01.02.08
Get ekki gert að því að roðna örlítið eins og kerling þegar ég heyri auglýsinguna um "ókeypis innsetningu" í útvarpinu. Og voðalega auglýsir S Helgason mikið þessa legsteinaútsölu sína. Er fólk eitthvað að skoða og kaupa svoleiðis fram í tímann?
---
Úrelding. Það er ekki nóg með að allir séu hættir að tala um að kolefnisjafna, enginn talar heldur um að heiðra sinn lingam eða yoni. Kannski kominn tími til að kolefnisheiðra á sér lingaminn?
---
Ein frétt er svona: Akureyringur hreppti fyrsta Lottó-vinninginn í fjórföldum potti um síðustu helgi, nærri tuttugu og tvær milljónir króna. Önnur er svona: Bjarni Ármannsson fékk 100 miljónir króna í starfslokasamning þegar hann hætti sem forstjóri Glitnis á síðasta ári. Arftaki hans, Lárus Welding, fékk 300 milljónir króna fyrir það eitt að ráða sig til bankans. Ergo: Gáfulegra er að fara í viðskiptafræði (eða hvar sem það er sem maður lærir að verða svona æðislegur) en að kaupa lottómiða eins og einhver vesalingur með hor. Það er nú bara pínöts.

31.01.08
(a la E.H.) Ég þoli ekki...

Snúningshurðina í Kringlunni og Smáralind. Líður alltaf eins og verið sé að moka mér inn sem lambi á leið til slátrunar (á altari Mammons, ef þú vilt).

Þoli ekki heldur sjálfvirkar hurðir sem opnast þegar maður kemur í geisla. Þetta er alltaf bilandi og ég hef marg oft verið klemmdur á milli. Ég er fullur tortryggni á svona hurðir.

Ég þoli ekki fólk sem segir "heyrðu" á undan öllu sem það segir. "Heyrðu, ég er nú bara hræddur um að ég hafi keyrt á köttinn þinn". Þoli samt síst að ég segi stundum "heyrðu" sjálfur á undan því sem ég segi, sérstaklega ef ég er eitthvað stressaður.

Þoli ekki íþróttafréttamenn með grátstafinn í kverkunum. Ég fylgist svo sem lítið sem ekkert með kappleikjaútsendingum en stundum rekst maður á svona. "Sjáiði þetta, sjáiði þetta...." væla þessir gaurar alveg að fara að grenja út af einhverju voða flottu sem einhver hálaunapungurinn var að gera við tuðruna.

Meira þoli ég ekki í bili.
---
Hvað er þessi Moddys alltaf að rífa kjaft? Bað hann einhver um það? Láttu okkur vera þarna Moodys bjáni. Það er og verður alltaf allt frábært á Íslandi. 
---

Hajime Chitose - Birthday
Prógressífu fífukollarnir í Mars Volta hafa tekið Ammæli Sykurmolanna. Útgáfan liggur hér frammi á Amazon. Furðulega líkt Björk þessi söngur, er þetta samplað eða eitthvað fiff? Aðrir hafa húrrað sér á Ammæli í gegnum tíðina, t.d. japanska söngkonan Hajime Chitose, sem þar að auki notast við klippingu Bjarkar á meðfylgjandi mynd. Veit ekkert um þessa stelpu en útgáfan er eitthvað leidbakk hippanýaldarsoftpopp og nokkuð spaugileg.

30.01.08
Horfði á Kompás um guðsmanninn Guðmund í Byrginu. Djöfull reyndi sá að ljúga sig í gegnum flækjuna og skemmtilegt var að láta rifja upp fyrir sér hvernig annálaðir bloggarar sleiktu þvæluna upp og skömmuðu Kompás fyrir ónærgætnina – ætlar enginn að hugsa um börnin? Iron master væri eflaust enn á fullu með Biblíuna í einni og klemmurnar í hinni ef Kompás hefði bara haldið kjafti "af því þetta er svo lítið land". Fátt nýtt kom fram í þessum upprifjunarþætti nema algjört áhugaleysi stjórnvalda á langt leiddum dópistum. Væri þetta gert við hjartaveikt fólk? spurði ein mamman. Þá spurði Lufsan: Væri þetta gert við fólk sem stingur sig sjálft ítrekað í hjartað? Þá sagði ég: Uss svona svona, dópistar eru sjúklingar. Aumingja fólkið ræður ekkert við sig. Innst inni var ég þó sammála Lufsunni enda ekkert uppfullur af samúð í garð fólks haldið róna og dópistaveiki, leiðinlegasta sjúkdómi í heimi. Ef ég væri í stjórnmálum hefði ég eflaust bara glaðst eins og aðrir yfir því að losna við þetta allt saman til hans Guðmundar í Byrginu, þess elskulega manns og strangtrúaða eldhuga.
---
Svo er bara að sjá hvað langt líður þar til Byrgið II opnar með hjálp Ríkisins, enda eiga "allir að fá annan séns" – a.m.k. á Íslandi.
---
Ég lýsi hér með yfir opinberum stuðningi við Barack Obama.
---
Óli Sindri hefur snúið aftur í mjög góðu formi ásamt bræðrum sínum á Maurildi. Gaman að sjá að Óli þarf enga Mengellu grímu lengur til að skrifa jafn eiturmergjaða pistla og Nýju fötin Kalífans.

29.01.08
Íslenski málefnaþæfingurinn lætur ekki að sér hæða. Einni viku eftir bíræfið valdarán er umræðan farin að snúast um það hvort Spaugstofan sé fyndin eða ekki. Þæfa þæfa þæf þæf.
---
Spáð er 17 stiga frosti á föstudaginn. Ég man ekki eftir öðru eins. Nú er gott að eiga norsk ullarnærföt. Já og Spock á laugardaginn. Ef við drepumst ekki úr kulda.

27.01.08

EP-platan AÐ GEFNU TILEFNI – 4 mótmælalög er nú fáanleg. Lögin má sækja frítt eða fá þau á CD-diski heim að dyrum. Nánari upplýsingar: AÐ GEFNU TILEFNI

26.01.08
Nú er ég kominn í hóp helstu kverúlanta landsins, manna eins og Gríms konungs Bolvíkinga og Björvins Vals sem átti ágæta lýsingu á GGVilla nýlega: "talandi hárkollustatíf". Ég er sem sé kominn á Eyjubloggið. Ég neita því ekki að ég fer oft á Eyjuna til að leita mér frétta og lesa blogg svo þetta er bara fínt. Vegsemdinni fylgir ný mynd eftir snillinginn Halldór Baldursson (Pétursson þessarar aldar). Einhver var að biðja um fyrir-eftir-myndir af mér vegna 30 kílóanna sem nú eru bráðnuð oní gólfið á World class og því kemur þetta hér:

---
Heyrði ég rétt? Eru Björk, Sjón, Árni Matt og Kjartan í Sigur Rós í nefnd "Kraums", sem eru 50 millur frá Ólafi í Samskipum sem honum langar svona sjúklega að styrkja einhvern gegt töff tónlistarmann með? Hvar sækir maður um? Mér hefur alltaf þótt þessi Ólafur ógeðslega töff náungi. Hann sýndi guðdómlega frábæran smekk þegar hann fékk Elton í ammælið og er gegt næs þegar hann flýgur á þyrlunni yfir kotbóndann nágranna sinn á Snæfellsnesi. Ég hef verið að vinna að sólóplötunni Vettlingur á gaddavír, ljóð Gyrðis í nýju ljósi, og veitti ekkert af svona 5 millum til að hafa tíma í þetta. Hvassegiði? Ereddekki díll?
---
Einnig í vinnslu er EP platan AÐ GEFNU TILEFNI - 4 mótmælalög. Ætti að koma "út" um helgina.

25.01.08
Látíð alla helgina á Sirkus. Það er ekkert skrítið að fólki sé heitt í hamsi enda á að rífa Sirkus og Hljómalindarhúsið og öll helstu krúttathvörf miðbæjarins. Koma með steindauð ilmvatnsgallerí í staðinn. Giggið hefst kl. 17 í dag og á morgun en kl. 19 á sunnudag. Stendur yfir til miðnættis. Frítt inn. Allir í heimi spila. Líka ég meira að segja. Ég veit samt ekki hvenær. Hef samið sérstakt baráttuprógramm í tilefni að funheitum ólgutímum.
---
Mér sýnist aðallega blóðlaust fólk með uppþornuð kynfæri kalla lætin í Ráðhúsinu "skrílslæti". Þó það nú væri að það gengi eitthvað á þegar svona rugl er borið á borð fyrir mann. Körlunum í spinning gat þó ekki verið meira sama og töluðu um fótbolta eins og alla aðra daga. Ég held að þó kjarnorkusveppur birtist yfir Keili myndu þeir samt halda áfram að tala um hvernig Liverpool og Arsenal gekk í gær.

24.01.08
Það eru stórtíðindi daglega. Stjórnmálamenn sitja á svikráðum. Um það hef ég tjáð mig í Bakþanka-greininni Handrukkarar lýðræðisins. Ég er reiður, enda er öll þjóðin reið (nema glerhörðustu sjallar og aðdáendur Ólafs Eff, allir þrír). Meira að segja íhaldsmanneskjan hún Lufsan mín segist frekar myndi kjósa Dag en GGVilla. Svakalega er sá gaur orðinn þreyttur með sitt tuð um mistökin og 16 ár í bransanum, eða hvað það er. Ekki eru minni tíðindi að Satan sjálfur hefur pakkað saman og yfirgefið bygginguna. Lúxor hópurinn er allur. Já og Björn Ingi er hættur líka. Hvað næst eiginlega? Það hryktir í stoðum skynseminnar!

23.01.08
Sko Dag! Dag sem borgarstjóra aftur í síðasta lagi 2010, ekki spurning. Hann kemur út er þessu rugli öllu sem algjör vinner.

22.01.08
Hvað nú? Lokar Kolaportið? Verður aftur farið að tala um að hugsa "út fyrir rammann" í leikskólamálum. Hér er undirskriftalisti hinna óánægðu. 

21.01.08
Andskotans djöfulsins kjaftæði er þetta. Er ekki bara hægt að efna til nýrra kosninga? Þarf ekki að taka fram fyrir hendurnar á þessum framapoturum?

19.01.08
Ég sé oft ofsjónir á forsíðum blaðanna þegar ég fer svefndrukkinn og stíreygður að sækja þau. Um 30 þúsund eru ekki með heimilistæki, sagði Fbl t.d. í morgun og ég sá fyrir mér að heilu þorpin á hálendinu hefðu uppgötvast þar sem fólk væri í Gísla á Uppsölum fílingi. En nei nei, þá var bara verið að tala um heimilislækni.
---
Bobby Fischer er allur. Skákeinvígið man ég nánast eingöngu út frá myndum Halldórs Péturssonar og áhuga pabba míns á því. Þetta var stórkostlegur stórviðburður á þeim tíma, þegar fásinnið var jafnvel meira hér. Pabbi fór á einn leikinn og fylgdist grannt með keppninni. Við héldum auðvitað með Spasskí enda Fischer bæði klikk og Kani. Ég var mikill aðdáandi Halldórs Pé og alltaf að stæla myndirnar. Eitthvað þvældist þetta samt fyrir kennurunum sem kölluðu mig "Litli Sigmund". Halldór, ekki Sigmund, apakettir! Síðar fannst mér davíðslega sætt þegar hann dreif íðí að gera karlgarminn íslenskann og einu sinni sá ég Bobby og japönsku kerlinguna að væflast á umferðareyju í miðbænum. Skák gerir fólk geðveikt. Ég er ömurlega lélegur í skák og hef engan áhuga á að verða betri. Mér er eiginlega illa við skák eftir að ég fór á eitthvað skákmót í gagnfræðaskóla og skíttapaði fyrir öllum. Fokk skák!
---

Sonic Chicken 4 - Do it alright
Sonic Chicken 4 er hressandi gamlaskólarokkband frá Perpignan í Frans. Fyrsta fullvaxna platan er komin út hjá In the Red í USA og er svona líka væld. Platan er gefin út á skemmtilegan máta, á vinýl en með fylgir cd ef fólk vill koma þessu í tölvuna sína. Sniðugt. CDið er náttúrlega dautt og LP vonandi að koma sterkt inn aftur!

16.01.08
Góða fólkið sem má ekkert illt sjá, þ.á.m. svívirðilega árásir á múslíma sem Jótlandsosturinn ældi yfir heiminn um árið, fer mikinn í kommentakerfi Egils Helgasonar. Skemmtilegasta kommentið er auðvitað þessi mynd hér:

Þetta er auðvitað miklu fyndnara skrípó en þetta Sigmundslega danska stöff, sem Osturinn var samt auðvitað í öllum rétti að birta um árið. Hvað með það þótt öfgatrúað lið móðgist yfir slöppu gríni? Það má og á að gera grín að öllu, sérstaklega ímynduðum ofurverum. Heilagar beljur eru til að sparka í. Og svo nenni ég ekki að ræða þetta frekar.
---
Ég segi það sem almenningur í landinu að það eru embættisfærslur Árna Mathiesen sem hafa veikt tiltrú mína á dómstólum, ekki nöldrið í Pétri Kr. Hafstein. Skandall! Út af með þetta lið! Það held ég nú að Ingibjörg og Össur myndu gjamma eins og froðufellandi smáhundar ef þau væru hinu megin borðsins. Djöfulsins prinsipplausa oní kjötkatlaslefandi skítapakk. Er mest töff að ganga í Framsóknarflokkinn núna? Nei þetta er allt sama hyskið. Það vita allir.
---
Og afhverju talar enginn við Þorstein Davíðsson? Hefur einhver heyrt hann tala? Kann hann að tala? Stóðu ekki öll spjót að Auðunni Georgssyni í svipuðu skandalmáli fyrir nokkru? Þurfti hann ekki að stama sig út í horn? Hvað segir Þorsteinn? Þorir enginn fjölmiðill að yrða á hann? Kemur þetta honum kannski ekkert við? Það eru varla einu sinni til ljósmyndir af honum. Og hvað segir Ragnheiður Clausen um þetta allt saman? (Öppdeit: Vísir hefur brugðist við og birt nærmynd af ÞD. Reyndar er ekkert talað við hann enda veitir hann víst ekki viðtöl. Hins vegar lætur R. Clausen ýmislegt fjúka. Skv. þessu flutti ÞD að heimann 36 ára sem er helvíti vel af sér vikið. Ég flutti af hóteli Mapa 23 ára og þótti það all seint á þeim tíma (1988). Svona breytast viðhorfin í þessu.)
---
Það er góðæri, Range Rover kaupandi sælutíð. Svo þegar liðið sem er með 130 á mánuði ætlar að biðja um 150 á mánuði er auðvitað allt á leið til helvítis og engin leið að breyta neinu. Alltaf sama sagan. Má ekki ógna stöðugleikanum. Hvaða stöðugleika? Að sumir séu alltaf með horin í nefinu á botninum sama hvað þeir púla mikið? Ég skil ekki afhverju Vilhjálmur Egilsson og þetta lið segir bara ekki það sem það meinar: Sumir eiga að vera ógeðslega ríkir en hinir ógeðslega blankir og fokkiði ykkur svo aumingjarnir ykkar. Lítið pönk í verkalýðshreyfingunni, helst pabbi Bjarkar sem er harður og þá aðallega í hlutverki reiða eineltispabbans í fjölmiðlum.

13.01.08
Það var ljómandi að komast áfram með Dr. Spock. Næsta þolraun er 2. feb á móti eintómum vinnerum. Ég þakka þeim sem hringdu!
---
Hlaupið hefur á snærið í gosdrykkju. Keypti tvær tylftir frá Bevmo.com af alls kyns stöffi og mun drekka þegar þyngdartap bíður upp á. Heiða fór til Berlínar og kom með 2 flöskur fyrir mig af lókal stöffi. Því miður ekki gott! Einhver maður kom færandi hendi frá Brasilíu með tvær dósir af vinsælasta gosinu þaðan. Þannig vildi hann þakka fyrir að hafa fengið að dánlóda Goð um árið. Þetta kallar maður servis! (sjá nánar á Gos).
---
Var á ættarmóti á Skógum. Gekk aðeins upp með Skógaá, svona 1/12 af leiðinni til Bása. Komst í fíling. Annars er maður eitthvað klessulegur og andlaus. Bara gaman að því... þaggi!
---
Ég bendi á Chocoreve. Hér eru heilu plöturnar til niðurhals. Áhugasvið deilanda er gamalt sixtíspönk og liggja hér hinar ýmsustu obskjúr safnplötur á glámbekk. Einnig fullt af frönsku sixtísdóti, þ.á.m. fullt af Gainsbourg. Gullnáma, myndi ég segja.

10.01.08
Ellý Ármanns klikkar ekki í plögginu og birtir nú sjónvarpsviðtal við Óttarr Proppé á heimasíðu sinni. Eins og komið hefur fram verður Hvar ertu nú? flutt á laugardaginn og ég treysti á að þú hringir eins og brjálæðingur og tryggir Spockinu sæti í 12 laga úrslitum. Annað væri hneyksli.
---
Tannlæknirinn juðaðist á kjaftinum á mér í morgun. Ég sat með kjaftinn í slipp og gat ekki stunið upp öðru en mmm, mmm. Samt malaði læknirinn allan tímann (klukkutíma) um allt milli himins og jarðar. Flengingar á börnum, blóðflokkamataræði og verðbréf í Oz, svo eitthvað sé nefnt. Mjög gott gigg.
---
Ég var dofinn fram undir hádegi og hefði getað étið á mér kinnina innan frá hefði ég viljað. Sem ég vildi náttúrlega ekki. Hvað væri það? Sjálfsát?
---
Síðasti Bakþanki er finnskt raunsæisþunglyndi. Þess má geta að þetta með fasteignaauglýsingarnar á Vanuatu er lýgi, en restin nokkur vegin sönn.

09.01.08
Fastagestur í spinning sagðist hafa farið í Grand spa en fallist allur ketill í eld þegar hann sá "gamla biskupinn" Hr. Sigurbjörn Einarsson á næsta bretti. Mér fannst þetta stórfrétt enda Sigurbjörn 96 ára. Því miður varð ekki úr því að þetta færi í Fréttablaðið því ég hringdi í biskupinn og hann sagist aldrei hafa komið í líkamsræktarstöð. Hló bara að þessari fyrru. Ég var nokkuð fúll yfir að skúbbið væri della því ég var búinn að sjá fyrir mér fyrirsögnina: Biskup á bretti. Ég var líka að spá í samsettri mynd af biskup með svitaband. Jafnvel kross í staðinn fyrir pumuna.
---
Hef mætt aðeins í WC út á Seltjarnarnesi. Virðist vera ágætt en er dálítið fokhelt eins og er. Enginn vatnsbrunnur, engin svitahandklæði, engin vigt í búningsherberginu. Laugar er enn langbest.
---
Hér er góð grein í Guardian fyrir blankt fólk sem vill tónlist engu að síður.

06.01.08
Uppáhaldsauglýsingin mín þessa dagana er fyrir Geymslur. Það er svo gott lag í henni (eftir Valgeir Guðjónsson). Taktu eftir því næst.
---
Þrautarganga mín í forvali Eurovision, aka Laugardagslögunum, hefur verið framlengd því Dr. Spock með Hvar ertu nú? keppir á móti Fabúlu og Hafdísi Huld næsta laugardag í sérstökum aukaþætti. Aðeins eitt af þessum þremur lögum fer áfram og bætist í haug laganna sem þá verða orðin 12. Það er því bráðnauðsynlegt að hringja og hringja, enda fátt meira upplagt en að eyða hundrað köllunum sínum í svona. (Hér má hlusta á snilldina og hér má sjá hana.) 
---
Ég eignaðist tvo fyrstu diskana af Fóstbræðrum. Á endanum mun ég að öllum líkindum eiga þá alla fimm. Það var þarfaþing að koma þessu út en betur hefði mátt standa að útgáfunni. Þetta lúkkar alveg eins og videóútgáfan, það er ekkert aukaefni og engin komment eða neitt. Best hefði auðvitað verið að bjóða upp á alla seríurnar fimm í vandaðri öskju. Enda skilst mér að ekki ríkji mikil ánægja með endurútgáfuna hjá Fóstbræðrunum sjálfum. En altso, skárra en ekkert.
---
Talandi um framtíðarkaup á dvd þá myndi ég segja að þessi 8-diska pakki með myndum Luis Bunuels komi fyrr eða síðar í hús. Um Bunuel er lítið rætt þessi dægrin og kannski finnst manni myndirnar hans algjört krapp ef maður sér þær núna. Ég man þó að mér fannst stöff eins og CET OBSCUR OBJET DU DESIRE, DISCREET CHARM OF THE BOURGEOISIE og PHANTOM OF LIBERTY gargandi snilld og bara bestu myndir í heimi. Mér fannst kaldhæðinn súrrealisminn hans Bunuels alltaf langbestur af þessu evrópska arthouse dóti, sem maður sá á ófáum kvikmyndahátíðum og víðar á 9. og jafnvel 10. áratugnum. Ég fílaði takmarkað þessa þýsku gaura alla, hvað þá hinn ofurþunglynda Tarkovsky, sem margir voru gapandi yfir slefbólgnir í kringum 1980. En Bunuel... Það var snilld, og nú er kominn tími á kombakk.
---
Og talandi á dót sem ég þarf að fá mér þá hef ég komist að því að mig langar að eignast Ford Mustang. Mér hefur alltaf þótt þetta æðislegir bílar og er ég þó ekki bílakarl, samanber það að ég lærði ekki á bíl fyrr en 38 ára (reyndar mikil mistök að hafa ekki lært fyrr). Ford Mustang eru glæsilegir bílar, táknmynd töffaramennskunnar (og gráa fiðringsins). Þeir halda eðalstílnum og nýjustu týpurnar eru síst minna glæsileikar en eldri bílar. Ég tek heilshugar undir þennan boðskap á heimasíðu Brimborgar: Komdu í Brimborg – skoðaðu Mustang, finndu Mustang, kauptu Mustang og þú ert miðpunktur alheimsins, öll kvöld, alla daga í mörg mörg mörg ár. Veldu Ford. Kynntu þér örugga þjónustu Brimborgar. Vertu í hópi þeirra bestu, í dag og um alla framtíð. Vertu á Mustang.
Einn daginn ek ég einum svona, kannski fæ ég hann í fimmtugsgjöf 2015. Og þá geng ég náttúrlega í Mustang klúbbinn (og verð "miðpunktur alheimsins"). Og hvað annað núna, en:

Serge Gainsbourg - Ford Mustang
---
Og hér er Geirfinns mál íslenska rokksins, hljómsveitin Vér eðlum oss (nema hún heiti eitthvað annað?) Maggi Strump er að verða gráhærður því hann veit ekki hvað þetta er eða hvaða menn eru þarna á ferð. Veit það einhver? Plís! Hér má hlusta á tónbrotið dularfulla.

05.01.08
Blóðugur maður ógnar fólki með hnífi. Britney fær ekki að sjá syni sína. Dabbi Grensás ræðst á enn einn fótboltamanninn. Hvað er þetta mað Dabba og fótboltamenn? Er hann anti-sportisti dauðans? Týndir unglingar. Sem sé ekkert nema fólk í rugli í fréttunum. 
---
Hápunktur gærdagsins var að hitta þá Hemma Gunn og Óttarr Proppé fyrir utan útvarpssvið 365. Ég var svei mér þá búinn að gleyma að Hemmi Gunn væri til. Það má helst ekki gerast aftur. Báðir voru dúndurhressir. Hemmi í rauðri peysu, Óttarr í glæsilegum veiðijakka. Umræðuefni okkar þriggja var svo leyndardómsfullt að ekki má segja frá því á svona opinberum stað.
---
Síðar talaði ég við tónlistarmanninn BMV sem er heimsfrægur í Grikklandi. Hann var einnig mjög leyndardómsfullur. 
---
Sé fólk að leita að funheitri músik mæli ég með samantekt Pitchfork á 100 bestu lögum 2007. Fullt af tóndæmum þar. Þá hefur hljómsveitin The Harvey girls búið til fínt 19 laga mix sem má nálgast hér. Erlendi annállinn minn sem var á Rás 2 er áhlustanlegur hér og íslenski annáll Ásgeirs Tómassonar er hér. Sjálfur undirbý ég nú útvarpsþáttaröð um snælduútgáfu á Íslandi. Ég er dálítið lost í sumu, enda verður þetta varla meira undergránd en þetta. Meðlimir eftirtalinna hljómsveita, eða þeir sem vita eitthvað um þessi bönd og snældur þeirra, mega endilega hafa samband við mig: 

Guði gleymdir
Tennurnar hans afa
Pétur (Hljómsveitin Pétur)
Glimmer
Mug

03.01.08
Árið! Hér er ég, dáldið þreyttur svona enda kominn í fúlltæmdjobb á Fbl. Það tekur smá tíma að komast í þann gír. Svo eru krakkarnir manns á þannig aldri að næturnar geta verið ófriðlegar. Ég keypti mér einmitt eyrnatappa áðan, níu pör. Og Íbúfen... Og svo er hrikalegt myrkur og slen eitthvað yfir öllu, en það lagast, já já, halelúja. Samt kannski ekki nema von að fyrsti Bakþanki ársins sé þunglyndur. Gefðu blóð! 
---
Starfsfólki 365 er boðið á Stórsveitar-sparigigg Bubba (2 miðar á mann) og skv þessu sendi Vodafone 500 miða ókeypis. Samt nenni ég nú ekki að sjá Bubba og Ragga Bjarna syngja My way og fleiri stuðlög. Ég er ekkert að dissa Bubba, ég hef ekkert nema ást til hans í hjarta mér, en ég nenni samt ekki á þetta dæmi. Ekki spenntur. Bjöggi, með sín 3 uppseldu jólagigg, hlýtur að glotta.
---
Morðingjarnir spila á Ellefunni annað kvöld með Slugs, nýju bandi sem meistari Sindri Eldon syngur í. Varla er lag þeirra "Motherfucker" byggt á eigin reynslu? Ný Morðingjaplata er væntanleg 20. febrúar. Þar flytja þeir lag eftir mig og félaga mína í pönkbandinu F/8 sem gerði allt vitlaust 1980-81 en gaf ekkert út. Lagið Bölvun fylgi þeim má fá hér, en útgáfa Morðingjanna, sem ég hef heyrt, er dúndurgóð.
---
Hefi stofnað nýtt menningarafurðahorn með einu viðbæti, bók um 2 ára dvöl í eyríkinu Kiribati. Hér er fáni Kiribatis fyrir áhugasama:

---
Og Skaupið já. Jú jú, alveg þokkalegt svo sem, en undir meðallagi. Ekkert fyndir þessir vafrandi útlendingar og Samúelsgrínið full teygt. Og Árni Johnsen enn einu sinni? Er það nú ekki frekar 2006ís eitthvað?

31.12.07

30.12.07
Flugeldatíð er stuðtíð. Ég var sérstaklega spenntur fyrir sprengjettum (eins og Db kallar þetta) þegar ég var aðeins yngri en er nú að reyna að troða áhuganum upp á soninn. Absúlútt á maður að versla við björgunarsveitirnar. Ekki koma einhverjir sveittir flugeldaheildsalar og sækja mann fótbrotinn á Fimmvörðuháls, er það? Hvaða skítapakk fer annars í samkeppni við skátana og sveitirnar? Í minningunni var til öðruvísi dót í gamla daga. Til dæmis hálfgerðir eldormar sem skriðu út úr kassa. Mann rámar í það. Þarna litlu kínversku raketturnar og ýlurnar hafa verið til í áratugi. Gaman að sjá að þetta lítur alltaf eins út. Það er ömurleg spá svo ég keypti bara einn Tralla og eitthvað smádrasl.
---

GLH - Gamlárskvöld, flugeldarnir, gamlárskvöld: Ein af tíu últra lágtækni sólóspólum mínum (gefnum út í einu eintaki af hinum ýmsu útgáfufyrirtækjum) frá fyrri hluta 9. áratugarins heitir Gamlárskvöld, flugeldarnir, gamlárskvöld og þetta er titillagið, eða verkið öllu heldur, margkafla sándeffektað stórvirki. Ég hafði hvorki heyrt Smile með Beach Boys né Who´s next með The Who þegar þetta var tekið upp, en auðvitað helstu lófí verk The Swell maps. Á þessum spólum notaði ég listamannsnafnið GLH. Það er Örn Yngvar sem leikur á munnhörpu og raddar. GLHELDAR gaf út 1983. Verkið er óður til flugeldanna og þeirrar barnslegu gleði sem þeir veita.
---

Dóttir ársins: Elísabet Lára kom sterk inn 30.05.
Ganga ársins: Fimmvörðuháls með Kattahryggjunum.
Ferðamannagöngutúr ársins: Rokktúrinn með Rockjunket í New York.
Heimsborg ársins: New York.
Mannvirki ársins: Heimili Hrafns Gunnlaugssonar.
Sundlaug ársins: Seltjarneslaug (rennibrautin).
Sturta ársins: Í World Class, Laugum.
Vonbrigði ársins: Ómar komst ekki á þing.
Sumar ársins: Sumarið í sumar – unaðslegt var að geta synt í sjónum á einkaströndinni:

Fár ársins: Megasarfárið (2 góðar plötur og meistarinn á Cherrios pakka!).
Poppstefna ársins: Grínbönd utan af landi.
Leiðinlegasta popptrend ársins: Að fá Gospelkórinn.
List ársins: Risessan.
Menningarslys ársins: Safnarabúðin lokar.
Afstýrt menningarslys ársins: Kolaportið (??!).
Aldarafmæli ársins: Hergé.
Hálfrar aldar afmæli ársins: Sid Vicious.
Tónleikar ársins: Stranglers, Laibach, Air, Of Montreal (man ekki meira).
Bíómyndin sem ekki varð ársins: Fyrsta íslenska klámmyndin frá klam.is.
Leiksýning ársins: Abbababb!
Bók ársins: Abbababb!
Plata ársins: Abbababb!
Verðlaun ársins: Gríman fyrir Abbababb!
Neytendaframtak ársins: Okursíðan (koma svo, halda vöku sinni...).
Niðurlæging ársins: Ítrekað tap fyrir verri lögum í Eurovision. Ekki er þó öll von úti enn og Hvar ertu nú gæti komist í wildcardþáttinn. 
Ávöxtur ársins: Avókadó. Eftir að ég sá Álfrúnu Örnólfsdóttur skera avókadó oná hrökkbrauð hef ég skorið ófáa avókadó oná hrökkbrauð sjálfur.
Mjólkurvara ársins: Lífrænt ræktað kókos-jógúrt frá Bíóbú er mjólkurvörusnilld ársins. Gríðarlega vel heppnað jógúrt. Það eru fleiri en ég sem finnst þetta því jógúrtin var ófáanleg í 2 vikur í byrjun desember.
Kjöt ársins: Húskarlahangikjöt til að hengja upp í eldhúsinu.
Bíómynd ársins: Þýska dramað Líf annarra. Ekkert toppar þá snilld.
Leynimanneskja ársins: Mengella.
Helstu hitamál ársins: Beygðir karlar úr sadískum uppeldisheimilum beyja af í sjónvarpi, Sadó/masó hvítt hyski úr Byrginu með gott grín, hundkvikindi kertafleytingar og upprisa (og ha ha, voða gaman), klámráðstefnufarsi, millar millifæra og/eða fara á hausinn, Rei, friðarsúla, einkaþotur, eignasöfn, yfirtaka, dauði Framsóknarflokksins, rassgat.
Ár ársins: 2008 – verður jafnvel enn betra en 2007!

29.12.07
Eins og ég lofaði er komið að kveðjustund. Síðasti Topp Fimm í heimi kemur hér. Ég nenni hreinlega ekki að halda þessu fyrirkomulagi áfram, það er alltof knýjandi að þurfa að vera ferskur á laugardags eða sunnudagsmorgni með fimm hressandi lög. Hér á síðunni verður því í staðinn blandað inn brakandi ferskum tóndæmum á mp3 þegar ég nenni og sé tilefni til. Maður er að fara að vinna fúlltæm á Fréttablaðinu (þar til annað kemur í ljós) og ég nenni ekki að standa í þessari sjálfsskipaðri toppfimmkvöð. En nóg af afsökunum, hér kemur einn ilvolgur í morgunsárið:

TZMP - Santabot is coming tonight: TZMP eða The Zuckakis Mondeyano Project er ævaforn og viðloðandi alíslenskur dúett. Tékkið á mæspeisinu til að vita meira. Hér er gullfallegt jólalag sem kom í pósti.

Pnau - Come together: Ástralskur dansidansidúett sem var að gefa út plötu #3 (PNAU), fullri af svona gæða tónlist sem sver sig í dansidansiættir. Elton John ku vera aðdáandi og sækir það nú fast að afla bandinu samnings í Bretlandi. En ekki láta þá vitneskju á þig fá. 

M.I.A. - Paper planes: MÍAN og platan KALA kikkaði seint inn hjá mér og þá helst vegna þessa alfrábæra lags. Restin af plötunni er því miður ekki svona poppuð, en mjög svo góðmelt engu að síður.

Len - Man of the year: Ég var sérlega hrifinn af semí-smellinum Steal my sunshine með þessu kanadíska bandi frá 1998, svo hrifinn að ég fékk mér samhliða plötuna You Can't Stop the Bum Rush. Þar er lítið af fullu viti nema þetta lag sem mér finnst dúndur hressandi. Len eru víst ennþá í fullu fjöri og spurning hvort maður leggi sig eftir öðrum plötum með þeim. Steal my sunshine var náttúrlega svo mikil snilld (og samplið frá ekki síðra lagi, More more more með Andreu True Connection) að það er aldrei að vita nema þau hafi dottið niður á aðra eins snilld sem nú liggur meðvitundarlaus hjá smellaveggnum.

Þrjú á Palli og Sólskinskórinn - Sól sól skín á mig: Og í tilefni af upprisu sólarinnar, eitt gamalt og gott til að minna okkur á sumarið og hið eilífa stuð (ferðabæklingur Útiveru er kominn í hús, nú bíður maður eftir bæklingi FI). Þetta lagast... Hér má sjá Hönnu Valdísi hressa í fremstu röð en lagið var fljótlega sungið svona eftir því sem vinsældir Hönnu jukust:

Sól sól skín á mig
Hanna Valdís rekur við
lyktin er alveg að drepa mig
Sól sól skín á mig
---
Ég sendi innlegg í grínfréttakeppni Bagglendinga en fékk ekki náð fyrir augum dómara. Ég uppsker aldrei neitt í svona keppnum. Mér finnst þetta samt mjög fyndin frétt þótt hún sé tekin orðrétt upp úr Mogganum:

Biskup fær rússneskan biskupsstaf að gjöf
Timur Zolotutskyi, prestur rússnesku rétttrúnaðarkirkjunnar á Íslandi, færði Karli Sigurbjörnssyni, biskup Íslands, að gjöf biskupsstaf við sameiginlega helgistund í Dómkirkjunni í gær. 

Ef maður lifir í þeirri sjálfsblekkingu að maður sé fulltrúi Guðs á jörðinni þá má maður ganga um í svona gullskykkju og þiggja staf frá öðrum álíka klikkuðum í ekki jafn sniðugri múnderingu. Sjáiði kallana! Sprenghlægilegt! En uss, aðgát skal höfð í nærveru ruglaðrar sálar og biskupinn verður alltaf svo fúll og vígreifur þegar verið er að rugla í honum svo við skulum bara ekkert vera að því. Áfram Guð! 

28.12.07
Ég er vitanlega búinn að liggja í áti og veislum, drengurinn búinn að fá hauga af dóti, stúlkan fullt af fötum og dóti en við hjónin fengum minna. Þó ýmislegt smálegt, rjómasprautu, bókahaldara, eðalkaffi og bolla. Ég fékk ÞÞ í Fátæktarlandi en þori varla að lesa hana því ég las ömurlegan dóm hjá þessum (aðrir hafa þó verið hrifnari, t.d. þessi og Grímur Atlason) Maður þarf auðvitað að taka sjálfsstæða ákvörðun en líklega væri gáfulegast að lesa bara eitthvað af bókunum hans ÞÞ aftur. Það er samt of seint, búinn að rífa plastið af. 
---
Ég heyrði tónleikaupptöku áðan á Rás 2 með Silvíu Nótt frá því í febrúar. Þá rifjaðist upp fyrir mér að SN gerði 30 milljón kr. samning við Jakob Magnússon (versti díll ársins?) og gaf út plötu sem hvarf svo algjörlega að hún ekki einu sinni í Plötutíðindum 2007. Horfnast plata ársins? Svona er þetta bara. Fá fyrirbæri hafa farið jafn mikið öfgana á milli í vinsældum og fyrirbærið SN. Hvað gerir Ágústa Eva nú? Varla nennir hún endalaust að hjakka í þessu fyrir örfáa sænska homma eða hvað þetta var.
---
Í gær fór ég og lét taka mig upp sem álitsgjafa í áramótaþátt Egils Helgasonar. Best, verst og eitthvað. Það var ótrúlegt persónugallerí í sminkinu. Ég og Andri Freyr, Sóley Tómasdóttir (sem var hin alúðlegasta og ég styð þær Femínstakonur í öllu sem þær gera (þetta segi ég auðvitað bara svo aðgerðahópur femínista komi ekki heim til mín í skjóli nætur og geldi mig (þetta segi ég eingöngu svo frelsisherjir rúnkista (aka Ómar Valdimarsson og félagar) haldi ekki að ég sé kerling))) og Björgúlfur Thor, ríkasti Íslendingur í heimi. Hann var reyndar ekki álitsgjafi hjá EH heldur í Kastljósinu í gær. Maður fann hvernig allir spenntust upp þegar hann gekk inn í herbergið. Djísús kræst, hér er maður sem græðir örugglega jafn mikið bara núna á meðan hann lætur sminka sig og ég er með í árslaun, hugsuðu allir. Á leiðinni út bankaði Bjöggi (eins og ég kýs að kalla hann) létt á öxlina á mér og sagði eitthvað sem ég heyrði ekki hvað var. Ég sagði "Já blessaður" á móti eins og eitthvað fífl. Þegar hann var farinn spurði ég Andra Frey, sem sagði mér að Bjöggi hefði sagt "Árið". Andri var drullufúll að ríki gaurinn hefði ekkert yrt á sig. Djöfuls, nú heldur Bjöggi að ég sé þroskaheftur, eða svona ótrúlega hrokafullur, fyrir að segja Já blessaður þegar hann sagði Árið, hugsaði ég. Mér datt í hug að hlaupa á eftir honum út á götu til að leiðrétta þennan misskilning en gerði ekki því þá hefði hann náttúrlega verið alveg viss um að ég væri fáviti.
---
Úr þessum massífa félagsskap lá leiðin í ekki verri félagsskap, að hitta þá Sigurjón Kjartansson og Mikael Torfason og taka við þá viðtal sem birtist á morgun í Fbl. Sigurjón er maðurinn á bakvið Pressu, 6-þátta seríu á Stöð 2, sem hefst á sunnudagskvöld. Mikael (sem ritstjóri DV) er svo fyrirmyndin að Nökkva, sem er ritstjóri Póstsins, blaðsins sem er sögusvið Pressu. Mér fannst upplagt að leiða þá saman og viðtalið verður fínt. Maður fylgist svo spenntur með Pressu.

24.12.07

Kæru vinir, til sjávar og sveita, fjalla og geita, 
sendi mínar hugheilustu hátíðarkveðjur
GLEÐILEG JÓL!

23.12.07
Ég las í Fbl að 3ju jólin í röð væri búið að segja Andra Frey upp í útvarpinu og að á leiðinni væri að leggja niður Rvk FM. Það stoppar þó ekki Stjána Stuð sem verður í stuði í allan dag á FM101.5 og fær m.a. mig og Heiðu í viðtal kl. 15:10. Pró maður, hann Stjáni.
---
Sá tvær ömurlegar myndir í gær. Fyrst dottaði ég yfir Alvin & The Chipmunks þar til Dagbjartur heimtaði að bíóið yrði yfirgefið (fljótlega eftir að nammið kláraðist). Sannarlega ömurleg mynd. Um kvöldið leigði ég The Bourne Ultimatum sem fjallar um Matt Damon að flýja undan einhverju liði á meðan annað lið fylgist með af sjónvarpsskjám. Sannarlega glatað drasl sem enginn ætti að þurfa að horfa á.
---
Hér er búið að kaupa allt inn og allt bara reddí fyrir jólastuð. Ég ætti samt kannski að taka til í herberginu mínu.

22.12.07
Gott er að þiggja. Enn betra að gefa. Best því líklega að gefa sjálfum sér eitthvað. Ég gaf mér því nýjustu bók Hugleiks, Kaupið okkur. Hún er fín, en samt finnst manni að honum sé eitthvað farið að leiðast þetta form. Sumt er dáldið þvingað, sumt bara ógeðslegt (og ekki fyndið – nema ég sé orðinn svona mikil tepra?) og einn djókur stolinn úr Little Britain. Aldrei hefur Hglkr stolið áður svo vitað sé. Bókin er samt þykkari en vanalega (sýnist mér) og feykinóg í henni til að réttlæti að hún sé til á hverju menningarheimili (eins og mínu). Þrjár stjörnur! Hér eru tveir góðir: 

---
Keypti líka tvíreykt hangikjötslæri, svokallað Húskarlakjöt, og gaf mér og mínum. Mér hefur langað að fá mér svona síðan kallinn í Jólagarðinum á Akureyri skar bita fyrir mig af sínu læri haustið 2006. Maður étur þetta bara beint af lærinu og allir í fjölskyldunni eru sólgnir í þetta. Svona læri er síður en svo ókeypis og slagar upp í Kobe (sérstaklega þegar tekið er inn í myndina að slatti af þessu er bein, fita og tægjur). Keypti lítið læri á 4500 kall (kílóið á 3000) í Fjarðarkaupum, en þangað förum við árlega til að gera jólainnkaupin. Kerran kostaði 25.000, ég var búin að búa mig andlega undir 30.000 kall. Það eina sem skilur mig frá röðinni í Mæðrastyrksnefnd er vísakortið mitt. Nú hangir lærið upp á vegg inn í eldhúsi blóðrautt með tægjum og fitukleprum. Dáldill svona fjöldamorðingjafílíngur að hafa svona inni hjá sér. Ilminn leggur um allt hús. Ah, jólalykt...
---
Ég er yfirleitt lítið spenntur fyrir gismóum og drasli, er t.d. alveg laus við áhuga á að fá mér gps þótt ég sé eitthvað á fjöllum og svona (og framan á nýjasta Útiveru, sem er meðal hápunkta ársins!). Í gær í samkvæmi handlék ég þó græjuna Iphone og var klossbit yfir frábærleika tækisins. Allir aðrir símar eru jafn úreltir og 2ja kílóa farsíminn sem Ómar Ragnarsson átti við hliðina á þessari græju. Skjárinn á þessu er algjört tækniundur og með puttunum stækkar maður og minnkar myndir og netsíður og ég veit ekki hvað. Mér fannst framtíðin komin með þetta í höndunum. Ég kaupi mér ekki annan farsíma fyrr en ég hef efni og möguleika á að kaupa svona. Þetta var krakkað eintak, kostaði 25kall í USA. Ég veit ekki hvenær þetta kemur á Evrópumarkað en Apple-umboðið verður varla með þetta undir 100kalli ef maður þekkir þá rétt. Prúv mí rong.
---
Stafrænn Hákon hefur í samvinnu við Unstatuesque sett tvö gullfalleg jólalög á netið. Farið í enn meiri jólafíling og niðurhlaðið hér. Við Heiða erum annars að spá í að gera saman jólaplötu fyrir jólin 2008. Þessari hugmynd laust niður þegar við vorum að fara að plöggspila Abbababbbókina í Kringlunni og vorum að væflast á yfirfullu bílaplaninu. Ég er m.a.s. kominn með nafnið á plötuna, Eitthvað fallegt. Þú last það fyrst hér.
---
Samantekt Fbl á plötum ársins kemst að sömu niðurstöðu og þessi síða. Mugison og Arcade Fire þykja líka best þar.

21.12.07
Tímabært þykir mér nú að birta persónulegar niðurstöður yfir bestu plötur ársins:

Íslenskar plötur ársins
1 Sprengjuhöllin – Tímarnir okkar
2 Megas – Frágangur / Hold er mold
3 Hellvar – Bat out of hellvar
4 Seabear – The ghost that carried us away
5 Hjaltalín – Sleepdrunk seasons
6 Jakóbínarína - The first crusade
7 Skátar – Ghost of the bollocks to come
8 Ólöf Arnalds – Við og við
9 Bloodgroup – Sticky situation
10 Eliza – Empire fall

Útlenskar plötur ársins
1 Of Montreal – Hissing Fauna, are you the destroyer? 
2 Caribou – Andorra
3 Digitalism – Idealism
4 Akron-Family – Love is simple
5 Battles – Mirrored
6 LCD Soundsystem – Sound of silver
7 Goose  – Bring it on
8 Arcade Fire – Neon bible
9 Midnight Juggernauts – Into the galaxy
10 M.I.A. - Kala

Hér má svo kjósa plötur og myndir ársins hjá 24st.
---
Kok er gott nafn á bílaleigu. Ég sá það á bíl í dag. KOK. Magnað. Úfur væri líklega gott nafn á hraðhreinsun. Kriki gott nafn á skóvinnustofu.
---
Í grein um klám fyrir blinda gleymdist að hafa með línk á herlegheitin. Þetta mun vera það sem verið var að tala um.

19.12.07

Jólamix Dr.Gunna

Innihaldslýsing:
1. El Vez - Feliz navidad 
Byrjun með blasti. El Vez, hinn mexíkóski, blandar saman Ég fæ jólagjöf og Public Image Ltd. Hverjum hefur dottið það í hug? Þetta er hress gaur sem hékk svolítið með Sykurmolunum í gamla daga. 

2. The Go-Bang's - Rock n roll santa claus
The Go-Bang's var japanskt kvennatríó sem spilaði poppað tyggjórokk með örlitlu pönkbragði. Þær nutu vinsælda í kringum 1990 og einhverra hluta vegna á ég allar plöturnar með þeim. Hér er hressandi jólalag frá þessu frábæra, en algjörlega óþekkta, bandi.

3. Hybrid Kids - Deck the halls
Hybrid Kids var leyninafn fyrir Morgan Fisher. Hann er líklega þekktastur fyrir að hafa verið hljómborðsleikarinn í Mott the Hopple. Í kringum 1980 var hann að taka allskonar lög og gera svona sniðugar ábreiður af þeim. Hann gerði m.a. plötuna Claws sem eru bara jólalög. Hún er alveg ljómandi fín.

4. The Frogs - Here comes Santa's pussy 
Þegar sungið er um pussuna á Jóla hringja allar viðvörunarbjöllur í Jólaþorpinu. The Frogs er fyndið, dónalegt og eldgamalt amerískt band sem ég sá einu sinni á CBGB's. Ég man að einn var með vængi á bakinu og þetta var flippað og skemmtilegt.

5. Big Star - Jesus Christ
Alex Chilton og félagar voru hljómsveitin Big Star, band sem gerði tvær magnaðar plötur sem allir verða að heyra (#1 Record 1972 og Radio City 1974). Þetta lag er af þriðju plötunni, Third/Sister Lovers, sem kom 1978. Lagið er um gaurinn sem allur gauragangurinn er víst tileinkaður. 

6. Alli Rúts - Grýlupopp
Alli Rúts var bílasali sem tróð upp með skemmtiatriði í kringum 1970. Hann gerði 4-laga barna- og jólaplötu 1972 og af henni kemur þessi sungna-útgáfa af laginu sem margir þekkja, Popcorn. Umslag þessarar plötu er einstaklega vel heppnað (og notað hér að ofan aðeins breytt).

7. Bit shifter - Let it snow
Á netsíðunni http://8bitpeoples.com/koma saman listamenn sem gera tónlist á fornar tölvur. Þetta er fyndið og skemmtilegt og öll tónlistin býðst ókeypis í niðurhali. Þetta lag með Bit shifter (Bandaríkjamaðurinn Joshua Davis) er tekið af átta laga jólaplötunni The 8bits of christmas.

8. The Three Wise Men - Thanks for christmas 
Hljómsveitin XTC frá Swindon, Englandi, hefur lengi verið í miklu uppáhaldi hjá mér. Þeir hafa stundum gert músik undir ýmsum dulnefnum og gerðu þetta jólalag og annað til á smáskífu undir nafninu The Three Wise Men árið 1983. Ágætis jólalag hjá strákunum.

9. The Fall - (We wish you) A protein christ 
Líklega er fátt ójólalegra en amfetamínbryðjandi skáldjöfurinn Mark E Smith og taumlaus og endalaus snilldar ferill hans. Hann gerði nú samt 4-laga jólaplötu árið 2003. Af henni heyrum við titillagið. Hin lögin eru jafnvel enn ójólalegri en þetta.

10. Paska - Merry christmas
Paska er finnskur sköllóttur pönkari sem hefur öskrað inn á þónokkuð margar plötur. Ég hitti hann einu sinni þegar hann var með pönk-karókí í Turku. Einu sinni öskraði hann inn á símsvarann minn en því miður er sú spóla týnd. Paska endar við mixteipið í sönnum jólaanda. Gleðileg jól! 

(áður birt í Mónitor)

18.12.07

Two Little Dogs kynna með stolti fyrstu jólatónleika sína sem fara fram á Organ þann 20. desember kl 22.00 stundvíslega. Þar kemur fram tónlistarmaðurinn Tim Ten Yen frá Lundúnum.
Tim Ten Yen er nýstirni á hraðri uppleið í breska tónlistaheiminum. Þessi ungi og snyrtilegi maður hefur hlotið einróma lof gagnrýnenda þar í landi fyrir einstaka hæfileika til að búa til grípandi popplög. Tim kemur fram á tónleiknum vopnaður einungis hljómborði og reykvél og leikur af þvílíkri einlægni að unun er að horfa á og hann hrífur áhorfendur með sér inn í töfraheim þar sem gleðin ræður ríkjum. Fyrir utan hljómborðið og reykvélina þá fylgir honum hvert fótmál "Kaldrifjaði kötturinn" (The Sinister Cat) sem er einskonar tuskubrúða sem slær taktinn með skottinu. Ýmsilegt bendir til þess að það sé í raun kötturinn sem er við stjórn og Tim sé bara hjálparkokkur hans. 

Og af því að jólin nálgast nú óðfluga þá verður "eggnog" í boði handa þeim gestum sem mæta fyrstir á staðinn á meðan byrgðir endast, en ekki lengur en til 22.00. 

Hljómsveitirnar Hellvar og Sexy Jazz hita upp, en sú síðarnefnda samanstendur m.a. af meðlimum Bertel! og Sometime.

Aðgangseyrir barasta 1000 kall. 

MP3 hljóðdæmi:
The Bear and The Fox + Move with the Wildpalms + When the song applies to you

og Myndband.

17.12.07
Bensínstöðin sem Raggi Bjarna auglýsir fyrir er nú með slagorðið "Við höldum með þér". Ég veit það ekki... minnir þetta ekki dálítið á Michael Jackson. Þegar hann var sýknaður lagði hann sig fram við að láta sjá sig með fullt af smábörnum, eins og Jesús eða eitthvað. "Við höldum með þér", einmitt...
---
Ég spilaði á jólaballi í gær. Lögin eru mörg mjög löng og mikið drón í gangi og svo er þetta fullt af föðurlandsást og (úr)kynjuðum staðalímyndun. Nú skal segja, nú skal segja, hvernig gamlar konur gera: Prjóna sokka, prjóna sokka -og svo snúa þær sér í hring... Það þarf vitanlega að taka þessa texta til gagngerar endurskoðunar, a.m.k. áður en Femínistafélagið heldur jólaball.
---
Sá þátt um strákaelskandann Michael Jackson á Stöð 2 í gær. Nokkuð athyglisvert, en full mikil sensasjón kannski. Forboðnar "ástir", auðævi og sturlun. Maður sat nokkuð límdur.
---
Halldór --> Hannes --> Óttar --> Brissó. Nú er spurning hver tekur við flippkyndlinum og skrifar ævisögu Brissó M. Johannsson. Helst einhver sem heitir þremur nöfnum takk.

16.12.07
Hér kemur næst síðasti Topp 5imm í heimi, hugsanlega, því ég held ég nenni ekki að halda þessu úti á nýja árinu. Mp3blogga þá bara í staðinn þegar andinn blæs mér svo í brjóst, það er einum of mikil kvöð að vera með fimm fasta á viku. Maður er mismikið að heyra áhugaverða tónlist eftir vikum. Oft ekkert að spá í þetta. En hér er sem sé enn einn Tomm Fipp:

Hjaltalín - The boy next door: Sleepdrunk seasons er ein af betri plötum ársins, ég er amk alveg að fíla þetta. Keypti hana á dánlódi frá Grapewire, sem er tvímælalaust framtíð plötukaupa. Verðið dettur líka oní viðunandi (990 kall í staðin fyrir 1990 - hver þarf disk og umslag lengur? Ekki ég allavega). Þar með var það önnur platan sem ég kaupi í heild yfir netið, sú fyrsta var meistaraverkið Eniga Meniga sem jólasveinninn gaf Dagbjarti í morgun í brenndu formi. En Hjaltalín semsé, gott band og flott plata og hér er eitt af mörgum góðum lögum á henni. 

Mr. Silla & Mongoose - Wanna million: Af Foxbite, nútíma kassagítarblús með mikilli elektrósjálfsást. Mikið grútt og inn í sig. Ekkert sem þú ferð að syngja með í bráð, en svona slípast inn. Þarf þó að hlusta betur áður en ég er almennilega dómbær.

Polyphonic Size - Mother's little helper: Franska njúveifbossanóvakóverbandið Nouvelle Vague spilaði hér í fyrra. Ég nennti auðvitað ekki. Nú er komin út tvöföld safnplata á þeirra vegum sem safnar saman ævagömlum nýbylgjuböndum að spila kóverlög. Mestur fengur er í frönsku böndunum og belgísku. Þetta er t.d. band Belgans Roger-Marc Vande Voorde og vélmennaútgáfa af Stóns. Mig minnir að útgáfa Nylon á þessu lagi hafi einhvern tímann verið fyrirhuguð. Hvað varð eiginlega um það? Voðalega frægir menn áttu að taka upp og jalla jalla. Tja, það var náttúrlega ein af þessum fréttum um eitthvað sem á að gerast en gerist svo ekki. Ísland er svo lítið að allt kemst í blöðin, jafnvel það sem er á frumstigi, menn voru að röfla um á fylliríi í gærkvöldi eða jafnvel bara eitthvað sem einhver var að hugsa um í morgun. Til dæmis er frétt í Fbl í dag um að Cat Stevens ætli að setja upp söngleik í höllinni sem Helgi Björns rekur í Berlín...

Cat Stevens - Granny: ...Kannski verður aldrei af þessu, en hugmyndin er allavega góð. Kannski Paris Hilton mæti. Kötturinn er vitanlega eðalstöff. Fyrsta platan hans, Matthew & Son, frá 1967 er mögnuð poppsnilld og í engu lík því afslappa gærustöffi sem hann er þekktastur fyrir. Hann fékk nebblega berkla og lá í rúminu í ár eftir þessa og næstu plötu og spratt svo fram glænýr í gærunni. En allavega, megi söngleikurinn fara á svið, þá skreppur maður nú til Berlínar, það er ljóst. Og hér er lag af fyrstu plötunni, Cat leitar huggunar hjá ömmu sinni. 

Tralli - Gilsbakkaþula (Naumhyggjutechnomix): Þetta fékk ég í pósti. Teknójólalag með Tralla sem er til alls líklegur og heldur sig hér. Fullt af gæðaefni þarna. Svo hljóta að fara að detta inn fleiri jólalög hérna.
---
Nú skellur á með áramótauppgjörum. Hjá Frank er til dæmis eitt í gangi. Rocklist er svo ágætis uppspretta til að sjá uppgjör aftur í tímann og alls konar aðra lista að auki.
---
Gamla gufan, Rás 1, er stofnun. Hvílík snilld að hún skuli halda sér svona vel en samt þróast smávegis. Gamla góða Ísland er þarna í öllum sínum dýrðarljóma, fjöll og dalir, myrkur og birta. Mér er samt spurn: Eftir eina öld, ætli Gufan hljómi þá eins og FM hljómar í dag? Og ætli FM verði þá bara vanvitar að stynja og rymja allan daginn í bland við það nýjasta með æsandi þrívíddarklámvélmenninu uxnCC-7? 

14.12.07
Útgáfufyrirtækið Frostrós hefur gefið út nýjustu bók Gulla sendils (Gunnlaugur Ingi Ingimarsson f. 1965), Reykjavíkurbókin. Hún fæst hjá 12 tónum (900 kr). Gulli er afkastamikill rithöfundur og hefur gefið út eftirtaldar bækur:

Ævisaga
Dýrfirðingabókin
Ísafjarðarbókin
Gulli segir frá
Frásagnir
Fyrirtækjabókin
Reykjavíkurbókin

Að auki hefur tímaritið Gunnlaugstíðindi komið út árlega síðastliðin ár. Hér er sýnishorn úr nýju bókinni:

13.12.07
Hinn mikilsvirti meistari Atli Heimir Sveinsson skrifaði dóm um Rolling Stones plötu 1997. Margir urðu fúlir fyrir hönd Rolling Stones og voru skrifuð nokkur eitruð lesendabréf. Mér fannst þetta þó nokkuð sniðugt og vildi sjá meira í þessum stíl. Stakk upp á við Moggann að þeir ættu að senda Bjarna móhikana heitinn á Sinfóníutónleika og láta hann svo skrifa dóm. Þannig yrði jafnræðis gætt og svona. Ég held að það væri skemmtilegra og jafnvel gáfulegra að "eitthvað lið út í bæ" væri fengið til að dæma plötur. Það yrði bara happa og glappa. Hjörtur Magni fengi Sesar A og Vigdís Grímsdóttir Gumma Jóns. Niðurstaðan yrði varla vitlausari en sú sem fæst út úr færibandagagnrýninni þar sem gaggarar fá hauga af músik til að gramsa í í bullandi tímastressi og yfirvofandi deddlæni. En allavega: Hér er dómur Atla Heimis í öllu sínu veldi:

Sjarminn horfinn

ATLI Heimir Sveinsson tónskáld fjallar um "Bridges to Babylon" með Rolling Stones sem kemur út í dag.

"HAPPY new ears," sagði John Cage. Ég hlustaði á nýja Rolling Stones-diskinn. Ekki er mögulegt að nota hugtök fagurtónlistar, eða beita aðferðum listrýni á poppið. Í poppinu gilda önnur lögmál. Poppið er hvorki verra né betra er fagurtónlistin, það er bara öðruvísi.

Rolling Stones búa ekki til neins konar list heldur vöru, "product" á amerísku. Listrænn mælikvarði á ekki við um söluvöru. Afurðin sker sig ekki úr þeim 99% síbyljunnar sem úðað er um borgarumhverfi velferðarbeltisins. Og textarnir lúta ekki lögmálum ljóðagerðar og bókmennta. Þeir standa nær auglýsingagerð. Karl Marx segir einhvers staðar að kapítalistar búi ekki til "die wahre Kunst sondern die Ware Kunst" ­ ekki hina sönnu list heldur vöruna list.

Engar grípandi laglínur er að finna, útsetningar staðlaðar, sándið hið sama og alltaf, flutningur grófur og blæbrigðalaus. Og ekki er hægt að segja að þeir spili vel, hafa sennilega aldrei reynt það. Þeir eru ekki virtúósar. Lögunum er raðað niður á diskinn eftir pottþéttum formúlum lyftutónlistar.

Ekki er hægt að fá fullkomna mynd af Rollingunum, því ljósasjóið vantar, og sviðstilburðina. Þetta tvennt er óaðskiljanlegur hluti poppsins. Diskurinn er aðeins hluti af stærri heild. Hann auglýsir konsertana og konsertarnir auglýsa hann. Og allt auglýsir stjörnurnar í fjölmiðladansinum.

Ég veit ekki hvort grúppan hefur breyst frá því í gamla daga. Kannski hafði hún þá þetta "eitthvað", sem er óskilgreinanlegt og ósegjanlegt. Það var frumstætt, dýrslegt og sexý. Svo var töluvert um vímuefnaauglýsingar. Ég hef á tilfinningunni að hin frekjulega áreitni og plebbalegi ruddaskapur, sem þó var sauðmeinlaus, sé horfinn. Og þar með fór sjarminn. Markhópurinn hefur líka breyst og spekst. Gervihipparnir eru orðnir skallapopparar og pempíulegir millistéttarborgarar í garðabæjum alheimsþorpsins, rétt eins og bítlavinafélögin hér og sextíu-og-átta- gengið.

En þetta er ekki aðalatriðið. Rolling Stones eru bara Rolling Stones, öflugt bisnessveldi með yfirþyrmandi auðlýsingaapparat á bak við sig. Og á bak við fjórmenningana er mikill skari aðstoðarmanna: tón- og textahöfundar, útsetjarar, hljóðmenn, ljósamenn, hreyfingameistarar, búningahönnuðir, tískutæknar, rótarar, auglýsingastjórar, sálfræðingar, lögmenn, grúpís og svo framvegis. Mick Jagger, Keith Richards og hinir eru hvorki góðir né vondir listamenn, þeir eru bara stjörnur, afsprengi markvissrar, fagmannlegrar sölumennsku. Og það er hægt að selja þá meðan þeir hafa þetta "eitthvað". Poppið sem vantar þetta "eitthvað" selst ekki, og þá er það ekkert popp.

Rolling Stones eru eins og kókið. Það er hvorki gott né vont, hollt né óhollt. "Coca cola is the real thing" og "you can't beat the feeling". Hvort þú vilt kók fremur en pepsí hefur ekkert með vitsmunalega ákvörðun að gera. Það fer eftir því hvort þú fílar fremur rauða eða bláa litinn.

Og þannig er það líka með Rolling Stones, þú fílar þá eða fílar þá ekki. Þeir eru hvorki góðir né slæmir, skemmtilegir né leiðinlegir. Þeir eru bara Rolling Stones. Umræða er ónauðsynleg. Í hennar stað kemur síendurtekið slagorð auglýsing- arinnar.

Sagt er að takmark kóksins sé að verða vinsælla en vatn. Það mætti líka segja að takmark síbyljunnar sé að útrýma þögninni. Það finnst mér slæmt.

Ég fíla ekki disk Rolling Stones. Kannski hafði ég græjurnar ekki í botni, og ekki var ég fullur eða dópaður. En þegar poppið fer inn í merg og bein, þá kemur kannski einhver fílingur. Ég þarf ekki að rökstyðja neitt, ég bara fíla diskinn ekki.

Þar með er ekki sagt að ég sé á móti poppinu. Ég fíla í botn það sem Björk er nýbúin að gera og ég er mjög hrifinn af nýja disknum hans Kjartans Ólafssonar sem heitir Þrír heimar í einum. Kjartan er tónskáld, segist vera poppari, og hann poppar í framúrstefnu, tölvum, raftónlist með penum og vel menntuðum popptónlistamönnum.

Almennilegt stöff þetta!

12.12.07
Nokkur umræða hefur skapast um gagnrýni í Gestabókinni. Er ég réttilega sagður pissa í skó með "vælinu" hér að neðan. Verður ekki gagnrýni alltaf mat eins manns út í bæ, og jafnvel hvernig skapi hann er í? Verður maður ekki bara að treysta á sjálfan sig? Mun ekki sagan og tíminn dæma dótið að lokum? Annars hefur tónlistargagnrýni engin áhrif á mig, eða lítil, skulum við segja. Alveg er mér sama þótt enn ein Radiohead platan fái 9 komma eitthvað hjá Pitchfork. Maður er vaxinn upp úr því að láta segja sér hvað er gott. Safnhaugur jákvæðra dóma getur hins vegar beint manni á dót, t.d. þetta Burial og The Field sem sprengja skala hjá Metacritic en er svo bara óspennandi drasl. Meira vit virðist vera í bíómyndagagnrýni. Þar virðist misjafn smekkur ekki alveg jafn ráðandi og meira að almenn sannindi séu höfð til grundvallar, ef það er þá eitthvað til sem heitir almenn sannindi. Maður skoðar oft hvað myndir fá hjá IMDB. Ef þær fá 6 og undir þá kannski veigrar maður sér við að taka þær. Manni hefur lærst að það er yfirleitt að marka þetta.
---
Og það er líka satt sem Brynjar segir um að Bob Dylan fái alltof góða dóma. Steininn tók út þegar nýjasta platan hans var kosin besta plata ársins (í fyrra?) hjá Mojo(?). Hundslummulegt blúsrúnk sem enginn annar hefði vakið athygli fyrir. Megas fær hins vegar sjaldan of góða dóma. Allavega ekki á meðan hann gerir jafn góðar plötur og þessar tvær nýjustu.

11.12.07
Neikvæðir dómar vekja alltaf hjá mér meiri athygli en jákvæðir. Þannig er það bara. Það er óneitanlega skemmtilegra að lesa slátrun en lofrollu, en það á samt ekki við ef verið er að slátra vinum manns. Ég tók eftir því að Öll trixin í bókinni fékk frekar slæma dóma í Mogganum. Það kom á óvart, maður hefði haldið að Arnar Eggert ætti góðan dóm vísan þar, verandi innanbúðarmaður og svona. Nýjasta Mónitor kemur líka á óvart með nokkra helvíti neikvæða dóma. Hin ágæta plata Hellvars er púuð niður og Heiða er fláð og hengd upp til þerris: "Hún ætti að halda sig við Dr. Gunna og syngja í Evróvision. Þar hefur hún allavega snefil af sjarma. Svona innst inni veit maður samt að hún á aldrei eftir að vinna." Uss, er þetta nú ekki einum of persónulegt skítkast? Plata Mr Silla og Mongoose fær einnig slummuna framan í sig og Hjaltalín fær volgan hráka á skóna sína. Ég hef ekki heyrt Sillgoose en Hjaltalín finnst mér helvíti góð og mun betri en þessi 52% gefa til kynna. Á meðan fær Birgittan fína dóma og m.a.s. Lúxorlampinn líka. Það er svo sem ágætt að Mónitor hafi komist að þeirra póstmódernísku en úreltri í fyrra skoðun að allt sé jafnt og öll tónlist sé ágæt við réttar aðstæður. Lúxor fær t.d. 50% af því þessi tónlist væri fín ef maður þyrfti að dæna með jakkafatakörlum í Perlunni. Uh, ókei, vottever, eins og kerlingin sagði. 

10.12.07
Lokið er kosningu lesenda um bestu plötur ársins. Úrslit eru eftirfarandi (lúðrablástur): 

Sigur Mugiboogie og Neon biblíu er afgerandi og góður. Sprengjuhöllin og Megas hafa hangið hönd í hönd í rassinum á Mugison síðan fyrstu tölur fóru að berast í hús og enduðu hnífjafnir. Efstu plöturnar þrjár á Íslandi eru gersamlega afgerandi á meðan aðeins Radiohead blanda sér í "toppslaginn" og hanga í Arcade Fire. Gaman þó að sjá Of Montreal enda með brons. Eru þessar niðurstöður það sem koma skal á Íslensku tónlistarverðlaununum og í áramótauppgjörunum? Kemur í ljós og takk fyrir að taka þátt!

09.12.07
Hallærisleg eru viðbrögð fréttadeildar Stöðvar 2 við hrekknum. Fréttastjórinn lítur það alvarlegum augum og fréttamaðurinn hótar að segja af sér. Sprenghlægilegt! Skást í stöðunni held ég að halda bara kjafti. En eins og höfundur Mengella bendir á eru hrekkjalómarnir efnilegir. Frekari umræðu um málið má finna hjá bróðir hrekkjalómsins.
---
Geir Ólafs er ekki hress með Erps-viðtalið sem hefur nú verið fjarlægt af jútjúb. Ég sá hluta af því í gær. Engin tíðindi svo sem, Geir bara að bera af sér unggæðingsháttinn (fyrir 3 árum), enda virðulegar listamaður í dag. Að hamast á gúmmídúkku í sjónvarpi getur greinilega komið aftan að manni. Ég er samt ekki frá því að þessi gúmmídúkkusessjón með Geir sé alveg á topp 10 yfir eftirminnilegustu sjónvarpsmóment Íslandssögunnar. Svona ásamt Gísla á Uppsölum. Verst að það eru hvorki til myndskeið af Gísla og gúmmídúkku né Geir Ólafs á Uppsölum.
---
Okrin eru nú komin yfir 300. Bendi á athyglisverða umræðu um verð á tónleikamiðum. Grímur Atlason er enginn okrari, ég get alveg staðfest það. Fyrirtækið hans heitir jú ddr.

08.12.07
Samkvæmt Metacritic er Untrue með Burial best heppnaðasta plata ársins. Ég kem ekki auga á snilldina, sannast sagna drepleiðinlegt væl.  We Go Sublime með The Field á svo að vera 3ja best. Drepleiðinlegt líka, óspennandi. Það er sem sé ekkert að marka gagnrýni. Eða þannig. Eyrun á fólki eru misjöfn.
---
Topp 5imm:

Mugison - Jesus Is A Good Name to Moan: Mugiboogie, nýja platan með Erni Elíasi og félögum, er hreinlega að taka aðrar í nefið í bindandi kosningunni hér að ofan. Á plötunni, sem mér finnst fín, syngur Mugi að vanda á ensku og rokkar og slappar af til skiptis. Meira "af kúnni" sánd en vanalega og minna um fíngerð smáatriði og sándstæla, og það er virðingavert að höfundurinn hefur tekið öll mál í sínar hendur og leggur allt í sölurnar. Kaupið eintak á Mugison.com.

A Place To Bury Strangers - Missing you: Hávært og skerandi pedalapönk frá Brooklyn, Psychocandy augljós fyrirmynd. Aðaldúddinn er Oliver Ackermann og hann smíðar sína eigin pedala og nær því þessu sérstaka sándi. Pedalana frá honum má kaupa frá bækistöðvum fyrirtækisins, Death by audio. Af þeim plötum sem lesendur bentu á í gestabók var þessi tvímælalaust bitastæðust.

King Khan & The Shrines - Welfare Bread: King Khan er af indverskum ættum (döh), ólst upp í Kanada en býr nú í Berlín þar sem hann hefur safnað í kringum sig band. What is? er önnur platan hans og þetta er snoturt lag og ekkert líkt Screaming Jay Hawkins þótt myndin gæti gefið það í skyn. 

Circle - Saturnus Reality: Hinir finnsku Circle hafa gefið út fleiri plötur en elstu menn muna. Katapult er sú nýjasta, eiginlega hundleiðinleg og tuðkennd. Þetta, fyrsta lagið á henni, er þó ókei.

Paul Spencer - Bettie Page: Vert er að vekja athygli sjóferanda á að Stöð 2 sýnir The Notorious Bettie Page, sjónvarpsmynd frá HBO um ævi Bettie Page, kl. 22 á sunnudagskvöldið. Hin lokkandi gyðja Bettie var blautur draumur hvers fiftís Kana og í dag þykir nokkuð hipp og kúl að renna til hennar hýru auga. Myndin, sem ku ágæt, er leikstýrt af Mary Hannon, sem leikstýrði hinum ágætu I shot Warhol og American Psycho. Paul Spencer sá sem syngur hér um Bettie er frá Connecticut og lagið er af The Whole shebang sem kom út 2005.

07.12.07
Nóg að gera í dag: Hellvar með strætógiggið kl. 18. Þá leggur leið Hellvar upp frá Lækjartorgi og fer rúnt og spilar lög af plötunni Bat out of Hellvar. Í kvöld er svo megagigg á Organ, Akron/Family, Hjaltalín og hinn angurværi Phosphorescent. Þetta á að byrja um kl. 21 og hér eru tóndæmi:

Phosphorescent - A Picture Of Our Torn Up Praise (af Pride 2007)

Akron/Family - Dont Be Afraid (You're already dead) (af Love is simple 2007)
---
Karlar sem líta út eins og gamlar lesbíur er skondin síða. Vel væri hægt að taka íslenskan vínkil á þetta en ég þori það ekki. Það er ljótt að stríða. Verð þó að segja að einu sinni var Guðni Elísson í sjónvarpinu og þá heyrðist í mömmu vinkonu minnar: Þessi er nú pottþétt lesbía!
---
Á Ísafirði eru menn iðulega nefndir eftir mömmu sinni. Jói Jóu, Tommi Önnu, Rúnar Siggu o.s.frv. Ýktasta dæmið er einhver sem heitir Jón Gíslason en er aldrei kallaður annað en Freysi. Mamma hans heitir nefnilega Freyja.
---
Tengdamóðir mín spyr að vanda hvaða bók hún eigi að gefa mér í jólagjöf. Ekkert er augljóst í þeim efnum, það er ekkert sem mig langar hryllilega mikið í. Maður les yfir bókatíðindi og yppir öxlum. Ég nenni ekki að eiga sakamálabækur. Það er nóg að fá það á bókasafni og svo hef ég engan sérstakan áhuga á slíku. Finnst það vera tímaeyðsla. Ég væri til í að lesa Endurfundi e. Kárason. Það má eflaust glotta af því. Ég skil ekki rithöfunda sem skrifa á íslensku en söguhetjurnar eru erlendar. Ég nenni ekki Hníf Abrahams og ekki Val Gunnarsson sem skrifar Konungur norðursins um finnskan lúser. Mun athyglisverðara ef þetta væri íslenskur lúser, jafnvel þótt hann inni við skúringar í Finnlandi. En samt, kannski maður taki hana á bókasafninu einn daginn. Ég nenni ekki ljóðrænum bókum. Hef aldrei lesið Gyrði og mun aldrei nenna því. Skáldsögur eru líka einhvern veginn á útleið hjá mér. Ég er eiginlega hrifnari af bókum sem byggja á raunveruleikanum, ekki einhverju sem eitthvað skáld út í bæ er að ímynda sér. Held ég láti því tengdó gefa mér úr flokknum Ævisögur og endurminningar í ár. Elías Mar, Nýr penni í nýju lýðveldi e. Hjálmar Sveinsson lítur vel út og er eflaust gaman að lesa upp á að smjörþefa af fílingi frá síðustu öld, en ég hef reyndar engan áhuga á skáldverkum Elíasar. Hólmstein fær maður sér auðvitað. Jólagjöfin frá tengdó í ár verður þó líklega á endanum ÞÞ - Í fátæktarlandinu, Þroskasaga Þórbergs Þórðarsonar e. Pétur Gunnarsson. Held þar klikki ekkert.
---
Blogggáttin er sniðugt dæmi vilji maður fylgjast með skástu bloggunum. Nú er bloggsíða mín komin þar inn svo þá held ég að þessum rss-málum sé loks komið á hreint.

06.12.07
Meirimáttarkenndin. Fjallað er um kynjarusl.

05.12.07
Svo það sé samhengi í hlutunum þá eru nú komnar upp hér að ofan tvær kannanir, ein fyrir bestu íslensku plötur ársins og önnur fyrir bestu erlendu plöturnar. Hægt verður að kjósa til mánudagsins 17. desember og niðurstöðurnar eru bindandi. Mjög bindandi!!!
---
Hagkaup Miklagarði var ágæt. Það er þó bara til sama dótið þarna og annars staðar. Slagaði alveg upp í góðar búðir í útlöndum, en allt vitanlega helmingi dýrara. Bara t.d. á Kanaríeyjum má finna flottari matvörubúðir en hér. Miklu betra úrval, girnilegra kjöt og fiskiborð, að ógleymdu verðlaginu. Ég leitaði sérstaklega að "karlageymsluherberginu" vegna bakþankaskrifa. Hélt að þetta herbergi væri nú mun flottara. Þetta var bara sirka 6 fm blettur afmarkaður með hóruhúsagardínum og í honum fjórir þröngir leðurstólar og eitt 42 tommu sjónvarp. Miðað við umfjöllunina bjóst ég við mun meiru. Svona svipað sér maður í hvaða raftækjabúð sem er.
---
Tannlæknirinn reif úr mér endajaxl. Það voru hræðileg óhljóð í þessu og ég sá fyrir mér kjálkann á mér eins og sviðakjamma. Tannsi vildi endilega senda mig heim með jaxlinn í plastmáli. Dagbjartur er dauðhræddur við hann. Nú er ég á fljótandi sem er fínt í smá tíma. Kostaði 10.000 kall eins og um var samið (samkvæmt dæmum á okursíðu er það vel sloppið). 
---
Skiptist á bókum við Arnar Eggert. Það varð auðvitað fjölmiðlamál og má lesa um í Mogganum í dag. Líst ágætlega á bókina um Bárðarson nema hún hefði mátt lúkka flottar, myndir eru grámóskulegar og lítið glam í leiátinu. Þetta gæti verið bók um aldraðan skipstjóra, lúkklega séð. Sama vandamál var reyndar upp á teningnum varðandi rokkbókina mína. Það virðist hverfandi metnaður til að búa til flottlúkkandi kaffiborðsbækur hérna en kannski var það bara manni sjálfum að kenna og tímaleysinu.
---
Enn verður niðurlæging manns sem aldraðs verðbótaþolanda augljósari nú þegar 29 ára smábarn hefur verið gert að forstjóra FL. Aumingja Hannes fékk bara 60 millur í starfslokasamning en var nýbúinn að kaupa sér bíl á 65. Er þetta mál bara byrjunin á hruninu? Verður "útrásin" bráðlega jafn fyndin í spéspegli tímans og uppgangur Skjás eins? Ekkert byggt á engu? Eða eins og Ragnar Bragason spyr í Fbl í dag: "Eru ekki allir komnir með nett ógeð á þessum fjármálageira?" 
---
Fréttatilkynning:
Hljómsveitin Hellvar bryddar nú upp á nýstárlegri leið til að fagna útgáfu fyrstu plötu sinnar sem heitir Bat out of Hellvar. Föstudaginn 7. desember klukkan 18.00 mun strætisvagn leggja af stað frá Lækjartorgi og innbyrgðis er Hellvar, ásamt öllum sem vilja vera viðstaddir. Strætóinn keyrir hring og á meðan mun Hellvar leika lög af nýju plötunni. Mun þetta vera í fyrsta skipti sem útgáfutónleikar eru haldnir í strætisvagni á Íslandi og verður mjög spennandi að vita hvernig tekst til. Að sjálfsögðu er frítt inn. 

Auk þess að vera nýjungagjarnir með eindæmum eru meðlimir Hellvar mjög hlynntir umhverfisvernd og finnst því frábært að geta nýtt útgáfutónleika sína til að lokka fólk inn í strætisvagn.
"Við vonumst að sjálfsögðu til að það verði vagnfyllir", segir Heiða, "en hljómurinn í Strætó á enn eftir að koma í ljós. Það kemur þó ekki að sök þótt hann verði ekki fullkominn  því það er upplifunin sem skiptir máli. Það að ferðast um götur Reykjavíkur í almenningsvagni og horfa út um gluggann á lífið í borginni á meðan hlýtt er á skemmtilega tónlist hlýtur að vera eitthvað sem verður gert mun meira af í framtíðinni, ef vel tekst til hjá okkur." 

Fyrir þá sem komast ekki er bent á að Hellvar spilar einnig á Gauki á Stöng laugardagskvöldið 8. desember, á útgáfuhátíð plötuútgáfunnar Kimi Records, sem gefur út plötu þeirra. 

04.12.07
Það er ekkert sem heitir að Dr. Spock verður að komast áfram úr símakosningunni. Að hringja í 

03.12.07
KL. 06:40. Að hugsa sér það: Britney Spears, Amy Winehouse, Pete Doherty og Paris Hilton eru líklega bara öll sofandi núna. Sennilegast þó öll búin að kúka í sig.
---
Er annars hlustandi á Back to Black með Amy akkúrat núna. Það verður ekki af henni skafið að þetta er ágætis stöff og ekki er verra að svona gamaldags 60s sánd fái uppreisn æru í nútímanum og ekki er síður verra að heysátuhárgreiðslan komi sterk inn líka.
---
Hverjar er bestu erlendu plötur ársins? Ég sé um áramótauppgjörsþátt á Rás 2 á Nýársdag og það væri gaman að fá tilnefningar í Gestabókina. Bestu erlendu plötur ársins – eins margar og fólk vill. Og svo tek ég kannski tíu mest nefndu plöturnar og bý til vísindalega könnun. Koma svo, erða nýja platan með Britney? Radiohead? Hvað segiði?

02.12.07
Össs... ekki var bolurinn til í dobble doktor og því fór sem fór. Við vorum þó #2 og munaði örfáum atkvæðum. Maður er þá alveg búinn að taka svekkja-sig-á-euro-pakkann og getur nú blessunarlega snúið sér að öðru. Áfram Barði! 
---
Í gær skrapp ég í styðstu ferð lífs míns til Akureyrar. Þar voru jólin komin, snjór og fegursti fjörður heims, Eyjafjörður, skartaði sínu fegursta. Við höfðum 3 tíma, Rokkararnir, Heiða og Jói, til að skemmta í Landsbankanum, rölta í hina frábæru fornbúð Frúin í Hamborg (með sínu magnaða vinýlplötu herbergi) og slafra í okkur Brynjuís. Ég tók líter með til baka sem þoldi flugið, enda sér innpakkaður. Eftir hinn niðurlægjandi ósigur var það því ekki Ben og Jerry dolla sem var dælt í sig heldur Brynjuís í massavís, en ég tannburstaði mig reyndar áður en ég lagðist útgrátinn til hvílu. Ég lýsi yfir sárum vonbrigðum mínum með þá sem studdu ekki Dr. Spock til sigurs, en það er víst enn von í wild kard kjaftæðinu. Símakosning á Rás 2 og allt það. 

01.12.07
Það er til mikils að vinna...


(af Sviðsljósi Ellýar).

30.11.07
Það er ljóst að fleiri en ég meina bisness í Laugardagslögum á morgun. Allir meina bisness og Dr. Spock fá þungavinnuvélalega samkeppni. Ekki nóg með að Magnús Þór dragi Ragnheiði Gröndal á flot, en þau unnu einmitt saman eina af ástsælustu ballöðum síðustu ára, Ást, heldur tekur Hafdís Huld allan pakkann og ríflega það og fær Magna og Birgittu Haukdal til að syngja sitt lag saman. Magni OG Birgitta?! Maður toppar það nú varla nema maður hringi í Megas og Björk og fái þau í dúett. Semsé, heví samkeppni og full ástæða til að liggja í símanum.
---
En nú: Löngu tímabær Topp 5imm, gjössovel:

Hellvar - Ice cream drum machine: Bat out of Hellvar er komin út, fyrsta plata Hellvars. Ég sagði Heiðu að umslagið væri alveg eins og eitthvað með Enyu og henni fannst það alls ekkert sniðugt. Það var reyndar það eina sem ég gat sagt neikvætt um þessa plötu því hún er alveg þrusugóð (og auðvitað ekkert í anda Enyu). Ellefu lög mynda sterka og skemmtilega heild, dáldið súrsaða á köflum og hnausþykka, og það er alveg gráupplagt að láta þetta liggja lengi í bleyti í ipoddinum eða winampinum. Ein albesta ísl-enska plata ársins! Allir út í búð! 
Það er nýstofnað útgáfufélag hugsjónamannsins Baldvins Esra frá Akureyri, Kimi records, sem gefur út. Það lítur út fyrir að Kimi hafi hönd í bagga með öðrum spennandi plötum sem ég á enn eftir að tékka á: Hjaltalín-plötunni Sleepdrunk sessions, Ein í leyni með Benna Hemm Hemm og Mr. Silla og Mongoose plötunni Foxbite. 

Yelle - A cause des garçons: Sprellihressar franskar popppíur hafa löngum kætt mig. Nægir að nefna Lio, píuna í Les Rita Mitsouko og þá hressustu af öllu hressu, France Gall. Nú er komin ein nútímahress, sprellifríska Yelle (Julia Budet) sem á ættir að rekja til Bretoníuskaga. Á frumalbúmi sínu, Pop-up, spriklar hún hægri vinstri þrumuskuð í litríkum njúveif lopahosum og hólkvíðum neonlitum axlasýnandi peysum. Slagveðurslinandi.

Bearsuit - Mission Io must not fail: Bjarnarbúningurinn kemur frá Norwich á Englandi og spilar eitthvað mitt á milli Dýrðarinnar og Deerhoof. John Peel var mjög hrifinn af þeim og á þriðju plötunni sinni, oh:io, er tekið vel áðí. Hér er aftur á móti fremur hægt lag, en engu að síður ómþýtt. Og meðan ég man: Ef einhverjum vantar gott nafn á hljómsveit: Vasabilljard.

Partyshank - Penis vs. Vagina (Shanks killer mix): Njúreif (e. New Rave) vilja menn flokka það sem þessir ensku drengir og fjölmargir aðrir bjóða upp, sem sé nútíma danstónlist sem ungmenni í skræpóttum peysum dæla nú út um víðan völl. Kannski væri "skræpótta bylgjan" heppilegra heiti á íslensku. Fólk skammast sín ekkert fyrir að vilja skemmta og vera í partístuði. Þetta er lauflétt samsulluð en langt í frá einsleit tónlist. Þó á hún það sameiginlegt að vísa aldrei til eldri tónlistar en frá sirka 1980 þegar eitís nýbylgjan var að fæðast. Gítarar og sixtís og seventís-áhrif eru sem sé hverfandi. Fulltrúar eru fjölmargir og víðsvega, allt frá brasilískum stuðboltum eins og Bonde do Role og CSS, yfir í íslenska fulltrúa eins og Fm Belfast, Bloodgroup og Steed Lord. Þó vill eflaust enginn láta troða sér í skræpótta bylgju básinn en það er nú bara eins og það er. Helst blómstrar bylgjan á bloggum, áhugasamir geta t.d. gert margt vitlausara en að athuga eina bestu uppsprettuna, Big Stereo. 

Jukebox The Ghost - Good Day (Andrew Maury Remix): Tríó frá Washington, DC, með traustvekjandi lýsingu á ferilsskránni: Blanda af popnæmi Elvis Costello, íburði Queen, andríki They Might Be Giants og skapandi rokki The Flaming Lips. Hljómsveitin er nýútskrifuð úr George Washington University og hefur gefið út sjálftitlaða EP-plötu.
---
Áhugafólk um tónlist andfætlinga okkar í Ástralíu og Nýja Sjálandi ætti að flýta sér hingað, þar sem gefur að líta topp 25 yfir bestu andfætluböndin samkvæmt fjölmörgum andfætlu mp3bloggurum. Fjölmörg tóndæmi! 
---
Og svo áríðandi tilkynning frá Grími Atlasyni:

Hinn magnaði kanadíski listamaður Rufus Wainwright mun koma fram á tónleikum í
Háskólabíói þann 13. apríl nk. Það verður að teljast gríðarlegur fengur að
þessi mikli listamaður leggi leið sína til Íslands enda eru aðdáendur hans hér
á landi fjölmargir.

Allt frá því að Rufus kom fyrst fram aðeins barn að aldri hefur hann vakið
verðskuldaði athygli. Hann spilaði í hljómsveit með móður sinni og systur Mörtu
Wainwright en hún er auðvitað þekkt söngkona í dag. Rufus var rétt 16 ára þegar
hann var tilnefndur til Genie verðlaunanna fyrir lagið I’m A-Runnin, sem kom
fram í myndinni Tommy Tricker and the Stamp Traveller. Frá því hefur leið hans
legið upp á við og frá fyrstu sólóplötunni Rufus Wainwirght sem kom út árið
1998 má segja að aðdáendahópurinn hafi aðeins stækkað. Rolling Stones taldi
plötuna vera eina þá bestu það ár tímaritið valdi Rufus sem besta nýja
listamanninn það ár. 

Með útkomu Release the Stars í ár má segja að Rufus Wainwright hafi náð
almennri hylli. Platan hefur m.a. komið honum hærra á stjörnuhimininn í
Bandaríkjunum en hann hafði áður komist. Platan fór hæst í annað sætið í
Bretlandi og náði strax 23. sætinu í Bandaríkjunum. Lagið Going to a town náði
talsverðri hylli á Íslandi. Gagnrýnendur hafa lofað tónlist Rufusar og er hann
talinn vera einn af athyglisverðustu tónlistarmönnunum sem starfa um þessar
mundir. 

Rufus hefur samið talsvert af tónlist fyrir bíómyndir og meðal mynda sem heyra
má tónlist hans í eru: Brokeback Mountain, I am Sam, Moulin Rouge!m Shrek, Meet
the Robinsons og Leonard Cohen: I’m Your Man. Hann hefur komið fram með
fjölmörgum listamönnum t.a.m.: Antony and The Johnsons, Erasure og Pet Shop
Boys. 

Rufus hefur einnig tekið lög eftir aðra og gert það einstaklega vel. Meðal laga
sem hann hefur tekið er Leonard Cohen lagið Hallelujah  sem heyra mátti í Shrek
2 og Bítlalaginu Across the Universe ­ báðar útgáfur þykja tær snilld. 

Hann er einstakur á tónleikum og nær upp mikilli nánd og stemmingu hvar sem
hann kemur fram.

Gott að fá Rufus! Hér er hann og gott lag af plötunni Poses (2001): Greek Song.

29.11.07
Ég leiði saman "hesta" mína með Dr. Spock í euroþættinum á laugardaginn. Lagið heitir Hvar ertu nú? og er sjómannarokk af bestu gerð. Annað slagið drulluheví eins og stormur og stórviðri, en þess á milli fellur allt í ljúfa löð eins og sólbjart og spegilslétt haf eftir fárviðri. Lagið smíðuðum við doktorarnir saman eftir þaulsetur í sánaböðum. Þess má geta að allir sem koma nálægt laginu er með pung en enginn þeirra er rakaður. Ég vildi að ég gæti sett það hérna inn til að þú fengir að heyra snilldina en það er stranglega bannað. Refsingin er tíu sinnum fleiri vandarhögg en að kalla bangsa Múhammed (andskotans fáráður eru þetta). Semsé: Hvar ertu nú? á laugardaginn! Reiðum gúmmíhanska á loft!
---
Ég horfði loksins á Westway to the world, fína heimildarmynd um The Clash. Kannski aldrei uppáhaldsband, en ég sá þá í Höllinni 1980 og fannst alveg geðsjúkt. Ég man að ég hugsaði eftir það gigg að maður "þyrfti ekki að vera fullur til að fara á rokktónleika" og það gekk eftir því ég var aldrei fullur þegar ég sá stöff eins og Echo & the Bunnymen, Human League og Crass í Höllinni næstu ár, að ógleymdum hinum mögnuðu safntónleikum "Annað hljóð í strokkinn". Þar man ég einna helst eftir því hvað Englaryk voru helluð, þegar löggan stoppaði Bruna BB af með vélsagirnar og Fan Houtens kókó tóku "Hún er svo sæt".
---
Eitthvað er skrýtið við þessa nýju sjónvarpsstöð sem Erpur Eyvindarson á að fara fyrir - "3". Þeir segja að þetta sé á stöð 12 á digitalinu. Ég kíkti á þetta kl. 18:30 í gær og þá var Erpur að skoða veiðihnífa með Birni Jörundi. Jú jú, alveg svaka áhugavert, en samt ekki jafn áhugavert og fréttirnar. Svo kíkti ég tvisvar seinna um kvöldið og sá ekkert nema skjámynd frá Sýn eða eitthvað. Það mætti því kannski segja manni hvenær dýrðin er send út?

28.11.07
Átti svakalegar draumfarir. Fór alla leið til Japan til þess eins að vera fastur á flugvallahóteli. Þar á undan hafði Ragnar Kjartansson framið á mér "Tekinn"-hrekk sem var dulbúinn sem listgjörningur. Ég var svo reiður við Rassa að ég handleggsbraut hann. Algjör sósa náttúrlega, enda er maður nú sofandi upp í 10 tíma á nótt í staðin fyrir þetta 6-7 tíma vanalega. Það gerir skammdegið. Meiri svefn framkallar sósaðri drauma.
---
Bubbi kominn á gulljeppa. Og það er enginn draumur.

27.11.07
Ég vil bara taka það fram að mér finnst Rannveig Rist ekkert daðra við að vera þroskaheft, ekki einu sinni á myndinni sem fylgir þessari frétt.
---
Ég hef bara einu sinni komið í Silfur Egils og þá kom ég til að ræða um rokk. Það er til háborinnar skammar að mér sé bara boðið til að ræða um rokk. Þess vegna ætla ég að segja nei næst þegar Egill kemur skríðandi til að fá mig í þáttinn. Það er breiðfylking sem ætlar að segja Agli að hoppa upp í rassgatið á sér þegar hann kemur skríðandi næst, ég veit um a.m.k. þrjá aðra, þá Arnar Eggert, Óla Palla og Kristinn Pálsson. Við rokkfræðingar látum ekki koma svona fram við okkur. Egill getur bara étið það sem úti frýs.
---
Stórtíðinda er nú að vænta í eurovisionþætti allra landsmanna, Laugardagslögunum. Næsta laugardag skellur á fyrsta lagið í sögu þessarar keppni sem er loðið á bakinu og með hár og pungnum.
---
Hættu svo þessu væli. Þú býrð í besta landi í heimi.

26.11.07
Ég veit ekki hvað það þýðir að tauta og raula um íslensku / ensku í dægurlagatextum endalaust. Það er náttúrlega lítið hægt að gera í því þegar ágætis íslensk bönd ákveða að syngja á ensku (hver svo sem ástæðan er). Það eru ekki neinar takmarkanir sem fylgja. Rás 2 hefur ekki enn ákveðið að neita að spila íslensk lög með enskum textum og það væri vissulega kaldrifjuð aðferð. Arnar Eggert er með ýmsar athyglisverðar pælingar í Gestabók. Hér eru nokkrar mótpælingar:

Getur verið að það sé bundið í eðli dægurtónlistarinnar að textinn sé raunverulega bara skraut? Alla jafna?

Jú jú, það er ósanngjarnt að leggja þá kvöð á poppara að þeir þurfi líka að vera skáld og hafa eitthvað að segja. Langflestir láta "músikina tala", en eins og ég hef áður minnst á finnst mér bætast við ný vídd í heildarpakkanum þegar popparar eru með góða texta á íslensku – þegar maður finnur smjörþef af samtímanum og raunveruleikanum í gegnum músikina. Þegar poppið er ekki bara snotur eftirlíking af því sem hæst ber erlendis heldur einhverskonar spegill á samtímann. En þetta er sjaldgæft og fáránlegt að ætlast til þess. 

Tökum Bítlana sem dæmi. Ekki voru þetta nú sérstakir textar hjá þeim, hvorki á fyrri hluta ferilsins né á þeim síðari. Það virðist samt öllum sama um það. Allir eru á því að þetta sé stórkostlegasta hljómsveit dægurtónlistarsögunnar. Ergo: textarnir skipta ekki nema brotabrotsmáli í heildarsamhenginu. 

Ágætis dæmi. Sumt þeirra textadót er náttúrlega þrælslappt. Tek alveg undir þetta ergó, textar eru yfirleitt minnipokamenn í heildarpakkanum. 

Þær eru ekki margar sveitirnar sem eru mér kærar vegna texta (Smiths, American Music Club eru tvær sem ég man eftir í svipinn).

Hér má vel bæta við Belle & Sebastian, Pulp, Art Brut...

Strokessveit sem syngur á íslensku. Er það ekki bara hallærislegt - og það að vera hallærislegur er dauðasynd rokksins.

Er ekki nógu hallærislegt að stofna Strokessveit fyrir það fyrsta? Svo er náttúrlega fátt meira kúl en að vera hallærislegur. Þ.e.a.s. ef maður veit sjálfur að maður er hallærislegur. 
---
Ég tek nú ekki mark á þessu krepputali fyrr en ég heyri af fyrsta trillanum sem neyddist til að selja einkaþotuna sína. Þá veit ég að "útrásin" er búin.

24.11.07
Þið getið hætt þessu rss-væli. Ég er með í Mikka vef, hvernig svo sem það virkar.
---
Það er orðin hefð að ég sofna yfir lögreglumanni í ensku smáþorpi að leysa morðmál á föstudagskvöldum. Svo er mér svo sama um þetta að ég gleymi að spyrja Lufsuna hver drap alla.
---
Á sama tíma og ég sit tárvotur upp í sófa yfir heimildamynd um langveik börn eru hommar í sleik út um alla Öskjuhlíð. Þetta og margt fleira segir 123 töff.

23.11.07
Steinþór Helgi skrifar pistil í tilefni af bakþönkum mínum í gær um íslensku og popp. Nú nenni ég ekki að standa í rifrildi um þetta mál, fólk má hafa þá skoðun sem það vill, heldur var ég bara að benda á að fyrir mér bæta (góðir) íslenskir textar við aukavídd í heildarpakkann, gera poppið annað og meira. Steinþór deilir skoðun með Fabúlu sem sagði eitthvað svipað í Laugardagslögunum á dögunum: "Enskan er einfaldlega alþjóðlegt tungumál tónlistar (kjaftæði) og ég held að það sé tónlistarfólki eðlislægt að semja texta á ensku (það heitir leti og metnaðarleysi - eða hugsar þetta lið kannski á ensku líka?), alveg eins og erindi-viðlag-erindi-viðlag-brú-viðlag er venjan í uppbyggingu á popplagi (sem sé, klisja). (ath: Frekari umræða um málið í Gestir hafa orðið).
---
Ef snyrti- og góðmennin Björgúlfsfeðgar eru með Fáfnismenn í vinnu við að hrekja burtu fólk í íbúðum sem þeir vilja kaupa (eins og lesa má um hér og hér) þá hljómar það eins og bíómynd með Chuck Norris. Hver pant vera Chuck og hjálpa góða fólkinu? Enginn?
---
"Mest lesið" sýnir okkur það sem skiptir mestu máli í lífinu. Til dæmis núna:
1. Bachelorinn sendi báðar brúðirnar heim
2. Nærbuxnalaus Christina Aguilera
3. Vill síður vera borinn berrassaður út úr Kringlunni 
4. Luxor sjá í rassinn á Páli Óskari 
5. Britney með "takeaway" kærasta 
6. Allir hættir að tala við Magna 

Í fullkomnum heimi væri "mest lesið" eitthvað svona:

1. Endurútgáfa á verkum Fan Houtens kókó fyrirhuguð
2. Guðbergur með góðan pistil í DV
3. Þýðing á "nýju" Tinna bókinni heppnast vel
4. Megas segist ánægður með árið
5. Internetið litlausara eftir fráfall Mengellu
6. Næturvaktin bráðum á dvd
---
Mikið væri skemmtilegra ef þetta hefðu verið þátttakendurnir í Herra Ísland...
---
Það er annað hvort grenjandi rigning eða helkalt. Ef manni langar aðeins í burtu, þó ekki sé það nema í huganum, er margt vitlausara en að skoða ferðablogg. Eitt gott er Ferðablogg Sonju og Jóa sem nú ferðast með myndavél, Megas og Morrissey um Norður-Indland, Bútan og Nepal. Annað sniðugt er að taka smá rispu á snilldarforritinu Goggle earth.
---
Skatturinn sendi mér frekar fúllynda ítrekun um að ég ætti eftir að skrá mig í eitthvað nýtt kerfi, ÍSAT2008. Ég hafði aldrei verið beðinn um það áður. Það var lítið mál og þegar ég var búinn að breyta birtist þetta:

ÍSAT 95 vörpun fyrir Lögaðila 
ÍSAT 95 -> ÍSAT 2008 vörpun 

Vörpun? Hvað er það? Fer skatturinn nú að skatta mig eins og ég sé varphænsn?
---
Hænsn. Flott orð. Prófaðu að segja það upphátt. Næstum því eins flott og tengsl. Tengsl. Prófaðu að segja það upphátt.

22.11.07
Dagarnir líða. Það er skítkalt eða rigning til skiptis. Myrkur og doði. Samt reynir maður að hressa sig við, hugsa til heitu landanna.
---
Við kláruðum Abbababb! fyrir tveim blindfullum húsum á sunnudaginn. Svo var étið saman. Þetta var mjög góð sýning þótt ég segi sjálfur frá og frábært samstarf sem skilaði þessu. Það er frekar líklegt að sýningin birtist á fjölum aftur fyrr en seinna, ja eða eftir nokkur ár.
---
Ég sá Ladda í World Class. Hann var nú bara í plebbaklefanum þótt hann sé tvímælalaust maður ársins vinsældarlega séð. Laddi er maðurinn.
---
Ég hitti loks textahöfund minn Mengellu, Ólaf Sindra, og tók við hann viðtal fyrir Fbl (birtist um helgina). Við hittumst á Hótel Holti sem er besta kaffihús bæjarins, það hljóðlátasta og mest passandi. Best þykir mér að hitta fólk þar eða á BSÍ. Á Holtinu fær maður einskonar bonzai kaffi og bonzai bakkelsi með. 400 kall skammturinn sem er gjafverð þegar haft er í huga leðursætin og málverkin. Alvöru stöff, gamall peningur, ekkert smekklaust nýríki. Enginn helvítis 50 cent úr hátölurunum.
---
Ég á sæmilegan Bakþankaí dag um Íslenskulögguna. Enn ein tilraunin til að segja það sama, að fólk eigi að syngja á íslensku í poppinu sínu. 
---
Plötutíðindi kom inn um lúguna í morgun. Alltaf gaman að fá þann pésa. Ég vorkenni þó útburðarfólkinu sem þarf að rogast með sirka kíló á hverja lúgu þessa dagana. 
---
Ég fór með ritstjóra Útiveru upp á Úlfarsfell til myndatöku. Ég er í viðtali í blaðinu næst. Þyki víst ágætur til að vekja athygli á útivist. Ekki eins og ég sé einhver útivistargúrú en ég sýni þó allavega lit og hef tekið mig á. Ritstjórinn er annar eigandi Fjölva svo nú á ég von á Tinna í Sovétríkjunum sem Fjölvi er nýbúinn að koma út. 
---
Gaman er að horfa á Kistuna. Spennan á milli Kolbrúnar og Páls Baldvins í byrjun þáttarins er sjaldséð í sjónvarpi. Kolbrún titrar en Páll heldur í stálgrímuna. Áhugaleysi Kolbrúnar um Tinna er þó skammarlegt. Einu sinni var ég aðdáandi Jóhamars. Gaman að sjá hann er að koma inn aftur og maður ætti að fá sér bókina hans. Mig langar alltaf jafn mikið í fornbókabúðina þegar ég sé Braga.
---
Menn eru að skipta glugga í svefniherberginu. Það kostar nú skildinginn. 
---
Ég fór á Eastern Promises (sjá menning). 
---
Tengdapabbi kemur frá Skotlandi í dag. Ég þarf í búð að kaupa standard vörur að því tilefni, súrmjólk, síld og harðfisk.

19.11.07
Boys on wheels – síðasta hljómsveit í heimi? Sjáðu bara.
---
Það er aldeilis að hundarnir flaðra upp um eiganda sinn í dag. Voff voff! Slef slef!

17.11.07
Sá Zodiac í gær. Morðingi er þefaður uppi í alltof langri og ekkert svo sérlega skemmtilegri mynd. Hefði auðveldlega getað verið hálftíma styttri. Manísk leitin af morðingjanum minnti mig eitthvað smá á manísku leitina að dularfulla leynibloggaranum, sem tók fólk "af lífi" á íslensku.
---
Eitt pirrandi eru útvarpsmenn sem kynna lög með því að segja að þetta sé "glænýtt lag" frá hinum og þessum, þegar hið rétta er að þetta er það lag sem nýlega var gefið út á smáskífu, en er búið að vera til á albúminu í hálft ár eða eitthvað. Hvernig getur hálfs árs gamalt lag verið "glænýtt" eða "það nýjasta frá..."? En allavega, fáum enn annan alíslenskan Topp 5imm. Þetta er glænýtt og það nýjasta frá...

Guðmundur Jónsson - Eyjólfur: Óperumeistarinn Guðmundur Jónsson er fallinn frá. Ekki þarf að fjölyrða um snilli hans á óperusviðinu en ekki má heldur gleyma poppplötunni hans, Lax Lax Lax, sem SG gaf út 1969. Í snobbaða batík og fondúgeiranum þótti Guðmundur hafa tekið all rösklega niður fyrir sig með svona "auðvirðulegu popskrani". Aðrir nutu alvöru óperupopps (þetta er auðvitað löngu áður en Satan stofnaði Luxor hópinn) og platan er full af hitturum; Jón tröll, Það er eins og gerst hafi í gær, þetta lag og titillagið. Útsetningar, kór og hljómsveitarstjórn var í höndum Magnúsar Ingimarssonar og þetta er frábær snilldarplata.

Sprengjuhöllin - Nú er tíminn: Unga fólkið liggur afvelta yfir þessu, skilst mér. Lufsan hefur líka haft orð á því hve Vertu í sambandi sé flott lag og það hefur ekki gerst síðan hún mærði Story of a star með UMTS (og Sail away með David Grey þar á undan). Tímarnir okkar er kannski ekki alveg Sumar á Sýrlandi klámkynslóðarinnar, eins og einhverjir vilja meina í hástemmdri fagnaðarvímu yfir því að loksins skuli einhver syngja á íslensku um eitthvað sem er ekki kjaftæði, en þetta er alveg Tívolí. Fullt af góðum lögum, nokkur slappari reyndar líka, rosalega gaman auðvitað að loksins skuli einhverjir syngja á íslensku um eitthvað sem ekki er kjaftæði og svona. Ég valdi þetta lag af því það er gott og af því orgelbyrjunin á því minnir mig á Barry Andrews á meðan hann spilaði með Xtc. Nú er að sjá hvort Sprengjuhöllin fylgir þessu eftir með Sumri á Sýrlandi eða Gráa fiðringnum – ég held það verði Sýrland. (Bónus: Til að einhver skilji nú hvað ég meina með þessu orgeltali og Barry Andrews er bónuslag: Xtc - All along the watchtower. Einkar snyrtileg Dylan sæng.)

Megas & Senuþjófarnir - Upprisubúðir: Af Holdi er mold, sem við fyrstu heyrn er fjölbreytt og uppsöfnunarlegt flykki sem tekur tíma að kjammsa á og melta. Sem er náttúrlega ekki verra. Frágangur var miklu auðveldari.

Sigur Rós - Hljómalind: Your eyes on my phone – er það textinn? Fjallar þetta lag um Kidda í Hlómalind sem var alltaf að glápa á símann hans Jónsa? Textinn eða textaleysið skiptir kannski ekki öllu því þetta er ægigott og guðdómlega poppað og kemur af plötutvennunni Hvarf/Heim.

Páll Óskar - Komdu til mín: Lag eftir Svölu Björgvins af Allt fyrir ástina, bestu diskóplötu Palla til þessa. Viðtal við Pál í dag er endurkoma mín í viðtaladeild Fbl. Svo heldur hann útgáfutónleika í kvöld á Nasa frá kl. 23, en er með krakkaball um daginn. 

16.11.07

Til sölu #2:
Smábarnarólan Fisher Price Rainforest Cradle swing. Hér er mynd:

Lítið notuð, batterí-knúin og eitur svöl. Þú veist ekki af barninu tímunum saman. Sambærilegt græja fæst í Baby Sam á 20+. Mitt verð 12.000 kall. Kaupa. (SELD)

Hneyksli #1
Gallabuxur fást varla lengur með rennilási – bara með tölum. Og ég sem þoli ekki tölur á buxum. Til hvers að hneppa ef hægt er að renna. Ég sem hélt að rennilásinn hefði verið fundinn upp til að spara tíma. Hvað er nú að rennilásum?, öskraði ég á buxnadrenginn í búðinni. Hann stóð álkulegur og sagði að það væru ekki til neinar buxur með rennilási í sinni búð. Ég til dæmis gleymi alltaf að renna upp þegar ég er í buxum með rennilási, sagði drengurinn. Ég var auðvitað of vankaður til að spyrja af hverju hann myndi þá frekar eftir að hneppa en renna. Heil Kringla full af buxum og engin með rennilási. Ég missi vitið. 

Hneyksli #2
Hvernig væri að einhver einhvers staðar tæki upp á því að sýna eitthvað af þessum bíómyndum klukkan 5, 7 og 9 í staðinn fyrir 6, 8 og 10. Ég kemst aldrei í 8 bíó, alltaf að svæfa, en er orðinn einum of syfjaður kl. 10, hvað þá 12 þegar myndinni líkur. Níubíó væri því upplagt fyrir mig og eflaust fleiri í svipuðum sporum. Svo myndi líka gera poppstrauminn í sjoppunni jafnari að hafa þetta svona allskonar.

Opinberun #1
Óli Sindri er Mengella. Kannski ekki þruma úr heiðskýru lofti, en fyrst Gellan þrætti svona fyrir þetta hélt maður kannski að þetta væri einhver vinur hans Óla, eða ættingi. Þegar ég myndgerði Mennu í huga mér poppaði Anna Kristjáns alltaf upp. Það er gríðarlegur missir af Mengellu en ég bind miklar vonir við Óla, enda strákurinn greinilega snillingur. Og ekki nema 24 ára.

Opinberun #2
Ég er Gunnar Lárus Hjálmarsson og ég er ekki milljónamæringur.