04.03.07
Hljómsveitarnöfn eru þeirrar
náttúru að öll venjast þau á endanum.
Nöfn eins og Jeff Who? eða Búdrýgindi – sem hljóma
bjánalega í byrjun – venjast fyrir rest. Því
skiptir kannski ekki máli hvað böndin heita. Einu sinni,
líklega þegar Unun vantaði nafn, skrifaði ég
Guðbergi Bergssyni og bað um uppástungu. Hann hafði
sýnt gríðargóða takta í hljómsveitanafnagiftum
í Sögunni af Ara Fróðasyni og Hugborgu konu hans,
en þar koma m.a. fyrir pönkhljómsveitirnar Úldinn
skítur og Steiktir naflar. Ég bjóst því
við einhverri snilld í þessum dúr en karlinn var
í engu stuði og það eina sem honum datt í hug
í svarbréfi var "Raddbandið".
---
Ef einhverjum vantar nafn á band bíð
ég hér upp á tvö sæmileg. Hrat. Hljómsveitin
Hrat. Virkar í meiki, t.d. H-Rat. Einnig Sófar. Hljómsveitin
Sófar. Þrælvirkar í meiki sem So Far. Þessi
eru gefins ef einhver vill.
---
Ég er búinn að vera í
nokkrum hljómsveitum. Hér eru nafnaskýringar.
Dordinglar = Man ekki tildrög þess.
F/8 = Flokkur átta. Þ.e.a.s.
flokkur átta í Vinnuskóla Kópavogs. Við
vorum í honum.
GLH = Sólónafnið áður
en Dr. Gunni varð ofan á. Gunnar Lárus Hjálmarsson
augljóslega. GLH gerði 10 spólur í einu eintaki
hver með tilraunakenndu teip á teip stöffi, sirka 1981-1986.
Spólurnar heita: Véfréttin talar / Heilagt heilaæxli
/ 3ja / Ugasta / Kysstu mig áður en ég dey / Maðurinn
sem býr til hjörtu / Gamlárskvöld – flugeldarnir
– gamlárskvöld / Fjóshaugur / Djúpsjávarfiskarnir
/ Endalausir mánudagar. Því "besta" var síðan
safnað á spóluna Nunnurusl sem Erðanúmúsik
gaf út í uþb 150 eintökum 1986.
Geðfró = Fann þetta í
eldgamalli orðabók.
Beri-Beri = Stolið frá Tappa
tíkarrass, sem var með samnefnt lag.
S.H.Draumur = Svart hvítur draumur
í byrjun, stytt í S.H.Draumur v/ meikvona. Hugmyndin kom
frá laginu "Do you dream in colour?" á plötunni Quit
Dreaming and Get on the Beam með Bill Nelson sem ég sá
í Safnarabúðinni. Hef ekki enn orðið svo frægur
að heyra þetta lag (jú núna, glóðvolgt
af Soulseek... hmm... ekki ýkja merkilegt).
Dr. Gunni = Dúett trommuheilans
Dr. Rhythm og mín, þ.e. Dr. Gunni.
Bless = Síðasta plata S.H.Draums
heitir Bless og þegar við Biggi byrjuðum aftur með Ara
Eldon í stað Steina og þurftum að plögga þessari
síðustu plötu þótti upplagt að notast
við Bless-nafnið.
Ekta = Ég spurði einhvern karl
á 22 hvort hann gæti stungið upp á hljómsveitarnafni
og hann kom með "Ekta". Þótti þetta ægilega
sniðugt í vímunni svo það stóð.
Unun = Kom upp þegar við Þór
Eldon spiluðum Scrabble. Þótti strax upplagt. Eða
allavega mun betra en "Zombie duck".
---
Aðrar hljómsveitir sem ég var
í á táningsaldri en gerðu kannski líkið
nema spila út í skúr og taka upp á kasettu.
Man ekki tilkomu nafnanna:
Grisjurnar = Ég og Oddný Eir Ævarsdóttir.
Stuna úr fornbókarverslun = Ég,
Steinn Skaptason og Trausti Júlíusson.
Tromman & steinninn = Ég og Örn
Ingvar, 5 ára frændi.
Videósílin = Ég og Steinn
Skaptason.
---
Þessi færsla var í boði
Detox:
Þegar anallinn gengur fyrir.
03.03.07
Í dag er bara tvennt í stöðunni:
Kroppa í klístrað hrúður eða belgja sig
út af Topp 5imm. Auðvelt val:
The
Stranglers - Soldier's diary: Giggið er á þriðjudaginn
á Nasa og hreinlega hjákátlegt að mæta ekki.
Hér er til minnis eitt gott stuðlag af nýjustu plötunni
Svít sixtín, eða Suite XVI eins og gömlu karlarnir
kalla það. Hér gefst einstakt tækifæri til
að sjá ellilífeyrisþega spila pönk því
trommarinn er 68 ára og notar rafpumpur til að að ná
fallþunga á bassatrommuna. Bandið á vitaskuld hauga
af snilldarlögum og ekki er verra að hinir einu og hrikalega sönnu
Fræbbblar hita upp. Þeir voru einmitt læf á Rás
2 í gær sem má hlusta á hér.
Dungen
- Så blev det bestämt: Ný-sækadelíuSvíar
hafa sent frá sér plötuna Tio Bitar, sem sparkar í
lamaðan durg. Látiði klippa ykkur.
(Ingenting)
- Punkdrömmar: Aðrir sænskir skrattar og poppaðri.
Er það nú forsvaranlegt að nefna hljómsveitina
sína (Ingenting)? Lagið er tekið af plötunni MYCKET
VÄSEN FÖR INGENTING sem kom út í fyrra. Mæspeisið
þeirra er http://www.myspace.com/nadazipp
The
Stooges - Greedy awful people: Út er að koma ný
Stooges plata, The Weirdness. Hún er langt í frá jafn
hrikalega æðisleg og fyrstu 3 plötur bandsins (frá
því 1700 og súrkál), en gefur maður ekki
gömlum körlum séns? Jú jú!
Kenneth
Bager feat. Julee Cruise - Fragment Seven (Les Fleurs): Danskur
tjillari sem gerði plötuna Fragments From A Space Cadet í
fyrra. Megin uppistaðan í þessu lagi er Les Fleur með
Minnie Riperton en hvíslkonan úr David Lynch myndunum leggur
andstutt lóð og vogarskálina. Grú-ví.
---
Skemmtilegasta lagið sem ég heyrði
í vikunni er þó ekki á Topp 5imm í dag
enda búið að mp3-blogga það út um allar
trissur og maður reynir að vera frumlegur. Þetta er nýjasti
síngullinn frá Maximo Park "Our velocity" og má t.d.
finna hjá Agli Harðar,
undir 18. feb.
---
Varúð: Pólitískt grín:
Það var sniðugt hjá Framsókn að fá
Laylow til að spila Please dont hate me á fundi. Nú þarf
bara Samfokk að fá Björn R. Einarsson til að spila
Því ertu svona uppstökk, VG að fá Sveinbjörn
I Baldvinsson til að spila Lagið um það sem er bannað,
Fúllyndir að fá Bubba til að spila Nýbúann
og XD að fá Elsu Sigfúss til að syngja Lofum þreyttum
að sofa.
02.03.07
Í ræktinni var einhver stöð
með stanslausar útsendingar af því þegar
nokkrir karlar báru líkkistu Önnu Nikól Smitt
um borð í þotu. Blessuð sé minning hennar og
allt það, en mér fannst þetta minna full mikið
á hina nákvæmu útsendingu af því
þegar Keikó kom til Vestmannaeyja.
---
Ef ég héti Sigurður gæti
ég skýrt dóttir mína Eðlu upp á
djók (Eðla Sig, skirurru? ha, skilurrekki?) Það hlýtur
að vera raunhæft nafn alveg eins og Bambi, Dúfa og Heiðlóa.
Eðla mín.
---
Hér
er einn að kvarta undan því að Blaðið skuli
vitna í bloggið hans. Hvað get ég þá
sagt sem hef verið aðalmaðurinn í bloggi dagsins í
sama Blaði þrisvar í þessari viku. Það
er náttúrlega algjör geðveiki, en kitlar auðvitað
hina kitlanlegu hégómagirnd að vera talinn svona obboslega
sniðugur. Ég ætti samt eiginlega að fara að senda
þeim reikning fyrir Dr. Gunna blogg hornið.
---
Það er ekki skemmtilegt að fylla
þessa smádálka í blöðunum. Ég
hef sjálfur staðið í því að hjakkast
um hin drepleiðinlegu bloggberangur leitandi að einhverju skítþokkalegu
til að setja í "blogghornið". Þessum sem er að
vinna á Blaðinu (Atli
í Haltri hóru kannski?) skal ég benda á nokkur
fín blogg þar sem hann finnur kannski eitthvað í
dálkinn sinn: Mengella
er eins og áður segir drottning bloggsins og á t.d. nýlegt
snilldarblogg um femínsta og lummur. Manni dauðlangar að
vita hvaða snillingur þetta er og myndi hlaupa slefandi út
í bókabúð ef hún gæfi út bók.
Smári
Karls er mikill meistari frá Ísafirði, Tóti
Leifs er ekkert að skafa utan af því og Gvendur
er ekkert slor. Þetta er nú bara það sem mig rámar
í í fljótu bragði, en svo er bara að hjakkast
áfram eftir línkunum og kópí peista í
nýtt skjal.
---
Ég lýsi eftir nýjum blaðasala
á horni Pósthússtrætis og Austurstrætis.
Það ættu að vera uppgrip hjá honum núna.
Allt vaðandi í pappír sem er fullur af undanrennu úr
tíðindaleysinu eða eldgömlum uppgröfnum skandölum
(hvenær kemur sláandi grein um Axlar Björn?) og bloggtuð
í bland. Er einhver að kaupa þetta? Nýi blaðasalinn
myndi fljótlega komast að því. Stæði
þarna dúðaður í svifmenguninni með borð
og á því Krónikan, Mogginn, DV, Viðskiptablaðið
og jafnvel Fbl og Blaðið líka. Er ekki allt fullt af smjörgreiddum
skjástörum og foxí verðbréfagellum á
sveimi þarna? Ég er viss um að þeim findist öllum
mjög erlendis að versla við nýjan blaðasala, sérstaklega
ef hann væri jafn kúl og þeir gömlu, Óli,
Auðunn og Gunnsi.
01.03.07
Andskotinn... Ég sé það
núna að Nancy Cartwright,
sem talar fyrir Bart Simpson, er í Vísindakirkjunni. Nei,
ég ætla samt ekki að hætta að glápa á
Simpsons. Lækka kannski bara þegar Bart talar. Djók.
---
Heimskulegust af mörgum heimskulegum trúarbrögðum
er Vísindakirkjan. Ég missi umsvifalaust allt álit
á viðkomandi ef ég heyri að hann er í þessari
bjánakirkju. Ekki það að mér sé ekki
sama hverju fólki trúir í frítíma sínum,
en þetta bull fer bara alveg yfir strikið og gerir átrúendur
að augljósum fávitum. Því nenni ég
t.d. alls ekki að sjá myndir með Tom Cruise og John Travolta.
Auðveldara er að leiða þetta hjá sér með
tónlistarmenn. Áhugi minn á Beck hefur þó
stórlega dregist saman (kannski líka vegna þess að
hann er löngu búinn með sína hressustu takta), en
ég get alveg hlustað á gamalt Isaac Hayes stöff
án þess að æla. Hér
er annars nytsamur listi yfir geðsjúklinga.
---
Ég fór á myndlistarsýningu
Auðuns blaðasala í Sólheimaútibúi Borgarbókasafns.
Auðunn kom til tals á dögunum. Steinn Skaptason fullyrti
í mín eyru að Auðunn væri fallinn frá.
Sagðist hafa lesið það í Mogganum. Ég var
auðvitað nokkuð hnugginn yfir því. Taldi að
nú væri stétt blaðasala útdauð. Óli
löngu horfinn, Auðunn látinn og Gunnsi Gunn á einhverju
smíðaverkstæði. Því var ég aldeilis
glaður þegar ég las í DV í gær (þar
sem ég stóð í röð í Bónus)
að Auðunn væri ekki bara sprelllifandi heldur að opna
myndlistasýningu. Verkin eru mörg góð, sérstaklega
"Áramót" sem ég falaðist eftir. Verkin voru ekki
til sölu en þó er verið að athuga tilboð
mitt. Það slagar hátt upp í þetta sem Kjarvalinn
fór á.
---
Fór í búð. Rosalega
er allt orðið ódýrt. Örugglega alveg 20 krónum
ódýrara en í gær.
28.02.07
Ég er orðinn svo gamall að ég
notaði einu sinni Alta vista
til að leita að drasli á netinu.
---
Mæspeis
og jútjúb er málið
í dag, en bæði fyrirbærin eru fötluð. Mæspeis
ferlega sló á köflum, t.d. fer þessi lagaspilari
oft ekkert í gang fyrr en eftir dúk og disk. Svo mætti
alveg setja upp þann möguleika á mæspeisinu að
maður gæti spilað tónlist random. Jútjúb
er oft líka drulluhægt. Og oft eru myndbrotin í drullugæðum.
Það verður eflaust hlegið að hvoru tveggja eftir
5 ár þegar eitthvað miklu flottari verður komið
til sögunnar.
---
Dauði myndbandaleigunnar (eða öllu
heldur dvd-leigunnar) er yfirvofandi. Það gerist um leið
og myndveitur eins og Skjárinn
standa undir nafni og fara að bjóða nákvæmlega
sama – eða betra – úrval og leigurnar.
---
Íslenska sjoppan er líka á
hröðu undanhaldi. Klukkubúðir eru teknar yfir.
---
The Who er eitt af örfáum snilldarböndum
gullaldar sem enn höktir þrátt fyrir mikla löskun.
Pete Townsend bloggar hér
eins og hver annar lúði og er með annað blogg hér,
einskonar endurminningarblogg. Hafandi séð McCartney, Stones,
Wilson og Davies, myndi ég halda að Hú sé það
eina sem vantar upp á til að pakka þessu inn. Nú
er bara að grípa gæsina.
---
Hvaða svifryk eru allir að tala um? Ég
sé ekkert svifryk.
---
Heiða
sagði mér frá saunabaði í Berlín sem
hún fór oft í. Þar voru allir saman allsberir,
konur og karlar. Og meira að segja líka úti í
porti, þangað sem fólk fór til að kæla
sig. Porti umkringdu íbúðum þar sem íbúar
höfðu beinan aðgang að hinum nöktu líkömum.
Engum fannst þetta tiltökumál en í rassaborunni
hér yrði líklega allt vitlaust ef einhverjum dytti í
hug að opna svona unisex saunu. Fyrir það fyrsta myndu fjölmiðlar
fá kast enda ekki á hverjum degi sem eitthvað skemmtilegt
gerist. Þeir gætu hætt rétt á meðan
að segja frá ósýnilegri svifmengun og óskiljanlegu
baugsréttarhaldarugli. Allsbert fólk selur. "Gárungar"
færu á kostum og það hlypi á snærið
hjá Spaugstofunni. Næst færu hópar herskárra
á kreik, Krossinn og femínistar gætu fundið eitthvað
á þá viðurstyggð að allsbert fólk
væri saman í saunu. Börnin! Ætlar enginn að
hugsa um börnin?! Það yrði gífurlegt umtal um
"klámsaununa" og ef hún væri einhverntímann
opnuð myndu ljósmyndarar hanga í portinu og ná
kannski mynd af Bryndísi Schram. Ég sé þetta
alveg fyrir mér, stóra klámsaunumálið.
---
Aumingja rassaboran. Of mikil rassabora fyrir
allsbert fólk.
27.02.07
Ég er á leiðinni til NYC enn
einu sinni af því ég tími ekki að láta
miða sem ég fékk fyrir að sjá um sérstakan
Manchester þátt af Popppunkti í fyrra, renna út.
Það verður náttúrlega kreisígaman að
losna aðeins undan þessari rassaboru sem okkar guðdómlega
land er. Það er hreinlega andlega nauðsynlegt að komast
héðan með jöfnu millibili. Ég keypti mér
Lónlí planet gæd um borgina góðu sem ég
þekki svo sem ágætlega. Möst er að hitta vin
minn KJG vel og mikið enda er hann bæði furðulegasti
og skemmtilegasti maður sem ég þekki. Hann er ennþá
ólöglegur innflytjandi eftir 21 ára dvöl í
borginni. Stefán Jón Hafstein skrifaði ágætis
bók um hann fyrir löngu síðan (New York New York
heitir hún og er til á bókasöfnum). Svo ætla
ég að fara á upptöku á eins og einum Conan
þætti. Þetta er vitanlega plebbalegt en ég er
plebbi. Ég ætla líka að kíkja á standöpp
í frægum klúbbi.
Svo var ég að bóka mig á rokktúr.
Glápt verður á fyrrum heimili Joey Ramone og fleira og
plebbalegra verður það varla. Ég fór á
svona túr í Liverpool og sé alls ekki eftir því.
Annars stefni ég að því að setja yfirstandandi
stórátak í hættu og gúffa í mig
sterakjöti og mettuðum fitusýrum. Ef lesendur vilja deila
uppástungu að möstsíi í NY er það
gvöðvelkomið.
---
Kannski er íslensk tónlist orðin
nógu rótgróin til að hægt sé að
setja á fót svona "rokktúr" í Reykjavík.
Take the Icelandic music tour - only 2000 kr. Maður ætti kannski
að fara út í þennan bransa í sumar. Your
host, the legendary Dr. Gunni, author of Eru ekki allir í stuði
(útdráttur á ensku fylgdi með). Ég þyrfti
litla rútu og svo væri byrjað á Hótel Borg.
"Here Björk used to get drunk as a teenager and play with Tappi tíkarrass".
Ég myndi benda á Iðuhúsið -- The Sugarcubes
played their last gig here in 1992 at Tunglið, but the original house
burned down. I lost my drum machine here in 1991 too, he he. Svo yrði
rúntað á Ægissíðuna og allir færu
út fyrir framan húsið hennar Bjarkar og tækju myndir.
She's not home now but if you look closely you might see her son, Sindri.
Slatta af öðrum stöðum væri hægt að bæta
við túrinn en auðvitað yrði endað í Álafosskvosinni
hjá Sundlaug Sigur Rósar. Kannski næðust samningar
og túristunum yrði boðið inn í jurtate. Hmm?!
26.02.07
Í gær var dagurinn sem VG varð
aftur að 10% flokki. Það gerðist þegar Agli Helgasyni
tókst glottandi og lúmskur að veiða það
upp úr foringjanum að hann myndi gjarnan koma upp "netlögreglu".
Steingrímur var auðvitað of heyrnarlaus af jarmi jákórs
helgarinnar og móðursjúku helgislepjunni síðustu
daga til að fatta hvaða fasísku vitleysu hann var að
láta út úr sér. Einmitt, netlöggu! Svona
eins og í Kína. Og banna svo bara allt klám. Svona
eins og í miðausturlöndum. Vei frábært.
25.02.07
Áhugafólk um girðingar í
Ástralíu athugið: þetta.
---
Hugmyndin var að fjölskyldan færi
austur fyrir fjall og skoðaði drauga- og álfasafnið
á Stokkseyri. Sem betur fer hringdi ég á undan mér
til að athuga verðið og hætti snarlega við þegar
í ljós kom að það kostaði 1500 inn á
draugana, og 1500 á álfana. Þetta hefði því
kostað 6000 kall fyrir okkur hjónin að skoða. Sorrí
þið framtaksömu einstaklingar, það er bara alltof
mikið. Ég hefði látið mig hafaða fyrir 3000
kall, en djísús kræst 6000!?
---
Við spöruðum því stórfé
með að halda okkur í bænum. Lóna í halarófu
niður Laugarveginn og glápa á fríkin, fara í
bakarí og maula bakkelsi við Vífilsstaðarvatn, glápa
á nýbyggingar í landi Kópavogs á Vatnsenda
(og ekkert smá helvíti sem er risað af húsum þar!),
og svona fjölskyldudót. Svo leigðum við videó
– Ice age 2 og Art School confidential – og lágum á meltunni.
Klassík.
---
Maður þarf alltaf að hugsa um menningarsambandið
við Finnana og hér eru fimm finnskar hljómsveitir á
Mæspeis:
M.A.Numminen
& DJ Sane (Numminen er leg-endi í Finnlandi og hér
tvistar hann með dj)
The
Micragirls (Krampsaðar stuðstúlkur)
Risto
(Víðfermt rokkband með diskó og svo framvegis töktum)
Circle
(stálslegið eðalhjakk)
Rehtorit
(Stuðpönk)
---
Menningarviðburðirnir svoleiðis hringlandi.
Vorið
er franskt og eitthvað dót á leiðinni sem maður
kannast við, t.d. Nouvelle
Vague á Nasa 26. apríl. Þetta er bandið sem
tekur nýbylgjusmelli í bossanóva og hefur gert tvær
plötur. Svo held ég að Air séu á leiðinni
líka. Eiga að spila í Höllinni í byrjun júlí.
---
Svo rignir kvikmyndaveislum. Fjalakötturinn
alveg rakið dæmi, Græna
ljósið dúndurstuð og Kvikmyndasafn
Íslands með pakkaða pakka. Manni þarf því
ekki að leiðast. En ef manni leiðist og kann á veghefil
þá er ísí vei át því Ístak
auglýsir nú eftir manni til að vinna á veghefli
á Jamaika. Ja man.
24.02.07
Sögur hafa gefið út geisladiskinn
Dr. Gunni & vinir hans syngja og leika lögin úr söngleiknum
Abbababb! Hann fæst í öllum betri plötubúðum
og í Hafnarfjarðarleikhúsinu á meðan á
sýningum stendur. En þá er það einn spikfeitur
Topp 5imm!
Charles
Wright & The Watts 103rd Street Rhythm Band - Express Yourself:
Ekki er laust við að látlaus keyrsla á Dressmann-auglýsingu
þar sem þetta grúví lag er notað hafi troðið
sér ógætilega í heilabörkinn á mér.
Eins gott að ég átti þetta á safnplötunni
The history of funk vol. 1 - In yo' face, en sem betur fer keypti enginn
þann fönkpakka í cd-sölunni miklu í fyrra.
Lagið náði 12 sæti í USA árið 1970,
en Charles er enn í góðu stuði með heimasíðu
og allt.
Curver
+ Kimono - Chelsea Hotel: Út er kominn hraunkantaður
samkrullsdiskur Körversins og Cimono sem iðar í tilraunaspikinu.
Hér gefur að heyra opnunarlag disksins. Lagið mun ef til
vill fjalla um Chelsea hótelið
í NY, en þar áttu Sid og Nancy sín þrumuskot
í æðarnar og fleira heimsfrægt listalið lónaði
um gangana. Sjálfur hef ég gist þarna eina nótt,
en það var ekki upp á neitt annað en djók.
Öllu þægilegra hótel í NY er Milford
plaza, en þar hefur reyndar enginn dópisti gert neitt
eftirminnilegt, svo ég viti að minnsta kosti. Gestir virðast
aðallega vera feitir miðríkjamenn á dráttarvélaráðstefnu.
The
Nightingales - Let's think about living: The Nightingales er frá
Birmingham og eitt af þessum traustu ensku böndum sem hjakkar
áfram í svita síns andlits (sjá The Mekons,
The Fall o.s.frv.). Upprunnið í pönki og hét einu
þá The Prefects. Bandið mun hafa hafið leik 1979 (Prefects
1977) og er enn að með hléum. Nýjasta platan þeirra
kom út í fyrra (Out of time) og þessi glaðningur
eftir Bob Luman af henni ætti að koma mönnum í "gírinn".
Mér skilst að The Nightingales hafi gert fleiri John
Peel-sessjónir allra banda, fyrir utan The Fall.
Bónus 1: Bob
Luman - Let's think about living (orginallinn - náði #7
í USA 1960.)
Bónus 2: Prefects
- Escort girls (glaður pönkari af "The Prefects are amateur
wankers" með efni frá því um 1978).
Yoko
Ono & Peaches - Kiss kiss kiss: Mætt er konan sem margir
elska að hata því hún skemmdi að sögn
fyrir Bítlunum. Ég verð auðvitað fyrstur út
í Viðey til að skoða súluna hennar enda búinn
að glápa á Dakota bygginguna og eitthvað friðardót
sem hún lét planta í Central park. Nú er ekkjan
glaða búin að gefa út Já, ég er norn
þar sem hún fær rjómann af rokkinu til að
púkka upp á katalókinn. Hún er Fíkjan
með henni í góðu stuði í einu af betri
lögum Ono, en lið eins og Flaming Lips, risadúkkan Antony,
The Blow og Spiritualized koma einnig við sögu.
The
Stranglers - Spectre of love: Smekklegur smellur af 16. plötu
Kyrkjara, Suite XVI, sem kom út í fyrra. Gleðjast nú
pönkaðir gumar því Stranglers koma enn á ný
til landsins þann 6. mars og spila í Nasa. Nú er bandið
blessunarlega laust við sterahelmútinn sem söng með
því í Kópavogi í hitteðfyrra. Bandið
er auðvitað frábært og sagnfræðilega mikilvægt
því það kom með pönkið til Íslands.
Til gamans birti ég hér kafla úr Eru
ekki allir í stuði, sem fjallar um fyrstu komu bandsins
til Íslands árið 1978:
Í Englandi höfðu The Stranglers
fengið þá "flippuðu" hugmynd að kynna þriðju
plötuna sína, Black & White, á Íslandi. Hljómsveitin
var á öldufaldi pönkvelgengninnar eftir tvær LP-plötur
árið áður og þeirrar þriðju var beðið
með miklum spenningi.
Á þessum tíma var Steinar
Berg að stíga sín fyrstu spor með plötubúðarrekstur,
en hann hafði gefið út nokkrar plötur, sem margar hverjar
höfðu selst vel. Gunnlaugur Sigfússon var eini starfsmaður
fyrirtækisins ásamt eigandanum, og stóð vaktina
í plötubúðinni, sem hafði aðsetur í
Karnabæ. Vegna þess hve Steinar hafði selt vel af plötu
ELO árið áður barst inn á borð til hans
fyrirspurn frá umboðsskrifstofu Stranglers: Hvort fyrirtækið
gæti hjálpað til við að skipuleggja blaðamannafund
og jafnvel tónleika?
"Ég var brjálaður Stranglers-aðdáandi
og hvatti Steinar til að kýla á þetta," segir Gunnlaugur.
"Honum fannst hugmyndin spennandi, en var samt efins. Það verður
að taka inn í myndina að þarna um vorið 1978 var
fólk ekki að hlusta á pönkrokk eða nýbylgju.
Steinar var nýtt fyrirtæki og varð að skapa sér
sérstöðu. Við vorum dálítið upp við
vegg. Þar sem hinar búðirnar höfðu umboð
fyrir flest stóru erlendu útgáfumerkin, lenti mikið
af pönkinu og pöbbarokkinu hjá okkur, en við tókum
ekki inn nema kannski fimm eintök af hverri plötu. Ég
keypti eitt eintak, sendi eitt beint til einhvers gaurs sem var á
vertíð í Vestmannaeyjum, og svo var mesta streð að
koma hinum þrem út. Þeir sem voru að fylgjast með
tónlist af áhuga voru allir inn á "West-coast/LA"-línunni,
hlustuðu á Jackson Browne og þannig músik. Ég
man að einu sinni kom Hilmar Örn Hilmarsson (síðar
heilinn á bakvið Þeyr) í búðina og ég
leyfði honum að heyra nokkur lög af Never mind the bollocks
með Sex Pistols. Hann þóttist hafa gaman að, en sagði
mér síðar að hann hugsaði "hvað er gaurinn
eiginlega að éta?", þegar hann fór út."
Steinar var tvístígandi um tíma,
bauð Hrafni Gunnlaugssyni að fá Stranglers á Listahátíð,
en þar sá Hrafn um innflutningsmál. Þegar Hrafn
fúlsaði við pönkinu kýldi Steinar sjálfur
á dæmið, enda átti áhættan að
skiptast á milli hans og erlendu umboðsskrifsstofunnar. Mikil
áróðursmaskína fyrir The Stranglers fór
því í gang á vormánuðum. Nýjasta
myndbandið með The Stranglers (við lagið "Five minutes")
fékkst keyrt látlítið í Sjónvarpinu
og Sigurjón Sighvatsson og gamli Kinks-innflytjandinn Baldvin Jónsson
tóku að sér kynningarmál með Steinari.
"Einu sinni kom strákur í rifnum
jakkafötum með sikkrisnælur í búðina og
ég var alveg viss um að þetta væri túristi,"
segir Gunnlaugur. "Svo var þó ekki og hann keypti fyrstu LP-plötuna
með The Clash. Mér fannst svo mikið til koma um þennan
sálufélaga í pönkinu að ég gaf honum
góðan afslátt af plötunni. Daginn eftir kom strákurinn
aftur og sagðist hafa fengið of mikið til baka. Við urðum
miklir mátar upp frá þessu. Hann hét Einar Örn
Benediktsson og hann var fenginn til að hengja upp plaköt fyrir
Stranglers-tónleikana um allan bæ."
2% þjóðarinnar verður
vitni af pönki
Tónleikum The Stranglers var gefið
heitið "Hot Ice" í höfuðið á Hljóðrita.
Laugardalshöllin var leigð undir verknaðinn og þriðjudaginn
2. maí mætti bandið með sitt hafurtask, 4 tonna 4000
vatta söngkerfi, og fjölmarga blaðamenn og bransakarla í
eftirdragi. Hljómsveitin hitti blaðamenn í Hljóðrita
og fór um kvöldið í Klúbbinn þar sem
hljómsveitin Tívolí var að spila, en stoppaði
stutt, þrátt fyrir að margar smápíur væru
sérstaklega mættar til að komast í tæri við
stjörnurnar.
Dagurinn eftir var þéttbókaður.
Fyrst blaðamannafundur í Skíðaskálanum á
Hveradölum, þar sem nýja platan var spiluð í
botni og hljómsveitin ljósmynduð í hrauninu. Svo
voru það sjálfir tónleikarnir. Áróðursmaskínan
hafði greinilega virkað því um 5000 manns voru mættir
til að sjá nýbylgjupönkið með eigin augum.
Þursaflokkurinn hætti við að spila því
hann hafði ekki fengið sándtékk, en Póker
létu sig hafaða og voru klappaðir upp. Á milli atriða
sprelluðu Halli og Laddi í góðu gríni, bæði
á íslensku og ensku, enda aldrei að vita nema þeir
gætu meikaða líka þegar svona margir útlendir
áhrifamenn væru að horfa. Eftir 20 mínútna
hlé komu Kyrkjararnir og byrjuðu án formála. Sveitin
rokkaði hrátt og hávært í rúmlega
klukkutíma og áberandi var að ungir krakkar, þetta
13-18 ára, skemmtu sér best. Fullorðnara fólki
fannst þetta heldur klént, og tautaði að það
væri helst hljómborðsleikarinn sem gæti eitthvað.
Eins og tónleikar Tony Crombie & His
Rockets höfðu kveikt rokkneistann á Íslandi 1957
voru það tónleikar The Stranglers 1978 sem sáðu
pönkfræjum hjá móttækilegri æskunni.
Þetta var mikil opinberun fyrir marga og viðhorfið gagnvart
þessari tegund tónlistar tók að breytast. Gunnlaugur
hjá Steinari þurfti að panta fleiri en þessi venjulegu
5 eintök af plötunum og smá saman vatt snjóboltinn
upp á sig þar til hann rúllaði yfir allt sem fyrir
var rúmu ári síðar.
En Stranglers voru ekkert að hugsa um þessi
mótunaráhrif þegar þeir fóru í
Hollywood eftir tónleikana í brjálað fjör
frameftir morgni. Hinn ýturvaxni trommari Jet Black var einna hressastur
og gekk um með ginbrúsa sem hann heimtaði að fólk
svolgraði af. Hinir voru rólegri, bassaleikarinn og karatefríkið
JJ Burnel át t.d. salat allt kvöldið og drakk mjólk,
en allir fóru þeir þó heim á hótel
með píur, nema hljómborðsleikarinn sem hafði
komið með kærustuna með sér.
Blaðamenn niðurlægðir
Í stórskemmtilegri bók um
sögu The Stranglers, No Mercy, eftir David Buckley, rifjar Jet Black
upp íslandsferðina og ýkir stórlega: "Sumir þessara
16-17 ára krakka á tónleikunum mættu með
heilu flöskurnar af spíra með sér. Þegar við
byrjuðum að spila hugsuðum við, "Vá, mikið er
fólkið ánægt með að sjá okkur!"
Það var mikil hrifning, en í lokin var skollið á
stríð. Fólk var brjótandi flöskur á
hausnum á hvoru öðru, krakkar liggjandi út um allt
ælandi. Glundroðinn var algjör. Ég spurði strák
eftir giggið, "látiði svona vegna tónlistarinnar?",
og hann sagði, "Nei, þetta er svona á hverju kvöldi!"
Annars minnast Kyrkjararnir ferðarinnar helst
fyrir það að þeir komu fram hefndum við nokkra
af þeim ensku blaðamönnum sem þeim var sérstaklega
illa við. Einn var vitlaust settur upp á ótemju og datt
af í miðjum útreiðartúr og öðrum
var ýtt í hver og brenndist á fæti. Enn einn
var niðurlægður á blaðamannafundinum í
Hljóðrita. "Nú birtist blaðamaður New Musical
Express," skrifaði Ásgeir Tómasson í Dagblaðið,
"gufulegur náungi sem dró býfurnar á eftir
sér. Hann sagði eitthvað við Hugh Cornwell (söngvara
og gítarleikara), sem lagði snarlega frá sér blaðið,
sem hann hafði verið að lesa. "Segðu okkur bara hvert þú
vilt fara," sagði hann. "Við skulum borga fyrir þig fargjaldið,
þó að þú ætlir alla leið til Mars.
Komdu þér bara í burtu eins og skot!" Nokkur frekari
orðaskipti fóru þeim tveimur á milli, en Hugh hamraði
sífellt á því að náunginn skyldi
koma sér í burtu, hvað sem það kostaði.
Að lokum lufsaðist blaðamaðurinn í burtu. Jet Black
fylgdist með atvikinu án þess að hafast að. "Þessi
gaur hefur gert sér far um að rangsnúa öllu sem
við gerum og draga fram það, sem hann finnur á móti
okkur," sagði hann. "Það hlýtur að vera allt í
lagi að vera andstyggilegur við þá sem leggja sig
í lima við að vera andstyggilegur við þig."
Stund hefndarinnar rann þó ekki
upp af alvöru fyrr en í rútunni út á flugvöll
á leiðinni af landi brott. Þá skoraði blaðamaður
London Times, sem búinn var að liggja í bleyti allan
tímann á Íslandi, á pönkarana í
drykkjukeppni. Blaðafulltrúi bandsins, Alan Edwards, segist
svo frá í bókinni: "Þessi gaur var algjör
efristéttar uppskafningur. Ég held m.a.s. að hann hafi
verið með einglyrni. Allavega, hann hélt að hann hefði
í fullu tré við pönkarana og sagði, "ég
get léttilega drukkið ykkur undir borðið". Þá
ákvað JJ að kenna honum lexíu. Við erum alveg
að koma á flugvöllinn þegar JJ ræðst á
hann, heldur honum niðri og hellir heilli vodkaflösku niður
kokið á honum. Gaurinn dettur út úr rútunni
og ég er ekki að ýkja; það spýttist
æla út um eyrun á honum! Svo dó hann á
gangstéttinni. En, þetta voru Stranglers, svo í staðinn
fyrir að hringja á sjúkrabíl, setja þeir
gaurinn steindauðann upp í hjólastól og trylla
honum um flugvöllinn. Hann er allur út í ælu,
hálfpartinn búinn að missa brækurnar niðrum
sig, og allir blaðamennirnir og ljósmyndararnir eru kallaðir
til að verða vitni af þessu. Stranglers létu m.a.s.
taka af sér myndir fyrir aftan gaurinn dauðann í stólnum.
Frekar sjúkt dæmi!"
Bónus 1: The
Stranglers - Nice 'n' Sleazy - Taumlaus snilld af "íslandsplötunni"
Black & white. Bandið tók þetta lag ekki í
síðustu heimsókn en vonandi rætist úr því
núna. Ég vek athygli á þættinum Menn
í svörtu á Rás 2, en þar ætlar
Jakob Smári að rekja sögu meistarana. Fyrsti þátturinn
er á þriðjudaginn.
Bónus 2: J.J.
Burnel - Goebbels, Mosley, God And Ingrams: Bassaleikarinn og karate-meistarinn
JJ Burnel ku hafa gefið út tvær sólóplötur.
Ég hef bara heyrt þá fyrri, Euroman Cometh frá
1979, sem mér þykir mikið til koma. Sú seinni kom
1988 og svo hafa þeir David orgelleikari gert eina plötu saman
árið 1983. Maður þarf auðvitað að athuga
þetta stöff. Lagið hér er aftur á móti
frá árinu 1980 og kom út á flexidiski. Ég
vissi nú ekki einu sinni að þetta væri til en hoppaði
auðvitað hæð mína í loft upp þegar
ég rakst á þennan flexidisk í Safnarabúðinni
á dögunum. Það getur borgar sig að gramsa í
Safnarabúðinni.
23.02.07
Ég hef litlu við klámfarsann
að bæta sem Magga best
og Megellan hafa ekki sagt
nú þegar, nema kannski það að gaman væri
að ímynda sér viðbrögðin ef ráðstefnan
hefði verið fyrir fólk í samkynhneigða klámbransanum.
Svo missti ég endanlega alla löngun til að taka þátt
í svokölluðu lýðræði í maí,
enda ekkert í boði nema hjarðdýr og gungur, og það
ótrúlega gerðist að aldrei þessu vant get ég
tekið undir það sem fýlupokarnir á Andríki
segja. Ísland er Færeyjar norðursins.
---
Friðleifur endurheimti Bee Gees plötuna
sína í gær, en hana lét hann frá sér
árið 1970. Lauk þar sögu 37 ára aðskilnaðar.
Uppsett verð: 1000 kr. Í gær seldi ég líka
Gunnari Bjarna úr Jet Black Joe Gibson SG junior gítarinn
minn, einnig 1970 módel, en ég og þessi gítar
náðum aldrei almennilega saman. Uppsett verð: 110.000 kr.
---
Ég veit hvar Ég og heilinn minn
endaði í Eurovision en var skildaður í þagnarbindindi.
Ég vil nota þetta tækifæri til að þakka
öllum sem kusu lagið og styrktu kaffisjóð Símans
um það sem nemur glænýrri smábifreið
með aukabúnaði.
22.02.07
Hvernig er það, geta þá
Bændasamtökin ekki líka látið undan annars
konar þrýstingi og lækkað verð á kjöti?
---
Er klámráðstefnan byrjuð?
---
Því miður hefur svartagallstexti
Jóhanns G. Jóhannssonar í lagi Óðmanna
"Spilltur heimur" (SG-546, útg. 1970) staðist tímans
tönn. Þar sem Jóhann er sextugur í dag (og heldur
upp á afmælið á heimasíðu
sinni) er engin ástæða til annars en að splæsa
þessu frábæra lagi á mannskapinn. Vesgú:
Óðmenn
- Spilltur heimur. Áhugasamir ættu að nota daginn
til að redda sér Óðmönnum komplett, enda leitun
að betri bandi á Íslandi. Það væri þá
einna helst tvöfalda platan þeirra frá 1970 sem er væntanlega
ekki til svo það er kannski ekki um annað að ræða
en Tónlist.is.
---
Borðaði 1 og 1/2 bollu á sunnudaginn,
enga á Bolludaginn. Borðaði ekkert saltkjötogbaunir.
Dagbjartur var bifvélavirki á Öskudaginn og alsæll.
Það bregst annars ekki að það er alltaf vitlaust
veður á Öskudaginn og í minningunni eru uppáklæddir
krakkar sífellt fjúkandi um í óveðrinu.
---
Máttur internetsins er mikill. Hér
að neðan sagði ég frá Idea-plötu Bee Gees
sem ég keypti í Safnarabúð Valda. Samkvæmt
kúlupennamerkingu á umslaginu var platan áður
í eigu Friðleifs Kristjánssonar, Hlégerði
16. Í gær hringir sjálfur Friðleifur, líklega
um 30 árum eftir að hann lét plötuna frá
sér, og fullur vonar biður mig um að selja sér plötuna
til baka. Ég, sem skil vel þá tilfinningu að vilja
eignast aftur það sem maður lét frá sér
í bríaríi, sagði að það væri
auðvitað velkomið. Friðleifur er því á
leiðinni til að sækja plötuna. Ég myndi segja
að þetta væri falleg saga úr hversdagslífinu.
---
Það er alltaf glápt aðeins
meira en venjulega næstu dagana eftir að maður hefur sést
í sjónvarpinu að einhverju ráði. Þannig
hrósaði stuðpiltur mér í hásterti í
Bónus á mánudaginn og virtist með þetta
allt á hreinu. Á Eiðistorgi snéri eldri konu með
slæðu sér í hálfhring og sagði á
eftir mér: Þú ert bara svona stór.
---
Einn af uppáhaldsþáttunum
mínum á Rás 1 er Pipar
og salt sem Helgi Már Barðason stýrir. Þar
er komin gamla góða hljóðmyndin sem maður ólst
upp við á skömmtunartímum fyrri alda, tónlist
sem móðir manns vaskaði upp við, tónlist sem
maður hékk í pilsfaldinum á. Stöff úr
"lögunum við vinnuna". Unaðslegt six- og seventíspopp
sem maður fór að hata með gelgjunni en ólgar
nú af ljúfsárri nostalgíu. Missi ekki af þætti!
---
Til að gefa gleggri mynd af því
um hvað ég er að tala er hér sýnishorn: Dr.
Gunni - Til ama mömmu. Hér er ég að böggast
á móður minni við uppvaskið og hvað annað
en lögin við vinnuna heyrist í bakgrunni. Þetta er
upptaka frá sirka 1980. Ég vissi aldrei hvaða lag þetta
var fyrr en ég keypti notaða plötu með Gilbert O'Sullivan.
---
Nú birtast Bakþankarnir á
Vísi. Hér
er t.d. Bakþanki dagsins sem fjallar um skallafordóma.
21.02.07
Manni heyrist að nú eigi að kynda
upp í stríðsarninum til að rebúblikkandi hanar
eigi séns á endurkjöri. Kaninn malar nú ansi
stíft um árás á Íran sem ég skil
ekki alveg hvernig á að ganga upp. Þeir eru þegar
með allt niðrum sig og skítinn lekandi úr rassgatinu
í Írak sem þó er þrisvar sinnum fámennara
land. Tja, nema það eigi bara að taka kjarnorkupakkann á
þetta? Gleðilega útrýmingarhættu.
---
Jæja, þá er kosningabaráttan
að hefjast... (geisp) Varð fyrir því óláni
að stilla á Ástu Möller og Mörð Árnason
tuða um orkugjafa á Gufunni áðan og það
verður að segjast að Mörður hljómar með
leiðinlegri mönnum þegar hann kemst í míkrófón.
Engin furða að Samfokk sé að hrynja með honum, Tuðbjörgu
og öllu þessu liði – og svo hafnar flokkurinn almennilegu
fólki eins og Guðrúnu Ögmunds.
---
Jóhann
G er kominn á netið líka og heldur upp á 6tugs
afmæli sitt á morgun.
20.02.07
Tuttugu ár í haust síðan
Goð með S.H.Draumi var tekin upp. Planið er að fagna með
rímasteraðri endurútgáfu og aukadisk í
veglegum pakka. Ekkert kombakk í pípunum hins vegar.
---
Meistari Hallbjörn
Hjartarson er kominn á netið!
---
Abbababb fær
eðlilega einróma lof gagnrýnenda sem eitthvað mark
er takandi á. Í Víðsjá
á mánudag mátti heyra Þorgerði E. Sigurðardóttir
segja þetta meðal annars: Eins og flest góð barnaleikrit
höfðar þetta verk bæði til barna og fullorðinna
en ekki endilega á sama plani. Í raun efast ég um
að börnin skilji allt sem gerist hér, til dæmis held
ég að munurinn á pönki og diskói sé
ekki eitthvað sem börn almennt átta sig á en það
skiptir í sjálfu sér ekki máli, slíkar
vísanir eru frekar ætlaðar fullorðnum. Þetta
er hreinlega þrælskemmtilegt og fyndið verk sem er ekki
ofhlaðið uppeldisboðskap eins og oft vill verða í
sambærilegu efni fyrir börn. Hér er auðvitað
verið að tengja saman lög af plötu sem hafa ekki sameiginlegan
söguþráð og verkið ber þess stundum merki
og verður dálítið sketsakennt, sérstaklega
framan af, en þetta skiptir í raun ekki höfuðmáli
í samhenginu, útkoman er bæði hröð og
fyndin. Og verkið er ekki alveg laust við boðskap en hann er
einfaldur: Það borgar sig að vera góður við
aðra og stríða ekki þeim sem minna mega sín.
Hér er mikið fjallað um vináttu og samstöðu
og það er auðvitað hið besta mál.
Heildaryfirbragð sýningarinnar
eru skemmtilegt, ekki of fágað heldur eru leikmynd og gervi
frekar einföld og gróf sem á ágætlega við
efnið og tónlistina. Það sama má segja um leikinn
sem er frjálslegur og áreynslulaus og laus við uppgerðarvæmni
sem stundum einkennir barnasýningar, söngurinn er hvorki of
fágaður né viðvanginslegur, þetta er einfaldlega
bara unnið á afslappaðan hátt sem kemur vel út.
Tónlistin er líka mjög skemmtileg og ber merki átakanna
milli tónlistarstefnanna í verkinu, þarna er rokk,
diskó og pönk ásamt ýmsu öðru. Þetta
er í raun tónlist sem höfðar til allra aldurshópa
og sameinar þannig áhorfendur með allskonar tónlistaráhuga
og -þarfir. Hér er börnum treyst til að tileinka
sér allskonar tónlist og ég gat ekki betur séð
í salnum en að það væri að takast ágætlega.
Framan af hafði ég nokkrar áhyggjur af því
að brotakenndur söguþráðurinn væri að
fara fyrir ofan garð og neðan hjá samferðafólki
mínu en róaðist all verulega þegar rétt
tæplega sex ára fylgdarmaður minn tilkynnti í hléinu
að hann hefði hug á því að sjá þessa
sýningu þúsund sinnum. Betri verða meðmælin
varla. Hann varð hinsvegar stundum dálítið hræddur
en það fór þó aldrei úr böndunum
og var innlifunin hjá honum gríðarleg, sérstakleg
í seinni hlutanum þegar spennan magnaðist verulega.
---
Við sýnum næst sunnudagana 25.
feb og 4., 11., og 18. mars og alltaf kl. 17. Við sýnum svo
vonandi tíðar þegar Orri Huginn losnar úr Ronju
ræningjadóttir. Platan með lögunum úr söngleiknum
er svo væntanleg í þessari viku.
18.02.07
Hér á heimilinu dreymdi okkur eintómt
rugl í nótt. Lufsunni dreymdi að hún væri
í hjartaþræðingu með Michael Caine. Þau
lágu hlið við hlið og hann kvartaði yfir því
hvað þetta væri helvíti vont. Minn draumur var enn
furðulegri. Ég var að taka þátt í Eurovisionforkeppninni.
Heiða var þarna líka í gullgalla og lagið var
einhver gífurleg poppsnilld um mannsheilann. Þetta var svaka
spennandi og ég hékk skjálfandi á bakvið
með fullt af uppstríluðu liði. Mér fannst eins
og ég væri staddur á ráðstefnu Star Treknörda.
Svo kom Björgvin Halldórsson og sagði mér að
þessi keppni væri nú bara "gay pride á sterum".
Ég er meira að segja ekki frá því að
á tímabili hafi ég verið farinn að halda að
við myndum vinna. Farinn að segja krökkunum í bakraddakórnum
frá skemmtilegum börum í Helsinki og eitthvað. Nei
nei, svo skíttöpuðum við bara fyrir Eiríki Haukssyni!
Meira ruglið...
---
Þá er bara að ná úr
sér hrollinum og sturta hér úr einum stórkostlegum
Topp 5imm:
Abba
- Watch out: Talandi um Eurovision. Keppnin náði hápunkti
sínum fyrir 33 árum. Þá bar Abba flokkurinn
sigur úr bítum. Hér er B-hliðin á Waterloo
singlingum frá 1974. Björn sjálfur syngur aðalröddina
í þessu mjög svo ótýpíska Abbalagi.
Ekki laust við að riffið sé málmkennt, næstum
Hamlegt. Lagið byrjar töff en villist nokkuð af leið er
á líður.
The
Shocking Blue - Love buzz: Abbalagið hér að framan
minnir nokkuð á tónsmíðar þessa hollenska
örlí seventíshóps, sem einna þekktastur
er fyrir hið almagnaða popplag Venus. Söngkonan hét
Mariska Veres og dó úr krabbameini í fyrra. Bandið
átti nokkur fín lög fyrir utan hittarann, eins og þetta
sem fólk kannast etv við af flutningi Nirvana. Sneddí
stöff.
Cause
co-motion! - Which way is up: Frá Brooklyn núna en
hljóma eins og það sé 1979. Minna mig bæði
á Swell maps og Television Personalities. Þetta er nýlegur
síngull.
Satanicpornocultshop
- .aiff skull: Japönsk garnaflækja. Gott á geðveik
grill. Lagið kom út á 7unda plötu sveitarinnar,
Orochi under the Straight Edge Leaves. Ekki fá heilahristing.
The
Besnard Lakes - And you lied to me: Benni í Maríspan
mælti sérstaklega með þessu kanadíska bandi
og plötu þeirra
"The Besnard Lakes Are The Dark Horse". Ég
tékkaði náttúrlega og er nokkuð sáttur.
Dramatískt og dulúðlegt, hintar að ýmsu (Flaming
Lips, Mercury Rev, Bee Gees, Beach Boys...) og vinnur snarlega á.
Jagjaguwar
gefa út.
7.02.07
900 2002
16.02.07
Jude Law var í morgunmat á 101
hótel. Ég passaði mig að glápa ekki á
hann þar sem hann fékk sér appelsínusafa beint
fyrir framan mig. Ekki vil ég spilla möguleikum Íslands
til að verða böggfrír viðkomustaður fyrir fræga
fólkið. Hann var í bláum náttbuxum. Eina
myndin sem ég man eftir að hafa séð hann í
er Gattaca, sem var nú frekar leiðinleg. Þess má
geta að Forest Whitaker brosti fallega framan í son minn á
Þjóðminjasafninu þegar hann var hér um árið.
Mér finnst dáldið flott að Idi Amin hafi brosað
framan í afkvæmi mitt.
---
Hér sjáum við félagana
Bruno, Claus og Jeppe á góðri stund á síðustu
klámárshátíð. Nú hleypur á
snærið því þeir og margir fleiri eru á
leið á nýja klámárshátíð
á Hótel Sögu. Þetta er auðvitað stórmál
og ljóst að kynningarherferðir Icelandair hafa skilað
tilætluðum árangri. Heilmikill fjölmiðlasirkus
er handan við hornið og femínistar munu fyllast heilagri
reiði og mótmæla pjöllunotkun í rúnkskyni
("mansal" o.s.frv.). Þetta er allt gífurlega fyrirsjáanlegt
en samt ólgandi spennandi sjónvarpsefni þar sem reiðar
konur munu hitta fyrir graðkarla sem þora ekki yfir strikið
og viðurkenna klámfíkn sína frammi fyrir reiðu
konunum og alþjóð, heldur munu tafsa um eitthvað allt
annað en rétt sinn til að rúnka sér yfir klámi.
Til að fá forskot á sæluna geta áhugasamir
lesið þetta
og svo skrollað yfir kommentin. Það mætti finna verri
umgjörð fyrir gott sitcom en graða karla versus skinhelga
femínista sem dýrka hið heilaga skaut. Bæði
hafa rétt fyrir sér, karlar hafa rétt til sjálfsfróunar
yfir myndefni af greyjum að riðlast eins lengi og greyin eru ekki
tilneydd til riðlunar (af því við erum sem betur fer
horfin frá því kristilega hugarfari að kynlíf
utan hjónabands sé viðbjóðsleg synd) og það
er rétt hjá konunum að þessi bransi er þroskaheftur
og niðurdrepandi fyrir sjálfsvirðinguna að vera alltaf
útglenntur og sullandi í vessum. Ekkert sem maður vildi
sjá einhvern nákominn sér enda í. Andleg rotþró.
En hei, vel borguð rotþró!
---
Eiki Hauks var í góðu stuði
í gær. Hef held ég aldrei hitt þennan öðling
áður. Fbl tók viðtal við okkur 2 með vinklinum
rauðhausar í Euro eða eitthvað álíka.
Ætti að birtast á morgun. Eiki var með ferðatöskuna
nýkominn úr vélinni í Start bol en það
var búið að eiga við t-ið frá orginal hönnuninni
því fólk hélt almennt að hann væri
í Smart bol. Orðið á götunni virðist vera
að Heiða eða Eiki séu vænlegastir vinningshafar
en ég þori ekki að hafa neinar væntingar. Hvernig
sem fer ætti maður alveg að fá þrjátíuþúsund
kall í stef-gjöld fyrir lagið eftir 2 ár.
15.02.07
Internetið er fullt af góðu stöffi.
Þetta vita allir þótt það vilji gleymast ef
maður hangir of lengi á tuðhaugunum. Hlekkir dagsins eru
í boði Blás Ópals
- klóróform fyrir krakkana:
Ahhh... Hér eru bráðskemmtilegar
myndasögur eftir Max Cannon, Rautt
kjöt. Hann birtir eina á dag og svo má fletta aftur
í aldir.
Ég hef alltaf verið hallur undir amerískt
"kits". Og á Bedazzled
eru haugarnir, línkar á Youtube-brot og annað drasl.
Hægt að gleyma sér góðum stundum. Meðal
efnis: Patti Smith í barnatíma og myndir úr gömlum
sirkus.
Nú stendur yfir massíf túristakynning
á Dalvík. Komdu til Dalvíkur og áttu exótíska
nótt, segir látlaus hali á Rás 2. Ég
er næstum búinn að panta en geri það varla því
ég á inni exótíska nótt á Hótel
Búðum sem ég vann þegar ég sigraði spurningakeppni
fjölmiðlanna á Rás 2 ásamt þessum
meistara í fyrra. Eins og allir vita var Jóhann risi
frá Svarfaðardal og hann var ekki bara risi heldur líka
töff gaur. Á netinu má finna góða
síðu um Jóhann hjá Júlla Dalvíkingi.
Hvar er dána fólkið núna?
Find
a death staðsetur hinsta stað stjarnanna og er að auki
með mikinn fróðleik um það óumflýjanlega.
Og á þessum nótum: Það er ekkert byrjað
að sjá á
see me rot
konunni. Klárast ekki batteríið áður en eitthvað
gerist?
Einhvern tímann spígspora ég
vonandi um á Tonga eyjum. Því er gott að undirbúa
sig og komast inn í málin með því að
tékka á Matangi
Tonga Online.
Eins og ég hef áður sagt er
WFMU besta útvarpsstöð í heimi. Liðið þar
er flippað og flott og línkabloggar hér.
Hægt að sökkva sér hægt í tímaeyðslufen.
Meðal efnis: línkur á Devo
upptöku frá 1973, en eins og allir ættu að vita
er Devo ekki bara ein af bestu hljómsveitum í geimi heldur
sú sem var einna mest á undan sinni samtíð (eins
og sjá má á þessu myndskeiði).
Talandi um stöff á undan sinni samtíð:
Hljómsveitin
Monks. Það er ljóst að maður þarf að
sjá heimildarmyndina um þá og svo er tribjútplatan
fín og m.a. með Singapore Sling innanborðs.
Ef B2/69
er fyrir graða unglinga þá er Boing
Boing línkasíða fyrir snillinga eins og þig.
Allskonar áhugavert í boði, t.d. þessi giftingarmynd
sem sýnir fram á sigur ástarinnar og hér er
saganá
bakvið myndina.
14.02.07
Árni
Torfason tók myndir af Abbababb! Hér eru nokkrar:
Hr. Rokk & Rokkarnir. Hringferð með
Halla og Ladda í sumar?
Meðlimir Rauðu hauskúpurnar, þau
Aron Neisti, Halla og Óli, ásamt Systur Óla, Systu.
Engin verðlaun í boði fyrir þann sem getur upp á
hvaða lag hér er verið að syngja.
Rauða hauskúpan planar stórfenglega
uppljóstrun.
Stóru strákarnir, Gulli og Steindór,
vilja meira diskó og ekkert pönkrugl.
---
Fyrsti dómurinn um Abbababb! er kominn
í Mogganum. Ég var hreinlega með hjartað í
buxunum enda hef ég aldrei fengið leikhúsgagnrýni
áður. Mér til mikillar gleði og ánægju
er dómurinn bæði jákvæður og sanngjarn,
þótt ég sé ekki endilega sammála öllu.
Til dæmis segir að ég "ofnoti það stílbragð
að láta áherslur falla vitlaust í orðum" og
að það virðist visvítandi. Ég verð
því miður að játa að ég er svo vitlaus
að ég áttaði mig ekki á þessu fyrr en
Biggi benti mér á þetta í upptökuferlinu.
Samkvæmt honum erum ég og Megas einu mennirnir sem gera þetta.
Þetta bara flæðir svona út hjá mér,
enda sem ég alltaf melódíurnar fyrst og textana síðan.
En allavega, hér er dómurinn.
13.02.07
Þó Mogginn sé búinn
að fatta að blogg sé til þýðir það
ekki að blogg sé orðið eitthvað skemmtilegra en
það var. Sama tuðið upp til hópa. Stundum tek
ég bloggrúnt í leit að einhverju skemmtilegu (ok,
einhverju um sjálfan mig) og sárasjaldan finn ég eitthvað
skemmtilegt, eiginlega bara ekki rassgat (tja, Katrín
er alltaf ágæt, Simmi
á Xinu er stundum góður, Freedom
fries er fínt ef maður nennir að spá í
bandarískri forheimsku og svo er ég örugglega að
gleyma einhverju). Það gerðist þó í dag
að ég aulaðist inn á blogg sem ég hef aldrei
séð áður, en það er svo skemmtilega ófyrirleitið
og vel skrifað að ég er búinn að eyða kvöldinu
í að lesa það komplett. Algjörlega langskemmtilegasta
bloggið í dag og enskur texti fyrir Mig og heilann minn að
auki. Má ég kynna: Blogg
Mengellu! Hvaða stórfengilegi meistari er þetta eiginlega?
Mér dettur einna helst í hug Enter hjá Baggalúti,
þó hann hafi nú varla tíma í þetta
líka.
---
Kristilegir skandalar á færibandi.
Fyrst Byrgið, svo Breiðavík, næst: Bjarg. Lesbískur
sadismi og fleira stuð. Lesið um það hér!
---
Gunnar Hansson tók við mig viðtal
fyrir barnaþáttinn Vitanná
Rás 1. Það verður sent út á morgun kl.
19. Ég stórgræddi á þessari ferð því
hann gaf mér Sigti-disk. Á disknum er aukaefni sem er ekkert
smá erfitt að fatta, en það má lesa sér
til um það hér.
Gunnar fór ekki tómhentur af þessum fundi því
ég gaf honum dós af Sarsi, en ég hafði verið
að byrgja mig upp af Sarsi í Sælkerabúð Nings.
Gunnar þykir rótarbjór góður sem er sjaldgæfur
kostur. Flestum finnst rótarbjór eins og tannkrem. Það
er della.
---
Einu sinni var karl sem gat prumpað á
stórkostlegan hátt. Það má segja að
þetta sé hinn orginal prumpukarl. Hann hafði atvinnu af
þessu og var með sjó á Rauðu myllunni í
París. Ef þú trúir mér ekki tékkaðu
þá á þessu.
Djöf... hefði verið gaman að sjá þetta!
---
Frumsýning afstaðinn og maður
í lausu lofti að þurfa ekki að mæta á
stífar æfingar daglega. Gekk rosavel og allir gífurlega
glaðir. Svaka partí og maður er enn að jafna sig. Nú
má einnig kaupa miða á midi
puntkur is.
---
Þá er hægt að byrja að
fá í magann og svitna fyrir Eurovision næsta laugardag.
Það er ansi bjánalegt eitthvað að standa í
keppni með popplag eftir sjálfan sig, en selaví. Samkvæmt
áræðanlegum heimildum erum við önnur á
svið, sem er svo sem ekkert verra en hvað annað...
---
Úlpur, ullarvettlingar og síðar
nærbuxur athugið: Hörku fínt nýtt Múm
stöff í Hlaupanótunni hér.
11.02.07
Stór dagur. Abbababb! söngleikurinn
frumsýndur í dag. Forsýningin var í gær
og gekk vel. Krakkarnir gríðarglaðir, allt niður í
2 og hálfs árs, mikið stuð og gleði. Fáum
okkur nú Topp 5 til niðurróunar fyrir frumsýninguna
miklu:
M.O.T.O.
- Ghosts: Í tilefni frumsýningarinnar er hér
boðið upp á orginal útgáfuna af Dodda draug.
Lagið kom út á smáskífu 1992 en M.O.T.O.
(Masters of the Obvious) er ævagamalt rokkband frá Chicago
sem Bless spilaði nokkur gigg með á sínum tíma.
Aðaldúddinn heitir Paul Caparino og semur helvíti melódísk
og skemmtileg lög sem er vel þess virði að tékka
á, t.d. á murdochsíðu
sveitarinnar. Bandið er í fullu fjöri en með allt
öðru lænöppi en þegar Bless spilaði með
þeim. Þá var Paul bara einn með stelpu sem trommaði
og fannst Moe Tucker ýkt kúl. Bónus: M.O.T.O.
- Rot rot rot: stórkostlegt lag um líf nútímamannssins
og óumflýjanlegan dauða hans. Kom út fyrir langa
löngu.
Boney
M - Daddy Cool: Er þetta besta lag allra tíma? Það
er ekki laust við það. Geðveik bassalína, þýskar
strengjamottur og Þórir Baldursson með fingur á
tökkum. Magnað helvíti. Ég reyndi hvað ég
gat að verjast safaríkum heilaþvætti Boney M á
mínum mótunarárum í pönkinu en man að
ég var sólginn í þetta lag. Á svokölluðu
"pönkballi" í skólanum var þetta lag leikið.
Mér fannst það auðvitað alveg fáránlegt
og hugsaði, hvar eru Buzzcocks?, en þó laumaðist ég
auðvitað til að dilla mér við Pabba kúl,
enda fjandakornið ekki annað hægt.
Bee
Gees - Idea: Brautriðjendastarf í þágu
fyrstu platna Bee Gees heldur áfram. Nú er það
titillagið af 3ju plötu Gibbbræðra, poppsýrður
rokksmellur. Lagið er tekið af rispaðri plötu keyptri
í geisladiskabúð Valda og samkvæmt plötumiða
er upprunalegur eigandi Friðleifur Kristjánsson, Hlégerði
16, Sími 40709. Bónus: Bee
Gees - I started a joke, þekktasta lagið af þessari
plötu.
Arcade
Fire - Intervention: Ákveðin yfirhæping er yfirvofandi
á nýlekna plötu þessara. Hefi hlustað lítillega
á hana, alveg þokkaleg held ég en það sem
mér finnst standa upp úr er hvað Arcade Fire minnir mikið
á eitís hljómsveitina The Triffids frá Ástralíu.
Söngrödd og fílingur, jafnvel útlit, er vel samanburðarhæft.
Þetta mun vera fyrsti síngull nýju plötunnar.
The
Triffids - Wide open road: Þetta er gamalt uppáhaldsband
og ég er hrifnastur af fyrstu plötunum. Á seinni skeiðum
urðu þau ansi poppuð og einum of late eitís gáfumanna-eitthvað.
Þetta er af plötunni Born Sandy Devotional (1986) sem er líklega
frægasta platan og þarna mitt á milli tímabilanna
tveggja. Þetta lag er líkast til frægasta lagið
þeirra. Bandið meikaði það aldrei alveg og söngvarinn
David McComb tók það líklega inn á sig því
hann drap sig á sukki 1999, þá að verða 37
ára.
---
Hef annars formlega breytt mæspeissíðunni
úr síðu hljómsveitarinnar Dr. Gunna (sem er ekki
líkleg til stórræða) í persónulegu
mæspeissíðuna mína. Samt er nú ekki líklegt
að ég nenni mikið að uppdeita mæspeisið, enda
er miklu skemmtilegra að athafna sig hér. Mæspeis er þungt
og leiðinlegt og eigandi þess er kúkur. Eiginlega ætti
maður bara að hætta þar alveg. |