11.10.07
Gamli góði Villi bara gamall og grafinn en Blóðsugan fær að vera með John F Kenn, ég meina Degi Bé, dóttir hans Svavars o.s.frv. Ég hef bara eitt að segja þessum nýja borgarstjórnarmeirihluta: Drullisti til að koma leikskólamálunum í lag! Líklega meiri séns að eitthvað gerist í þessum málum núna, allavega hættir Heimdellingaljóskan að mæta í viðtöl og tala um að það þurfi að hugsa "út fyrir rammann".
---
Gærdagurinn var alveg magnaður. Ekki nóg með að Lufsan gerði ljúffenga hráfæðisköku og börnin voru stillt og góð heldur fór ég í skrokkadekur og prófaði besta Sushi stað á landinu. Ég tók Heiðu með til Boga sem býr út á annanesinu Hlið og er með heimaveitingastaðinn Gullnahliðið og hið nýopnaða spa Alsæla. Einu sinni át ég þarna sem var dúndur. Þetta er gífurlega vinsælt eðlilega, ljúffengur tælenskur matur, og bókað fram á næsta sumar. Nú bauð Bogi mér sumsé í spaið í sárabætur fyrir boðsleysið út í Viðey, enda eðalmenni úr Kópavoginum. Eftir þriggja tíma pott, þarabað, jurtagufubað og tælenskt nudd sem fílsterk starfskona framkvæmdi við undirleik Friðrik Karlssonar (geri ég ráð fyrir) var maður eins og endurfæddur; táhreinn, últraslakur og glorsoltinn. Mæli með þessu fyrir hvern sem er sem vill lyfta sér á kreik andlega og líkamlega. Við brunuðum í Mai Thai búðina á Hlemmi til að kaupa tælenskt kaffi og engifer te sem okkur hafði verið boðið upp á og þótt svona líka geðveikt. Þaðan á Sushibarinn, Laugarvegi 2 (Gott í gogginn var þarna o.fl staðir), sem er toppurinn á sushiinu í dag. Ekki gefið svo sem, best fyrir 1 á 1500 kall, en svona líka ferskt og ljúffengt. Alger snilld. Alltaf fullt náttúrlega svo best er líklega að mæta kl. 11:30 eða eftir kl. 14:00.

10.10.07
Friðarsúla Lennon er 75.000 wött. Til samaburðar má geta þess að spilavítisljóssúlan í Luxor í Las Vegas (mesta ljóskeila í heimi) er 273.000 wött. Ágætt miðað við höfðatölu, sem sé. Gott að gamli góði Villi er ekki sleipari í ensku en þetta. Gaf þessu alíslenskan blæ. Gaman að sjá Hönnu Birnu og Björn Inga í sjónvarpinu með Yoko og Sean. Einmitt fólkið sem maður hugsar fyrst til í þessu sambandi. En ágætlega flott bara. Ég er jákvæður. Meira í Bakþanka á morgun.

09.10.07
Hér eru handhægar upplýsingar ef þig langar til að fá drullu.
---
Nei ég fékk ekki boðskort á súludans Yókóar. Fer til Boga í staðinn. Gamli góði Villi og blóðsugan verða vonandi ekki þar.
---
Ekkert lát er á okrinu. Verð í Capone kl. 08:45 á morgun að plögga.

07.10.07

Ekkert topp 5 þessa viku heldur mixfællinn Iceland Airwaves 2007 Fitubrennsla. Mixið er rúmlega klukkutími og inniheldur eftirtalin lög í svitaaukandi uppröðun:

Bonde de role - Office boy
!!! - Myth takes
Deerhoof - Scream team
Of Montreal - Suffer for fashion
Snake & Jet's Amazing Bullit Band - X-Ray Spirit
Jakóbínarína - (I've got a date with) my television
The Bronx - Heart attack American
The Teenagers - Starlett Johansson
The Duke spirit - Lion rip
Bloodgroup - Tiger
UMTS - Story of a star
Loney, dear - The city, the airport (CSS remix)
Grizzly bear - Knife (Girl talk remix)
Who knew - Wallabe
FM Belfast - Lotus
Johnny Sexual - Feel good hit of the summer
Chromeo - Tenderoni
Lali Puna - Micronomic
Best Fwends - M.Y.S.E.L.F. (Feat. Teena Ba$$)
Radio LXMBRG - Score on the floor
Seabear - Teenage kicks

Þetta er vitanlega bara brot af því stöffi sem verður á hátíðinni. Slefaukandi lænöppið er komið. Nóg að gera!
---
Syðsta súla, hæsta fjall Botnsúlna, er minn Moby Dick. Ég reyndi að klöngrast þarna upp í fyrra en gafst upp ömurlega nálægt toppnum vegna lofthræðslu og almenns aumingjaskapar. Þá fór ég frekar erfiða leið og bjóst því við að ég kæmist upp á topp í gær þegar önnur auðveldari leið var farin. Ég fór í fyrsta skipti á ævinni með skipulagðri ferð á vegum Toppfara, sem er lítill en ört vaxandi fjallgönguklúbbur sem mikið hugsjónafólk drífur áfram. Það gladdi mig mikið að í hópnum var Stebbi í Saktmóðigi, enda alltaf skemmtilegra að vera með einhverjum sem maður kannast við. Jæja, þetta gekk ágætlega framan af. Ég þaut upp hlíðarnar á móti hvínandi stormi. Leiðsögumenn með í för og allt, 26 manna hópur. Þegar nokkur skref (kannski 40 metrar) voru eftir á toppinn, missti ég móðinn, enda búinn að renna eitthvað smá niður og átti í miklu basli með að fóta mig. Það var hált þarna í móbergsklöppum og ég er með sjúklega svellfóbíu. Ef ég er ekki með öruggt land undir fótum breytast lappirnar á mér í gúmmíslöngur. Ég varð því eftir á meðan hópurinn tíndist á toppinn – 67 ára kona fór síðustu fram hjá mér og karlmennska mín mun aldrei bíða þess bætur. Svo fór ég á rassinum niður aftur. Helvítis aumingi sem maður er! En þessum Moby verður slátrað, bíðiði bara. Allt er þegar þrennt er og ég fer á toppinn í þurru næsta sumar só help mí Stefán Grímsson!
---
Þess má geta að annað fjall þarf ég líka að hefna mín á. Snemma á þessu fjallabröltferli gafst ég upp í hlíðum Baulu og snéri sneypulegur til baka á meðan félagar mínir í Blómeyju fóru upp. Ætli maður þurfi ekki að klára Baulahelvítið líka þótt óárennileg sé.
---
Ég mun vera 42 ára í dag. Deili afmælisdegi með Röggu Gísla (51) og Skapta Ólafs (meistarinn er áttræður í dag! Til hamingju!) Ég horfði með athygli á Laugardagslögin, en þarna verð ég eftir viku. Settið náttúrlega eins og frá 1987 (Egill klikkar ekki!) og ágætt stöff bara. Tvíhöfði og Óttarr Proppé og hvað vill maður meira?

06.10.07
Lee Hazlewood gigg Ununar (eða mín, Heiðu og Elvars) var ekkert slor og svo kom hver kanóna af annarri og heiðraði líkið. Allt fór vel fram enda meðalaldur gesta sérlega þroskaður. 
---
Ekkert boðskort hefur enn borist frá menningarnefnd Rvk en ég hef hlekkjað mig við póstkassann og vona það besta. Eftir að friðarsúlublogg mitt rataði í Moggann í gær og síðan á Mbl punktur is hafa ýmsir gárungar "bloggað um fréttina" og ekki ómerkari menn en Ómar Ragnarsson tjáð sig (ekki fengið boðskort heldur, sem er auðvitað miklu meiri skandall). Þar að auki hefur Bogi kenndur við Bogarúllur boðið mér í lúxus spaið sitt út á Álftanesi, Alsæla spa, sem er hrikalega spennandi og bætir súluruslið margfallt upp.
----
Okur flóaða mjólkin á Borginni er "of gott" okurdæmi til að vera satt. Dæmið kom þó frá "mjög góðum vini" Lecca. Ég fékk nefnilega skeyti:

Þetta með Nicola Lecca og mjólkurglas dauðans er ekki rétt, og það veit ég
þar sem ég starfaði fyrir bókmenntahátíð í Rvk. og sá m.a. um Nicola Lecca
á meðan henni stóð.
Lecca keypti flóuðu mjólkina í fyrsta lagi á Holtinu, en ekki Borginni,
enda gistu allir höfundar á því hóteli. Hótel Borg verður því að teljast
laus allra mála.
Á Holtinu var þó um veruleg mistök að ræða, og hann borgaði engar 800
krónur fyrir mjólk. Ástæðan var sú að nýr starfsmaður í móttökunni var
ekki með verðskrána á hreinu. Einu sannindin í þessari færslu er sú að
Lecca er vissulega að koma með bók að nafni Hótel Borg í haust sem kemur
út hjá Bjarti.

Húrra fyrir Hótel Borg! Húrra fyrir Holtinu! (Ég er viss um að þeir hafi látið hann hafa glasið frítt) Húrra fyrir Lecca og mjólkinni hans!

05.10.07
Minni á Lee Hazlewood giggið í kvöld. Týri Elvis 2 segir sögu af sigurgöngu minni í Tyrklandi með laginu Klossar munu þramma. Ég var nú eiginlega búinn að gleyma að ég hefði sungið þetta frægasta lag þeirra Lee og Nancy, en þarf að finna út hvar þetta er og skella því hingað inn. Hér koma tvö lög í tilefni dagsins: 

S.H.Draumur - Lightning's girl (í bílskúr 21.10.87)
The Boys next door - These boots are made for walkin' (það fyrsta sem Nick Cave söng inn á plötu með Birthday Party sem hét The Boys next door á þessum tíma. Kom út á smáskífu 1978.) 
---
Íslendingar virðast vera að komast á rótarbjórsbragðið. Síðustu ár hafa verið til dósir frá annað hvort Super chill eða Shasta einu sinni á ári, á amerískum dögum í Hagkaupum, og hefur þetta verið til í búðunum vikum ef ekki mánuðum saman. Í ár seldust byrðirnar upp á þremur dögum. Ég fór skjálfandi í Hagkaup í Kringlunni og Skeifunni daginn eftir að þessir dagar hófust en á báðum stöðum var allur rótarbjór uppseldur. Þá blótaði ég sjálfum mér að hafa ekki mætt daginn áður. Endaði í mínu hverfis Hagkaup út á Nesi og gat hamstrað nokkrum dósum í sekk. Ég var viss um að það hlyti að hafa verið miklu minna pantað inn en vanalega af rótarbjórnum en karl í búðinni í gær sagði mér að nei, það hefði verið pantað meira en vanalega. Íslendingar eru sem sé komnir í rótarbjórsgír og hömstruðu góssið á nótæm. Margar áskoranir eru komnar til innkaupastjóra Hagkaupa um að rótarbjór verði föst vara í hillunum og ku það mál víst í skoðun. Það væri nú ekki amalegt.
---
Rótarbjór er annars til á Íslandi, en bara á Akureyri, í Heilsuhorninu á Glerártorgi. Þar er til Virgils rótarbjór sem er svona heilsudæmi, alveg ok, fær XX af XXXX á Gossíðunni. Hann er í gleri og fellur því í glerflöskudeildina, en í útlöndum má einnig fá rótarbjór í dósum og plasti. Vilji fólk eðal fær það sér rótarbjór í glerflösku. Dósa og plast er dagleg meðalmennska. Fjögurra stjörnu rótarbjórar sem ég smakkað eru eftirfarandi: 

Americana root beer 
Tommyknocker 1859 Original Root Beer 
Bulldog Root beer 
Boylan Bottleworks root beer 
Fitz's Root beer 
Cool mountain root beer 
Sparky's fresh draft root beer 
Capt'n Eli's root beer 

Þessa og fleiri má kaupa á ýmsum stöðum í USA. Ég mæli með tveimur netbúðum, Soda pop stop og Pop the Soda shop.  Í báðum búðum má blanda flöskum í kassa og prufa allskonar drasl. Ekki borgar sig að kaupa minna en 24 flöskur í einu. Ég hef látið Shop Usa flytja þetta inn fyrir mig og þegar upp er staðið hefur flaskan kostað 350 kall komin til mín. Jafnmikið og lítil kók í gleri hjá Naustinu! En ég mæli allavega með að rótarbjórsáhugafólk reyni að fá sér alvöru gos í gleri því að það er mun betra en þetta Hagkaupsdósagos þótt ágætt sé. Toppurinn í þessu á svo að vera rótarbjórinn sem ýmsar hamborgarabúllur og veitingastaðir í USA búa til sjálfir og selja af krana á stöðunum. Ég hef enn ekki orðið svo frægur að smakka það. Ps. Aldrei kaupa diet-rótarbjór! Það er rusl.

04.10.07

Okurverðlaun vikunnar fær Hótel Borg fyrir eftirfarandi:

#123    Nicola Lecca, ítalskur rithöfundur, var nýlega á bókmenntahátíð og bjó á Hótel Borg. Lecca var lasinn, bað um flóaða mjólk fyrir svefninn og fékk eitt glas af flóaðri mjólk upp á herbergi. Haldið ykkur fast: mjólkurglasið kostaði 800 kall! Þegar útúrgáttaður Ítalinn vildi fá skýringu á þessu fáránlega verði var sagt að þetta væri "með þjónustugjaldi!" Það fyndnasta er svo að Lecca hefur skrifað bók sem gerist á Íslandi og heitir Hótel Borg. Hún kom út á íslensku nýlega. 

Okrin eru orðin 130 á Okursíðunni. Ég var í viðtali í gær á Rás 1 í Vítt og breytt. Og okur er þemað í Bakþanka dagsins.
---
Dómógiggið í gær var fínt. Ekki svo geðveikislega fjölmennt en óneitanlega góðmennt með ekki verra fólki en t.d. Sverri Stormsker, Óskari Pétri, Þorsteini Eggertssyni, Dodda, Kristjáni, Villa naglbít og Andreu Gylfa í salnum. Og svo kom ég í sjónvarpinu og allt. Við komum beint á eftir faglegri umfjöllun um líkbrennslu svo það var kannski ekki mikið mál að toppa það í hressleika. Biggi tók giggið upp á "pödduna" sína og ég skelli mp3 af gigginu hérna inn ef þetta sándar vel.
---
Horfði á Kistuna í fyrsta skipti, nei ég meina Kjarval, nei ég meina Kiljuna. Bara fínt enda Egill alltaf hress og eðlilegur. Gaman að sjá Braga og Ljóðavalda tala um Jónas Svafár og skrýtið að sjá Megasar-bróðirinn Einar Má. Þeir eru svo líkir en samt ekki. Lufsan sagði að Einar væri eins og hreinsuð útgáfa af Megasi. Ég verð þó að viðurkenna að ég skildi ekki helminginn af þessu menntatuði. Strúktúralismi? Er það eitthvað oná brauð?
---
Hér má forhlusta á Sprengjuhallarplötuna. Mér heyrist þetta vera gott og hressandi popp, íslenskt Belle & Seb kannski, án þess að vera einhver kópía. Ég spái öryggri gullplötu.

03.10.07
Hitti Egil Helgason á göngum Rúv. Hann dró upp gullslegið boðskort á Yoko Ono móttökugilli í Listasafninu þarna þann níunda, áður en ljósið verður tendrað. Nokkuð rogginn bara. Þarna mun liðið fá að éta á kostnað útsvarsgreiðanda og svo verður því trillað út í Viðey. Hvar er boðskortið mitt?! Gísli? Kjartan? Svanhildur?!! Á ég bara að þurfa að hanga heima og rotna yfir Innlit/útlit eins og mölétið nóboddí á meðan gæðingar slafra í sig og flissa yfir friðarkerti bítlaekkjunnar? Þetta er vitaskuld reginhneyksli! Ég sem hékk fyrir utan Dakotabygginguna í nokkrar mínútur og allt.
---
Fjöldi okurábendinga í dag: 22. Þetta fer nú bara að verða full vinna ef fram fer sem horfir. Ég ætti kannski að biðja KB banka um styrk?
---
Það mun kosta 500 kall inn í kvöld og ýmsir snillingar ætla að stíga á stokkinn auk mín, t.d. Biggi í Maus (eða eigum við að segja Biggi í Mónitor?), Siggi Ármann og Valgeir Guðjónsson! + óvæntir meistarar.
---
Jæja góðir hálsar. Þá erða Dómó í kvöld kl. 21. Dómó er þarna í Þingholtsstræti 5 þar sem Sportbarinn var áður. Þetta er söngskáldakvöld FTT og ég ku vera heiðursgestur. Því tók ég mig til, hóaði í Bigga og við höfum æft upp smá prógramm. Kannski verður þetta svo mikið stuð að við búum til plötu í þessum stíl og förum hringferð í kringum landið og og... Þessi stíll er svona Beach Boys platan Party eða "Eldhúspartí FM". Nei ég segi svona. Þetta er allavega fyrsta giggið síðan á Innipúkanum í fyrra, ef undan er skilin spilamennskan í Abbababb! Og svo á föstudag erða Unun-kombakk á Lee Hazlewood tribjútinu, en meira um það síðar.
---
Ég get glatt lesendur með því að Rafskinna hefur þegar svarað kallinu og verður stuttmyndin Oxzmá plánetan með valmöguleikanum kommentaríspjalli Kela og Skara meðal efnis í öðru tbl. sem kemur út um miðjan nóv. Sjón skrifar einnig smá bita um Oxzmá hópinn. Þá er bara að koma Sjúgðu mig Nínu út á dvd líka og málið er dautt...

02.10.07
Það styttist í að okur #100 velti inn á Okursíðuna, enda tóku okurdæmin að streyma inn eftir Kastljósinnslagið í gær. 

01.10.07

Ef Hr. Ólafur Ragnar ákveður að hætta (sem hann ætti auðvitað að gera) legg ég til að Ómar Ragnarson verði næsti forseti íslenska lýðveldisins. Herra forseti Ómar Ragnarsson. Hann á flugvél og þarf ekki að liggja á auðmönnum og getur keyrt á milli á litla bílnum sínum. Ég er ekki að grínast.

30.09.07
Maður dagsins er Aki Kaurismäki sem var í stuttu en góðu viðtali í Fbl. Þar sagðist hann m.a. ætla að sýna konunni sinni Geysi en þar sem konan væri gáfuð þýddi ekkert að ljúga því að henni að sturtan á hótelinu væri Geysir. Út í Helsinki kom ég á pöbb sem þeir Kárismaki bræður eiga en var svo sem ekkert merkilegri en aðrir. Svo fékk Aki einhver verðlaun hjá Hr. Ólafi og sló á létta strengi að því tilefni. Ólafur sló einnig á létta strengi. Þetta var sýnt í fréttum Rúv en fréttaþulurinn röflaði yfir alla léttu strengina svo maður fékk ekki að heyra neina brandara. Ömurleg vinnubrögð. Kannski er bannað með lögum að segja brandara í fréttum? Í mesta lagi eru svona "góðar fréttir" um stelpur sem finna kríunga og ala upp í pappakassa í lagi.
---
Heiða kom frá USA og gaf mér svona Trúðu á Guð-munnsprey:

Þetta kemur frá gríndótaframleiðandanum Blue Q sem framleiðir allskonar gríndrasl, til dæmis þetta:

---

Keli í Oxzmá var í Evu Maríu. Gott stöff. Oxzmá var æðisleg hljómsveit og myndirnar Oxzmá-plánetan og Sjúðu mig Nína helber snilld. Hvað með dvd?! Sýnt var verkið Circulator, allsber Keli að pissa upp í sig í svona 2 mínútur á præm tæm. Þjóðin er algjörlega orðin vönuð fyrir vandlætingu ef a.m.k. 10 hringja ekki í Sjónvarpið til að væla. Það er af sem áður var þegar allt varð vitlaust ef Hrafn Gunnlaugsson slapp í gegn með einhvern pervertaskap og allar línur glóðu 2. janúar eftir að hið dúndur listklámfengna sjónvarpsleikrit (oftar en ekki með Guðrúnu Gísladóttur nakinni og geðsturlaðri í aðalhlutverki) hafði verið blastað á Hagkaupssloppakynslóðina.
---
Hjálparsveit Skáta kynnir með þjóðarstolti safnplötuna Hin heilögu Grunngildi íslenskrar alþýðu, eþs Topp fimm:

Space - Avenging angels: Í útvarpinu (Rás 2) heyrði ég lag. Það var þetta lag. Ég vissi ekki hver skrattinn þetta væri þó það hljómaði kunnuglega. Pet shop boys? Nei, of bítlatímabilslegt til þess. Svo heim með leitarorðið "Kick ass angels" og þá kom í ljós að þetta var hljómsveitin Space, enskt poppband og ég átti m.a.s. þessa plötu (Tin planet, 1998) einhvern tímann. Svo heyrði ég annað lag í útvarpinu (Reykjavík fm) en hef ekki fundað út ennþá hvað það er. Í textanum er m.a. sungið "Too much information og Sleeping with the fishes". Þetta er svona gott rokklag bara. Veit einhver hvað þetta er? Hjálp!

Jakóbínarína - Spit me in the eye: Fyrsta plata sprelligosanna úr Hafnarfirði, The First Crusade, er að koma út. Hún er eins og við var að búast full af hoppandi rokkgelgju og finna upp hjólið ákefð. Fínt stöff. Tólf lög og ekkert rugl.

múm - Guilty rocks: Nýja múm-platan Farðu farðu smurðu eitruðu bergfléttunni er fín, þetta er greinilega múm ennþá, varfærnislega fiktsándið og titrandi tónarnir, en einnig er tekið fastar og ákveðnar á því, eins og t.d. í þessu góða lagi, sem gæti náttúrlega verið sándtrakk í s/h ítalskri mynd um par í leit að sjálfu sér bla bla. Svo eru pirrandi smábarnaraddirnar sem eyðilögðu síðustu plötu ekki lengur með sem er óneitanlega plús. 

Boys Noize - Wu-Tang battery: Boys Noize er þjóðverjinn Alexander Ridha og spilar fínt stöff fyrir brettið. Þetta býr í sömu blokk og Justice, Digitalism og auðvitað afarnir Daft Punk. Hvað eru menn að kalla þetta, new rave? Oi oi oi er fyrsta breiðskífan og álíka góð og nýjar plötur áðurnefndra Justice og Digitalism. Spurning hvort þetta eldist eitthvað.

Nino Ferrer - Oh hé hein bon: Hressandi franskt-ítalskt é é frá 1966, einskonar söngleikja svíng bítl. Nino var frægur og dáður, en mislyndur og á niðurleið 1998 þegar hann skaut sig í hjartað á miðju kornengi, tveimur dögum fyrir 64 ára afmælið sitt.

28.09.07

Okursíðan er búin að meikaða biggtæm, vinsælast vikunnar á b2, DV og Viðskiptablaðið búin að taka viðtöl, Síðdegisútvarpið líka og Egill klappar á bakið. Ég bíð bara eftir að karlinn hjá Neytendasamtökunum hringi og bjóði mér vinnu. Auðvitað ættu þau samtök að vera með svona síðu, ekki ég, einhver jólasveinn út í bæ. Það vantar meira pönk í Neytendasamtökin og náttúrlega bein í nefið á Íslendingum. Ef fólk lætur ekki okra á sér verður ekki okrað á því, þetta er svona einfalt. Lesendur eru allir að vilja gerðir og senda dæmi í hrönnum. Margt er ónothæft og sumt af því finnst mér alls ekkert okur (eins og að kleina sé á 120 kall, það er nú bara frekar sanngjarnt, miðað við allt og allt, þó framleiðslukostnaðurinn sé kannski bara 2 kr.). Ég er kominn með alveg nóg af 10/11 dæmum. Við vitum öll að það er okurbúlla og endaþarmsblóðgandi að stíga þangað inn (nema eftir skyrbarnum!) Sum bréfin sem ég fæ set ég í gestabókina. Þau eru þess eðlis, ekki okurdæmi heldur bara einhverjar pælingar eða spælingar.
---
Fór með Dagbjarti á Ratatouille sem er rosalega góð mynd. Ég fór næstum að grenja og allt. Dagbjarti fannst þetta hins vegar hundleiðinleg mynd og var suðandi um að fara allt eftir hlé. Það voru 8 manns í bíó en samt var gert 10 mínútna hlé. Fáránlegt. Og hver bað þessa bíókarla um að smyrja 50 kalli á hverja mynd ef hún er sýnd á digitaltjaldi? Úlala, okrið maður, okrið...
---
Það væri ágætt að fá boðsmiða út í Viðey þann 9. okt þegar ljóssúlan hennar Yokoar verður frumtendruð. Ég get ekki betur séð en að ég eigi að vera þarna alveg eins og einhverjir borgarfulltrúar. Gaman að vera með Yoko á eyju og svona. Svo koma eflaust ægileg frægðarmenni með, kannski Julian og Sean og Paul McCartney og Ringo Starr líka? Hvað veit maður? Þetta er allavega bítlatengdasti atburður á Íslandi síðan Paul kom með staurfótinn og sem sé, ef meðlimir í menningarmálanefnd Reykjavíkur eru að lesa þetta: Einn miða takk.
---
Fór á Control í Tjarnarbíói sem var skrautleg bíósýning og öll í rugli. Fyrst var líklega sýndur filmubútur númer 3, þá bútur númer 2 og svo aftur bútur númer 3. Þegar hann var hálfnaður aftur föttuðu starfsmenn að allt var í rugli og kveiktu ljósin. Þá var myndin sýnd á dvd og spólað yfir mest af filmubútum 2 og 3. Maður sá þessa mynd semsé aldrei frá byrjun til enda og suma búta þrisvar sinnum. Bót í máli að maður fékk frímiða á aðra mynd á Riffinu og þar er nógu úr að moða (t.d. Screamers um SOAD og þjáningar Armena). Þó ég hafi ekki séð Control í réttri röð get ég ekki betur séð en að þetta sé fín mynd. Hún fjallar um Ian Curtis í Joy Division sem kálaði sér 23 ára, að því virðist í einhverskonar stuttu brjálæðiskasti og þunglyndi yfir kvennaveseni og bla bla. Virtist ekkert vera búinn að ganga með þetta í maganum lengi. Flott mynd, flott músik, klassík! Á leiðinni heim heyrði ég Interpol í útvarpinu, sem var eitthvað svo þunnt í ljósi orginalana. Afhverju hljómar öll músik í dag eins og útvatnað gamalt dót? Hverjir eru að gera eitthvað nýtt og frumlegt? Eitthvað sem verður hægt að gera svona mynd um eftir 30 ár. Enginn? Æ æ og ó ó. 
---
Mannstu eftir kolefnisjöfnunarauglýsingaflóðinu? Og nú talar enginn um kolefnisjöfnun. Minnir á vélindarbakflæðisherferðina um árið.

27.09.07
Fólk má ekki senda eitthvað rugl á okursíðuna. Það þarf að vera alveg viss svo ég fái ekki allt í hausinn. Fólk má ekki fara offari á okurvaktinni. Þannig hefur okursíðunni borist leiðrétting frá veitingasölunni á Leifsstöð v/ okurs #31: Okkur þykur leitt að sjá hátt verðlag en það þarf nú samt ekki að vera hærri en það er. Hjá okkur í Veitingadeild IGS í Leifsstöð er 1/2 l af kók á 235kr og flatkökur m/hangikjeti á 210kr en ekki 350 kr hvort stykkið eins og þú getur til um. Þá er það komið á hreint!
---
Hinn mikli nýdáni meistari Lee Hazlewood verður heiðraður eftir rúmlega viku eins og sjá má hér á ofan. Hljómsveitin Unun ætlar að kombakka og taka tvö lög. Á miðvikudaginn á ég sjálfur svo að vera aðalnúmerið á tónskáldakvöldi FTT á Dómó. Tvö gigg sem sé í næstu viku. Það er naumast.

26.09.07
Át sushi með Erpi Eyvindarsyni á Ósushi, en hann er einn af spyrlunum í Laugardagslögunum. Hann át slöngu og kakkalakka á ferðum sínum um Austurlönd en konan bannaði honum að borða hund. Hann fræddi mig um japanskt klám (bukkake í sjónvarpinu á prime time með blörruðum skaufum). Sagðist líka vera langt kominn með sólóplötu. Svo fór ég í okurspjall með Ólafi Darra hjá ASÍ í hinu afar góða síðdegisútvarpi á Rás 2. ASÍ standa fyrir verðkönnunumaf og til, en samt erða ekki nógu oft og ekki nógu öflugt. Í þessu spjalli rifjaðist upp fyrir mér þessir örfáu dagar þegar verðstríð ríkti milli matvörubúða og menn lækkuðu vörur til skiptis, aðallega mjólk, sem endaði með því að líterinn var kominn í 1 krónu eða eitthvað. Fáránlegt rugl. Það væri náttúrlega mun betra ef það væri viðvarandi verðsamkeppni, en ekki verðstríð sem stóð í 2 daga eða hvað sem það var.
---
Okursíðan hefur vakið það mikla athygli að karlinn í fiskbúðinni lét mig hafa soðninguna á 1000 kall en ekki 1100 kall af því hann vildi ekki lenda á síðunni. Svona er strax byrjað að múta mér!
---
Okurdæmin streyma inn en fólk er mikið að senda inn almenn sannindi, eins og að bensín sé ógeðslega dýrt og að allt í Apple búðinni sé ógeðslega dýrt miðað við í Ameríku o.s.frv. Dæmin þurfa að vera sértæk, kids.

25.09.07
Sri Chimnoy er fáránlegt krapp. Um það sannfærðist ég í Háskólabíói um árið þegar hann sat á sviðinu eins og heilög lumma og sargaði á hin ýmsu hljóðfæri sem gufulegar lummudísir í hvítum kuflum færðu honum. Karlinn kunni ekki á neitt af þessum hljóðfærum og sargaði bara eitthvað en hinum trúuðu fannst þetta alger snilld. Reyndar var gott að fá ótakmarkað hláturskast yfir þessari dellu. Friðarverðlaun Nóbels? Held ekki. Reyndar fór ég tvisvar á Sri. Í fyrra skiptið var ógeðslega gaman enda svo mikið rugl. Í seinni skiptið var ekki eins gaman. Þá skrifaði ég þetta. Nú hafa vondu mennirnir á Vantrú skrifað um Sri, en þessi vantrúar-illmenni eru eins og kunnugt alltaf skiptandi sér af og eira aldrei vitleysingum í vitleysu sinni.
---
Raftæki hafa lækkað mikið á Íslandi síðustu árin, t.d. gítarmagnarar og slíkt. Ég hélt að við værum orðin samkeppnishæf. Svo er ekki. Okursíðan fékk 2 dæmi, samanburð á verði á flatskjám hér og í Danmörku. Munurinn er endaþarmssvíðandi og það margborgar sig að fljúga út og taka tækið með í gegnum tollinn. Lesandi sendi dæmi:
Sony Bravia 40” LCD sjónvarp sem heitir KDL-40W2000 kostar 329.000 í Sony Center, Kringlunni. Sama tæki er á 14000 DKR í Bilka. Það myndi semsagt borga sig að skreppa út til Köben (ca. 25000), borga yfirvikt (ca. 15.000) og toll og vsk hérna. Reyndar myndi það borga sig um 100.000 kr. sem er ágætis tímakaup, ik’?
---
Hellvar sparkar USA-túrnum sínum af stað með útvarpsviðtali og giggi í dag kl. 15:23 að íslenskum tíma. Hægt er að hlusta í beinni á heimasíðu WAMC northeast public radio. Þau hafa skrifað upp á samning um að blóta ekki í útvarpinu, hvorki á íslensku né ensku.
---
Nýja múm-platan fær slappa dóma í gáfupopparabiblíunni, Pitchforkmedia. Svo sem kannski ekki 100% að marka það. Hér má hlusta.
---
Hér er tloggað um bónlist, m.a. mixteip af Airwaves sem er hornið við handan.

24.09.07
Okursíðan er hvílíkt að meikaða. Komin 20 dæmi af ýmsu tagi, frá 100 kalli (að fá kokteilsósu á pylsuna sína í Staðarskála) til 77.100.000 kr. (3 herbergja íbúð á Seltjarnarfokkingsnesi). Ég vil þakka öllum sem sendu ábendingar, ég fékk m.a.s. myndrænt sönnunargagn af geðveiku ópal okri. Um að gera að halda áfram okurábendingunum, gaman ef dæmin verða orðin 100 fyrir helgi! Verum á varðbergi, látum vita um okur! Okursíðan gegn okri!
---
Það verður ekki tekið af þeim hjá 10-11 að þetta er okursjoppa frá helvíti. Manni logsvíður í rassgatið ef maður neyðist til að versla þarna (til dæmis þegar búið er að loka allsstaðar annars staðar og maður er bleyjulaus og endar með að borga 1000 kalli of mikið miðað við Bónus). Þeir mega þó eiga það í 10-11 í verslunarmiðstöðinni í Hafnarfirði að þar er frábær skyrbar og frekar ódýr meira að segja, innan við 300 kall bakkinn sem er fínn hádegisverður.
---
Café Conditori er okurbakarí frá helvíti. Allt er alltof dýrt þar. Jói Fel og sérstaklega Mosfellsbakarí eru í sama klassa en mun ódýrari. Þeir mega þó eiga það hjá Café Conditori að þar er selt valhnetubrauð sem er líklega besta brauð landsins (og kostar rétt innan við 400 kall stk). Svo það er margt í mörgu greinilega...
---
Látum ekki gust reiðinnar slökkva ljós skynseminnar* og fáum okkur Topp 5:

Akron/Family - I've got some friends: Skeggband úr sveit sem flutti til New York til að meikaða. Er í hippafíling en þó skínandi nútímalegt í bland. Gefa út hjá Young God Records, en þar ræður ríkjum Michael Gira, fyrrum söngvari hávaðabandsins The Swans sem tæmdi MH um árið. Þetta frábæra lag er af nýjustu plötu Akron/family, Love is simple, og tekur á flug á kafla sem minnir mig rosalega á XTC, en gutlar svo yfir í Pere Ubu, Frank Zappa, The Band og skuð má vita hvað. Platan er reyndar nokkuð þétt í gegn.

John Vanderslice - White dove: Amerískur útdælari, sem samkvæmt wiki er sérlegur aðdáandi Davids Lynch og gerir músik sem nær á milli Neutral Milk Hotel og Public Enemy. Hér er sérlega gerðarlegt lag af nýjustu plötunni hans, Emerald City, hans sjötta frá árinu 2000.

The Wombats - Backfire at the disco: Tríó frá Liverpool sem hefur vakið nokkra athygli með stuðlaginu Let's Dance To Joy Division. Enn á ný er boðið upp á gott stuð. Platan A Guide To Love, Loss And Desperation er handan við hornið.

Regurgitator - I like your old stuff better than your new stuff: Hinir áströlsku Regurgitator (Ælari) eru hressir blandípokarakallar með hauga af plötum á bakinu, sú nýjasta nýkomin út. Þetta lag opnar aðra plötu bandsins, Unit frá 1997. Þess má geta að fyrsta lagið á fyrstu plötu bandsins, Tu Plang frá 1996, heitir I sucked a lot of cock to get where I am.

The Clash - Police on my back: Í hinni lala grínmynd Knocked up sem ég er hálfnaður með má finna ýmis fín lög. t.d. þetta af Sandinista Klassara. Klassa stuðlag eins og maður segir.

* Eins og ég las einu sinni á miða á mælaborði sendibílstjóra.

21.09.07
Át á Great wall í hádeginu. Allt í lagi kínastöff. Maður blánaði þó þegar reikningurinn kom og lítil kók í gleri reyndist vera á 350 kall stykkið. Bæjarstjórinn á Bolungarvík saup hveljur enda hafði hann fengið sér tvær og þurfti nú að borga 700 kall fyrir tvær skitnar kók. Svo mjög fékk þetta skefjarlausa og svívirðilega okur á mig að ég ákvað að stofna sérstaka okur-síðu sem myndi lista upp dæmi um skefjalaust og svívirðilegt okur. Og hér vil ég auðvitað fá hjálp lesanda. Ef lesendur hafa dæmi af viðurstyggilegu okri skal umsvifarlaust senda mér línu til að okrið fái pláss á nýju okursíðunni. Vér Íslendingar erum náttúrlega vön okri á flestum sviðum svo ég er bara að leita eftir frámunalegum okurdæmum, eins og þessu með litla kók á 350 kall. Skill jú? Vonast eftir góðri þátttöku. Látum ekki endalaust okra á okkur! Okursíðan gegn okri! Allir saman nú!
---
Versta við miðbæinn að það eru svona 50/50 líkur á að vera böggaður af ógæfumanni ef maður hættir sér þangað á virkum degi. Einn draugfullur plastpokamaður elti mig inn í bíl í gær og hvæsti á mig þegar ég var að festa Dagbjart í barnastólinn: Átt þú þetta? Átt þú þetta? Þetta var semsé Dagbjartur. Ég umlaði eitthvað og reyndi að reikna út gott skot í punginn á garminum ef til átaka kæmi. Ekki kom til þess og ræfillinn reikaði í burtu til að böggast á næsta manni. Það er alltaf sama gallerí ógæfuliðs sem maður mætir í bænum, svona sirka 10 manns í allt. Oftast er liðið ljúft og mesta lagi sníkjandi pening og þá þykir voða sætt, kristilegt og mannlegt að víkja að þeim aur. En svo vill fjúka í liðið og þá er verra að lenda í því. Ég skil ekki að það þurfi að vera lögverndaður réttur ógæfufólks að fá að hanga lon og don í miðbænum böggandi mann og annan. Út af fimm manns sem hanga allan daginn fyrir framan ríkið í Austurstræti var komin upp sú fáránlega hugmynd að fjarlægja einhvern kæli. Væri ekki sniðugra að fjarlægja liðið og flytja það til dæmis nauðungaflutninga í gám einhvers staðar á hálendinu þar sem það getur drukkið sig í hel? Nei uss, hamingjan hjálpi mér, svona má ekki segja. Rónarnir þykja víst lífga upp á mannlífið og illþefjandi böggið er bara einn áhættuþáttur þess að fara í miðbæinn. Og svo eru þetta náttúrlega sjúklingar. En er eitthvað vit í því að sjúklingar veltist um útúrheiminum fyrir hunda og manna fótum? Greinilega.
---
Fáskrúðsfjörður er aldeilis að meikaða í dag og menn bara að fá úronum á fréttadeildunum að fá loksins eitthvað fútt íetta. Teknir slær Blaðið upp og Vísir talar um Stóra spíttsnekkjumálið. Það er náttúrlega frekar leiðinlegt fyrir graða fréttamenn þessi gúrka hérna. Ég man enn eftir gleðinni sem ríkti hjá tveimur blaðamönnum sem ég vann einu sinni með þegar maður var drepinn í miðbænum. Þeir geisluðu af gleði og stemmingu þegar þeir breyttu blaði morgundagsins, tóku einhverja gúrkufrétt af forsíðunni og skelltu morðinu á í staðinn. Þá var sko fútt íessu.
---
Bannað er að gera grín af special olympics. Einu sinni þegar Íslendingar voru að meikaða biggtæm á þessum leikum ætlaði einn blaðamaður sem ég vann með að skrifa grein með fyrirsögninni Fljótustu fávitar í heimi. Samstarfsfólk hans fékk hann til að hætta við.

20.09.07
Charles Manson er hálfviti en er hann dauður? Ég hreinlega man það ekki, held samt ekki. Er hann kannski með netsíðu í fangelsinu? Gúggla. Sko, wiki er náttúrlega alltaf best. Svo er náttúrlega youtube vaðandi upp fyrir haus í drasli um gamla manninn, hérna er t.d. eitt voða fallegt viðtal sem leiður í ljós að Manson er ekkert. Já já við erum öll ekkert, gamli sauður. Svo eru hvorki Birgitta Bardot né Elísabet Taylor dauðar heldur þó manni finnist það einhvern veginn. Ekki Soffía Loren heldur.
---
Vert er að vekja athygli á kvikmyndasýningum Kvikmyndasafns Íslands í Bæjarbíói Hafnarfirði. Alveg vintage bíóstemming þar. Engar slor myndir, bara alvöru frábærlega hundleiðinlegt artí stuð með táknmyndum og gömlu drasli sem enginn gerir lengur. Og svo Journey to the center of the earth í byrjun des. Hún var í sjónvarpinu þegar ég var 12 ára. Væri gaman að rifja upp kynnin. Ég man að á leiðinni til Snæfellsjökuls voru kaktusar. Hvað hét nú aftur gæsin? Geirþrúður?
---
Í Blaðinu er ágætis grein um Kolaportið. Það er glatað að því eigi að fórna fyrir bílastæði. Þetta er svona týpískt eitthvað, skítugur almenningur á móti gljáfægðum lúxusbílum. Ég sé að Ingvar í soulhorninu segir að fleiri komi í Portið en í öll gallerí borgarinnar til samans, sem er auðvitað alveg rétt. En það má svo sem bregða sér í gallerí líka. Til dæmis er á fimmtudögum ókeypis í Listasafn Reykjavíkur, Hafnarhúsinu. Gjörningaklúbburinn sýnir nú þar sitt stuð sem leit lokkandi út þegar ég fór með Dagbjarti um daginn. Ég komst ekki langt í að skoða því Dagbjartur er með króníska fóbíu fyrir listagalleríum eftir að ég fór með hann á hryllingsdraslið hennar Gabríelu. Þarf að skreppa aftur. Í Ljósmyndasafni Reykjavíkur er nú þrælskemmtileg sýning úr safni DV. Þar má bæði sjá myndir af Auðunni blaðasala og Óla blaðasala, en því miður er engin mynd af Gunnsa Gunn blaðasala. Svo er alla daga ókeypis í Listasafn Íslands, Glaumbæ, þökk sé Bjögga pönk.

19.09.07
Hef verið að taka upp fyrsta framlag mitt til þáttarins Laugardagslögin með hinum nýsteggjaða Vigni í Írafári. Eins og komið hefur fram er ég í 9 manna forgangshópi sem fékk að semja 3 lög á kjaft til að spila í þessum laugardagsþætti á Rúv í vetur. Fyrsti þátturinn er 6. okt en fyrsta framlag mitt, ÍSINN, verður líklega frumflutt viku síðar. Hin ekki svo mjög dularfulla Mangella samdi textann. Heiða syngur enda óþarfi að ná í vatnið yfir lækinn, a.m.k. fyrst um sinn. Margar skondnar og sniðugur hugmyndir og tengingar munu þó líta dagsins ljós í þessum þáttum en ég er bundinn þagnareyði sem má sækja fyrir héraðsdómi svo ég held kj. Það er fínt að fá tækifæri til að framleiða þrjú popplög en ekki eins fínt að standa í þeirri þvælu að keppa við aðra lagahöfuna eins og hver annar bjáni í raunveruleikaþætti. En fokk itt.
---
Horfði á æsingarþáttinn Kompás. Þeir gleymdu alveg að segja frá því að hinn meinti gerandi samdi alla textana á einu plötu Svanfríðar, What's hidden there. Þar má m.a. finna góða hippalínur eins og "Life is too short, wasting it in Mammons court."

17.09.07
Movie Mistakes er síða sem segir frá mistökum í bíómyndum. Ég reyndi að tékka á Inland Empire en hún er ekki á skrá... skrítið!
---
Næturvaktin stóðst væntingar og væntingarnar voru þó nokkrar. Gaman að sjá Faulty Towers, besta grínþátt sögunnar, lifna við á íslenskri bensínstöð með svíasósíalískum Mr. Faulty og hnakkrænum Manuel. Ég mun glápa á rest.
---
Það er í lagi að löggan reyni að koma í veg fyrir að vitfyrrtir sterahnakkar og aðrir ofbeldismenn misþyrmi fólki í miðbænum en eftir því sem ég heyri er löggan dáldið að fara yfir strikið. Fullur Pólverji sem var bara eitthvað að detta af stól og slumpast um Organ án þess að þó að vera með einhver læti fékk víkingasveitina í flasið sem tók hefí pakka á hann, hnéð í bakið og handjárn fyrir aftan bak og eitthvað svona rugl. Grunlausir gestir stóðu í röð fyrir utan Sirkus, sumir með glundur í bjórflösku eins og gengur. Kemur þá sérsveitin grá fyrir járnum og handtekur alla með flöskur og babú niðrá stöð. Mér sýnist þetta því annað hvort vera í ökkla eða eyru. Kannski leitar þetta jafnvægis. 
---
Sjálfur hef ég migið víðsvegar um bæinn í annarlegu ástandi (oftast þó reynt að fara í sund eða port) og margsinnis drukkið úr flösku á almannafæri. Nokkuð mörg ár síðan reyndar, en allt þetta lið sem er stanslaust að hneykslast á "miðbæjarvandanum" var náttúrlega stór hluti af honum fyrir nokkrum áratugum. Hætti svo sullinu og eignaðist fjölskyldu og eitthvað eins og gengur og þá má gratt og fullt fólk allt í einu ekki gera það sama. Ég fékk mér reyndar 3 bjóra á laugardaginn í brúðkaupsveislu sem var held ég í fyrsta skipti sem ég finn smávegis á mér síðan bítlafyllirríið mikla í Liverpool í okt í fyrra. Maður er voða mikið hættur að nenna þessu enda vímuástand frekar aumingjalegt fyrirbæri eitthvað. Pálmi hitti naglann á höfuðið. 

15.09.07
Alexander Pichushkin stefndi á eitt morð fyrir hvern skákreit. Hann var búinn að kála 62 og vantaði bara 2 upp á. "Skákmorðinginn" – ný viðbjóðleg mynd á leiðinni. Ætli þessi fáviti verði fyrirmynd annarra geðsjúklinga? Eru lúdómorðinginn og yatzídráparinn á leiðinni?
---
En jæja, Mæðrastyrksnefnd, stóra táin á Finni Ingólfssyni og Seljum orku, græðum ógeðslega mikið á sameignum landsmanna ehf kynna safnplötuna Steiktir naflastrengir 2, eþs Topp 5:

Leadbelly - Gallis pole: Var í bílnum og stillti á Rás 1. Þar var Jónatan Garðarsson með þátt sinn Brot úr eilífðinni, fyrsta þátt af fjórum um blúsarann Hudy William Ledbetter, kallaðan Lead Belly eða Leadbelly. Þetta var síðasta lagið í þættinum og mér fannst það alveg magnað og æðislegt, sérstaklega þar sem þarna er bara einn maður á ferðinni og þetta var tekið upp 1933 í fangelsi í Louisiana. Nú er bara að fylgjast vel með þáttum Jónatans, hlusta á þá á netinu ef ekki vill betur. Blúsinn er í hálfgerðri þoku hjá manni. Ætli maður sé ekki enn í losti yfir nokkrum drepleiðinlegum blúskvöldum sem maður villtist inn á sirka 1988. Ég hef alltaf fundið fyrir leiða í garð nútímablúss, fátt er minna spennandi einhvern veginn en hvítir karlar með kúrekahatta að gera endalaus sóló og þykjast eitthvað, en þetta eldgamla dót er sannarlega dúndur, einhvern veginn alvöru og svo auðvitað afi rokksins. Spurning um að taka hefí syrpu á þetta dót, kaupa sér Lomax-kassa og bækur... eða hafa þetta einfalt og hlusta bara á Jónatan. Tja eða fara milliveg. Þess má geta að Led Zep riðluðust á þessu lagi á III.

Fræbbblarnir - Ó, Fræbbblar vors lands: Önnur breiðskífa Fræbbblanna fannst manni misheppnuð á sínum tíma. Maður hafði verið í dúndurstuði fyrir Viltu nammi væna og Bjór 7" og lögunum á Northern Lights Playhouse safnplötunni og Okkar á milli sándtrakkinu. Svo kom önnur stóra platan sem hét hvorki meira né minna en fjórum nöfnum: Fræbbblarnir (samkvæmt framhlið), Pottþéttar melódíur í rokkréttu samhengi (samkvæmt bakhlið), Í kjölfar komandi kynslóða (samkvæmt kili) og Fræbbblarnir munu landið erfa (samkvæmt plötumiða). Það var eitthvað sem klikkaði, fannst manni. Kannski of mikið af dótalegu sintaspili eða kannski var þetta nógu alvarlegt og í anda þess sem maður var þarna dottinn í, Joy Division, The Fall og allt það. En allavega, platan stóð stutt við í safninu en tíminn vinnur alltaf og nú finnst mér þetta fín 15 laga popppönk plata. Lögin örstutt og sprellmelódísk og dótasintinn finnst manni bara krútt í ljósi sögunnar. Semsé fín plata og enn ekkert á leiðinni á cd. (Bónus: Fræbbblarnir - Anna (frænka hans Steina) - annað af sömu plötu) 

Hellvar - Kjaftæði: Heiða og Elvar og vinir þeirra eru Hellvar eins og kunnugt er. Tilbúin er fyrsta platan og bíður útgefanda. Ljómandi gott trommuheila tilraunapopp með glefsandi sprettum. Þau leggja í ferð upp Hudsondalinn í þarnæstu viku og spila á Paddys í kvöld á Rockvillefestivalinu mikla. Á mæspeis.

Þeyr - En...: Fáar hljómsveitir hafa tekið eins miklum breytingum og Þeyr. Á meðan sveitin tók sér sumarfrí við að taka upp fyrstu plötuna sína, hina réttnefndu Þagað í hel, breyttist bandið úr Ljósin-í-bænum, eða næstum-því-Upplyfting legu léttfönksveitaballabandi í það iðandi töffdrungarokk band sem við þekkjum og elskum. Þagað í hel (sem SG gaf út 1980) er því gjörsamlega tvítóla. Opnunarlag plötunnar, En..., er t.d. töffdrungarokk á meðan bónuslagið Vítisdans er míní diskófriskó. Gefum sjálfum mér orðið úr Eru ekki allir í stuði: Fyrir jólin 1979 höfðu Þeysarar æft upp slatta af frumsömdu efni og fóru til Svavars Gests með tvö ofursæt lög í anda Upplyfingar. Svavari leyst ágætlega á og eftir að Þeysarar höfðu "kjaftað karlinn til" byrjaði hljómsveitin að vinna LP-plötu í Tóntækni. Upptökum miðaði hægt því Þeyr var vandvirk hljómsveit og varð að auki oft að víkja fyrir borgandi kúnnum. Um sumarið var gerð afdrifarík sumarpása því í sumarfríinu snarbreyttist hljómsveitin. Strákarnir hlustuðu þá á allskyns nýja og ferska tónlist sem Guðni Rúnar og fleiri dældu í þá en "fríkuðu gjörsamlega út" þegar þeir heyrðu Ruth Magnússon syngja "Pétur tunglsjúka" eftir Schönberg á Listahátíð '80. Þá fór sú hugmynd að gerjast að Þeyr ætti að spila blöndu af nútímatónlist og rokki -- einskonar nútímarokk.
"Sigurður Árnason stúdíómaður var alveg gáttaður á okkur þegar við komum aftur inní stúdíóið, hann hélt að við værum alveg brjálaðir, við vorum svo breyttir," sagði Hilmar Örn Agnarsson í Helgarpóstinum í nóvember 1980. Sigurður hafði þó gaman af þessu fyrir rest, eins og t.d. þegar Magnús var látinn syngja í gegnum gjallarhorn Fylkingarinnar eða þegar hann var sendur heim og látinn hringja í stúdíóið og syngja lag í gegnum símann. Þegar platan var loks tilbúin var hún algjörlega tvískipt. Eldri lögin hljóma eins og úr myrki fortíðinni, þau nýju gáfu sterklega til kynna hvert Þeyr stefndi. 
Hljómsveitin hafði passað vandlega upp á að Svavar Gests kæmi aldrei í hljóðverið. Hann varð þó sífellt meira efins eftir því sem stúdíótímunum fjölgaði og fór að kalla plötuna "long long play plötuna". Þegar hann heyrði loksins útkomuna varð hann sjóðandi vitlaus, en sprakk fyrst þegar hann sá umslagið. Hann ætlaði að hætta við allt saman því hann vildi ekki að SG-lógóið færi á svona forljótt umslag, en konan hans, söngkonan Ellý Vilhjálms, fílaði plötuna í botn og það var í raun henni að þakka að hún kom út. 
Platan hét Þagað í hel, sem varð réttnefni. Platan kom út í örfáum eintökum í desember 1980 og upplagið var meira og minna gallað. (Bónus: Þeyr - Vítisdans)

Stjörnukisi - Reykeitrun: Úlfur Chaka er látinn. Hér er smá minningarbrot með honum og Stjörnukisa af Spírum frá 1997.

14.09.07
Ég held að Ísland í dag rúlli ekki upp næstu blaðamannaverðlaunum. Í gær fóru kynnar yfir um á flissinu og sýndar voru fullar grænlenskar kerlingar í slag. Hvað átti það innslag að sýna okkur? Eymdina á Grænlandi? Eða var þetta svona flipp í anda Jackass? Nær væri að fara með vél oní miðbæ og mynda fulla íslenska hálfvita míga á veggi og berja hvorn annan. Ekki svo mikill munur á Íslandi og Grænlandi í drykkjumenningunni. Og talandi um Ísland í dag, hvað er málið með þetta endalausa "þáttarstjórnandi mátar föt", "þáttarstjórnandi fer í boot camp"? Ef þátturinn telur sig vera í einhverskonar stríði við Kastljós er ljóst að það stríð er fyrir löngu skíttapað.
---
Ungverska gúllassúpan heppnaðist vel og verður bara betri í dag. Næsta súputengda verkefni er að gera Borsch-súpu en sú súpa hefur mér verið hugleikin síðan ég fékk svoleiðis fyrst í Finnlandi 1992. Mér var bent á annan uppskriftavef sem er Hvað er í matinn? Lítur vel út þó ég nenni seint að gera stundatöflu yfir matinn minn mánuð í senn eins og þarna er boðið upp á.
---
Veðramót og Astrópía. Er maður ekki á leiðinni á þær? Ég held það.

13.09.07
Húrra fyrir kónginum! Nú gleðst mitt pínkulitla hjarta, og enn glaðari er ameríski bragðlaukurinn, því í Hagkaup (þar sem Íslendingum finnst skemmtilegast að versla) standa ný yfir amerískir dagar. Allskonar frauðmeti má fá og svo auðvitað rótarbjór. Skv. bæklingi Hagkaupa er rótarbjórinn eitt það vinsælasta á amerísku dögunum svo kannski rennur sú staðreynd stoðum undir Dr. Gunna rótarbjórsframleiðsluna. Í ár er boðið upp á Shasta rótarbjór eins og stundum áður. Shasta er betri en Super Chill, sem sum árin er boðið upp á á blessuðum dögunum. Semsé gott rótarbjórsár í ár. Ég er á auðvitað á leiðinni til að tryggja mér kassa eða þrjá.
---
Aldrei aftur Randver með hárkollu að þykjast vera kelling. Maður er hér hreinlega í sárum.
---
Matseld.is er fín síða. Ég er að reyna að þroska eldamennskukunnáttu mína og í dag ræðst ég í það stórvirki að búa til ungverska gúllassúpu.
---
Leikskólastjóri hefur sent skeiti til að þakka fyrir bakþanka dagsins. Þá er markmiðinu náð.

12.09.07
Ég þoli ekki rapparann 50 cent. Hann fer verulega í taugarnar á mér þegar hann birtist á skjánum kjánalegur með skögultennurnar og uppblásinn eins svartur Michelínkall. Ekki minnkaði andúð mín á honum þegar ég las þennan dóm um plötuna hans. 50 Cent er fyrir hálfvita. Hann er víst í einhverju rappstríði við Kanye West, sem hann skíttapar vonandi. Kanye er viðkunnalegur gaur sem býr til fína músik og fékk mörg stig í kladdann fyrir gott megadiss á vanvitann Bush í kjölfar Katrínuhamfarana.
---
Það er nauðsynlegt að þaullesa innkaupastrimlana í Bónus eins og argasti smámunaseggur. Starfsfólkið er stundum úti á þekju. Um daginn var ég kominn heim með einn bleyjupakka en skv. strimlinum borgaði ég fyrir tvo. Bleyjupakki kostar 1300 kall svo ég fór auðvitað til baka. Áðan var ég með vaðið fyrir neðan mig og sá strax að eitthvað var að. Enda var ég látinn borga fyrir 15 l af G-mjólk þegar ég var bara að kaupa einn.
---
Djöfulsins mannekla er þetta alls staðar, eða allavega í láglaunastörfum. Nú er pósturinn stórkostlega undirmannaður. Ég fékk sent áríðandi umslag frá Japan sem aumingja Japaninn borgaði stórfé undir. EMS-forgangspóstur og hvað eina. Þetta skaust til Íslands á ógnarhraða en stoppaði svo hjá póstinum vegna góðærisvandans. Lá þar dögum saman vegna manneklu, enginn mannskapur til að keyra umslagið út . Þetta kemur í dag! lofaði pósturinn á mánudaginn en á þriðjudaginn gafst ég upp og sótti þetta sjálfur upp á Höfða. Þar var biðröð út á götu eins og við pylsuvagn með sértilboð. Getur ekki farið að koma kreppa eða eitthvað svo ástandið lagist? Djöfulsins rugl. En jæja, strákurinn er þó allavega með leikskólapláss.

11.09.07
Ellefti september, ellefti september. Ellefti september getur étið skít...
---
Maður leitar að frábærri hugmynd. Að finna eitthvað upp, að fylla í gat, fatta upp á einhverju, búa til markað, marka sér línu, slá í gegn, græða fullt af pening og lifa hamingjusamur til æviloka og þurfa ekki að gera handtak aftur. Maður er með hausinn í bleyti. Maður ætti kannski að fara í frumkvöðlafræði í HÍ? Hvað þarf nú heimurinn í dag? Eða segjum bara Ísland, hvað þarf nú Ísland í dag? Hvaða gat get ég fyllt? Til dæmis tölvan. Maður komst alveg án hennar árið 1990 en í dag er maður eins og dáið dádýr þegar tölvan er biluð. Kannski full stórt vísindaafrek fyrir mig að finna upp á einhverju í anda tölvunnar. Ég er meira svona að spá í dóti eins og súperboltanum (eþs skoppuboltinn). Eina hugmyndin sem ég hef fengið só far eru t-bolir með áletrun sem sést ekki fyrr en sá sem er í bolnum er orðinn sveittur í gegn. Svitabolir hf. Allir væru í svona bolum í ræktinni eftir ár. Eða ekki. Á þeim væru áletranir eins og ÉG PUMPAÐI eða SVEITTUR EINS OG GRÍS. Hmm..? Söluvænlegt? Þá mætti athuga hvort Egils sé til í að byrja framleiðslu rótarbjórs. Dr. Gunna rótarbjórinn loksins kominn. Nei, glötuð hugmynd. 90% Íslendinga finnst rótarbjór viðbjóður.
---
Svona spáir maður. Það eina sem þarf er ein góð hugmynd og þá rúlla aurarnir í kassann. Viltu vera ljón eða viltu vera mús? Hvað til dæmis með þessa konu á Ísafirði sem á að vera orðin múltímilli á dúkkulísuheimasíðu? Ég trúi því nú reyndar ekki, en er ekki heimasíða málið? Heimasíða sem maður græðir ógeðslega mikið á? Lúdó online? Eh, Hvað er klukkan online? Bíddu. bíddu... þetta er að koma... 

10.09.07
Dreymdi að ég hitti Jónas Kristjánsson á Súfistanum. Sagðonum að ég læsi alltaf síðuna hans. Hann sagðist vera á leiðinni að fá sér tattú. Áður en ég fékk á hreint hvers konar tattú þetta væri hafði draumurinn breyst í eitthvað annað sem ég man ekki hvað er. 
---
Hitti líka Björgvin Halldórsson í Nóatúni í Hafnarfirði. Þá var mig ekki að dreyma. Fátt er töff við að kaupa í matinn, rogast með poka í einni og klósettpappírsbúnt í hinni, en Bjöggi var engu að síður þræl töff þar sem hann tróð pokum í bílinn sinn. Hvað ert þú að gera í Memphis?, spurði hann mig þegar ég gekk hjá með eldspýtnabúnt sem ég var að kaupa fyrir sýningu Abbababb! sem byrjaði aftur í gær fyrir stuðluðum sal. Næsta sýning 16. sept!
---
Ég er áhugasamur um sturturnar í World Class. Þar ríkir stéttskipting eins og ég benti á í bakþanka. Svo kölluð frægðarmenni sem nota plebbasturtunar eins og ég hækka sjálfkrafa í áliti hjá mér. Meðal meistara sem láta sér plebbasturturnar nægja eru Svali útvarpsmaður á FM957, Páll Óskar, Geir H. Haarde, forsætisráðherra og Einar K. Guðfinnsson, sjávarútvegsráðherra. Því miður hef ég aldrei séð Hr. Ólaf Ragnar í sturtunni (bara á Seltjarnarnesi á sínum tíma og í Sundhöllinni). Ætli hann færi í plebba- eða lúxussturtu?

09.09.07

Ég hef lengi verið með fetish fyrir Eyjaálfa. Einu sinni fókuseraði ég á Ástralíu. Ég las mér til og góflaði menningunni í mig. Þetta var fyrir tíma internetsins svo það var aðeins erfiðara. Ástríðan var svo slæm að ég keypti mér ævisögu Pauls Hogan (einnig þekktur sem Krókódíla Dundee) og las hana meira að segja. Þá fór ég einn í bíóið í Breiðholti til að horfa á myndina Young Einstein með gerpinu Yahoo Serious. Ekki leið á löngu áður er ég útvíkkaði áhugann til Nýja Sjálands og þaðan til Kyrrahafseyja. Ef guðstaðan á bankareikningnum leyfir mun ég einhvern tímann fara þarna niðreftir, til Ástralíu, Nýja Sjálands og valinna Kyrrahafseyja. Í tilefni af því að fyrsta Ný Sjálenska hljómsveitin sem spilar á Íslandi hefur boðað komu sína á Airwaves er Topp 5 nýsjálenskur í dag:

Cut off your hands! - Tell me about: Þetta er bandið sem ætlar að rolla á Erveifs. Ég póstaði þessu bandi í fyrra og kallaði það Shaky hands fyrir einhvern aulahátt, hið rétta er að bandið heitir Cut off your hands! (með ! eins og Reykjavík!, Abbababb! og Panic! at the disco), en fyrsta ep-ið þeirra heitir Shaky hands. Þetta er ágætis ákefðarrokk, kannski ekkert verið að finna upp hjólið (eða þríhyrninginn, þannig), en mörg lög á þessu fyrsta ep-i (sem þetta lag kemur af) eru velsmurð og ótottuð. Annars er ég sirka viss um að COYH! sé fyrsta nýsjálenska bandið til að spila hér en gestum er velkomið að leiðrétta mig. Einnig hafa áströlsk bönd verið fremur fátíð á klakanum, Nick Cave, Crime and the city solution og Architecture in Helskinki, en ég man ekki eftir fleirum. Er ég að gleyma einhverju? (Bónus: Cut off your hands - You and I, endurpóstun á smelli.)

Nýja Sjáland er nokkurn veginn Ísland, hinu meginn á hnettinum. Allt fullt af kindum og kiwi, goshverir og stundum snjór. Landið skiptist í tvær eyjar, Norður og Suður ey, sem hvor um sig er ríflega stærri en Ísland. Þarna búa 4.2 milljón manns, þar af 1.3 í stærstu borginni Auckland á Norður ey. Landslagið er víða svipað og hér eins og mátti sjá í Lord of the rings, en leikstjórinn Peter Jackson er klárlega frægasti Ný Sjálendingurinn (þeirra Björk). Nýsjálensk rokksaga er svipuð íslenskri. Þetta byrjaði af einhverju viti í kjölfar Bítlanna og Split Enz (síðar Crowded House) eru þeirra Sykurmolar/Mezzoforte. Útgáfumerkið Flying nun er hálfgerð Smekkleysa. Maður hefur þó líka á tilfinningunni að Nýja Sjáland sé einskonar Færeyjar og Ástralía sé þá Ísland – þ.e. nýsjálensk bönd fara til Ástralíu til að stækka sig á sama hátt og Eivör, Jagvan og þetta færeyska lið kemur hingað til að stækka hringinn. En allavega, meiri músik: 

The Bluestars - Social end product: Dæmi um hrátt nýsjálenskt bítlapönk frá því á 7. áratugnum. Safnplöturnar Wild Things vol. 1 og 2 eru ágætar til að kynna sér svipað stöff. Þær má m.a. fá frítt á þessari sjóræningjasíðu. Þetta lag The Bluestars hefur einnig komið út á Nuggets-safnplötu. (Bónus: The Gremlins - Never you mind - Meira frumstætt bítlapönk frá Nýja Sjálandi.)

Split enz - I got you: Hljómsveit bræðranna Tim og Neil Finn byrjaði 1971 og spilaði progg en sló í gegn um 1980 með leikrænu og bítlamelódíulegu nýbylgjurokki. Hér er tíunduð saga sveitarinnar. Þetta lag er langmesti smellur Split enz, fór á toppinn í Ástralíu, Nýja Sjálandi og Kanada, í 11. sæti í Bretlandi og 53. sæti í USA. Það má finna á plötunni True Colours frá 1980. (Bónus: Split Enz - Six months in a leaky boat. Lag sem hljómar eins og ELO að djamma með Grandaddy af plötunni Time and Tide frá 1982.) 

The Verlaines - Pyromaniac: Flying nun plötumerkið er eldgamalt og enn starfandi (stofnað 1981 í Christchurch á Suður ey) og mikið akkeri og gróðrarstía í nýsjálenska indíinu. Margt af því sem Fljúgandi nunnan hefur gefið út hljómar svipað og því var talað um "nýsjálenska sándið" þegar þessi músik gerði vart við sig í kreðsum Vesturlanda á 9. áratugnum. Hljómsveitin The Chills (sem er í bónus) varð líklega stærst Flying nun banda, en mér fannast The Verlaines alltaf skemmtilegast. Þar var klassískum töktum blandað í háskólarokkið á órúnkaðan hátt. Sumt sem ég hef sjálfur samið minnir (mig að minnsta kosti) á Verlaines. Hér er lag af Juvenilia, safnplötu með Verlaines frá 1987 sem safnaði saman eldri ep-um og smáskífum. (Bónus: The Chills - Kaleidoscope World)

The Black seeds - Hey son: Nú eru allir og amma þeirra að velta sér upp úr mikilfengleika nýsjálenska gríndúettsins Flight of the Conchords. Þessir sjónvarpsþættir hófu göngu fyrr á þessu ári og þykja það ferskasta í gríni í dag. Áður en annar meðlimurinn, Bred, byrjaði í þessu spilaði hann í hljómsveitinni The Black Seeds sem er vinsæl döbb, raggí, fönk-grúppa í heimalandinu. Hann lék að auki álfinn Figwit í Lord of the rings (ekki að það hringi einhverjum bjöllum hjá mér). Hér er lag af fyrstu plötu Black seeds, Keep on pushing (2001), en samtals hefur bandið gert 4 albúm til þessa. Ný Sjálendingar eru mikið á þessari línu, þ.e. þarna er mikill fílingur fyrir raggí, döbbi, hipphoppi og fönki. Frumbyggjarnir maóríar virðast t.d. mikið fyrir þessa músik. (Bónus: Scribe - Stand up - New zealand hip hop stand up, segir Scribe, einn vinsælasti hipphopp-gaurinn þarna af breikþrú plötunni The Crusader frá 2003.) 
---
Að lokum, nokkrir nýsjálenskir hlekkir:
95bFM - útvarpsstöð í Auckland
Amplifier - NZ music online
NZ music - skýrir sig sjálft
NZ músik frá 7. 8. og 9. áratungum
NZ músik á wiki
NZ menning á wiki
NZ á wiki
---
Hafði orku til að glápa á heila bíómynd í gær, School for Scoundrels á voddinu. Alveg fín. Nokkur spenna er að myndast á mínu heimili fyrir Næturvaktinni, nýjum þáttum með Jón Gnarr og Pétri Jóhanni sem hefst eftir nákvæmlega viku. Það sem maður hefur séð lofar góðu og mágkona mín ætlar að koma í heimsókn á hverju sunnudagskvöldi til að horfa. Gerð hefur verið 16 mínútna mockumentary um Næturvaktina sem má sjá hérna.

08.09.07
Þá hefur Skemmtiþáttur Dr. Gunna runnið sitt skeið á enda í sumar. Væntanlegt kombakk næsta sumar. Í dag áttu Jón Ólafsson og Páll Óskar að keppa í sólópunkti. Þeir, sem og ég, eyddu 2 tímum af ævi sinni í að taka upp þáttinn á fimmtudaginn. Sem betur fer tók árvökull tæknimaður eftir því að fyrir mistök var ekkert á upptökunni, bara þögn. Ég hafði gleymt að ýta á hinn mikilvæga takka PMG-1. Á síðustu stundu fékk ég því Frey Eyjólfsson og Kristinn Pálsson til að fylla í skarð Jóns og Palla. Þeir eru með þætti á Rás 2 og hafa einmitt báðir lent í því að gleyma að ýta á PMG-1. Maður gerir það bara einu sinni. Leikar voru hreinlega hrikalega spennandi en Kristinn vann í bráðabana á Everything but the girl spurningu.
---
Ég drekk Morgundögg frá Kaffitári á hverjum degi. Ætli ég fari ekki með pakka á viku. Í Bónus kostar pakkinn 456 kr (síðast þegar ég vissi), en 660 í Hagkaup. Ég spara því um 10.000 kall á ári með að versla við Bónus, bara á kaffinu. Ef ég gerði þetta í 6000 ár hefði ég loksins efni á svona sportbíl eins og Jón Ásgeir var að fá sér.

07.09.07
Pöbbakviss á Paddys var stuð. Liðið Einglyrnið vann. Í því voru Heiða og Halla Valli í Ælu, menningarmálaráðunautur Paddys. Dálítið vandræðaleg, en engu að síður óumdeilanleg niðurstaða.
---
Áður en ég mætti hafði ég tíma að drepa og ákvað að rúnta aðeins um gamla varnarsvæðið. Það var enginn í hliðinu svo lítið mál var að komast inn. Mér skilst þó að von sé á vöktun svo unglingar fari ekki að mæta þarna í haugum til að fá sér einn stuttann og annan feitann í auðum húsum. Ég keyrði um hinn yfirgefna bæ og það var ekki laust við að það væri spúkí í þokunni. Slangur af bílum sá ég bara fyrir framan tvö fjölbýlishús. Ég bjó alveg eins við að afskræmt zombí hoppaði fyrir bílinn til að éta á mér heilann eða að yfirgefinn og snargeðveikur hermaður birtist úr þokunni til að drepa mig. Ekkert bjó þó þarna í þokunni frekar en í öðrum þokum. Þarna eru eflaust mikil sóknartækifæri. Enda ekki yfirgefinn 5000 manna bær á hverju strái. Með líkamsræktaraðstöðu og poolborði í hverju fjölbýli. Mér skilst að þegar allt sé komið á fúllsvíng eigi að opna Andrewsbíó aftur og Subways og þetta dót sem var þarna fyrir Kanana. Það var þó óneitanlega meiri exótískur sjarmi yfir þessu gróðurvana holti á meðan það var USA.
---
Alltaf er fínt að koma til Kef. Ólsen klikkaði ekki og ég sá nokkra aflitaða erkibrúnkuhnakka glotta við sportbíl. Í útvarpinu heyrði ég einhverja kerlingu segja frá könnun sem hún lét gera á smekk kvenna til karla og kemur þar fram að konur vilja stælta karlmannlega menn en enga plokkaða metróræfla með smábarnapung. Andlitsfegurð skiptir engu en gott er að viðkomandi sé með stóran böll. Þetta þóttu mér allt saman jákvæðar upplýsingar.

06.09.07
Muna svo eftir stuðningstónleikunum fyrir Úlf Chaka í kvöld. Þeir sem komast ekki ættu að leggja inn á 0101-26-014144 kt. 440304-2570.
---
Þess má geta að það eru bara örfáar sýningar eftir af Abbababb! nú í haust svo ef fólk ætlar á annað borð á þetta stórfenglega Grímuverðlaunaleikrit þá er tíminn núna!
---
Meira megaplögg: Verð með popp-pöbb-kviss á Paddys, Keflavík í kvöld kl. 21:30! Spilaðar verða 3 umferðir og eru verðlaunin spikfeit. Kvissið er undanfari hinnar árlegu Rockville-hátíðará Paddys sem fer fram 13-16 sept. Staðfest bönd nú þegar eru ÆLA - BACON - DARK NOTE - DR. SPOCK - HELLVAR - HOFFMAN - I ADAPT - JAN MAYEN - KLAUS - KOJA - LADA SPORT - LOKBRÁ - REYKJAVÍK! - ROHNDDA AND THE RUNESTONES  - TOMMYGUN - VICKY POLLARD.
---
Þótt Mæspeis sé sniðugt konsept verður að segjast að síðan er fjandanum hægvirkari. Maður er drullulengi að fletta á milli síða og það tekur 1-2 mínútur að fá lög í gang. Óskiljanlegar eru vinsældir Mæspeis miðað við þetta.
---
Felix skilur eftir sig slóð eyðileggingar og Felix banaði minnst níu segja fyrirsagnir. Aumingja Felix hefur margt á samviskunni.
---
Í gær horfði ég á endursýndan Stelpuþátt. Alveg ágætt, manni stökk nokkrum sinnum bros. Í samhengi við annað verður þó að segjast að Fóstbræður er geðveikt fyndið stöff og við erum ekki að tala um bros þar heldur pissíbuxurnar. Á meðan beðið er eftir auglýstu delúxboxsetti er margt vitlausara en að ylja sér við Fóstbræður á jútjúb. Bobby Breiðholt hefur t.d. tekið saman best of á síðunni sinni undir 22. ágúst. Besta íslenska sjónvarpsgrín í heimi ever! Það verður líka að segjast eins og er að Stöð 2 er að gera mjög góða hluti með Stelpunum og Næturvaktinni (sem byrjar 16. sept) og Pressunni (sem byrjar ekki fyrr en 25. des). Rúvið verður með Spaugstofuna með einhverjum nýjum leikurum sem ég veit ekki hverjir eru og róa væntanlega á mjög lignan sjó. Tvíhöfði sprellar svo í megaeuromambóþættinum á laugardagskvöldum (sem byrjar 29. sept). Skjár einn virðist alveg heillum horfinn í íslenskri dagskrárgerð og er ekki með neitt spennandi, bara einhvern óspennandi spurningaþátt (hvar er Popppunktur eiginlega?) og enn eina seríu um kellingar að taka til heima hjá skítapakki. Reyndar hefur maður eitthvað heyrt af Conan-Leno-legum kvöldþætti sem meistari Þorsteinn Guðmundsson ku eiga að sjá um, svo þar gæti sóknarfæri S1s á lendur kúlsins legið. Talandi um kvöldþætti þá er Latebyte hollensk síða sem bíður upp á niðurhal á nokkrum eðalþáttum. Feitasti bitinn er væntanlega Conan sem engin íslensk stöð hefur vit á að vera með. Reyndar segja sérfræðingar að Conan sé farinn að dala en ég tek þeirri alhæfingu með fyrirvara.

04.09.07
Í dag eru fimm ár frá því þetta gerðist:

Fimm ár er víst trébrúðkaupsafmæli en okkur langaði ekki í neitt timburdrasl – hvorki ámálaðan rekavið né flís úr krossi Krists – svo appelsínugul Kitchen Aid varða heillin. 
---
Jón Gnarr er byrjaður að vinna á auglýsingastofunni Nonni og Manni, við hlið Sigurjóns Kjartanssonar. Þetta þýðir bara eitt: Fyndnari auglýsingar. Og ekki veitir af. Fyrst verið er að troða einhverju upp á mann er best að það sé fyndið. Mér finnst auglýsingarnar með Aukakrónunum alls ekkert fyndnar en í Glitnis-auglýsingum er Dani að röfla í tveim Íslendingum um hve allt sé dýrt hérna. Það er nokkuð fyndið. Skyldu Tvíhöfði hafa fundið upp á henni? Síðasta kvöldmáltíðarauglýsingin fyrir Símann er ágæt, helst fyrir það að alltaf er gaman að sjá Jón. Eitthvað virðist þetta hafa farið öfugt oní biskupinn sem er með væl. Hverjum er nú annars ekki sama um hvað honum finnst? Það er nú ekki eins og feðgarnir á efri hæðinni hafi hringt í hann og beðið hann um að væla.
---
Útvarpsþátturinn Frank er með svaka mp3blogg og er færslan frá 28. ágúst sílspikuð. Bestu lög ársins só far. Ég ætla annars að vera með eitthvað svipað í næsta Skemmtiþætti sem einmitt er síðasti skemmiþátturinn í bili. Ég sný væntanlega aftur næsta sumar. Í Sólópunkti keppa hvorki meira né minna en sjálfir Páll Óskar og Jón Ólafsson. 
---
Þess má svo geta að ég sé um sérstakt tónlistar-quiz á pöbba quizzi á Paddys bar í Keflavík á fimmtudagskvöldið kl. 21. Það verður heldur ekkert slor.

03.09.07
Við þetta er að bæta að Baggalútur er kominn úr sumarfríi, nú með sjónverpli, Quataska boltanum og fleiru smálegu.
---
Stórfrétt: trommarinn í Þey, Sigtryggur Baldursson, mun taka við af gítarleikaranum úr Ham, Sigurjóni Kjartanssyni, sem Hr. Rokk í Abbababb! Sigtryggur treður í fyrsta sinn upp sem Hr. Rokk þann 23. sept., en þangað til mun söngvarinn úr Greifunum, Felix Bergsson, leika sjoppueigandann síkáta. Einnig hafa orðið þær breytingar í leikaraliðinu að Tinna Hrafnsdóttir er Halla í staðin fyrir Álfrúnu Örnólfs (sem er ólétt og því ekki trúverðug sem átta ára (nema í Nígaragúa)) og Jóhannes Haukur Jóhannesson leikur Steindór í 2 mánuði á meðan Atli Þór er að jafna sig eftir hnéuppskurð. Fyrsta sýning á haustönn er 9. sept. Miði reddar miðunum.
--- 

Í bókinni hans Chucks Klosterman, Sex, Drugs, and Cocoa Puffs: A Low Culture Manifesto, er einn smákafli sem er 23 spurningar sem Chuck segist spyrja fólk (konur) til að ákvarða hvort hann geti í raun elskað þær. Þetta eru mjög skemmtilegar spurningar og auðvelt að snúa þeim í djúpar pælingar (eða ekki svo djúpar). Ein spurningin er svona: Segjum að fullvaxinn og fullfrískur Clydesdale hestur sé skorðaður á hófunum við jörðina og hausnum á honum haldið föstum með þykkum kaðli. Hann er með fullri meðvitund en getur ekki hreyft sig. Segjum svo að öllum pólitískum föngum á jörðinni (samkvæmt lista Amnesty international) verði gefið frelsi ef þú getur sparkað þennan hest til dauða á innan við 20 mínútum. Þú mátt vera í stáltá. Myndirðu reyna þetta?
---
Í gær fór ég á æðislegasta stað í Reykjavík, heima hjá Hrafni Gunnlaugssyni á Laugarnesi. Dagbjartur var með svo ég ætlaði að afsaka mig með því að hann hefði bara hlaupið af stað inn í garðinn ef Hrafn birtist með haglabyssu. En meistarinn var ekkert á svæðinu heldur bara glaðlegur blökkumaður sem var ekkert að böggast í feðgum. Þetta er geðveikt flott ævintýraland sem þarna er risið. Þriggja metra hvannir út um allt, ófrýnilegar trégrímur á víð og dreif, fiskar í tjörnum, gengt oní fjöru, myndir og plaggöt hengd á veggi, skúlptúrar og algjör snilld. Hluti af sjarmanum er að gróðri hefur verið leyft að vaxa að vild og þá sér maður muninn á sannri náttúru og þeirri ofursnyrtu vestrænu steinsteypunáttúru sem við hrærumst í. Ég velti fyrir mér hversu æðisleg Viðey gæti orðið eftir 10 ár ef þar yrði sankað saman allskyns exótískum munum og drasli, hvönn sáð og öllu leyft að hafa sinn gang. Þetta var eiginlega eins og í Apocalypse Now og ég bjóst við að rekast á Hrafn í einhverjum helli þarna nuddandi hauskúpu. Þessi ævintýraheimur Hrafns er síst verri en dótið hans Samúels Jónssonar í Selárdal og ég ætla rétt að vona að þetta verði friðað og varðveitt þegar þar að kemur. Uppgötvun sumarsins!
---

Vinir Úlfs í Stjörnukisa ætla að halda styrktartónleika fyrir hann á fimmtudaginn (6. sept) í Iðnó. Hér er fréttatilkynning sem ég fékk senda:

Úlfur C Karlsson tón- og myndlistamaður hefur strítt við hvítblæði seinustu ár. Eins og gengur hefur hann gengist undir ótal læknismeðferðir og verið inn og út af sjúkrastofnunum í gegn um þennan tíma. Hann er fjölskyldufaðir og hefur konu og barn fyrir að sjá en hefur sökum veikinda sinna lent illilega úti fjárhagslega og nú er svo komið að þessi litla fjölskylda er að þrotum komin. Ég er í forsvari fyrir nokkra vini og félaga Úlfs sem komum saman og viljum sýna í verki samhug og stuðning með Úlfi í þessum þrautum sem hann og fjölskylda hans ganga í gegnum. Grunnhugmyndin er sú að erfiðleikarnir sem fylgja slíkum veikindum hljóti að vera hverjum manni nóg raun, fjárhagslegar áhyggjur í ofanálag er eitthvað sem við getum ekki horft upp á aðgerðalaus.

Af þessum orsökum söfnuðumst við saman til að halda þess tónleika, til þess að safna í sjóð til þess að Úlfur og kona hans þurfi ekki að hafa eins miklar fjárhagslegar áhyggjur í ofanálag við allt það erfiði sem fylgir því að stríða við jafn erfiðann sjúkdóm. Allir sem koma fram gefa vinnu sína og eru allir tengdir Úlfi í gegn um vin- eða kunningskap.
---
Hér er annað lag með Náttúru, en svo set ég ekki fleiri inn því þá verður Shady brjáluð: Náttúra - Could it be found.

02.09.07
Þetta er ekki mynd af Múhammed spámanni:

Ekki þetta heldur:

Og þetta er alls ekki mynd af Múhammed spámanni:

Ég endurtek: Þetta eru ekki myndir af Múhammed spámanni.
---
Ljósanótt var nú meira giggið. Svoleiðis rok og rigning að maður bjóst við að tjaldið með öllum græjum fyki út á haf. Það var klukkutíma frestun vegna veðurofsans og vegna þess að Jón Skuggi hljóðmaður fékk sviðsmyndina í hausinn og þurfti að láta sauma sig upp á slysó. Í gámi á bakvið biðu Skoppa og Skrýpla og Kalli á þakinu og grísinir þrír sem reyktu eins og strompar. Disneyland á sýru. En svo var voða gaman þegar þetta byrjaði loksins og Kalli á þakinu stökk upp á svið og fretaði með. Maður stóð í pollum og átti von á steikingu á hverri stundu en það slapp.

01.09.07
Og enn halda menn áfram að deyja eins og ekkert sé sjálfsagðara. Nú erða Hilly Kristal eigandi CBGB's sem er fallinn í valinn (meira hér með tóndæmum eða hér). Mæli annars með Skemmtiþættinum í dag, Bóas úr Rvk! og Birkir Fjalar í I adapt í dúndur stuði og svo erða gigg á Ljósanótt í Kef kl. 14 í dag - Abbababb!
---
En nú kynna Straumur-Burðarás og Mæðrastyrksnefnd safnplötuna Ég drekk blóð þitt, ég ét hold þitt, fátæklingur! eþs T5!:

BC Camplight - Lord, I've been on fire: Kani sem hljómar stundum eins og Ben Fold og Ron Sexsmith og lítur stundum út eins og Gunnar Jónsson fóstbróðir og spilar poppmúsik sem hljómar eins og hann hafi dáldið hlustað á Beach Boys, Burt Bacharah, Xtc og Soft boys. Hefur gert tvö albúm, Hide, run away, sem vakti nokkra lukku 2005 og svo eina glænýja sem þetta lag kemur af, Blink of a nihilist. Það er auðvitað allt of margir sem langar til að vera hinn nýji Brian Wilson og restin af þessari plötu er ekkert að gera stórkostlega hluti fyrir kjöttætlurnar á efri hæðinni, en þetta lag er engu að síður glimrandi glúrið og gott.

Soko - I'll kill her: Franskt dúó, þau kalla sig Soko boy og Soko girl. Hér er ljómandi skemmtilegt lag sungið út frá heimsýn geðveikrar stúlkukindar í hefndarhug. Ég held bandið sé ekki á samningi og hvað þá búið að gefa út plötu en kannski kveikir einhver á perunni og þau verða víðfræg eftir að þetta lag heyrist í sjónvarpsþætti og auglýsingu.

Shout out louds - Tonight I have to leave it: Sænsk 80ís hetjunýbylgja í 00ís-gæru. Eins og Echo & The Bunnymen með Robert Smith. Af nýrri plötu, Our ill wills.

Náttúra - Tiger: Útúrhassað og dáleiðandi hipparokk frá 1972. Miklir meistarar á ferð, Shady í stuði, Karl í stuði á orgelinu, Björgvin í stuði á gítarnum o.s.frv. Af einu plötu Náttúru, Magic Key, sem enn hefur ekki verið yfirfærð og gefin út á cd. Er því meðal fárra platna á topp100 listanum sem fylgdi Eru ekki allir í stuði? sem enn hefur ekki fengið cd-meðferðina (var #80). Aðrar plötur sem liggja ó-cd-aðar eru Þeyr - Mjötviður mær (#25 - kom reyndar mest á safndisknum Mjötviður til fóta), Kamarorghestarnir - Bísar í banastuði (#75), Tappi tíkarrass - Miranda (#82, Björk ku ekki kæra sig um cd-un), Bara flokkurinn - Gas (#88, er reyndar að mestu á safndisknum Zaphir), Drýsill - Welcome to the show (#90), Íkarus - Rás 5-20 (#96) og Frakkarnir - 1984 (#100). 

Húbert Nói & Howie B - Into landing: Húbert Nói er frægastur fyrir myndlist en hefur tekið spretti í tónlist, spilað með HÖH og Psychic TV og sá um umhverfishljóð í frægri sýningu Oxzmá-hópsins, Oxtor í svartholi, sem ég er enn að naga mig í handarbökin að hafa ekki séð. Út er komið tónverkið Music for astronauts and cosmonauts, sem Húbert gerði með Howie B., eftirsóttasta pródúser heims fyrir nokkrum árum. Hugmyndin kveiknaði þegar Húbert heyrði Bjarna Tryggvason lýsa hvernig tíminn líður í geimferð, en það tekur víst 90 mínútur að fara hring umhverfis jörðin í geimflaug. Lögin á verkinu (2 cds) eru Countdown, Take off, Morning, Day, Evening, Night, og þetta hér sem er síðasta lag verksins, lendingarlagið, sem Húbert segir að sé fengikall til Young marble giants. Vilji fólk geimferð í stofunni er fátt betra en þessi plata.
---
Ég var spurður að því um daginn hvort ég teldi að einhverjar plötur sem hafa komið út á þessari öld væru nógu góðar til að bætast í hóp platnanna 100 á áðurnefndum 100 Bestu plötur síðustu aldar-listanum. Ég veit kannski ekki hvort einhver plata komist í topp 10 hópinn, en jú jú, mikil ósköp, það hafa komið út fullt af ágætis plötum. Án þess að ég nenni að raða þeim þá eru hér 10 góðar plötur frá þessari öld: XXX Rottweiler hundar - XXX Rottweiler hundar, Mínus - Halldór Laxness, Mugison - Mugimama, Is This Mugimusic?, Sigur Rós - Takk, Emilíana Torrini - Fisherman's Woman, Trabant - Emotional, Eberg - Voff voff, Apparat Organ Quartet - Apparat Organ Quartet, Ólöf Arnalds - Við og Við og Reykjavík! - Glacial landscapes, Religion, Opression & Alcohol. Gestir mega taka trylling um þetta mál í gestabók ef þeir kæra sig um.

31.08.07
Góður Bakþanki í dag eftir Kristínu Svövu. Nú er bara spurning hvaða banki fattar fyrstur að gera eitthvað í þeirri neikvæðu ímynd sem landsmenn hafa á honum. Hvaða banki hættir fyrstur böggi, bruðli og okri og kemur með eitthvað annað en flísteppi til að slá í gegn, t.d. Já, við afnemum debetfærslugjöldin. Nú getur þú eytt eins miklu af þínum eigin peningum án þess að við rukkum þig fyrir það því frá og með deginum í dag erum við hætt að taka 13 kall á hverja einustu debetfærslu. Þú heyrðir rétt: Þú getur eytt á debet og það kostar ekki neitt alveg eins og þegar þú eyðir á vísa. XXbanki: Við erum ekki skítugar lýs á landsmönnum, við erum góð og viljum bara græða smá á þér, ekki ógeðslega mikið. Nei í alvöru. Plís, ekki finnast við ógeðsleg.
---
Lög sem Wee Willie Shantz gerði og komu út á litlum plötum á hinu obskjúr plötumerki Mark Twain á 6. áratugnum eru stundum kölluð furðulegustu lög sem hafa komið út. Það að þetta kom út sirka 1955, löngu áður en Frank Zappa, Residents og margir margir fleiri tóku flippið upp á arma sína, gerir það auðvitað að verki að þetta er þrælmerkilegt og líka það að lítið sem ekkert er vitað um Wee Willie. Á föstudegi er margt vitlausara en smá flippgrúsk í boði Cheezeball sem hafa verið svo elskulegir að pósta öllum lögum Wee Willies á mp3 hér.
---
Ef ég væri barnlaus piparsveinn færi ég í kvöld á Gaukinn, drykki mig fullan og dansaði eins og hnakki á ketamíni við það sem innstu koppar í búri Kitsune Maison samsteypunnar ætla að dæla yfir mannskapinn. Kitsune gefa nebblega út hressandi tölvudanspopp sem er gaman að skokka við og eru franskir og kúl.
---
Má ekki reyna við karla á almenningssalernum í USA? Ég skil ekki alveg þessar fréttir. Og hanga löggur allan daginn með buxurnar á hælunum inn á þessum klósettum og bíða eftir því að einhver bjóðist til að ríða þeim? Alltaf sama hommahallærið á þessum teprulegu Könum.

30.08.07
Næst síðasti Skemmtiþáttur Dr. Gunna í bili er á laugardaginn. Óskalög úr Kolaportinu (sem á að loka um áramót ef ekki kemur til stórtækra mótmæla og hlekkingja við harðfiskbása) og rokkfrændurnir Birkir Fjalar úr I adapt og Bóas úr Reykjavík! ætla að berjast á banaspjóti í sólópunkti. Jibbí jei.
---
Ég hef velt því fyrir mér að undanförnu hvort sé skárra að vera blindur eða lamaður fyrir neðan mitti. Ég hef ekki komist að neinni niðurstöðu. Það fer reyndar mest eftir því, held ég, hvort hrókurinn sé í lamasessi eða ekki. Stundum finnst mér blindan skárri, stundum lömunin. Lömun fyrir neðan mitti er kannski skárri en blinda, en lömun fyrir neðan háls er líklega verra en blinda. Æi, líklega full dapurlegar pælingar.
---
Það er allt að hækka. Bleiurnar og þvottaefnið var miklu dýrara í Bónus í dag en fyrir 3 mánuðum. Verst að maður á engar nótur til að bakka sig upp í þessari tilfinningu. Lækkun virðisaukaskatts rassgatið mitt. Kona á besta aldri hrósaði mér f/ Bakþanka en skammaði f/ að kalla Lufsuna Lufsu. Ég sagði að Lufsunni fyndist þetta bara krútt en konan hélt fast við sinni keip og skipaði mér að hætta strax. Þá hljóp ég grenjandi í burtu.
---
Einhver Dabbi Grensás skammast sín oní tær fyrir hálfvitaganginn í viðtali á Stöð 2. Púlizerstöff, ekki spurning.

29.08.07
Ég fór ekki á eina mynd hjá Grænu ljósabíóhátíðinni. Það er ekkert hlaupið að því að komast úr húsi þessa dagana. Þess í stað dánlódaði ég tveimur myndum, Sicko og For your consideration. Ég er með dáldið samviskubit að hafa ekki styrkt Ísa og hátíðina. Sicko er eins og ég bjóst við, grenjandi fólk og Michael Moore að hugga. Já já ég veit: Amerískt heilbrigðiskerfi tottar en ég nenni ekki að glápa á það. Hef horft 35 mín af myndinni og veit ekki hvort ég nenni að klára. Jú annars, ég geri það örugglega. Það er eitthvað í þessu sem heldur. Hina sá ég í gær:

For your consideration --> dl XXX
Spinal Tap mockument liðið enn á ferð. Þetta er þó ekki mockument heldur bíómynd. Lúserar halda að þeir séu að fá óskarsverðlaunatilnefningu. Þokkalega fyndið alveg en ekki meðal þeirra bestu mynda. 
---
Ég gleypti í mig íslenskar skáldsögur á 9. áratugnum. Las allt eftir Einarana, bækur Ólafs Gunnarssonar (Ljóstollur!) og Péturs Gunnarssonar og Guðberg Bergsson komplett. Lagði á mig talsvert erfiði við að grafa upp fyrstu verk meistarans sem á þessum tíma voru ófáanleg. Músin sem læðist er dálítið gufuleg en strax í Leikföngum leiðans (1964) er kominn hinn frábærasti galsi í kallinn eins og t.d. í sögunni um nýja kennarann sem syndir út á sjó og týnir sundskýlunni. Magnað. Tómas Jónsson metsölubók og Ástir samlyndra hjóna æðislegt stöff. Ég þýddi meira að segja einn kafla úr Ástunum yfir á ensku til að birta í einhverju erlendu fanzíni. Sendi Guðbergi þýðinguna til að fá samþykki hans. Hann gerði það en hefur örugglega ekki nennt að lesa þetta yfir því ég sé það núna að þetta er ömurleg þýðing. Margt fleiri fór undir augun. Tvö dónaleg atriði man ég enn úr bókum líttþekktari höfunda. Í fyrsta lagi endir á frekar slappri bók eftir Hafliða Vilhelmsson. Bókin endar á að söguhetjan lætur ríða sér í rassgatið út í Amsterdam og mælir eitthvað á borð við: Mér fannst þetta gott enda hafði ég alla mína tíð látið ríða mér í rassgatið hvort eð er. Annað atriði er líklega út bók eftir Anton Helga Jónsson, sem ég veit ekki heldur hvað heitir né hvað er um. Enn erða hráslagalegt klámið sem heilinn man því þarna er talað um samfarir, eitthvað á borð við Skítakleprarnir í rasshárum hennar minntu mig á litlar jólakúlur þegar ég dúndraði henni aftan frá. Kling klang, ég hringdi jólin inn á meðan ég hamraði taktfast og utangátta. Kannski ég reyni að sækja þetta í safnið og hafa orðrétt.
---
Einu sinni var bara einn rúllustigi á Íslandi. Pældu í því! Hann var við Laugarveg, í einhverri búð sem nú er GK. Eitthvað hefur mér fundist fyrirbærið merkilegt því fyrsta spólan sem ég (Erðanúmúsik) gaf út heitir Rúllustiginn. Þetta var safnspóla með 10 hljómsveitum, hvor annarri betri. Kannski maður ætti að fara að mp3-væða þetta gamla Erðanúmúsikspóludót?

27.08.07
Í 60 mínútum í gær var Símon þarna leiðinlegi gaurinn í Idol (jútjúb). Hann var ekkert að þykjast vera annað en hann er og líkti sjálfum sér við McDonalds og almennilega tónlist (geri ég ráð fyrir) við 3 stjörnu Michelin kokk. Bara hressandi þegar menn vita hvað þeir eru. Líka hressandi þegar menn rífa smá kjaft eins og rokkstjarnan Magni í mbl. Málefnin loga af umræðum um þetta mál (gríðarlega gáfulegum auðvitað, ekki annað hægt þegar þessir andans jöfrar þarna tjá sig) en ég get alveg tekið undir með Magna (og Agli): Tom Waits er drepleiðinlegur.
---
Hér er kafli úr óútgefnu, ókláruðu og svo ekki sé talað um óprófarkarlesnu skáldsögunni MMÚH:

Ég borða sárasjaldan í bankamötuneytinu, bæði er maturinn frekar ókræsilegur (alltof oft soðin ýsa eða kjötfas soðið með káli = viðbjóður) og mér finnst frískandi að sleppa úr kvennaheiminum. Ég segi stundum í gríni að á mig myndi vaxa snípur ég kæmist ekki í burtu í matar og kaffitímum.
Ég hef hringt í Lilla og Hamarinn og mælt mér mót við þá á Mokka kaffi. Ég er auðvitað ennþá hálf slappur eftir afmælisdrykkjuna og sé í hyllingum þegar ég mun slafra í mig ristaðri samloku með skinku, osti og grænum aspas; vöflu með útafvellandi rjóma og sultu og tveim ef ekki þrem bollum af súkkulaði með rjóma. 
Ég er mættur fyrir hálf tólf, enda fær maður sjaldan almennilegt borð eftir þann tíma á Mokka í hádeginu. Vinir mínir mæta skömmu síðar, Hamarinn frekar rislár en Lilli í sínum eðlilega gír. Hann er alltaf eins. Nú er hann með nýjustu plötu Tom Waits með sér, sú var að koma í búðina fyrr um morguninn. Ég renni yfir lagalistann og Lilli segir að þetta sé ágætis plata. Hamarinn byrjar ekki að vinna í Þjóðleikhúsinu fyrr en eftir hádegi. Þar er verið að setja upp eitthvað íslenskt stykki úr verðlaunasamkeppni. Eitthvað um kreppu nútímamannsins og hraðann í þjóðfélaginu. Hamarinn ber því ekki vel söguna.
Við félagarnir höfum ekki farið yfir fylliríið af neinu viti og Hamarinn vindur sér að máli málanna.
“Jæja, hvernig gekk svo á galeiðunni,” spyr hann mig. “Fórstu upp á eitthvað?”
Ég neita glottandi og reyni að láta eins og ég hafi bara ekki nennt á bak. Við erum karldýr í karlaumhverfi. Það mun engin blanda sér í umræðuna og setja út á að við tölum um konur eins og skinlausar skepnur. Við erum eins og veiðimenn sem gortum okkur af veiðinni. Þó við séum vissulega frekar vonlausir berum við okkur mannalega. Við vitum upp á hár hversu mörgum konum við höfum riðið. Stundum berum við saman bækur okkar. Ég hef fulla trú á að allir karlmenn láti svona. Að jafnvel Bjarni Ármannsson bankastjóri og æðsti yfirmaður minn tali eitthvað svipað við vini sína. Ég hef líka trú á að margar konur hagi sér svona. Þetta er sammannleg reynsla. Við gleymum alltof oft að við erum bara dýr. Jamm.
Nú færist íbyggið glott yfir andlit Hamarsins og ég fatta hvað hann vill að ég segi.
“Þú ætlar þó ekki að segja mér að þú hafir komist á kellingu,” segi ég. “Einar sagðist hafa séð þig dauðan fram á borði.”
“Dauður og ekki dauður,” segir Hamarinn og dregur augað í pung. “Eins og þú veist þá eru margar konur með Flórens Nætengeil sindrómið.”
“Ég skil. Var Magga þarna og dró þig heim?”
“Jááááh vinur minn, það var svo mikið svoleiðis.”
Hamarinn hermir ekki eftir Dengsa nema mikið liggi við eða að hann sé í sérstaklega góðu skapi.
“Og hvað?”
“Nú við vöknuðum saman og nutumst frameftir degi,” segir Hamarinn tilgerðarlega. “Ég er að fara að hitta hana í kvöld. Vorum að spá í að tékka á nýju Woody Allen myndinni.”
Ég verð nú að segja að þessi Magga er frekar vafasamur karakter. Einum of æst eitthvað fyrir minn smekk. Fer stundum að rífast upp úr þurru um ekki neitt. Verður alltaf að hafa rétt fyrir sér. Hún og Hamarinn hafa svona verið að dandalast eitthvað síðustu vikur en ég var satt að segja að vona að það væri dottið upp fyrir. Hjalti á skilið skárri konu en þetta. Æ það er annars ekki mitt vandamál. Leifur litli þykist djúpt sokkinn í Moggann og er alveg utanveltu í þessu samtali. Það er eins og hann og Hamarinn hafi ákveðið að þeir séu í liði á móti mér; Gaurar með kærustur á móti lúða með enga kærustu. Mér lýst ekkert á þetta. 
“Og… Hvað ertu að spá?,” spyr ég Hjalta Hamar. 
“Ekkert. Bara sjá til. Láta þetta þróast eitthvað. Það er allavega geðveikt að sofa hjá henni.”
A-ha. Hjalti notar “Sofa hjá” en ekki “ríða” eða eitthvað í þá áttina. Sönnunargögnin hrannast upp.
“Jæja vinur,” segi ég, óvart alltof særður í röddinni. Ég stend upp til að panta annan súkkulaðibolla. Þeir eru komnir á flug í spjall um þennan helvítis Tom Waits þegar ég sný til baka. Djöfulsins rauðvínsgutlandi rámi ræfill sem enginn hefur gaman að nema trefilvafðir tussulegir háskólanemar í hettuúlpum. Tom Waits og Charles Bukowski, sami pakkinn, eitthvað mömmulið notar verk þessara alkóhólista til að ná sambandi við eitthvað sem það heldur að sé meira “ekta” en litli öruggi sósíalheimurinn sem það hefur velkst í frá blautu barnsbeini. Æ, ég má ekki vera alltaf svona neikvæður. Lilli segir nýju plötuna afturhvarf til fyrri verka og bla bla bla. Ég sökkvi mér í Moggann og byrja aftast. Ég skil mest það sem stendur þar. Ég skil út á hvað sjónvarpsdagskráin, fréttir og viðtöl við poppara og leikara og bíóauglýsingarnar ganga út á. Ég skil meira að segja það sem Velvakandi er að rausa um og oftast líka liðið sem skrifar lesendabréfin. Ég myndi skilja hvað íþróttasíðurnar ganga út á ef ég hefði snefil af áhuga á íþróttum. Eins og mér sé ekki sama hvað einhverjir gaurar geti lyft miklu eða hlaupið hratt. Allt íþróttafólk er eitthvað svo kjánalegt og vitlaust. Aldrei hef ég heyrt íþróttamann segja eitthvað af viti. Og fótboltinn maður. Ef það væri ekki fótbolti myndu hvítir karlar kannski nenna að gera uppreisnir aðeins oftar en þeir gera. Heiladeyðandi rugl.
Eftir sportið verður Mogginn sífellt flóknari sé hann skoðaður svona öfugt. Ég nenni aldrei að spá í dauða fólkinu. Hverjum er ekki sama um það? Ísland er pínulítið land en samt deyr eiginlega aldrei neinn sem ég þekki. Hvaða fólk er þetta eiginlega? Svo taka við aðsendar greinar sem ég skil sem betur fer ekkert í. Eitthvað lið að skrifa um það sem því virðist búa í brjósti. Aumingja fólkið. Voðalega hlýtur því að líða illa og eiga lítið líf fyrst það nennir að pæla í öllum þessum leiðindum. Hér er t.d. einn að skrifa um skattvísitölu og hagvöxt. Hvað þýðir það? Ég fæ höfuðverk. Fréttir eru yfirleitt óskiljanlegar líka, a.m.k. finn ég mig ekki knúinn til að kafa ofan í þær. Hver höndin upp á móti annarri og allt í steik. Er nú ekki nóg að fylgjast með þessu dottandi fyrir framan sjónvarpið?
Ég veit það ekki. Þeirri úldnu tusku var nuddað framan í mig um helgina að ég væri orðinn fertugur og það taldist nokkuð hár aldur fyrir ekki svo löngu. Fyrir nokkrum öldum voru fertugir karlar komnir á efri ár með bullandi beinkröm og orðnir tannlausir og sjóndaprir. Búnir að koma upp nokkrum krökkum og þannig séð tilbúnir fyrir gröfina, búnir að “uppfylla skyldur sínar við lífið sjálft” eins og sagt er. Pabbi er á vissan hátt af þessari kynslóð. Kannski eru foreldrar mínir á síðustu kynslóð fortíðarinnar, og ég þá væntanlega af fyrstu kynslóð framtíðarinnar. Samkvæmt einni auglýsingunni sem nú er í gangi uppfyllir maður skyldur sínar við lífið sjálft með því að kaupa sér ákveðna tegund af jeppa. 
En ég fíla mig ekki eins og ég sé fullorðinn. Reyndar ekki sem ungling heldur og þaðan af síður eins og barn. Ég hef í grunninn ennþá sömu áhugamál og þegar ég var tvítugur. Þetta yrðu seint talin dygðug gildi: Að reyna að komast yfir sem mest af músik og bíómyndum, og ég bíst við að ég geti bætt við líka að reyna að komast yfir sem mest af konum. Ég bý reyndar ekki í foreldrahúsum, en það er líka eini munurinn á mér síðan ég var tvítugur. Til að teljast fullorðinn ætti ég eflaust að hafa áhuga á því sem er í Mogganum framan við skrítlublaðsíðuna. Ég vona samt innilega að ég fái aldrei þann áhuga. Já takk, ætli ég sé ekki bara ánægður með að vera eins og ég er, tvítugur, fertugur; skiptir ekki máli. Aldur er afstæður, svo ég vitni í frasana.
“Jæja, ætli það sé ekki best maður drífi sig,” segi ég, pakksaddur. Ég hef ekki hugmynd um hvað Hjalti og Leifur voru eiginlega að röfla.
“Jeps,” segir Lilli og grípur helvítis Tom Waits diskinn af borðinu.
“Við sjáumst,” segja þeir og ganga upp Skólavörðustíginn. Kannski Hamarinn ætli að fylgja Lilla í Skífuna, en það hefði nú verið eðlilegra að hann yrði samferða mér. 
“Gerum það,” segi ég. Á leiðinni niður í banka átta ég mig á því að hvorugur þeirra spurði mig út í gervipíkuna. 
---
Kannski klárar maður þetta einhvern tímann. En það kemur amk ein bók eftir mig fyrir jól og dáldið öðruvísi en hin ókláraða MMÚH, nebblega barnabókin Abbababb! með myndum e. Fanneyju Sizemore.
---
Ægilegt hringl er alltaf á þessum blaðamarkaði. Nú á RT að taka við af SME á DV (eða starfa við hliðina á honum) og áður hafa þeir RT og SME verið á sirka 70 blöðum og tímaritum síðustu 2 árin, rifið þau eitthvað smá upp en svo skipt um vinnustað jafnharðan. Ég held að rekstri DV sé aðallega haldið úti til að hægt verði að halda upp á aldarafmælið árið 2010. Ég get ekki séð aðra ástæðu. Ég meina, það er ekki eins og einhver sé að græða á blaðinu og ekki er það neitt sérstaklega skemmtilegt þessa dagana. Mallar frekar svona af gömlum vana. Kannski RT eigi að peppa þetta upp? Og kannski tekst honum það. Ísafold og Mannlíf hafa amk verið frekar frískleg en verða það varla lengur fyrst RT er farinn.
---
Er þetta kannski "guð"?
 

26.08.07
Alcan, Hydro, KBbanki og Lífeyrissjóður Pol Pots kynna safnplötuna Lágmarkslaun 150 þúsund strax!, eþs Topp 5!

The Gossip - Standing in the way of control (Soulwax nite mix): Hún er feit, kjaftfor og (almáttugur hjálpi mér) loðin undir höndunum. Þess vegna er Beth Ditto, söngkona The Gossip svona spes og áhugaverð. Bandið er svo sem ekkert geðveikt æðislegt nema lagið Standing in the way of control, sem er nútíma pönksál um líðan samkynhneggjaðra og hugsað sem andsvar við leiðindunum í Bússstjórninni (deyjið! deyjið!). Hér er enn eitt mixið, eftir Belgina hressu. Allir á gólfið svo!

The Magnetics - Hörku flykki: Bolurinn þoldi ekki vélræna Stuðmenn og vildi bara gamla góða hjakkið. Því miður sá ég ekki giggið enda nennti ég hvorugum þessum bankatónleikum en hefði viljað sjá Stuðmenn tölvast. Þar eru þeir nebblega á hornskökkum heimavelli og alltaf er gaman að hornskekkju. Jakob hefur löngum verið spenntur fyrir tölvutólum og er þessi spennandi hugmynd örugglega frá honum kominn. Sirka 1981 var hann með einhverjum Alan Howarth í tölvupoppbandinu The Magnetics og saman gerðu þeir A historical glimpse of the future. Þar innan um vokóderpopp og léttbræddar lágstemmur (Jakob hafði jú dælt út los angelískum bæðingi árin á undan) voru stuðlögin Súkkulaðisjúkur og Hörku flykki sem komu út á 7" á svipuðum tíma. Hörku flykkið er eftir Jakob og Valgeir Guðjónsson og er að öllum líkindum eldgamalt Stuðmannagrín. Textinn er góður og Chuck Berry vill fá Stefgjöldin. Sé fólk í Jakob in ðe 80s-stuði má benda á að Zúri blöggaði nýlega Bone Symphony smellinum It's a jungle out there og Bobby Breiðholt bætti um betur og gróf upp jútjúbið af sama lagi (aðalhlutverk Ragga Gísla og Stefán Jónsson). Því má segja að eitísJakob sé það heitasta á íslenska mp3blögginu í dag.

Pink - Leave me alone (I'm lonely): Ég er alveg maður til að viðurkenna fíling fyrir velskornu fm-rokki. Hér er Pínkurinn með ofurgrípandi rokkfroðu eftir sjálfa sig og einhvern Butch Walker. Pínk, sem lítur alltaf meira og meira út eins og Billy Idol, er að gera góða hluti. Ég myndi jafnvel fara á hana í Höllinni ef hún kæmi aftur.

The Germs - Lexicon devil: Maður var aldrei í fíling fyrir amerískt pönk í gamla daga. Eða jú, Ramones fílaði maður og Dead Kennedys, en svo voru stórir auðir blettir hjá manni fyrir allri LA pönk senunni og bönd eins og Black Flag, The Weirdos, The Dils, The Screamers, The Dickies, The Plugz, The Zeros, The Bags og The Germs fóru að mestu framhjá manni. Það var mikil anti-ameríkanisering í gangi sem endurspeglaðist sterkast í því að manni fannst hljómsveitin Surf Punks það bjánalegasta í heimi. Miklu betra fannst manni breskt dót. En það má alltaf endurmennta sig í pönki eins og öðru. Ég get kannski ekki sagt að ég hafi misst af miklu en platan (GI) með The Germs, sem löngum er talin klassískt, er ágæt. Gítarleikarinn Pat Smear er enn að hjakkast með þetta band en hann spilaði sem kunnugt er síðar með Nirvana og Foo Fighters. Söngvarinn Darby Crash, sem var manna fyrstur til að vera með hanakamb í Bandaríkunum (þ.e. eftir indjánana) sprautaði sig viljandi yfir móðuna miklu daginn áður en John Lennon var skotinn 1980. Hér er eitt þekktasta lag Sýklanna. 

Super furry animals - Suckers: Þegar þessir komu til Íslands 1995 drakk ég mig fullan og hékk baksviðs og var með kjaft. Einhver breskur blaðamaður frá mm eða nme eyddi síðar heilmiklu púðri í að lýsa fullum feitum fávita í grein um íslandsheimsókn sveitarinnar. Ég var dáldið sár um tíma. Síðar varð söngvarinn Gruff sannur íslandsvinur og fór að hanga með Mugison á Vestfjörðum. Nú er 8unda plata SFA að koma út, Hey Venus! Þetta er rólegri plata en oft áður og ekkert rosalega fljóttekin en mér sýnist þetta lag ná fyrst í gegn. Enda gott lag.
---
Ég lét blekkjast af auglýsingunni "Nú geturðu tekið gleði þína aftur því Rólósjeikinn er kominn aftur." Ég vildi taka gleði mína aftur og dró fjölskyldana með á Mcfukk til að fá sér rólósjeik. Þetta var svo vont að ef ég væri ekki ofæta þá hefði þurft að henda helmingnum.
---
Í Mosfellsbæ var allt vitlaust á Mosfellsdögum og hvergi bílastæði að fá í Álafosskvosinni. Samt voru líka Sandgerðisdagur, Viðeyjardagur og eitthvað meira, en samt var allt troðið og líka troðið í Kringlunni. Við nenntum ekki að troðast og rúntuðum bara um hin úthverfalegu úthverfi. Við erum mikið að spá í að flytja í Mosfellsbæinn. Stutt í móanna. Og svo er þetta náttúrlega orginal höfn fjölskyldu minnar. Þau voru reyndar flutt í Kópavoginn 4 árum áður en ég fæddist, en samt. Og svo hefur maður bara almennt góðan fíling til Mosfellsbæjar. Þarna er t.d. besta bakarí á landinu og Sigur Rós og Gildran. Og komin einhver geðveik sundlaug sem maður þarf að prófa. Þannig að nú vantar bara rétta húsið. 
---
Jónas bendir á að það standi til að loka Kolaportinu í 1 og 1/2 ár og að þegar það opni aftur verði það minna og lélegra. Þetta eru glötuð tíðindi. Er nú ekki hægt að finna þessu pleisi almennilegan stað til frambúðar? Þó lyktin sé slík að algengur hrekkur sé að fara með rúmföt fólks þarna inn er alltaf stuð að koma þarna. Og ekki er vanþörf á stuði í Rvk. Það sést að fólk vill stuð -- sbr. vinsældir Mosfellsdaga. Það má sem kunnugt er ekki gefa pylsu og blöðru án þess að 10.000 mæti á svæðið. Hönnunarhnakkinn Arnar Gauti lýsti þessi vel á sínum tíma og talaði um "rútufólk" því allt fylltist á "rútudaga" í BSÍ. Meira stuð! Rútustuð! 
---