#1252    Fór í Sambíóin og í hléi ætlaði ég að fá mér svona rauðan svalandi klakadrykk (slushy) en þá kostaði hann 310 kr... Mér þykir ákaflega mikið okur að borga 310 krónur fyrir frosið vatn með bragðefnum útí (sem sambíómenn framleiða sjálfir og er kosnaðaverðið sennilega 5 kr fyrir 600 svona glös!!) OKUR!

#1251    Nei, ekki okur, heldur frábær þjónusta. Þann 19. sept. fór ég að í tvær búðir fyrir fatlaðan mann sem ég vinn hjá. Sá hafði brotið glerkönnuna á kaffivélinni sinni sem var aðeins nokkra mánaða gömul og keypt í Elko Skeifunni.Verslunin flytur ekki lengur inn glerkönnur (sem varahluti) því það er svo óhagkvæmt sagði afgreiðslumaðurinn um leið og hann gekk að kaffivél sem stillt var út, rétti mér glerkönnuna af henni og sagði: "Gjörðu svo vel,  maðurinn má eiga þessa!" Þessi hlýlega framkoma gaf  mínum manni um 6.000 kr (ný kanna).
Hinn staðurinn sem var Byggt og búið í Smáralind.  Þegar afgreiðslumaðurinn heyrði að ég væri að versla fyrir fatlan mann bauð hann mér strax 10% afslátt og sagði að verlsunin væri að bjóða sambýlum og þjónustuíbúðum þennan afslátt. 
Elko og Byggt og búið: Takk fyrir okkur!
Sesselja Guðmunddóttir, Mosfellsbæ

#1250    Var að taka rútu heima úr skólanum frá BSÍ og ákvað að fá mér eina hálfslíters kók í sjoppunni þar. Kókflaskan kostaði 250 kr. Sama kókflaska í bónus er yfirleitt undir 100 kallinum.
Gulli

#1249    Keypti glas af rauðvíni í Flugleiðavél og það kostar 500 KR. Glas af bjór líka 500 kr. Einfaldur af Koniak 500 kr. En sem dæmi kostar glas af rauðvíni 400 kr á veitingastað IKEA í Garðabæ.
Gott ráð: Keyptu þér pela af koníak í Fríhöfninni en þar færðu hálfan líter af  Hardy vsop 50cl. 40%   á 2000 kr., en einfaldur er á 500kr í flugvélinni til að hafa með kaffinu.
Og mundu eftir smjörinu því það fylgir ekki lengur brauðinu sem þú færð í Flugvél Icelandair
Og að lokum taktu með þér heyrnatól ef þú vilt hlusta á efni það sem er í tenglinum í sætinu. Eyrnatapparnir eru alveg ónýtir í vélinni.
Ari
(Nb. Ekki veit ég hvort Icelandair myndu telja þetta réttláta gagrýni! Það er víst ekki það sama, rauðvín og rauðvín, það er bannað að taka með sér fljótandi efni í handfarangur (allavega til USA, nema það sé hætt?) og ég hef aldrei lent í biluðum headfónum.)

#1248    Þannig var mál með vexti að ekið var á bíl dóttur minnar, bíllinn hennar er gamall og ekki mikils virði en engu að síður í lagi. Afturhurð og bretti skemmdust og þar sem ég treysti mér alveg til að gera við þetta þá lét ég meta tjónið á verkstæði. Matið hljóðaði uppá 109 þús kr. og ég sætti mig við það og samdi við Tryggingafélagið Vörð að þeir greiddu út tjónið og ég skyldi sjálfur gera við.  Tryggingafélagið Vörður greiddi á endanum 76 þús kr. rúmar, ég var ekki sáttur og vildi vita af hverju ég fékk ekki þá upphæð sem tjónið var metið á.  Svörin voru þau að það væri hefð fyrir því að draga 30% af tjónaupphæðinni þegar tjón væru greidd út, þetta færi í ýmis opinber gjöld virðiskaukaskatt ofl.  Allt í lagi ég samþykkti þetta en vildi fá að sjá útlistun á þessum 30% hvernig skiptingin væri, nú væri td virðisaukaskatturinn ekki nema 19,68% þegar hann væri bakreiknaður osfrv.  Ég fékk klárt nei - við eigum þetta ekki til skilgreint var svarið en samt varð ég að sætta mig við þetta !!!!!  Reyndar neituðu  þeir í byrjun að leyfa mér að sjá tjónamatið en það fékkst þó í gegn eftir þrjú símtöl. 
Er þetta löglegt? Þetta er amk siðlaust! 
AB

#1247    Ef þú kaupir þér tæki, t.d hljómtæki eða gps-tæki í útlöndum fylgja  með leiðbeiningar á því tungumáli sem talað er í því landi sem varan er keypt í. Ef þú hinsvegar kaupir svona tæki á Íslandi eru leiðbeiningarnar á ensku. Þetta finnst mér móðgun við íslenska kaupendur. Hafði samband við Garmin-umboðið út af gps-tæki sem þeir selja og kostar litlar 65 þúsund krónur. Spurði um íslenskar leiðbeiningar en afgreiðslumaðurinn sem svaraði í símann virtist ekkert vita um tækið þegar ég spurði um leiðbeiningarnar en sagðist ætla að gefa mér samband við „Óla“ sem auðvitað var ekki við.  Ég get ekki annað en skammast mín fyrir að vera samlandi manna sem stunda slík viðskipti.
Kristján
(ATH: Það er eiginlega fáránlegt að krefjast þess að leiðbeiningar fylgi með raftækjum á Íslensku. Miðað við það að Íslendingar séu um 300.000 þús og aðeins lítil % af þessum 300.000 kaupir hvert tæki. Þú getur ímyndað þér það hvernig það yrði fyrir framleiðendur að fara að framleiða sér bækling fyrir allar borgir eða bæi sem eru yfir 300.000 þús að stærð út í heimi, kassarnir utan um tækin þyrftu að vera helmingi stærri. Það er eiginlega bara fáránlegt að það sé til dæmis íslenskur texti yfir höfuð á DVD myndum miðað við hvað við erum fá.)

#1246    Lítil Kókómjólk (1/4 L.) í Sundlaug Seltjarnarness kostar 180 kr. Það hlýtur að teljast okur!
GS.

#1245    Mig langar að segja frá undarlegri hækkun á tóbaki í Leifsstöð. Ég keypti þar karton af Café Creme vindlum í júlí sl. sem kostaði þá 1.590 krónur. Aftur keypti ég karton um miðjan september og þá kostaði það 1.899 krónur, semsagt 299 króna hækkun eða tæplega 20 % á tveimur mánuðum!!!
Sigurður Einarsson
(Nb. Ég held að allar hækkanir á erlendu dóti, smávindlum sem öðru, megi skýra með gengis-siginu.) 

#1244    Ég hringdi í B&L um daginn til þess að fá að vita hvað það kostaði að skipta um tímareim í Renault Laguna árg. 2003. Það er líka skipt um vatnsdælu um leið, hún er drifin af tímareiminni.
Ekki stóð á svarinu 120 þús. kr. (Dýr yrði Hafliði allur.).
Pétur Eggertsson, Skagaströnd

#1243    Fór í Krónuna að kaupa þvottefni sem ég er búin að kaupa í nokkra 
mánuði. Þetta er fljótandi þvottefni sem heitir PUREX. En bíddu við það 
var buið að hækka það um 40% kostaði undir 600hundruð kallinn en 
kostar núna 990 krónur hvernig er hægt að réttlæta þetta. Mun ekki 
fara og versla í Krónunni í bráð held mig við Bónus!
Inga

#1242    Ég vil hrósa Elko Lindum fyrir gott viðbót. Ég kom með safapressu sem ég var búin að nota í næstum 2 ár.  Pressan tók upp á því að leiða út. Verslunarstjórinn lét mig fá nýja pressu án nokkurra vandkvæða. Baðst afsökunar á því að pressan hefði næstum getað drepið mig.
Einnig vil ég hrósa Hagkaup í Holtagörðum fyrir skemmtilegt viðmót, ekkert mál að skila gölluðum vörum þar.
Óskar nafnleyndar. 

#1241    Við hjónin tókum þá ákvörðun að leyfa krökkunum að kaupa sér einstaka sinnum dvd myndir til að horfa á hérna heima í staðinn fyrir að fara í bíó enda horfa þau aftur og aftur á sömu myndirnar. Við fórum því einn föstudaginn í Bónus að gera helgarinnkaupin og ákváðum að kaupa einn dvd disk. Fyrir ofan dvd myndirnar er merkt "ódýrt dvd" á tæplega 900 krónur. Við völdum því eina mynd og þegar við komum á kassann kostaði myndin tæpar 2200 krónur. Við hættum því við. Fórum svo strax í Hagkaup og kaupa það sem vantaði upp á enda ekki allt sem fæst í bónus. Við ákváðum að kíkja í raftækjadeildina og skoða myndirnar og sáum sömu myndina þar sem stóð "ódýrt dvd" á tæpan 1000 kall. Við tókum því myndina og ætluðum að tékka á því hvað hún myndi kosta á kassanum. Við fórum þó ekki lengra en fram á ganginn þegar við sáum sömu myndina merkta á tæpar 2400 krónur. Við spurðum því starfsmann í raftækjadeildinni hvað myndin kostaði og hann sagði tæpar 2400 krónur en þegar við sögðum honum að myndin væri líka inni í deildinni á tæpar 1000 krónur tók hann til baka hitt verðið og sagði að það væri nýbúið að lækka myndina en þeir fengju bara ekki að vita það strax. Samt var myndin komin inn í deildina á ódýrara verðinu. Við fórum allavega með myndina á kassann og keyptum hana þar sem ódýra verðið var komið inn í kerfið.
Rósa Björg

#1240    Undanfarna daga hefur "Hrís" nammi verið auglýst: "Þú færð Hrís poka í næstu verslun á 90 kr". Ég keypti tvo poka í Krónunni og sá á kassakvittuninni þegar ég kom heim að pokinn kostaði 149 kr en ekki 90 kr. 
Begga. 

#1239    Ég veit ekki hvort þér hefur verið bent á þetta áður en fyrirtækið Birtingur sem gefur út öll þessi vikurit og mánaðarrit fær ekki margar stjörnur hjá mér. Við skráðum okkur fyrir tilboði sem kallast „Bókatilboð" en þá fæ ég 4 bækur og tvö mánaðarrit í 24 mánuði á ákveðinn pening. Ég sem hrikalega lélegur neytandi gerði þetta tilboð í október í fyrra og fylgdist lítið með kortasundurliðuninnni en tók mig til og skoðaði kortafærslurnar í sumar og tók þá eftir því að verið var að rukka mig miklu meira en um var samið. Þegar ég hringdi og kvartaði yfir þessu var mér tilkynnt að þessi blöð væru ekki mánaðartímarit heldur 3 vikna blöð (Hús & Híbýli og Nýtt Líf) því greiddi ég í það minnsta alltaf fyrir 3 blöð í hverjum mánuði. Um þetta var mér aldrei tilkynnt og ég skora á þá sem eru með tímarit hjá þessu fyrirtæki að fara vandlega yfir hvað er verið að rukka um. Maður spyr sig hvað þeir geta fjölgað blöðum mikið án þess að láta kúnnanna vita! Ég fékk ekki að segja upp áskriftinni tafarlaust heldur styttist áskriftarsamningurinn því sem samsvarar þessum aukagreiðslum sem var hálft ár. Ef ég hefði ekki skoðað þetta hefði ég greitt mánaðargreiðslur í hálft ár aukalega miðað við samninginn sem ég skrifaði undir.
Unnur

#1238    Síðasta árið hef ég verið áskrifandi að Stöð 2 Sport og Sport 2. Á þeirri fyrri eru yfirleitt golfmót í beinni um helgar og á þeirri síðari er enski boltinn. Fyrir þetta var ég að borga u.þ.b. 7200 krónur. Nú í september hækkaði svo verðskráin um nokkur prósent svo þessar tvær stöðvar eru núna á um 8.000 krónur ef maður bindur sig í 12 mánuði en 9.900 í einn mánuð. Það fannst mér of mikið og sagði þessu upp, enda um 100 þúsund krónur á ári þrátt fyrir bindingu. Núna, nokkrum dögum síðar, datt mér í hug að gaman væri að taka aftur inn Stöð2 Sport til þess að sjá Ryder Cup golfmótið milli Bandaríkjamanna og Evrópumanna, stærsta golfviðburð í heimi. Verðskráin á heimasíðu Stöðvar 2 segir að einn mánuður kosti 4.890 krónur. Það er óneitanlega í hærri kantinum fyrir eina stöð, en ég ákvað að hringja samt og reyna að fá tengingu í gegnum þjónustuverið, enda útsending byrjuð. Þá kom í ljós að í dag 19. september þarf ég að greiða fyrir seinni hluta september og allan októbermánuð líka til að fá opnað fyrir útsendingu, sem sagt einn og hálfan mánuð. Það verða þá rúmlega 7.700  krónur fyrir eina stöð! Og ég sem vildi bara fá að sjá eitt þrigga daga golfmót! Ég bað sölumanninn bara afsökunar á ónæðinu, sagði þetta of dýrt fyrir mig og kvaddi. Ég er svo heppinn að fjölskyldumeðlimir hafa Sky sjónvarpsstöðina og þær hundruðir stöðva sem þar fljóta með, svo ég sé mótið bara þar. Startkostnaður fyrir Sky með öllu, þ.e. uppsetningu, diski, afruglara, opnunargjaldi osfrv. er um 100 þúsund en eftir það er kostnaður á mánuði ekki langt frá 7.000 krónunum sem ég var að borga allan síðasta vetur fyrir tvær íslenskar stöðvar. Það tæki þá einungis 2-3 ár að borga upp byrjunarkostnaðinn. Ég hef ákveðið að byrja að safna og koma mér upp Sky pakkanum, og skil hreinlega ekki í því að fólk láti bjóða sér svona okur eins og viðgengst fyrir Stöð 2 Sport rásirnar. 
Sigurður

#1237    Dóttir mín átti afmæli nýlega og keyptum við handa henni bókina 
Draugaslóð úr Eymundsson á kr. 1490. Hún fékk svo annað eintak í 
afmælisgjöf. Þegar við ætluðum að skipta eintakinu sem við keyptum þá 
var búið að lækka verðið á henni í kr. 1117 (ekkert nema gott um það 
að segja svo sem). Þó svo að við værum með kvittun upp á kr. 1490 þá 
fengum við ekki meira en kr. 1117 í skiptunum.  Þetta eru engar stór 
upphæðir og væntanlega hægt að benda á að stundum gengur þetta líka í 
hina áttina en bara leiðinlegt þegar það gerist.
Bragi Walters

#1236    Langið að benda á frábæra þjónustu hjá þeim í RB Rúm í Hafnarfirði. Fór á stúfana að leita að rúmi fyrir strákinn minn, stærð 90 x 200 cm. Á svakalegu afmælistilboði í Rekkjunni, 67.000 kr. en hjá RB Rúm 52.000 kr. og innifalið í því var bólstrun á neðri dýnu, ál fætur og HEIMKEYRLSLA sem ég átti nú ekki von á. Fyrir utan það þá var rúmið afhent daginn eftir að ég lagði inn pöntun. Frábær þjónusta á frábæru verði.
Nökkvi Svavarsson

#1235    Ég hef verslað nánast eingöngu í Bónus síðan ég flutti út frá foreldrum mínum. Ég hef fylgst vel með verðmerkingum þar og hvet alla til að lesa nákvæmlega hvað er verðið að verðmerkja miðað við neðangreinda sögu. 
Eitt skiptið sá ég tilboð "Mömmu pizzur" 199 kr./stk. Sem var náttúrulega flottur díll. 
Ég geri ráð fyrir að fleiri hafi gert sömu mistök og ég í þetta skiptið því þegar ég 
var kominn á kassa sá ég 499 krónur dúkka upp á skjáinn á kassanum (sem var meðalverð á búðarpizzum á þessum dögum).
Ég stoppa kassadömuna og segi henni að ég hafi séð verðið 199, hún kemur með mér inn í búðina og segir að pizzan sem ég er með sé "ömmu pizza" en það hafi ekki verið tilboð á þeim. Þess ber að geta að mömmu pizzurnar umræddu voru ekki til.
Eftir þetta hef ég alltaf gefið mér góðan tíma til að lesa verðmerkingarnar betur í Bónus því þegar maður fer að skoða verðmerkingarnar eru oft miklu dýrari vörur við verðmerkinguna. Rakst til að mynda á "Bónus Boyone skinka - 40% afsláttur á kassa" en þar var enga "Bónus Bayjóne skinku að finna heldur Ali sem var miklu dýrari". Eftir mikla leit fann ég þó ódýrari skinkuna og tók á það ráð að færa skiltið á þann stað sem það átti í raun að vera. Að mínu mati er þetta löglegt hjá þeim en siðlaust.
Jóhann Már Sigurbjörnsson

#1234    Mig langar að koma eftirfarandi hugleiðingu á framfæri: Þegar maður skoðar topp 10 listana á okursíðu dr. Gunna slær það mann að sjá eintóm stórfyrirtæki sem "Vondu gæjana" á meðan að "Góðu gæjarnir" eru oftar en ekki litlar búðir. Sjálfur hef ég sannreynt að það borgar sig oft að versla við litlu kaupmennina sem flestir halda að séu dýrari en þeir stóru. Nýleg dæmi eru t.d. Garðs apótek sem seldi mér lyf á mun lægra verði en stóru keðjurnar tvær. Einnig hef ég átt mjög ánægjuleg viðskipti við litla reiðhjólaverkstæðið Borgarhjól á Hverfisgötu í sumar og haust en þar hef ég undantekningalaust fengið það sem mig vantaði, stundum eftir að hafa farið erindisleysu í stóru búðirnar nálægt Grensási. Verðið hefur einnig verið mjög sanngjarnt á verkstæðinu.
Síðast en ekki síst er það oftast mun ánægjulegra að versla við "kaupmanninn á horninu" sem hefur mikla þekkingu á því sem hann verslar með ólíkt sumu afgreiðslufólki hjá stórum verslanakeðjum. Heimildamyndin "Kjötborg" sýnir okkur hvers við förum á mis við þegar við verslum í stóru matvörubúðunum. Ég mæli eindregið með Kjötborg, bæði myndinni og búðinni sjálfri.
Sigurður Hr. Sigurðsson.

#1233    Þar sem ég er held mikið upp á vörur frá 66°norður var mér illa brugðið, nú ég hafði hugsað að kaupa mér jakka sem heitir Vindur hjá þeim og kostaði 23 og eitthvað 24.000 segjum það en í gær var hann komin upp í 29.800 þúsund þetta er svakaleg hækkun á þessum vörum þó að þær séu flottar og í flestum tilfellum mjög góðar. Þetta er verulega mikil hækkun og tala nú ekki þegar ég þarf að kaupa á börnin fyrir veturinn er ég hrædd um að ég versli ekki meira í bráð hjá þeim.
Guðrún Haraldsdóttir 

#1232    Ég vildi bara skrifa þér til að leiðrétta eitt á okursíðunni þinni. Í Topp 10 listanum þínum yfir vondu gæjana, þar er Leifsstöð í 5. Sæti.
Epal Design rekur verslun í Leifsstöð og þar eru allar vörur ódýrari en í bænum, og samkvæmt könnun sem Flugstöðin gerði á rekstraraðilum komum við mjög vel út. Verðin hjá okkur eru frá 15-65% lægri í Leifsstöð.
Þannig að listinn þinn ætti eflaust frekar að tilgreina einstakar verslanir í Leifstöð (svo sem Fríhafnarverslunina), en ekki alhæfa yfir alla rekstraraðila. En það er samt rétt hjá þér að sumar verslanir eru alls ekki með ódýrari vörur heldur en í bænum og er mjög gott að láta vita af því, en slæmt þegar það bitnar á öðrum sem reyna að gera vel við neytendur.
Dagur Eyjólfsson / Epal hf.

#1231    Við hjá Rekstrarvörum erum að selja rekstrarvörur til fyrirtækja en heimilin þurfa líka rekstrarvörur. Við erum með td RV þvottaefni og Windfresh frá USA á undir 300kr pr kg, meðan það kostar almennt um 500kr
Gráir ruslapokar eru hér á 385 en 549 og 538 í Húsasm og Byko (það þarf að kenna fólki að hætta að kaupa á 15kr og nota sjálf poka frá okkur.)
10  herðatré hjá okkur eru 493 en 917 og  849 i Húsa-Býko.
4x AA rafhlöður, eigin innfl kostar hjá okkur 280kr meðan þær kosta 790 í Húsasm.
Kaupum í gámavís frá samsclub í usa. Erum með bæjarins bestu verð á mörgum vöruflokkum. Við erum að flytja inn vörur framhjá heildsölunum ss Neutral, Duni, Gevalia ofl.
Hingað koma um 500 manns á dag að versla til heimilisins, búðin er etv ekkert fancy eða með dýrar hillur, en hún virkar. Best varðveitta leyndarmálið í bænum. Kíktu á www.rv.is.
Thomas forstjóri RV
(+ Við hjá RV vorum að bera saman nokkur verð. Í blaðinu í dag ertu að tala um bleyjur. Við flytjum inn, framhjá heildsalanum hér, og seljum beint í búðinni,  libero midi5-8 kg babysoft á 947kr 33 stk eða 28,5kr stk
Einnig erum við líklega með ódýrustu dömubindi á landinu, dæmi libresse 10 stk á 182 kr, heilu saumklúbbarnir koma hingað og taka þetta í kassavís, 
Nýbakaðir foreldrar koma hér í hópum og sækja bleyjur, hreinsiefni og ekki síst mesoft grisjur til að hreinsa bossana á börnunum fyrir 210kr, kostar 3falt í sumum búðum íbænum
Og hér kemur rúsínan......listerine tannhreinsiskol kostar það sama hér og í sumum búðum, um 1500kr, nema okkar er 1,5 ltr, en hja hinum fást aðeins um 300ml á sama verði.....það munar og munnar um minna!)

#1230    Ég er með viðskiptakort hjá N1. Seðilgjaldið var 160 kr en var að hækka í 250kr. eða um 56%.  Þetta er kjaftshögg í andlitið á launamanni þegar verið er að tala um þjóðarsátt. Ég hringdi í N1 og spurði af hverju þetta hefið hækkað og hvort að þetta seðigjald væri ekki ólöglegt.  Konan sem svaraði taldi að seðilgjaldið væri ekki ólöglegt og að það hefði verið tekið upp "nýtt kerfi" og þá hefði seðilgjaldið verið sett 250kr.  Ég sagði henni að ég væri alvarlega að hugsa um að hætta viðskiptum.  "Þú verður bara að meta það sjálfur hvort þú sjáir þér hag af því að vera í viðskiptum". Núna er seðilgjaldið hærra en afslátturinn sem ég fær af bensín kaupum.  Þessi viðskipti borga sig ekki lengur.  Þetta er síðasti mánuðurinn sem ég mun nota viðskiptakortið frá N1.
Geir

(Sett inn 22.09.08):

#1229    Svona af því Hraunbergssjoppan kemst á lista yfir góðu gæjana fyrir ódýrasta tóbakið þá er kannski rétt að minnast á að Leifasjoppa í Iðufelli er með ódýrasta tóbakið.  Hugsanlega á sama verði og Hraunberg, þar sem Hraunberg var með dýrara tóbak og lækkuðu sig einhvern tíma til að verða jafnir Leifasjoppu.
HT
(Nb. Þetta er rétt. Ég ruglaðist á Hraunbergssjoppu og Leifa. Það mun vera Leifi sem er leiðandi á ódýrum sígarettum og er hann beðinn afsöknar á mistökunum – þetta er hneyksli! Listanum hefur verið breytt þar að lútandi. Sem sé, ef þér viljið svæla gat á þín lungu á sem ódýrastan hátt ferðu til LEIFA!!!)
(ATH; Af gefnu tilefni og þar sem fullyrt er  að Leifa sjoppa í Breiðholti sé með ódýrasta tóbakið í Reykjavík vil ég leiðrétta það hér með. Ódýrasta tóbakið er í söluturninum Sunnutorgi á Langholtsvegi 60, þar kostar kartonið 5400 kr en ekki 5600 eins og hjá Leifa. Stakir pakkar kosta svo  frá 570 til 590 stk. Rétt skal vera rétt. Verð hjá N-1 og fleirum er komið vel yfir 600 kallinn svo hér munar all nokkru.
Pétur K.)
 

#1228  Þú segir Santa María vera til fyrirmyndar og það er örugglega rétt ef krónur og aurar eru eina viðmiðið. Hinsvegar leist mér ekki á blikuna eina skiptið sem ég borðaði þar. Burritoinn var vondur með ógeðslegri brúnni sósu en misjafn er manna smekkur og allt það og við hverju býst maður á ódýrum veitingastað. Okkur brá þó verulega í brún þegar við ætluðum að fá okkur vatn en staðurinn er með borð á miðju gólfinu þar sem gestir geta sótt sér vatn. Þar var dúkur á borðinu eða það héldum við þar til við tókum eftir kunnuglegu bláu logoi sem á stóð "Eign Þvottahúss Spítalanna". Þannig áklæði viljum við ekki hafa nálægt matnum okkar nema við séum á spítala og hófust umræður um hvaða kokkur hefði haft hvaða sjúkdóm til að eignast svona áklæði. 
Maður á ekki alveg að láta bjóða sér hvað sem er þó að það sé ódýrt. Við erum enn með klígjuna í hálsinum eftir þessa heimsókn. Okkar sparnaðarráð er að borða sjaldnar úti og njóta þess mun meira þegar það er gert.
Daði 
(ATH: Ég er annar eigandi veitingastaðarins Santa María og mig langar að fá að svara honum Daða sem sendi þér okurdæmi #1228. Mér þykir ofboðslega leitt að heyra hvað hann var óánægður með heimsóknina til okkar. Auðvitað er smekkur fólks misjafn og það sem einum þykir gott þykir öðrum vont. Sósan á búrrítóunum er þó ekki brún heldur rauð, ætli þetta brúna hafi ekki verið baunir, en hvað um það. Ég get þó ekki alveg tekið því þegjandi að hann tengi saman lágt verð og slæman mat, enda notum við ekkert nema gott hráefni, allt ferskt og fyrsta flokks. Það að verðin eru lág tengist frekar því að við erum að reyna að vera sanngjörn með því að láta fólk ekki borga mikið meira en varan og þjónustan kostar okkur.
Í sambandi við dúkinn góða þá er hann reyndar löngu horfinn en dagaði þarna uppi fyrir einhvern misskilning. Kokkarnir okkar eru við hestaheilsu og mér þykir sárt að sjá Daða gefa í skyn að eitthvað ógeðslegt gangi á í eldhúsinu. Þar sem starfsfólkið okkar er flest erlent skildi enginn áletrunina á dúknum (sem slæddist þangað inn ásamt tandurhreinum þvotti frá hótelinu), en um leið og ég sá
blessaðan dúkinn var hann látinn fjúka. Ég vona að Daði hafi geð í sér að koma einhverntíman til okkar aftur með opnum huga og við munum gera okkar besta, eins og alltaf, til að hann fari kátur heim í það skiptið.
María Hjálmtýsdóttir)

#1227    Langar til þess að koma með smásnuðfrétt.
Þannig var að ég opnaði dós af niðursoðnum sveppum frá ORA, en ORA er í miklu uppáhaldi hjá mér. Mig rekur í rogastans þegar dósarskömmin opnast en þar neðst í botni dósarinnar liggja örfáir sveppir en restin var bara vatn. (sjá mynd).
Ég er búinn að vera í dálitlu áfalli vegna þessa, því vinir mínir hjá ORA hafa aldrei svikið mig og ég hef keypt og borðað ORA grænar baunir og annað frá þeim síðan ég man eftir mér.
Ég ætla að fyrirgefa þeim þetta núna ef þetta kemur ekki fyrir aftur.
Kristján Blöndal

#1226 / #1226    Veit ekki hvort þetta hafi komið fram áður, en Mojito á Apótekinu 1.700
krónur. Sanngjarnt og gott verð! :-) Vissi ekki af því að
heimsmarkaðsverð á myntu væri að sliga barina í Rvík svona rosalega.
Keypti mér Canon EOS 1000D í Beco í vikunni sem leið + 18mm-55m linsu og
55mm-250mm linsu og svo 2GB minniskort = 137.100 kr (fæ það ekki ódýrara
hér í CPH), síðan fékk ég Tax-free 20.500 ISK þannað að lokaverð 116.600
ISK.  Í fríhafnarverslun ELKÓ kostar bara vélin 74.900, litla linsan
59.900 en ekki fékkst verðið í stærri linsunu...er örugglega þó um 49.900,
þá um 185.000 og það vaskfrítt!?  Leifsstöð er orðin að verslunarmiðstöð
eins og Kastrup.
Vil svo að lokum benda doktornum á, í kjölfar Silfursins í dag, að
verslanir hér í Kaupmannahöfn eru svona tveimur klössum verri en finnst á
Íslandi.  T.d. Krónuverslunin á Smáratorgi er gull af búð samaborið við
gæðamatvörubúðir hér í Köben (SuperBest t.d.). Vöruúrvalið verra og verð
fer hækkandi, samt þó ódýrara en á Skerinu; þá sérstaklega kjúkling- og
svínakjöt, grænmeti og áfengi.  Farðu í Fakta, Rema1000 eða Netto næst
þegar þú heimsækir Danmörku, þá færðu sjokk.
Vegna þess hve gengið er hagstætt ferðaglöðum Íslendingum þessa stundina,
þá kostar 300 gr. nautalund á Hereford Beufstow við Tívolíið um 6.000 ISK
í dag. Góður matur, en orðinn ansi dýr fyrir fólk með tekjur í ISK.
Guðmundur Björn Eyþórsson, Danmörku
(Nb. Ég er ekki haldinn þeirri ranghugmynd að halda að Danmörk sé einhver paradís og búðir þar eru ekkert spes, alveg satt.)

#1225    Þannig er að ég keypti mér leðursófasett 3+2+1 hjá versluninni Öndvegi fyrir 4 árum síðan. Ég skoðaði sófasett víða en ákvað að eiga viðskipti við Öndvegi vegna þess að mér leist vel á sófasettið og að ég hafði þær hugmyndir um þá verslun að hún seldi vönduð húsgögn. Sófasettið kostaði 204 þúsund krónur árið 2004. Ég taldi mig  vera að kaupa  sófasett sem myndi duga næstu 10 til 20 árin.
Sófasettið var notað sem sparisett, í stofu sem einungis er notuð þegar gestir koma eða á jólum og afmælum, sem sagt lítil notkun á sófasettinu. Settið var þrifið og borið á það eftir leiðbeiningum frá versluninni Öndvegi sem seldi okkur settið.  2-3 árum eftir að ég keypti settið fór að bera á litamun á því, sem jókst jafnt og þétt og lítur út fyrir að liturinn sé að fara af sófasettinu.  Nú er svo komið að sófasettið er orðið verulega ljótt, koníaksbrúni liturinn farinn af á mörgum stöðum á settinu og skín í appelsínugulan undirlit.
Við höfðum samband við Heima/Öndvegi, en þeir vildu ekkert gera fyrir okkur þar sem liðin voru meira en 2 ár frá kaupunum. Þá lögðum við málið fyrir Kærunefnd lausafjár- og þjónustukaupa og bárum við ákvæði um 5 ára kvörtunarfrest þegar um er að ræða vöru sem ætlað er að hafi langan líftíma eins og leðursófasett. Sjá hérna 2003 nr. 48 20. mars, grein nr. 27.
Niðurstaða Kærunefndarinnar var okkur í hag, þeir telja sófasettið gallað og falli undir þau lög sem ég vísa í hér að ofan.  Þeir komast að þeirri niðurstöðu að Heima/Öndvegi skuli veita okkur afslátt að upphæð 90 þúsund krónur vegna gallans í sófasettinu.
Heima/Öndvegi hafa ákveðið að una ekki úrskurði Kærunefndarinnar. Nú sitjum við uppi með 4 ára ónýtt leðursófasett frá versluninni Heima/Öndvegi. Mig langar að vara lesendur við að eiga viðskipti við verslunina Heima/Öndvegi, þeir telja sjálfir í álitsgerð sinni að líftími húsgagnanna sem þeir selja sé skemmri en 10 ár. Ég sem hélt að verslunin seldi eingöngu vönduð húsgögn en nú veit ég betur.
Arndís

#1224    Fyrir um mánuði síðan keypti ég grill, kennt við George Foreman, í MAX
raftækjum í Garðabæ.  Þessi verslun stærir sig af lágu verði og segir
orðrétt á heimasíðu hennar: ,,Bjóðum ávallt besta verð á markaðnum!". 
Fyrir grillið greiddi ég tæpar 9 þúsund krónur.  Daginn eftir var ég við
matarinnkaup í Fjarðarkaupum í Hafnarfirði og sá þá í hillu nákvæmlega
eins grill á tæpar 8 þúsund krónur!  Ég ætla aldrei aftur inn í MAX
raftæki, heldur beina viðskiptum mínum annað. Fyrir utan hátt verð þá
fékk ég lélega þjónustu; það vantaði verðmerkingar í hillum og
starfsfólkið hafði lítinn áhuga á að aðstoða mig við kaupin.
Guðmundur B. Ingvarsson

#1223    Ég er á þeirri skoðun að höfum meiri öll völdin í okkar hendi ef við stöndum saman og gegn ófétum í viðskiptum. Bílaverkstæði Láka á Sauðárkróki er farinn á hausinn vegna þess að þeir héldu að fólk væri fífl. Mamma fór með bílinn minn til þeirra vegna framhjólalegu, hún var með bílinn í láni því ég var á sjó. Þeir sögðu að það kostaði 12Þ + varahluti um 6Þ samtals 18Þ. Þegar hún sótti bílinn voru þeir búnir að skipta um leguna, bremsuklossa, bremsuslöngur, drif gúmmíhosur báðum megin að framan, rúðuþurkublöð og framljósperu, reiknigur samtals 90Þ. Mamma greyið fór í algjört rusl og viðhorfið þeirra var að eigendum bílanna kæmi ekki við hvað þeir gerðu fyrir bílanna og ef fólk mótmælti og neita borga, þá var því hótað Intrum eða verra (lögfræðing). Svona viðskipti gengu í smátíma og fólk fór ekki með bílinn til þeirra nema einu sinni.
Ég keypti 1/2L COKELIGHT í Olís á Selfossi 200kr, ég kváði og svar starfsmannsins var "hey það er kreppa". Ég fer aldrei þangað inn aftur.
Unnþór 

#1222    ÞETTA KALLA ÉG OKUR:
1. Það kostar 120 kr. að bæta smá  fetaosti á matinn sinn (sem er ekki ódýr fyrir) á SERRANOS
2. Það kostar 17,900 að fara í klippingu og litun á TONY AND GUY (sbr. 92 evrur í Hollandi á sömu stofu).
3. Tyggjópakki með 6stk. kostar 110 krónur á BSÍ.
4. KAFFITÁRS KAFFI i pokum kostar allt að 700 krónur í Melabúðinni.
5. KÓK / KRISTALL eða hvaða hálfslíters drykkur kostar 195 krónur í 10 / 11.
HÆTTUM ÖLL SEM EIN AÐ VERSLA VIÐ 10  / 11 BÚÐIRNAR!
Vigdís Jónsdóttir

#1221    Ég var að æfa í Hreyfingu fyrir nokkrum árum og ætlaði að kaupa árskort,
en mér var bent á það að ég gæti líka gert svona samning þar sem væri
dregið af reikningnum mínum mánaðarlega. Þannig að ég gerð árssamning. Ég
man það 100%, að þetta var árssamingur. Síðan leið árið en þau héldu áfram
að draga af mér 3000 kall (minnir það) mánaðarlega.
Ég hafði samband og sagði þeim að það áttu sér stað mistök,  þau gleymdu
að taka mig út úr kerfinu og ég bað þau vinsamlegast að greiða mér þennan
13. mánuð til baka.
NEI! Enginn mistök, ég þurfti sjálfur að segja upp árssamingnum, takk fyrir.
Af hverju í óskupunum að kalla þetta fyrir árssamning ef maður þarf hvort
sem er að segja þessu upp. Þetta var svona endalaus árssamningur. Frábær
hugmynd.
Sævar.

(Sett inn 21.09.08): í tilefni af eins árs afmæli Okursíðunnar:

Bubblandi og kraumandi undir: Jói Fel, Eymundsson, Tekk kompaní, olíufélögin og símafyrirtækin! Svo ekki sé minnst á BANKANA!!!!!!

Bubblandi og kraumandi undir: Bernhöftsbakarí, Asía, 22, Vaka, Hárhorn Torfa rakara!
---
#1220    Laugardaginn 20.september rétt fyrir kl. 5 verslaði ég í Spar-búðinni 
í Bæjarlind í Kópavogi.
Ég hvet fólk til að skoða strimlana áður en búðin er yfirgefin.
Ég lít svo á að eigendur verslunarinnar láti ekki starfsfólkið vita að 
það eigi að ganga frá körfum, og vera kurteist við kúnnana. Þess vegna 
mun hvorki ég né fjölskylda mín versla oftar í þessari búð.
Og vel á minnst, þessi búð er rándýr.
500 gr skyrdós kr.149  í Spar
117 í Bónus
Ég kom með hjólakörfuna að kassa í dag þar sem sat unglingsdrengur sem 
var að lesa blað. Ég þurfti að ýta frá 2 körfum til að komast að 
bandinu og í rennunni var fyrir ein hjólakarfa þannig að 
fyrirsjáanlegt var að ég þyrfti að taka til eftir fyrri kúnna ef ég 
ætlaði að komast út.
Ég sagði við drenginn að það væri erfitt að komast að bandinu vegna 
uppsafnaðra kerra, hvort það væri ekki í hans verkahring að setja 
körfur á sinn stað og hann svaraði mér með skætingi og sagði: ef 
kúnnarnir myndu ganga frá eftir sig þá væri þetta ekki svona. Hann 
gerði sig ekki líklegan til að ganga frá körfunum og ég sagði að þetta 
héti léleg þjónusta að ég þyrfti að ganga frá eftir aðra kúnna ef ég 
ætlaði að komast mína leið. Þá svaraði hann með skætingi eitthvað á 
þessa leið: eigðu það við sjálfa þig. Eitthvað fleira fór okkur á 
milli, ég trúði þessu varla, að hann ætlaðist til að ég lagaði til 
eftir aðra viðskiptavini.
Ég fór með mína körfu á sinn stað og þurfti að ýta frá enn fleiri 
körfum til að komast að körfuröðinni. Svo leitaði ég að yfirmanni, 
fann annan dreng í kjötinu og sagði honum frá þessu.
Í þessari búð afgreiða eingöngu unglingar ca. 14-16 ára og þegar ég 
kom heim sá ég að ég hafði verið látin greiða fyrir Morgunblaðið kr. 
200 sem ég hafði ekki beðið um né fengið. Ég fór aftur til að fá þetta 
leiðrétt og drengurinn í kjötinu sagði mér að þetta hefði ekki verið 
eins og ég hefði sagt, því hann hefði talað við drenginn sem sagði 
allt aðra sögu. Svo hér stend ég, miðaldra lygalaupur og ætla ekki að 
versla þarna oftar. Eldri drengurinn hefði vel getað beðið mig 
afsökunar en líklega hefur enginn kennt honum það.
Margrét

#1219    Langar að koma með ábendingu um okur. Var að leita mér að svona 
æfingabolta sem er hægt að nota í joga, leikfimi ofl. Hægt að kaupa 
svona bolta í ýmsum íþróttabúðum, s.s. Hreysti og kosta þeir milli 5-6 
þúsund. http://www.hreysti.is/?category=93. 
Svo er einnig hægt að kaupa sambærilega bolta á femin.is og 
modurast.is. Nema hvað þeir boltar eru með myndum á ásamt litlu 
statífi. Mig langaði mest í svona bolta með mynd af froski á frekar en 
þessa einlitu sem fást í Hreysti. Boltinn kostar 10.890 á femin.is :
http://www.femin.is/shop_products.asp?id=5539.
Nákvæmlega sami bolti er meira en 5 þúsund krónum ódýrari í Móðurást
og þar er hægt að kaupa boltann á netinu eða í búðinni a sama verði, 
kr. 5.580,
http://www.modurast.is/item_detail.asp?product_id=498925&VT=614
Það skal tekið fram að afgreiðslukonan í Móðurást vissi af þessum 
verðmun og taldi ekki ástæðu til að hækka verðið.
Hrund
(ATH:  Bolti í setti með dýnu og teygju kostar 2990 krónur í Europris.)

(Sett inn 20.09.08):

#1218    Ég fór til útlanda í sumar og þar sem ég hef hvorki verið mikið í sólarlandaferðum né í sundi almennt þá vantaði mig sárlega bikiní eða tankíni eins og þetta dæmi með buxum og heilum toppi heitir víst og þar sem ég hef ekki mikla þolinmæði í búðarráp þá ákvað ég að byrja bara á því að fara í Sigurbogann á Laugaveginum og fékk þar fína þjónustu og fann mér sundföt eftir aðeins 10mínútur inni í búðinni og mér skyldist það á merkinum í búðinni að það væri útsala í gangi allavega var frekar lítið af vörum eftir þarna, en allavega var ég rukku litlar 18.000kr fyrir sundfötin sem mér fannst auðvitað hreint rán en þar sem ég nennti ekki að leita lengur og þetta passaði mér mjög vel þá ákvað ég að láta kyrrt liggja, fór svo í Intersport stuttu seinna og sá þá að buxur og svona heilir toppar kosta hátt í 16.000kr þar svo ég var nokkuð sátt við kaupin, þangað til að í dag þá fer ég í Eirberg sem er hjálpartækjamiðstöð uppi á Höfða, þar sé ég nákvæmlega eins tankíni og spyr um verð og þar er það á 6.500kr takk kærlega fyrir, ég borgaði semsagt þrefalt verð fyrir það. Hvernig er hægt að leggja þrefalt á vöruna??
Illa farin... 
(nb. Það er ekkert mál, sérstaklega þegar einhver kaupir þetta á okurverðinu!)

#1217    Ég keypti flugmiða heim frá USA, er í Iowa, þannig að ég þarf að 
fljúga frá Cedar Rapids til NY. Ég kemst ekki heim fyrr en 19. 
desember vega lokaprófa í skólanum. Þannig er að miðinn kostar (aðra 
leið) um 27000 kr (þegar ég keypti hann, núna kostar hann um 29000kr) 
til 15. desember, en svo hækkar hann skyndilega upp í u.þ.b. 47000 kr 
16. desember (núna er hann kominn upp í 50000 kr). Þarna er klárlega 
verið að níðast á þeim sem ráða ekki hvenær þeir komast heim, s.s. 
stúdenturm, og þeir eru oftar en ekki aflögu færir. Ég er viss um að 
þetta verður til þess að einhverjir hætta við að fara heim um jólin! 
Ég skrifaði neytendastofu og þau sögðu að þet væri algerlega löglegt. 
Siðlaust, en löglegt.
Sigrún Vala Þorgrímsdóttir

#1216    Ég verð að spyrja að einu, hvers vegna er fyrirtækjum með posa ekki skylt að tæma út úr honum daglega? á föstudaginn fyrir viku keypti ég bensín (óskemmtileg reynsla eitt og sér) hjá Shell við Smáralind fyrir rétt rúmlega 4000 krónur og borgaði með debet-korti. Svo veit ég ekki fyrr til en FIT kostnaður er fallinn á mig vegna þess að þeir tæmdu ekki posann sinn fyrr en á mánudeginum og ég hafði greinilega eytt umfram efni yfir helgina, en kortinu ekki hafnað vegna þess að bensínkaupin höfðu ekki verið dregin af reikningi mínum. Á jákvæðari nótum þá hringdi ég í bankann vegna FIT kostnaðarins, sem ég fékk endurgreiddan vegna þess að ég hef aldrei áður notað kortið mitt án þess að innstæða væri fyrir því. SPRON í Borgartúni fær því smá props fyrir að endurgreiða mér kostnaðinn, en ég stóð líka í þeirri trú að FIT væri ólöglegt og Alþingi hefði staðfest það, hvers vegna er þetta þá ennþá innheimt?
Bryndís
(ATH: Nú vann ég 3 ár sem vaktstjóri og gerði þar að leiðandi upp. Þegar maður notaði bæði kassakerfið og venjulegu posana þá var alltaf sent inn við vaktaskipti. 
Ísak Jóhannsson)

#1215    Vegna 1189 og 1190 (dýrt kók). Fór um Leifsstöð um daginn og borgaði 260 fyrir 1/2 l. Diet kók! Allt í þeirri flugstöð er helmingi of dýrt.
Eli

(Sett inn 19.09.08):

#1214    Mig langar að segja frá okri í BYKO, geri ráð fyrir að þetta sé viljandi hjá þeim. Ég var að kaupa í Byko á Akureyri  net í körfuboltakörfu og á hillunni stóð 281.kr en kassadaman stundi út úr sér 749kr. Og ég sagði ha…það getur ekki verið það stóð 281 á hillunni, nú sagði kassadaman, horfði vondaufum augum í kringum sig, stimplaði svo eitthvað í kassann, starði tómum augum á mig og sagði svo” 281kr.” Ég fékk á tilfinninguna að þetta hafi ekki verið fyrsta kvörtunin en þvílíkt bull. Rúmlega 500kr. munur á kassa og hillu…þetta er ekki í lagi.. Við átum maðkað mjöl í mörg ár og erum enn að því að sumu leyti.
Körfuboltakörfueigandi á Akureyri.

#1213    Fór í Debenhams að kaupa mér púður frá Kanebo. Þar er mér tjáð að púðrið sjálft með öskju (askan seld sér) kosti 6890 kr. Nema hvað, þegar ég kem á kassan segir hún "9580 krónur". Ég trúði henni varla og spurði hvort púðrið kostaði nú nærri 10 þúsund. Þá segir hún að askjan kosti víst 2690 kr. Hún ruglaðist! Plast askja og púði á 2690 kr.?? OKUR! Eru ekki einhver lög um að ef þér er gefið upp verð standi það? 
Nafnlaus 

#1212    Ég keypti glæra króka með lími aftaná, nánar tiltekið Tesa Powerstrip, í Eymundsson Austurstræti þann 18. september á 1.030 kr. Fannst það frekar dýrt fyrir 8 litla króka en lét mig hafa það. Síðan átti ég leið í Brynju sama dag og rak þá augun í sömu vöru á 435 kr.! Þarf varla að taka það fram að ég gekk rakleiðis aftur í Eymundsson og fékk þar endurgreitt. Brynja er framúrskarandi verslun og hér með sannast það enn og aftur.
Hjördís

#1211    Vantar tvífót undir riffil. Hlað selur Harris fót á 8.900 kr, Sportbúðin (Veiðihornið) selur á 10.880 kr en Ellingsen selur sama dótið á 13.900 kr. Borgar sig að gera verðkönnun á netinu.
AG
 

#1210    Apple á Íslandi:

Ragnar Freyr
(Nb. Líklega munu þeir kenna um gengisþróun. Svo kemur lið eins og Davíð Oddsson í sjónvarpið að bullar um að það skipti engu hvort við séum með krónu eða eitthvað annað. Einmitt. Hann ætti að reyna að segja krökkum í námi erlendis það.)

(Sett inn 18.09.08):

#1209    Vil bara benda á að eldsneytisverð á heimsmarkaði hefur lækkað mjög 
mikið undanfarið og er nú á sama verði og það var í febrúar á þessu ári.
Í febrúar á þessu ári voru þessi verð á sjálfsafgreiðslu dælum 
Skeljungs:
bensín 137,9 
dísil      142,4
í dag er verðið hins vegar:
bensín 165,7
dísil     179,6
Hvað er málið?
Hafliði
(nb. Gengishrun íslensku krónunnar er málið. Í feb var 1$ = 65 kall, nú 1$ = 95 kall. Ég held satt að segja að bensínið hækki bara ef eitthvað er... Eins og allt annað!)

#1208    Mig langar að vekja athygli neytenda á einstaklega vönduðum og hræódýrum barnahúsgögnum sem greint er frá í heimilisdálki Fréttablaðsins s.l. mánudag.  Meðal annars er þarna að finna lítið náttborð sem tilheyrir H.C.Andersen-húsgagnalínunni og fæst í Tekk Company.  Náttborðið er með stórri útdreginni skúffu og kostar aðeins 37.700 krónur!  Enn fremur hefur Tekk Company til sölu vegghillu fyrir leikföng og bækur á ótrúlega lágu verði eða 31.000 krónur!  Rúsínan í pylsuendanum er svo H.C. Andersen-bókahilla frá sömu húsgagnaverslun þar sem hægt er að raða bókum, leikföngum og körfum til skiptis.  Bókahillan er á þvílíku tombóluverði að maður tekur hreinlega andköf.  Aðeins 200.000 krónur!  Segi og skrifa:  200.000 krónur.  Það hlýtur að vera roksala í svona hundbillegum húsgögnum!  Tekk Company á hrós skilið fyrir að keyra verðið niður í kreppunni til hagsbóta fyrir efnaminni fjölskyldur.
Gunnar.
(Nb. Góður Gunnar ;-))

#1207    Ég er mjög ósátt við að láta okra á mér en lenti því miður í því um daginn. Þá var ég að breyta í herbergi dóttur minnar og keypti málningu og veggborða hjá Slippfélaginu. Ok allt í lagi með það, borga fyrir veggborðann 2.051 kr með vsk. Svo þegar búið er að mála og byrjað er að setja upp veggborðann kemur í ljós að hann er ekki nógu langur. Þar sem það var sunnudagur og Slippfélagið lokað, fer ég í Byko og finn þar alveg eins borða, fer með hann á kassann og viti menn, þar kostar veggborðinn ekki nema 1.244 kr með vsk!!! Það munar því aðeins 807 krónum á sama hlutnum í þessum tveimur verslunum!!! Þetta er náttúrulega ekki hægt og búðir eiga ekki að leyfa sér að okra svona hrikalega á viðskiptavinunum! Ef þið hafið áhuga á að staðfesta þetta þá heitir veggborðinn ZIZAZOU hjá Byko en ZIZAZOV hjá Slippfélaginu. Hann er með myndum af litlum prinsessustelpum (ekki disney) og er 5 metrar í báðum búðum:)
Ásdís

#1206    Ég legg það nú ekki í vana minn að vera að kvarta, geri mér fulla grein fyrir að stundum er hinum og þessum verðmerkingum, þjónusta o.fl ábótavant á flestum stöðum. Hins vegar hefur mér verið verulega ofboðið undanfarið í Krónunni í Hafnarfirði (Hvaleyrarbraut held ég að gatan heiti). 
Þannig er mál með vexti að um daginn fór ég að versla og ég er yfirleitt nokkuð meðvitaður um hvað ég er að borga fyrir vörurnar. Ég keypti 2 hundabein um daginn og var 450 kr stykkið. Hins vegar borgaði ég, skv kassakvittun, um 1100 kr fyrir þau tvö. Ég leiddi þetta fram hjá mér þar sem svona mistök geta oft átt sér stað. 
Hins vegar var ég aftur nokkrum dögum síðar að versla og verslaði þá barnapela. Merkt verð í hillu var tæplega 400 kr en þegar ég leit á kassakvittunina þegar ég kom heim þá stóð 889 kr!!! Ekki ætla ég að fullyrða hvort gengislækkun o.þ.h. hafi haft áhrif eða hvort þetta sé einfaldlega vitlaust merkt eða hvað. En mér var verulega misboðið. Eftir þetta fór ég að fylgjast aðeins betur með og kom í ljós að það er þó nokkuð um að vörur séu alls ekki merktar og sömuleiðis eru verðin vitlaus. Mér þykir þetta með öllu ólíðandi enda er ég og mín fjölskylda að berjast í bökkum sem og aðrir. Spurning að fara bara í Bónus?
Ragnar

#1205    Þegar Netið kvaddi dyra fann ég lítið fyrirtæki sem hét Heimsmynd eða eitthvað álíka og veitt þessa frábæru þjónustu. Litla fyrirtækið stækkaði, varð að C-síma og síðan Landsíma eða var það öfugt, en það skiptir ekki máli því í hvert skipti sem stærra fyrirtækið gleypti minna fyrirtækið versnaði þjónustan. Sífellt var verið að skipta um fólk og nýi maðurinn/konan var „reynslulausari“ en sú á undan. 
Þegar allt var komið í hnút færði ég mig yfir til „gamla“ TAL og var það nokkuð gott í byrjun en síðan endurtók sagan sig, stærra fyrirtæki, nýtt fólk, verri þjónusta. Þegar reikningar þeirra voru orðnir tvöfaldir (þeir tví-rukkuðu mig) og ég fékk loks leiðréttingu flutti ég mig í skyndi yfir til „Gamla góða símans“ - en síminn var á þessum tíma að skipta um eigendur og enn endurtók sagan sig.
Til að spara hætti ég að nota .is-lén og losaði mig við allan þann kostnað og okur sem því fylgdi og fékk mér .net lén í staðinn sem kosatar mig tíu dollara á ári og aðra tíu á mánuði fyrir vistun erlendis.
Enn fann ég lítið og gott fyrirtæki sem hét HIVE og bauð þessa fínu þjónustu á tölvusviðinu, síðan heimasíma og stóð til að taka GSM símann líka. Þegar það gerðist var nafninu breytt í TAL (aftur) og nú átti allt að vera í þessu fína hjá sama aðilanum. Til að gleðja viðskiptavinina var boðið upp á ókeypis BÍÓKORT. Þú ferð á Netið og skráir þig inn og... ALDREI kom kortið. Þegar ég fór að grennslast um þetta hjá skrifstofunni, því ekki er hægt að hringja í þessi fyrirtæki, nema þú viljir bíða - „Þú ert númer 12 í röðinni“ - kom í ljós að ekki er um KORT að ræða þó alls staðar sé talað um kort: að sýna kortið færðu þetta og með kortinu leigir þú...  o.s.frv. því það er bara kennitala þín og GSM númer sem er fært inn í gagnagrunn hjá vídeóleigunni. Bara fara á næstu leigu, nefna kennitölu og sýna skilríki og þú færð ókeypis bíó. Nei, góði minn, þú verður að fara aftur heim og skrá þig aftur á Netið. Þar sem ég bý úti á Nesi og skrifstofa TALs er í Síðumúlanum hefur þetta BÍÓKORT kostað mig töluvert í bensíni og ef ég fæ einhvern tímann bíó þá verður það ekki ókeypis og ekki út á bíókort.
Ég er að svipast um eftir litlu símafyrirtæki eða ætti ég kannski að stofna mitt eigið...?
Jón Axel Egilsson
(Nb. Ég held þetta sé reynsla mjög margra. Síma/net-bisness á Íslandi er í endalausri flækju og erfitt að vita hver er í raun að bjóða besta dílinn.)

#1204    Ég þurfti að kaupa mér svokallað ,,límhanka" um daginn þar sem það er vesen að negla í veggina heima hjá mér. Ég kíkti í Griffil og fann límhankana þar á tæplega 700kr en keypti þá ekki þar sem betur fer. Leið mín lá svo fyrir tilviljun inn í Verkfæralagerinn og þar fann ég nákvæmlega eins hanka á 330kr!! Sem segir allt sem segja þar.
Þessi búð hefur alveg farið framhjá mér, en þvílíkt sem hún er ódýrari. Skoðaði þar af leiðandi margt þarna og það er allt rosalega hagstætt, þannig fólk kíkið í Verkfæralagerinn!! Eins og afgreiðslukona þar sagði  NIÐUR MEÐ VERÐIÐ :)
Erna

#1203   Ég var að lesa um hvað maður þarf að passa sig við búðarkassa langar mig að segja frá hverju ég og dóttir mín lentum í í Bónus í Holtagörðum á laugardaginn 6/9´08. Við skuppum í smá verslunarferð til að kaupa nokkra hluti sem okkur vantaði og viti menn ég sá sokkabuxur sem ég er ánægð með og kostuðu þær í hillu 759- kr. dóttir mín keypti barna sokkabuxur og kostuðu þær 299.-kr. og voru merktar svo á pakkningu. Við kassa þegar átti að borg kostuðu mínar 998.-kr og barnabuxurnar 499.- kr.  Við fengum þetta jú lagfært en ef við hefðum ekki verið vakandi yfir þessu þá hefðum við borgað heldur of mikið fyrir þessar buxur og þar sem við keyptum tvennt af hvoru þá var þetta svolítill peningur. 
Sigríður Þormar 

#1202    Sólveig Sigurðardóttir í Söluturni Atlantsolíu Kópavogsbraut 115 gerði verðkönnun 11. sept. 2008:
                                     Olís            Atlantsolía, Kópavogsbraut 115
Mjöll hreinsibón              1079              640
Mjöll hraðbón                  909               740
Mjöll Ultrabílabón             782               570
Sónax 250 ml                  1062             850
Sónax 500 ml                  1643            1120
Auto Glym Protec extra    1829             1270
Auto Glym Vinyl og 
      rubber care              1549              1215
Rainex                           1084              860
Sám 2000 1.L                 1179              790
Sám 2000 5.L                 3932             2730
Hrollur rúðuvökvi 5,L       979               860

Þá hafði Sindri Bergmann samband og vildi benda á ebay-klónvefinn sinn SELT.IS. Þar er eflaust hægt að gera góð kaup og það er alltaf að stækka úrvalið hjá honum. 
(Nb. Það er ekki stefnan að Okursíðan verði grundvöllur fyrir fólk að auglýsa eigin fyrirtæki, og hér munu aldrei birtast borgaðar auglýsingar.)

#1201    Fyrir nokkrum vikum eða mánuðum  kom símsvari hjá símanum þegar hringt var í 118.
Því miður eru allir þjónustufulltrúar okkar uppteknir .os.frv. Síðan: afsakaðu biðina ,
ekkert gjald er tekið meðan beðið er, þú getur fengið beint samband við númerið sem þú biður um fyrir aðeins 3.krónur.!
Nú er þessi símsvari ekki lengur við "störf" en þess í stað spyr starfsfólk viltu beint samband eða númerið.
Ég spurði á dögunum hvað beint samband kostaði, TUTTUGU KRÓNUR var svarið.
Ég býst við að margir haldi að þjónustan kosti ennþá þrjár krónur, enda eru þeir hjá símanum ekki að segja frá þessari
gríðarlegu hækkun af fyrra bragði. 
G.G.

#1200    Hæ, langar að tilkynna óeðlilega hækkun á einum degi. Ætlaði að kaupa mér
Apple Mac Pro fartölvu og var verðið á henni í gær 119.900 krónur í Elko
og 129.900 krónur í Mac búðinni.Í dag þegar ég ætlaði svo að ganga frá
kaupunum hafði tölvan hækkað um 10.000 krónur í báðum búðunum! Þegar ég
spurði svo út í þetta var mér sagt að forsvarsmenn Apple á Íslandi hefðu
ákveðið að hækka hana svona mikið vegna uppsafnaðrar hækkunar á gengi og
þar sem engin hækkun hefði verið í sumar hefði þetta verið nauðsynleg
hækkun. Ég verð að segja að mér finnst þetta fullgróf hækkun á einum
sólarhring og sagði ég verslunarstjóranum að ég myndi mæta í búðina um
leið og dollarinn væri kominn niður í 85 krónur og vænti þess þá að tölvan
væri ódýrari (líkurnar á því eru nú sjálfsagt ekki miklar).
Þess má til gamans geta að Mac Pro kostar 1.999 dollara úti í búð í USA og
miðað við að gengið sé þetta hátt (c.a 92 krónur) þá kostar talvan 183.908
krónur íslenskar eða 46.000 krónum ódýrari en hér á landi. Er í alvörunni
ekki til svigrúm til að ráða við hækkun á dollara þegar verðmunurinn er út
í hött fyrir???
Þessi hækkun er einmitt að gerast á sama tíma og nýja búðin þeirra er að
opna í Kringlunni. Kannski Apple á Íslandi hefði átt að láta sér nægja
íburðaminni verslun í Kringlunni og reyna að halda vöruverði frekar niður?
Ég er allavega mjög óánægð með þetta og vildi gjarnan koma því á framfæri
hérna.
Ungfrú nafnlaus
(ATH: Eftir að ég sá dæmi #1200 fór ég á apple.is til að athuga hvað tölvan sem ég er búin að vera pæla í að kaupa en það er ódýrasta týpan af MacBook Pro. Hér kemur það: Hún er búin að hækka úr 229.990 í 269.990 kr.!!!)

#1199    Ég fór inn í Hverabakarí í dag vegna þess að ég kaupi stundum  hjá þeim súrdeigsbrauð sem þau segjast baka á mánudögum og fimmtudögum.  Viti menn, þegar ég ætla að fara að borga brauðið þá rek ég augun í að búið er að skera brauðið í sneiðar en það er venjulega gert daginn eftir, ef brauðin sem bökuð voru þann dag seljast ekki öll.  Nú sem sagt það er fimmtudagur og ég er í þann mund að greiða afgreiðslustúlkuni fyrir nýbakað súrdeigsbrauðið en rek þá augun í að það er búið að skera brauðið niður.  Er það ekki nýbakað spyr ég?  Jú en það er úr frosti segir afgreiðslustúlkan.  Já en þá er brauðið ekki nýbakað segi ég,  jú það var sett nýbakað í frost segir afgreiðslustúlkan.  Og ertu að reyna að segja mér að þið seljið brauð sem var bakað á mánudaginn og sett í frost sé sellt á 400 krónur á fimmtudegi.  Þá segir konan við  mig frekar frenjulega,  þú þarft ekki að kaupa brauðið frekar en þú vilt...   Ég kom ekki inn í bakaríið til að kaupa mér gamalt brauð og gekk því út brauðlaus. 
Ingibjörg

(Sett inn 15.09.08):

#1198    Kannski ekki okur, en spurning um (ó)eðlilega viðskiptahætti:
Ég keypti laptopptölvu í Hagkaupum í Smáralind fyrir rétt rúmlega ári - Acer Aspire
Þetta er ágæt vél, en það komu böggar í hana eins og gengur og gerist.
Þrátt fyrir tilraunir mínar til að laga kerfisvillur, endaði hún í að hrynja í morgun. Það lítur út fyrir að harði diskurinn sé "fysiskt" í lagi, en að kerfisfælar séu skemmdir. Ég er með veiruvarnir, e.t.v. aðeins um of, því ólík veiruvarnakerfi gætu flækt hvert annað.
Þetta eru málsatvik, en ekki það sem skiptir máli.
Ég tel mig hafa þokkalega tölvukunnáttu og myndi vilja "strauja" tölvuna sjálfur, en fattaði þá að ég fékk engan kerfisdisk (Vista) með vélinni. Það getur verið að þetta sé seljanda að kenna, en það getur líka verið að þetta sé hluti af einokunarstefnu Microsoft. Hvað um það, ég er hundfúll yfir að þurfa að fara með tölvu í viðgerð, sem ég hefði getað straujað sjálfur. Nenni því tæplega, en velti því aðeins fyrir mér að setja í staðinn upp Ubuntu Linux og verða Microsoftfrír.
Einar G. Torfason
(ATH: Bara smá ábending, því ég hef verið í sömu aðstæðum þegar ég hef aðstoðað vini mina. Líklega hefur þetta ekki baun með viðskiptahætti Hagkaups að gera, þeir græða ekki baun á því að svíkja þig um fylgihluti tölvunnar.
Margar tölvur í dag koma án svona "physical" eða raunverlegs stýrikerfisdisks.  Margar koma með diskum sem heita "recovery disks", en á þeim er stýrikerfið ásamt öllu sem var í tölvunni þegar þú fékkst hana, stundum þarf maður að brenna þá sjálfur með hjálparforriti sem fylgir.  Þegar þeir eru keyrðir inn, færðu tölvuna uppsetta, "straujaða" eins og þú fékkst hana út úr búðinni.  Svo er einnig mjög algengt að það sé búið að skipta harða diskinum, á litlu svæði sem oft heitir "recovery" er allt sem til þarf.  Þá þarf maður bara að kunna setja það í gang.  Það er misjafnt eftir tölvum og verður þú að bera þig eftir þeim upplýsingum?  Ef þú á?tt gögnin sem fylgdu tölvunni, þá ætti það ekki að vera vandamál.
Að skipta yfir úr Window í Linux: Hægara sagt en gert ;)
Þórhallur Árnason)
(ATH2: Leyfið ásamt tegund MS Vista ætti að vera límt á botn lappans.
Nóg að fá lánaðan disk sömu tegundar og strauja svo sjálfur.
Það er leyfið sem skiptir neytandann öllu máli, ekki miðillinn sem
í þessu tilfelli er einhver DVD diskur, sem er verðlaus án þess.)

#1197    Hversu margir ætli geri sér grein fyrir eftirfarandi: Þegar þú færð talhólf þegar þú hringir í einhvern þá borgar þú upphafsgjald kr. 15-25 kr. eftir símafélögum, þó þú skellir á um leið og talhólfið byrjar að "tala" og lesir ekkert inn.
Fæstir, ef nokkrir, sem ég spurt segjast actually lesa inn á talhólf þegar þeir fá þau í hausinn.
Sennilega af því að það nenna fæstir að hlusta á boðin heldur sjá í missed calls að einhver
hefur hringt og hringja einfaldlega tilbaka.
Ef viðskiptavinur sem er að fá sér síma væri spurður; Ert þú til í að fá þér talhólf, þú þarft bara að borga alltaf þegar einhver kemst í samband við talhólfið, þó hann noti það ekki!? ; myndi sá viðskiptavinur segja já við því?
Samt sem áður borgum við þetta öll með því að samþykkja að hafa talhólf, fá svo reglulega talhólf allra hinna í hinna í hausinn (eftir 4-5 hringingar) og skella strax á.
Ef reikna má með að þetta komi fyrir GSM notendur með talhólf ekki nema 1 x að meðaltali á dag eru tekjur símafélaganna lágmark (reiknum með að helmingur þeirra sem eiga GSM síma séu með talhólf) 100.000  x 365 x 15 = tæpar 550.000.000.- krónur á ári fyrir þjónustu sem maðurinn sem þú hringdir í samþykkti fyrir þína hönd! Er það ekki alveg að lágmarki siðlaust ef ekki ólöglegt? Ekki fer nein þjónusta fram í þína þágu, í mesta lagi er þjónustan í þágu þess aðila sem þú hringdir í og hann ætti því að borga.
Ef hins vegar símafélögin settu það upp þannig, býst ég við að flestir myndu fatta að þeir væru að borga fullt af peningum fyrir ekki neitt og segja nei takk.
Björn
(ATH: Okur #1197 fjallar um talhólf og þann kostnað sem sá sem hringir borgar við það eitt að hlusta á það. Í flestum símum sem ég hef átt (bæði Nokia og Sony Ericson) er möguleiki á að slökkva á talhólfinu. Þannig forðast ég að fá skilaboð í talhólfið og ef ég svara ekki hringir bara út. Ég mæli með því.
Berglind Inga)

(Sett inn 14.09.08): 

#1196    Ég var að leita hvar maður getur fengið ódýra áprentalega DVD diska á netinu og jú ég fann þá hjá Tölvuvirkni á 1,960 kr. 25 stk í spindli. Og þeir voru dýrastir hjá Tölvutek á 3,490 kr 25 stk í spindli. Ég var líka að leita að ákveðnum harðadisk á netinu Seagate 1TB/1000 GB 32mb og ég fann hann hjá Tölvuvirkni á 16,860 kr. Og fann sama harðadisk hjá Tölvutek á 21,900 kr það er algjört OKUR!

#1195    Mér hefur lengi fundist okur vera áberandi þegar okkur Íslendingum er seldur bjór af krana. En fyrir slíkri sölu er ekki löng hefð hér á landi, svo við höfum sennilaga bara vanist því eins og öðru okri.
Maður hefur stundum velt því fyrir sér hver muni ganga fram fyrir skjöldu og selja kranabjór á verulega lægra verði en hinir og taka kanski bara þar með markaðinn.
Skilja okrarana eftir. Opna Bjórgarð að erlendri fyrirmynd með umgjörð sem kostar ekki arm and a leg. Enginn hefur nú þorað hingað til.
En svo komu þeir dagar að skyndilega var hægt að selja stóran bjór á 500 krónur í stað 850. Skotaverð!
En það gerðist ekki fyrr enn 3-4 þúsund Skotar gerðu sig heimakomna í miðbæ Reykjavíkur
Mér er spurn, af hverju að gefa þeim þennan 40% afslátt?
Er þetta viðskiptavit? Þessir Skotar voru komir hingar hvort eð var. Hefðu þeir keypt minni bjór ella? Ég held ekki. Enda bara hér í þrjá daga.
Mér finnst að þeir veitingamenn sem þetta gerðu og hældust um yfir rosalegri sölu til Skotanna ættu að skammast sín.
Það hefði verið nær að selja Skotum bjór á íslensku verði, þar sem þeir voru nú komnir til Íslands og hefðu sennilega keypt hann hvort eð var.

Svo hefði verið flott að bjóða Íslendingum Skota-tilboðið góða, í eina viku eða svo, 500 kall ! 
Því þeir eru jú kúnnarnir sem halda þessum stöðum uppi hina 362 daga ársins. 
Veitingamenn sem grobba sig í fjölmiðlum af Skota-gróðanum ættu að huga að því. 
Þeir eru hreinlega að sýna sínum föstu viðskiptavinum dónaskap.

Annað mál, mælieiningar. 
Ég drekk ekki bjór en hef tekið eftir því að þegar fólk pantar hér lítinn eða stóran af krana eru glösin kirfilega merkt rastal merkingu, 33cl. eða 50cl.
Öðru máli gegnir þegar pantað er glas af rauðvíni eða hvítvíni. Þá er hægt að búast  við öllum stærðum og gerðum af glösum sem innihalda á bilinu 1 – 2 desilítra
Allt eftir stöðum og skapi starfsfólks sýnist mér. Verðið er þó almennt 8-900 krónur þó að víninu sé dælt úr kassa. Ekkert eðalvín þar. Það er okur.
Af hverju eru ekki til hér ákveðnar reglur og lögbundin glös fyrir vín í glasatali ? Og hvað sé verið að selja fólki. Þetta þekkist hvergi í siðmenntuðum heimi.
Ingibjörg.
(ATH: I sambandi vid faerslu #1195 um hatt verd fyrir kranabjor, 
tha er Blásteinn i Árbænum med bjor a krana a 500-550 kall allt arid 
og hefur ekki haekkad i morg ar. Ekki verid ad snuda mann thar.)

#1194    Mig langar að benda á að maður þarf að vera vel meðvitaður um verð á vörum þegar maður fer að verslar. Ég fór í Krónuna og tók þar úr hillu morgunkorn Grandóla frá Gæða fæði. 475 gr. Ég hætti við að kaupa morgunkornið og fór í Nettó og fékk eitt kíló á sama verði og ég hefði borgað fyrir í Krónunni fyrir 1/2 kg. Í Bónus og Nettó kostar 1 kg.innan við 500,-kr.   Einnig keypti ég í sumar í Krónunni  skóáburð sem er staukur. Hann kostað tæpar 800 kr. í Krónunni. Ég fór og athugaði verðið i Hagkaup þar kostaði sami staukur 357 kr. Samt er Hagkaup ekki þekkt fyrir að vera ódýrastir. Það munaði meira en 100% á þessari vöru sem hún var dýrari í Krónunni. Það eru fleiri vörur í Krónunni sem eru mun dýrari en t.d. í Bónus.
Ég fór í Krónuna og skilaði þessum skóáburði þar sem ég var ekki farin að nota hann. Krónan setur mikla álagningu á ýmsar vörur sem fólk tekur ekki eftir. Þar af leiðandi er Krónan alls ekki lágvöruverslun.
Anna Kristjánsdóttir

#1193    Mig vantaði daglinsur og átti leið í Lyfju í Lágmúla. Þar fást Dailies linsur og kosta 30 stk 3360 kr. og pakkarnir tveir sem mig vantaði 6720 kr. Það þótti mér heldur dýrt enda versla ég oftast í pro-optic og minntist þess ekki að hafa borgað svona mikið. Svo ég brenndi í Skeifuna og í pro-optic búðinni í hagkaup kostar sami pakkinn 2600 kr. Nema hvað, það er tilboð á þreföldum pökkum sem kostuðu 3275 kr... þannig að ég keypti 180 daglinsur á 6450 kr. í staðinn fyrir að kaupa 60 stk á 6720 kr. í Lyfju. 
Húrra fyrir þeim!!!!
Björk 

(Sett inn 12.09.08):

#1192    Ég vil vekja athygli á villandi auglýsingu sem slær ryki í augu okkar neytenda.
Ég heyrði auglýsingu frá Þjóðleikhúsinu í útvarpinu þar sem auglýst er að miðinni í leikhúsið fyrir okkur sem erum yngri en 25 ára kosti 1500 kr. Þar kemur einnig fram að þetta gildi á allar sýningar, hvenær sem er. 
Mér fannst þetta hljóma ágætis "díll" og ætlaði að kaupa miða á sýninguna sem nú er til sýnis, Ástin er diskó. - nema hvað? Þá er mér sagt að tilboðið gildi ekki á hana og ég ætti að borga 3500 kr á sýninguna. Þvílíkt okur!  Þau í miðasölunni sögðu að tilboðið gilti ekki á allar sýnignar. Þetta finnst mér fáránlegt. Það kom ekkert fram um þetta í auglýsingunni og út í hött að auglýsa svona núna og svo gildir þetta ekki á einu sýningin sem leikhúsið sýnir á sama tíma. Og sennilega er þessi sýningin eina sýningin sem mínir jafnaldrar hafa einhvern áhuga á að sjá í þessu leikhúsi, ekki langar mig á Hart í bak (sem miðasölukonan bauð mér að fara á fyrir 1500kall í október!).  Fyrst þetta er svona, þá á bara að segja það í auglýsingunni. Ekki að draga mann niður í miðasölu þar sem maður ætlar að kaupa miða og hefur svo ekkert efni á að kaupa miða á sýninguna. Sennilega halda þau að maður segi bara "skítt með það" og kaupi miða á 3500 - en það hafa bara ekki allir efni á því. Eða að maður fari á sýningu sem enginn vill sjá (og borgi 1500kall fyrir það). Mér finnst að það ætti að vera ólöglegt að auglýsa svona vitlaust.
Mér finnst bara að það þurfi að benda á svona bull.
Jón

#1191    Sonur minn, 21 árs, keypti notaðan bíl hjá Brimborg seinna part árs þegar tilboð var í gangi. Tekið var sérstaklega fram að það var búið að skipta um tímareim. Í síðasta mánuði, á leið heim úr vinnu, þá fór tímareimin. Hann var miður sín, sá fram á fleiri hundruð þúsund kostnað sem hann átti ekki fyrir.   Þar sem bílinn er enn í ábyrgð fór hann samt í Brimborg til að athuga hvernig staðan hans væri.  Samtalið tók 5 mín.  Bílinn var sóttur, farið með hann á verkstæði í viðgerð og hann fékk bíl til umráða á meðan. Strákurinn hafði áhyggur af skemmdum sem koma þegar tímareim fer og hvernig viðgerðakostnaðurinn mundi skiptast.  Nei, hann fær bílinn aftur í fullkomnu standi og án kostnaðar.  Hann er búinn að fá bílinn og er í skýunum. Hann er staðráðinn í að næsti bíl verður keyptur hjá Brimborg. 
Elsa Jónsdóttir
(ATH: Langaði bara til að láta vita af því að reynsla #1191 af Brimborg er ekkert einsdæmi því ég hef lent í svipaðri þjónustu hjá þeim (fékk að vísu ekki lánsbíl á meðan) en þeir virðast taka vel á öllum svona málum.)

#1190    Í öllu þessu verðbólgutali hef ég grun um að ákveðnir aðilar nýti tækifærið og hækki vörur sýnar umfram það sem eðlilegt er. 
Í flestum söluturnum kostar núna 2L af Coke lihgt yfir 300 krónur og ekki óalgengt að 2l flaskan kosti 340 kr. Í Bónus kostar flaskan 118 kr sem er rétt rúmur 1/3 af verðinu í söluturnunum. Væri sumséð næstum hægt að fá þrjár flöskur fyrir 340 kr í bónus. 2L flaskan í söluturnunum er næstum 200% dýrari en í bónus. Kanski á þetta sér eðlilegar skýringar en ég hef lúmskan grun um að þarna sé okur á ferðinni. Má í þessu sambandi einnig benda á að þegar virðisaukaskatturinn á matvæli var lækkaður hér í byrjun árs 2007 var hann mest lækkaður á gosi og sælgæti. 
Níels Árni Árnason

#1189 10/11 - HÆTTUM AÐ VERSLA ÞARNA.
Var ógeðslega þyrstur og neyddist til að stoppa í 10/11 Hjallabrekku held ég að staðurinn heiti (Orkan er á sama stað ) rétt áður en maður kemur að Smáralind. Keypti 1/2 lítra af horkóla og það kostaði 195 kr. - sama flaska 4 x stærri kostar á bilinu 70 -  160 kr. í bónus, þ.a. verðið er allt 10 x hærra þarna - takk fyrir.  Alltaf er maður að lenda í sama helv. kjaftæðinu. 
Það er alveg sama hvað er keypt þarna - helvítis okur.  Eiginkonan mín bað mig um að kaupa salatpoka um daginn og ég nennti ekki í bónus, var staddur við hringtorgið áður en maður ekur úr Hafnarfirði og á suðurnes.  Sem sagt keypti helv. pokann 100 gr. af salati kostuðu 499 sagði afgreiðslumaðurinn eins og það væri sjálfsagt að greiða einn rauðan Jón Sig sem var einu sinni 50.000 kr. gamlar.
Djöfull blöskraði mér þetta.
Ég legg til að við tökum okkur til NEYTENDUR og hættum að versla þarna - .... Látum loka sjoppunum og hætta að traðka á okkur.  Öryggisverðirnir sem afgreiða þarna geta farið að vinna í bónus því þar verður þá meira að gera.
Að lokum.  Ég keypti parketlista í Söginni í Kópavogi um daginn.  Ekki versla þarna því maðurinn sem á pleisið fékk enga þjónustulund í vöggugjöf og hló bæði að mér og konunni þegar við gerðum athugasemd og skiluðum gallaðri vöru. 
Kristján

#1188    Ég keypti í matinn í Krónunni á Höfðabakka í gær og þegar ég renndi yfir strimilinn á kassanum rak ég augun í að pakki af 18 klósettpappírsrúllum sem venjulega hefur kostað í kringum 300kallinn kostaði 619 krónur! Og þetta var enginn sérstakur prinsessusilkipappír, heldur bara ósköp venjulegur krónupappír. Valið stóð semsagt milli þess að ganga um óskeind eða láta Krónuna rí*a mér í ra**gatið.
Þar sem ég er með börn á heimilinu þurfti ég að bíta í koddann í þetta skiptið & vona að þetta tæki fljótt af. En ég fer ekki aftur í Krónuna.
Svívirt húsmóðir.

(Sett inn 11.09.08):

#1187    Ég vil vekja athygli á því hvernig Tal og Vodafone og Síminn sem
eru ráðandi fyrirtæki á markaðnum hegða sér gagnvart nýjum
samkeppnisaðila NOVA.
Þeir verðleggja hringingar frá sér í NOVA á kr. 27 til 28 kr. mín.
NOVA verðleggur hringingar frá sér í Símann og Vodafone, tal á 15 kr. mín.
Síminn, Tal og Vodafone verðleggja sín á milli frá kr. 16 og max 23 kr. per mín.
Þarna eru ráðandi aðilar á markaðnum að misnota gróflega aðstöðu sína.
Það er ekki meiri tilkostnaður að hringja í NOVA úr öðrum kerfum.
Svo segist þetta lið alltaf fagna samkeppni, þvílíkt BULL
"Staðreyndin er sú að það verður engin góður í skák nema
hafa einhvern til að tefla við".
Ég mæli með því að fólk sem er hjá VOÐAFONE, Tali og Símanum
flyti sig yfir í NOVA í mótmælaskyni hið fyrsta, því aðeins þannig næst árangur á þessu OKRI þeirra. 
Pétur
(ATH: Hef smá athugasemd um okur nr 1187 um verðlagningu á símtölum í NOVA úr öðrum kerfum.  Ég veit ekki betur en mínútuverð hjá Tali sé það sama í öll farsímakerfi og eigi því ekki skilið að vera talið upp með símanum og Vodafone í þessu sambandi.  Tek það fram að ég tengist símamarkaðnum ekki á nokkurn hátt, rak bara augun í þetta misræmi.
Steinar)
(ATH2: Vegna okurs #1187 - Þá rukkar Nova hærri tengigjöld fyrir símtöl sem fara inn í þeirra kerfi en hin símafyrirtækin, þannig að NOVA eru fullkomlega ábyrgir fyrir að dýrara sé að hringja í þá en önnur fyrirtæki. Ekki er hægt að ætlast til að önnur fyrirtæki niðurgreiði símtöl í Nova . Þeir rukka mas hin símafyrirtækin mismikið í tengigjald...)

#1186    Mig langaði að benda örlítið á okurmaskínuna sem Félagsstofnun Stúdenta
(FS) er. Þessi samtök, eða hvað þetta er, eru svokölluð hagsmunasamtök
stúdenta. Mig langar þess vegna að líta örlítið á verðlag í kaffistofum
stúdenta sem reknar eru af FS. FS segir á heimasíðu sinni að "Meginmarkmið
Kaffistofa stúdenta er að stuðla að heilbrigðu mataræði háskólastúdenta
með því að bjóða fjölbreytt og gott vöruúrval á lágmarksverði." 
(http://www.fs.is/kaffistofur)
Hafa skal í huga að FS er með einhverskonar einkarétt á því að reka
veitingasölur í Háskólanum og því með góðan aðgang að einum stærsta
vinnustað landsins. Svo er alllangt í næstu veitingasölur frá flestum
húsum Háskóla Íslands, nema helst Hótel Sögu.

Dæmi um verðlag:
500 mL baukur af Egils Malt í kaffistofum FS kr. 200. Í Bónus kostar
baukurinn kr. 78 og í 10-11 kr 180. Maltið er því 156% dýrara í
kaffistofum FS en í Bónus.
Skyrdrykkur með mangó kostar kr. 175 i kaffisölu FS. Í Bónus kostar sama
vara um kr 110 og í 10-11 á 154 kr.
Kók er aftur á móti ódýrara hjá FS en í 10-11, á kr 175 á móti kr 195.

Meistaraverkið Háma bauð upp á fínan mat í hádeginu fyrir nema og
starfsfólk skólans á kr 550 fyrir heita máltíð. Þann 27. ágúst fengu nemar
póst þar sem auglýstur var stúdentaafsláttur í hámu. Póstinn var sendur út þegar þessi "afsláttur" tók gildi 28. ágúst og þýddi 100 kr hækkun á matarskammtinum. Eitthvað vegna breyttra
skattalaga eða bla bla bla. Grunnurinn er að máltíðin hækkaði úr kr 550 í
kr 800. Stúdentar fá þá einhvern afslátt ofan á það.
Ég tel mig geta haldið þónokkuð áfram að benda á okur verð hjá þessari
samlokusjoppu sem FS er en læt hér staðar numið.
SG

#1185    Við fjölskyldan ákváðum að skreppa á Pizza Hut, við vitum svo sem að þetta er ekki ódýrasti staðurinn en ákváðum að leyfa okkur þennan munað. 
Það gekk hinsvegar alveg fram af mér þegar ég áttaði mig á því að goskannan (1,7 ltr að þeir segja) kostaði 950 krónur. Persónulega finnst mér þetta vera allt of dýrt.
Daníel

#1184    Var að leita mér að fartölvu í gærkvöldi á netinu. Skoðaði heimasíðu EJS til að sjá Dell Inspiron-tölvurnar þeirra. Skoðaði svo síðuna hjá þeim í morgun og þá er búið að hækka allar tölvurnar (Dell Inspiron) þeirra um 25.000 kr. yfir línuna! 89.900 kr. tölva hækkaði því um næstum 30% á einum degi!
Óskar nafnleyndar

(Sett inn 10.09.08):

#1183    Ég hef oft keypt Bónus safa, appelsínu og epla, hjá samnefndri verslunarkeðju. Alveg fram á þetta ár kostaði 1 líters ferna 68 krónur, svo hrundi krónan og safinn hækkaði í 88 krónur, allt í lagi með það, er um 30% sem samsvarar um það bil því sem krónan veiktist um og ekki vaxa epli eða appelsínur á Íslandi þannig að hráefnið er innflutt. Fyrr í sumar hækkaði svo líterinn í 98 krónur og þegar ég fór í Bónus síðasta föstudag (05.09.2008) stóð á hillumerkingunni að líterinn kostaði 108 krónur! Það væri gaman að vita hvað liggur að baki þessum viðbótarhækkunum. 
Mér datt nú svona í hug að salan á safanum hafi ekki minnkað eftir að verðið hækkaði í 88 krónur og menn hafi því ákveðið að hækka í 98 krónur, bara svona til að kanna þolmörk neytenda og sjá hvort þeir haldi ekki bara áfram að kaupa safann þó 10 krónur bætist við. Svo hefur kannski komið í ljós að salan minnkaði bara ekkert og því tilvalið að kanna hvað gerðist ef öðrum tíkalli væri bætt við verðið og því best að skella því í 108 krónur. 
Það er rétt að taka fram að ég hef ekki keypt svo mikið sem einn líter af þessum safa eftir að hann hækkaði í 88 krónur.
Kristján Kristjánsson

#1182    Ég og konan vorum í Krónunni í gær og vorum að versla inn í ansi tóman ísskáp...
Ekkert er betra en góður ávaxtasafi á morgnana og ákvað ég að kaupa mér Happy Day appelsínusafa í tilefni þess. Ísskápurinn okkar er rúmgóður og gríp ég því 2lítra fernuna enda er það augljóst mál að maður sparar á að kaupa stærri einingar....... eða hvað... Ekki í þessu tilviki. Hér er mynd af Happy Day djúsnum hlið við hlið
1Líter 149 krónur
2Lítrar 339 krónur eða 169,5 krónur lítrinn 
ég segi OKUR!!!!
Hörður Ágústsson

#1181    Ég og börnin mín þrjú, 2ja, 6 ára og 10 ára (ásamt einum 5 ára frænda) ákváðum að skella okkur í BÍÓ um helgina – Bíóferðir eru orðnar sjaldgæfur lúxus á þessum síðustu og verstu enda þarf engan stærðfræðisnilling til að reikna út að Bíóferð fyrir 5 manna fjölskyldu er mun dýrari en einfaldlega að bíða þolinmóður eftir að myndin komi á DVD ! En nú var s.s.  Ákveðið að fara í Bíó með hersinguna og allir mjög spenntir enda byrjað að sýna nýja mynd “Grísirnir Þrír”  - samkvæmt auglýsingu í dagblaði þá var ódýrast að fara í 1-Bíó og ákveðið tilboð í gangi þá – 650kr.- f. fullorðna en 550kr.- fyrir börn, ógurlega löng röðin frá miðasölunni rúmlega hálftíma fyrir sýningu sagði mér að fleiri en ég höfðu ákveðið að grípa þetta “kostaboð”.
Þegar loks kom að því að greiða fyrir miðana kom í ljós að þetta góða tilboð var ansi lpðið!! Samkvæmt skilgreiningu Smárabíós á barnamiða gildir það aðeins við um börn til 8 ára aldurs – eftir það ertu s.s. gjaldgengur fullorðinn!! - 2ja ára barnið varð að greiða fyrir sem fullvaxta barn enda byrjað að rukka fyrir það frá og með 2ja ára afmælisdeginum – og engin leið að rökræða að barnið tæki nú ekki einu sinni sæti heldur vildi heldur hjúfra sig í kjöltu mömmu sinnar. 
Myndin var vægt sagt hrútleiðinleg – söguþráðurinn enginn – en verst þótti mér þá að hér var klárlega um lélega DVD –mynd að ræða í ömurlegum hljóð-og myndgæðum og lá við að auglýsingarnar í hléi tækju lengri tíma en spilunartími myndarinnar. Ég hætti hér en gæti örugglega skrifað annað eins bréf um okrið í sjoppum Bíóhúsanna en þar var greinilegt að “barna-box” tilboðin samastanda af gömlu poppi síðan kvöldinu áður – lítilli vatnsþynntri kók og hörðum gúmmíböngsum.
5 manna fjölskyldan er að hugsa frekar um að spara sér rúman 3.000 kallinn (plús annað eins í popp og kók) og kaupa sér bara góða ræmu og poppa heima næst! 
Þórhildur Laufey Sigurðardóttir 
(ATH: ég hugsaði það sama þegar ég fór á þetta í bíó nema hvað ég hef ekkert slæmt um myndina að segja. Hins vegar finnst manni alltaf að einhver hlæi að sér þegar sýndar eru svona ódýrar dvd-útgáfur í bíósölum. Það sem ég vil bæta við er að alblóðugast er að þurfa að horfa á ómerkilegar sjónvarpsauglýsingar í 10-15 mínútur eftir að sýningartími er hafinn. Sömu helvítis sjónvarpsauglýsingar og maður getur alla jafnan sleppt með því að skipta um stöð. Þetta er s.s. það sem maður greiðir fyrir. Það er í lagi að horfa á 3-5 auglýsingar um bíómyndir eins og hefur tíðkast eins lengi og maður man en hvað í fjáranum hafa börn sem fara á Grísina 3 að gera með að horfa á auglýsingar um tryggingar, tölvur og slíkt eða bara auglýsingar yfir höfuð. Þetta eru börn sem hafa bara ákveðinn athyglistíma í bíó og þarna er vel gengið á hann, popp og kók búið þegar loksins er ýtt á play.)

(Sett inn 09.09.08):

#1180    Ég sprakk úr hlátri þegar ég tók utan af þessari "girnilegu" samloku og
gat ekki stillt mig um að taka mynd. Eins og hér sést, þá fer ekki mikið
fyrir brakandi beikoni og djúsí nachos-sósu. Þetta lítur eiginlega meira
út eins og brauð með bremsufari ásamt skinku unninni úr vegabráð. Það þarf
varla að taka það fram að þessi verður send með pósti aftur í
verksmiðjuna.
Már Egilsson

#1179    Fór í Hagkaup um helgina og keypti 3 hluti, m.a. 1 rauða papríku.  Nennti ekki að renna út á Fiskislóð og vissi að það yrði okrað á mér (en ég stýri því þó, aðeins 3 hlutir keyptir).  Papríkan kostaði 149 kr., já takk fyrir!  Fór svo í Krónuna í dag og keypti  1 rauða til þess einungis að bera saman verð.   Kostaði 37 kr.  Ég veit að ekki gengur að bera saman eppli og appelsínur. Hagkaup og Nóatún eru okurbúllur.
Eitt í viðbót, starfa mjög nálægt Maður lifandi í Borgartúni.  Vantaði mjólk í kaffið um daginn og þar sem Maður lifandi er næst mér fór ég þangað til þess að kaupa mér litla soja mjólk.  Vissi svo sem að ég mundi ekki fá venjulega mjólk og allt í lagi með það.  Ein svona ¼ l venjuleg soja mjólk kostar 145 kr.  Þetta fannst mér ótrúlegt okur og slepti kaupunum.  Þetta er lítra verð annars staðar.  Labbaði svo yfir í 10-11 sem er næst við og ekki ódýrasti kosturinn í bænum og kostaði sama soja mjólkin 69 kr.   Maður lifandi er okurbúlla dauðans.
Nafnleynd

#1178    Okkur í fjölskyldunni datt í hug að skella okkur á landsleikinn á miðvikudaginn Ísland – Skotland, ég fer inná miði.is og brá í brún er ég sá miðaverðið. Það kostar okkur fjögur 20.000.- krónur í bestu sætin ,14.000.- kr í þau næstbestu, þetta kalla ég okur. 
NN

#1177    Hér er svosem ekki um okur að ræða, en varðar neytendamál og ég læt það því flakka.  Fyrir einhverjum vikum síðan var ég staddur á bensínstöð í Reykjavík.  Sá þar langloku frá Sóma og kíkti á dagsetninguna svo að hún yrði sem ferskust. Og haldiði ekki að ég hafi dottið í lukkupottinn - hún var svo fersk að hún var framleidd daginn eftir!  Semsagt var framleiðsludagsetningin tilgreind sem næsti dagur á eftir - dagur sem var ekki enn runninn upp.
JHO

#1176    Ég var í viðskiptum með netteingingu hjá SKO. Keypti minnsta skammt á kr 1990 á mánuði. Þjónustan var frábær og skammturinn dugði fyrir mig (ellilífeyrisþegan) sem smánotanda.
Einn daginn, varð breyting á. SKO var sameinað Tali. Mánaðargjaldið hækkað upp í 2990 krónur. Þeir hjá Tali sögðu skammtinn hafa verið aukinn um helming. Af hverju sem það stafar virðist þetta vera allt tregara núna en það var áður hjá SKO.
Þeir hjá Tali buðu tilboðspakka (Síma, gsm og nettengingu) sem ég þáði.
Á fyrsta reikningum sem kom, samkvæmt tilboðinu var rukkað fyrir leigu af nettengibúnaði kr190 mánaðargjald sem hvergi kemur fram í tilboðinu, ekki heldur í auglýsingum á þessum tilboðspakka frá Tali.
Ég hringdi á opnunartíma í skrifstofusíma Tals og ætlaði að gera athugasemd við þetta þar (vissi að reikningurinn var útfærður þar). Náði ekki þangað inn en var allt í einu kominn inn í símtalabiðröð þjónustuversins, þar sögðust þeir svara öllum símtölum sem þangað (á skrifstofuna) bærust en gátu ekki gefið samband þangað, en varðandi kvörtunina, bentu þeir á að leigugjaldið væri á heimasíðu Tals undir liðnum önnur gjöld, þar undir ásamt leigugjaldinu, eru ýmis gjöld vegna sérþjónustu og breytinga sem óskað er eftir.
Þarna er eðlismunur á. Er rétt að hafa svona fast gjald falið inn í sér þónustugjöldum? ekki rukkaði SKO leigugjald af þessu tagi og veit ekki til að hinir keppinautarnir geri það. Eru þetta eðlilegir viðskiptahættir hjá Tali? Þjónar sameining fyrirtækja á þennan hátt notendum?
Ellilífeyrisþegi

(Sett inn 06.09.08):

#1175    Keypti 100 ml fyrirtaks hvítlauksolíu frá ömmubakstri í Bónus í gær á
129kr sá svo sömu vöru í Nóatúni í dag á 415kr! Keypti einnig Tebollu á tilboði 98kr stk en á kassanum kostaði hún 168kr.
Ég fékk verðið leiðrétt, sama gerðist með kúnnann fyrir aftan mig í
röðinni en hann keypti rúnstykki á tilboði sem ekki kom fram á kassanum!
Fljótgert að græða á þessu og því miður týpiskt fyrir Nóatún.
Virðist gegnum gangandi að tilboðin séu bara á hillu hjá þeim en ekki
þegar komið er á kassann.
Fyrr í ár keypti ég kex, meter stórt skilti stóð við kexið 50% afsláttur.
þegar á kassann kom var engin afsláttur því þetta var gamalt tilboð þeir
höfðu bara gleymt að taka niður skiltið!!!
Eitt sinn keypti ég lax, en á kassanum hét hann stórlúða, að sjálfsögðu
mun dýrari fiskur. það kemur varla fyrir að maður þurfi ekki að leiðrétta
verðið hjá þeim. Þessi reynsla á við Nóatún við Rofabæ.
Óskar nafnleyndar

#1174   Fór í Elko um daginn, og sá mér til undrunar að heimabíókerfi sem ég hafði keypt
í febrúar/mars 2007 á 122.000 kr á tilboðsverði í Heimilstækjum kostaði í dag 140.000 hjá Elko! Þannig að ég ákvað að athuga hvað þetta tiltekna heimabíókerfi kostaði hjá
heimilistækjum í dag... og viti menn.... Núna er þetta heimabíókerfi auglýst á TILBOÐI hjá Heimilistækjum 149.000, en fullt verð sagðst 169.000. HVAÐ ER Í GANGI??? 
BTW: Raftæki eldast ótrúlega hratt og því eðlilegra að þetta verð ætti að vera mun lægra, sá einmitt fyrir nokkrum mánuðum (ca 3) Elko auglýsa sömu tegund heimabíó kerfis á 99.999
Nafnlaus

#1173    Tilboð 2 á Hamborgarabúllu Tómasar. Miðstærð hamborgari + lítill franskar + lítill shake. Svo bætti ég við bakon á borgarann og fékk bernessósu með frönskunum. 1820 krónur.. OKUR! Venjulegt tilboðsverð var 1490.. 330 krónur fyrir smá sósu og bakonsneið!!!
Pétur Ingi Egilsson

#1172    Ég var að koma úr verslunarferð fyrir hundana mína, er með 5 hvolpa heima sem þurfa allt að naga og mér fannst kjörið að finna eitthvað gúmmí og fann þennan fína bolta, sem þó kostaði 680 krónur. Ég lét mig hafa það og keyrði svo í Dýraríkið til að kaupa hvolpafóður. Ákvað að skoða hvaða gúmmígripir væru til sölu þar og heldurðu að ég hafi ekki fundið nákvæmlega sama boltann á 2.011 krónur! Ég gat ekki á mér setið og benti afgreiðslustúlkunni pent á þetta, en hún svaraði mér ekki einu sinni (enda ótrúlegt að hún sjái um verðlagninguna. Mér finnst þó í lagi að láta vita að maður fylgist með)..... Alla vega, mér finnst þetta rosalegur munur og ég mun hugsa mig tvisvar um áður en ég versla í Dýraríkinu aftur. Er þetta ekki allt framleitt í Kína og kostar svona 10 krónur, svo eru þessar búðir að græða á tá og fingri.
Ásta Sól

#1171    Ég fór í 10/11 á Hjarðarhaganum í vikunni. Fyrir framan mig í röðinni við kassann var gamall maður. Sá ætlaði að kaupa eina jólaköku og eina ferskju. Þegar drengurinn á kassanum sagði honum hvað vörurnar ættu að kosta hváði gamli maðurinn, enda ekki skrýtið. Drengurinn vigtaði ferskjuna aftur og kom í ljós að ein ferskja kostaði 480 krónur...480 krónur! Kílóverðið var 1499 krónur, ferskjan vóg 320 sem gera 480 krónur. Gamli maðurinn skilaði ferskjunni. Síðar um daginn fór ég í Krónuna, enda versla ég ekki við 10-11 nema tilneydd. Þar var kílóverðið á ferskjum 399 krónur. Hvað er það sem réttlætir þennan verðmun? Fólk áttar sig eflaust ekki á því að kílóverðið sé svona gífurlega hátt og eflaust hafa margir lent í því að vera með 3 ferskjur í poka innan um hinar vörurnar án þess að átta sig á því að þær kosta 1500 krónur. 
SV
(nb. Gamli maðurinn og ferskjan. Var það ekki einhver bók eftir Hemmingway?)
(Ekki það að ég ætla draga úr þeirri staðreynd að 10-11 er mesta okur sem finnst þá efast ég um að drengurinn á kassanum hafi haldið að þetta væri ferskja frekar en nektarína, verðmunurinn á þessum tveimur er svakalegur. Hef verið að vinna í 10-11 sjálfur og man alltaf þetta, kílóverð á nektarínum 1499 kr. ...sem réttlætir ekkert, en fannst vert að minnast á þetta.)
(Nb. Ég hringdi í Hagkaup og fékk það uppgefið að bæði ferskja og nektarína kostuðu 699 kall kílóið)

#1170    Keypti mér rúm í gegnum netverslun Rúmfatalagersins á dögunum. Voða fínt Amerískt á 39.900 kr. Rúmfatalagerinn tók 2000 kr auka fyrir að koma því á afgreiðslu Flytjanda í RVK. Við það hækkar það í 41.000. Gott og vel. En hvað skyldi nú kosta að fá þennan bálk austur á Seyðisfjörð.: 20.216 kr. Heildarkostnaður 61.216.(Ég  þarf ekki að taka það fram að hjartað hætti að slá um stund) . Ef þetta er ekki okur þá veit ég ekki hvað okur er. Ég vil hvetja fólk á landsbyggðinni til að kynna sér flutningskostnað vel áður en það pantar sér eitthvað fínerí að sunnan . Ég mun að minnsta kosti gera það. Í upphafi skyldi endirinn skoða. 
Anna Helgadóttir
(ATH:  Sambandi við flutningskostnað út á land þá hef ég heyrt frá fólki þar að það borgi sig að biðja um að vörurnar séu sendar með póstinum en ekki bílum ( líka stóru hlutina) það muni það miklu á gjaldskrá. Hef ekki skoðað þetta sjálf. Jóna)

#1169    Ég var að fatta eitt pínu áhugavert. Ef þú pantar ferð til útlanda með Icelandair, þá eru fargjöldin mishá eftir dögum. Það borgar sig í einhverjum tilfellum (ef ekki öllum) að kaupa ferðir fram og til baka sitt í hvoru lagi. Ég keypti mér ferð til Stokkhólms um daginn, sem hefði átt að kosta 44.000 krónur en þar sem ég pantaði leiðirnar sitt í hvoru lagi borgaði ég ekki nema 33.000. Það munar um minna, ekki satt? 
Sóley Tómasdóttir 

(Sett inn 05.09.08):

#1168    Ég fór í Bónus í Lóuhólum í gær, 2.september, en þegar heim var komið sá ég að
annar pakkinn af kjúklingamánum sem ég keypti var útrunninn 1.sept. Ég fór með
pakkann og kvartaði og þvílík þjónusta sem ég fékk! Ég rétti stúlkunni pakkann
og fór svo og náði í aðra matvöru sem mig vantaði. Þegar ég kom að kössunum
voru langar biðraðir en þá birtist þessi unga kona og bauð mér að koma á auðan
kassa og afgreiddi mig þar. Fyrir utan að láta mig fá annan pakka af mánum gaf
hún mér heilan bakka af kjúklingabringum að andvirði 2130kr sem sárabætur.
Þetta kalla ég frábær viðbrögð vegna mistaka við að taka útrunnar vörur úr
hillum. Þessi kona er yfirleitt alltaf þegar ég versla þarna svo ég geri ráð
fyrir því að hún sé verslunarstjóri, ef ekki þá á hún það fyllilega skilið!!!
Takk fyrir mig!
Þórunn Austurbergi

#1167    Fór í Nóatún í Smáralind í vikunni til að kaupa cherry tómata.  Í grænmetisdeildinni voru þeir verðmerktir á 299 krónur. Þegar ég fór svo yfir strimilinn sá ég að ég hafði verið rukkuð um 599 krónur fyrir þá. Ég fór þá aftur á kassann og bað um að mismuninn endurgreiddann, þá kom í ljós að boxið sem ég var með (sama tegund og öll hin boxin) kostar 599 en það var eitt box frá öðrum framleiðanda undir þeim og það kostar 299.
Ónefnd tómataæta

#1166    Ég stoppa reglulega á Shell stöðinni við vesturlandsveg (Höfða) og kaupi mér kruðerí á morgnana. Kaupi reglulega hnetuvínarbrauðið þeirra – sem nú hefur allt í einu hækkað úr 155kr í 183kr á einu bretti!
(nb. Það hlýtur að vera vegna alþjóðlegu hnetuvínarbrauðshækkunarinnar!)

#1165    Að gefnu tilefni langar mig til að deila reynslu minni af hárgreiðslustofunni Kompaníið sem er í turninum í Kópavogi.
Í byrjun ágúst, 6. eða 7. ágúst, fór ég þar í klippingu og litun. Ég hafði aldrei farið þangað áður, ég ákvað að fara þangað því daman sem hefur klippt hárið mitt síðustu ár á annarri stofu var farin í barneignarleyfi og taldi ég mig vera örugga að fara á þessa stofu þar sem ég hafði heyrt að standardinn væri hár þar, eða eins og segir á heimasíðu þeirra „Fagmennska í fyrirrúmi“.
Ég er sjálf í barneignarleyfi og er með nokkra vikna gamalt barn heima og var því búin að sjá til þess að faðir barnsins hefði næga mjólk heima svo ég gæti farið áhyggjulaus. Ég hafði hugmyndir um að láta lýsa á mér hárið og snyrta því við vorum að fara að skíra barnið okkar og gifta okkur í leiðinni.
Á hárgreiðslustofunni tók á móti mér hárgreiðslukona. Ég sagði henni frá hugmyndum mínum, þ.e. að ég vildi láta snyrta á mér hárið og lýsa en vildi alls engar áberandi rendur. Einnig sagði ég henni frá skírninni og giftingunni og barninu mínu sem var heima og hún skildi svo vel hversu erfitt væri að fara frá svona litlum ungum þar sem hún ætti nokkur sjálf og hversu mikilvægt væri að líta vel út á svona stórri stundu. 
Hárið á mér var vel klippt og var ég ánægð með það en aðra sögu er að segja um litinn. Hárgreiðsludaman dekkti á mér hárið og setti nokkrar ljósar mjög áberandi strípur í það, hárið mitt varð s.s. dekkra og röndótt.  Ég sagði henni strax frá því að mér fyndist hárið dökkt og strípurnar of áberandi. Hún sagði mér að þetta myndi jafna sig og að ég ætti að hafa samband ef ég yrði ósátt.
Þegar ég kom heim var ég alveg miður mín yfir þessu hrikalega hári og ekki nema rétt rúm vika í stóra daginn. Ég hafði því strax samband við hárgreiðsludömuna sem bauð mér að koma daginn eftir. Ég greindi henni frá því hversu erfitt það væri fyrir mig að fara svona frá og ætti enga mjólk sem hægt væri að gefa barninu meðan ég væri í burtu. Hún sagði að þetta tæki bara eina klst. þannig ég féllst á að koma meðan barnið svæfi. 
Þegar ég mætti daginn eftir var hárgreiðsludaman ekki mætt og þurfti ég því að bíða eftir henni. Svo var hafist handa við að laga hárið og þegar liturinn var kominn í ætlaði hún að setja e-a viftu yfir hárið svo biðin tæki skemmri tíma en setti hana ekki í gang fyrr en ég benti henni á það. Nokkru seinna kallaði móttökudama í hana og sagði henni að e-r annar viðskiptavinur vildi koma fyrr og sagði hún að það væri hið besta mál. Þessi viðskiptavinur kom skömmu seinna og sinnti hún honum meðan ég beið með litinn í hárinu. Hárgreiðsludaman hafði síðan ekki lengur tíma til að sinna mér vegna hins viðskiptavinarins og var ég því látin bíða lengur en ella með litinn og eftir að ég spurði hvort það væri ekki hægt að láta skola á mér hárið þá fékk hún aðra dömu til þess. Allt þetta tók miklu meira en eina klst. og átti þá eftir að greiða á mér hárið og blása. Ég sagði þeim að ég hefði ekki tíma til að vera lengur og sagði þeim einnig að ég væri óánægð með hárið þar sem það var ekki enn búið að lýsa það og það var enn ein ljós áberandi strípa í hárinu og fór út með ógreitt og óblásið hárið svo ég gæti farið heim til að sinna barninu.
Ég var svo óánægð með hárið og hafi í raun engan tíma til að fara aftur til að láta laga á mér hárið að á endanum klippti ég sjálf þessa hrikalega ljósu strípu úr hárinu svo ég væri ekki með einn ljósan áberandi lokk. Þá fór að fara í taugarnar á mér hversu hárið var ennþá dökkt tæpri viku eftir litunina að ég hafði samband 15. ágúst og bað um að fá að tala við eigandann. Móttökudaman sagði mér að það væru þrír eigendur og fékk ég að tala við einn þeirra sem ég fékk ekki nafnið á. Ég sagði honum sögu mína og sagðist hann ekki geta gert neitt fyrir mig þann daginn með hortugu fasi en ætlaði að tala við hárgreiðsludömuna ég hafi hitt og vera síðan í sambandi við mig.
Ég hef ekki enn heyrt frá neinum á þessari stofu í dag, 3. september, en það fór svo að ég var óánægð með háralit minn daginn sem ég skírði barnið mitt og gifti mig og borgaði kr. 17.000,- fyrir þennan harmleik! 
Þessi þjónusta þykir mér arfa slök og mun ég ekki fara á þessa stofu aftur né mæla með henni við neinn. Lágmark hefði verið að hafa samband við mig hvort sem eigendur stofunnar hefðu verið til í að gera eitthvað fyrir mig eður ei!
Helga Kristjánsdóttir

#1164    Erindi mitt er spyrja hvort ,,góð þjónusta"  sé eitthvað sem ekki finnist hér á landi? Jú, það er alveg sama við hvern eða hverja maður talar þá er verið að segja manni frá einhverju sem er alveg fáranlegt! Einn er að segja frá samtali vegna þess að bíllinn bilaði og hann fékk rangar upplýsingar um kostnað! Einn sagði mér frá því að hann keypti síma í Elko og var batteríið ónýtt í símanum. Það tók einn mánuð að fá þetta lagfært, en ekki fyrr en búið var að hafa samband á hverjum degi! Í fréttum er verið að segja frá viðskiptum við Heimsferðir vegna matareitrunar í Grikklandi. Hver er þjónustan sem þar er í boði ?  Jú, þetta kemur okkur bara ekkert við! 
Í sumum verslunum eru viðskiptavinirnir sendir hverfanna á milli til að ná í vörurnar sem verið var að kaupa! Að fara í Byko eða Húsasmiðjuna og ætla að fá einhverja þjónustu? Jú, það getur tekið klukkustund en þá ertu í vitlausri deild eða sá sem er við afgreiðslu veit minna en þú! Hvar getur maður fengið ,,góða þjónustu"?
JR
(nb. Góða þjónustu? Hugsanlega hjá Eggerti feldskera, ég er samt ekki viss!) 

Okur #1060 - 1163 eru hér.

Veistu um svakalegt okur? Láttu vita!