OKUR! OKUR! OKUR!
Okur á Íslandi er ekki náttúrulögmál. Ef þú lætur ekki okra á þér verður ekki okrað á þér. Láttu vita um okur!

#366    Hvað er að gerast í miðasölunni?
Dæmi:
Ísland mætti í gær 16 mars landsliði Færeyja í knattspyrnu karla í Kórnum í Kópavogi, landslið íslands var eingöngu skipað knattspyrnumönnum sem spila hér á landi fyrir utan einn, sem sagt B-lið íslands að mæta stórveldi Færeyja í æfingaleik.
Og hvað rukka KSÍ fyrir miðann ? 2000 kall! OKUR! (leik lokið 3-0 fyrir ísland, örfáar hræður mættu til að horfa á leikinn)
Hinn heimsfrægi listamaður Johnny Logan, Írska sjarmatröllið og Eurovision dominator verður með tónleika á Broadway föstudagskvöldið 23. maí eða daginn fyrir úrslitakvöld Eurovision. Og hvað kostar miðinn á tónleikana? 4.990 kr! OKUR!
Tónleikar þar sem meistaraverk Bítlanna, Sgt. Pepper's Lonely Hearts Club Band verður flutt í heild sinni, hafa verið færðir í Háskólabíó. Upphaflega stóð til að halda tónleikana í Laugardalshöll, en ekki tókst að selja eins marga miða í forsölu og reiknað hafði verið með og því var brugðið á það ráð að færa tónleikana í Háskólabíó. Ekki er ég hissa á að illa gangi að trekkja inn á Bo Hall og félaga stæla bítlana fyrir 8900kr! Veruleikafyrring einhver? OKUR !
Nákvæmlega sami hópur ætlar að halda samskonar "heiðurstónleika" fyrir hljómsveitina Eagles miðaverði er stillt í hóf í þetta skiptið aðeins 4900 kr! OKUR !
Ég var rosa spenntur fyrir tónleikum CCR kappans Johns Fogerty en ekki lengur, hvað kostar miðinn? 11900 kr kostar í stúku á tónleika Johns Fogrety! 6900 kr á gólfið! Eruð þið ekki að grínast!? OKUR!!!!!! (Ath: Hér á ticnet.se í svíþjóð eru John Fogerty miðar á 450 SEK og 495 SEK. Miðaverðið heima er ekki bara okur heldur gjörsamleg geðsýki. Fogerty er ekki einu sinni látinn í Globen, stærsta tónleikasalinn hér úti. Sama gildir um Bob Dylan miðana en ég fór á tónleika með honum síðasta ári fyrir sama miðaverð og þetta.  Bob Dylan kostar eitthvað nálægt 9000 kr heima. Ég hef bara einu sinni keypt miða á 12.000 kr íslenskar og það var í gott sæti á Rolling Stones í Gautaborg í fyrra. Ekki alveg sambærilegt við Fogerty í höllinni.)

#365  Mig langar að benda á eitt dæmi um mikla hækkun á vöru. Ég hef alltaf keypt ákveðna tegund af tissjú-kassa (af því það var það besta og ódýrasta sem ég fann). Fyrst í Bónus á 89 kr. Þá var það líka til í Hagkaup á 99 kr. Svo hætti það að fást í Bónus og var bara til í Hagkaup. 
Eftir því sem ég best veit rekur Baugur; Bónus, Hagkaup og 10-11 búðirnar, svo mér finnst mjög skrýtið að svona vara sé ekki til í öllum búðunum (hef aldrei séð þetta tissjú í 10-11). 
Alla vega, nú hefur þetta bara fengist í Hagkaup í langan tima. Mjög stuttu eftir að það hætti að fást í Bónus þá hækkaði verðið í Hagkaup úr 99 kr. í 119 kr. (20%!!!) Ekkert svo löngu seinna hækkaði það aftur, þá upp í 129 kr. Stuttu seinna önnur hækkun um tíkall (139 kr.). Dálitlu eftir það var það komið upp í 159 kr. Jæja, nú var tissjúið búið að vera á 159 kr. í svolítinn tíma, en viti menn ekki, í gær fer ég í Hagkaup (Kringlunni) og þá er tisssjúið góða komið upp í 179 kr!!!
Þetta er semsagt 80% hækkun (og þá tel ég ekki með Bónus-verðið!) á svona 12-18
mánuðum (man ekki nákvæmlega tímaramman). 
Kannski ekki svo miklar krónutölur, og tímabilið ekkert svo stutt, en eru það ekki þessir litlu hlutir sem safnast upp, og "þeir" halda að við tökum ekkert eftir (og kannski gera flestir það ekki?) 
Eitt veit ég allavega. Það er að launin mín hafa EKKI hækkað um 80% á s.l. 18 mánuðum.

#364  Eitt ekki-okur, enda tímabært í öllu svartagallsrausinu. Markið í Ármúla gerði við hjólið mitt í tvígang á síðasta ca. hálfu ári. Fyrst skiptu þeir um bremsur, barka, klossa, o.s.frv. (s.s. alveg glænýtt bremsusýstem). Síðan (þ.e. í þessari viku) skiptu þeir um afturöxul, ÖLL tannhjólin,
kasthjólið (þetta sem strekkir á/stillir keðjunna, utan um alla gíra), keðjuna og stilltu gírana upp á nýtt. Skiptu m.ö.o. um allt "drifið". Allt nýtt og allt svínvirkar þetta, sem nýtt hjól væri. Verðið:

- Bremsur: 3.500.- kr.
- "Drif": 7.600.- kr.

(Að ógleymdu: Bensín: 0.- kr!)

EKKI-OKUR!

#363  Páskarnir eru handan við hornið og Blómaval auglýsir 10 páskaliljur á 690.-kr. Fyrir ári síðan keypti ég 40 páskaliljur, í kjörbúðinni Fötex í Danmörku, á 60.-dkr. Þ.e. 10 páskaliljur á 15.-dkr. (212.-isk. samkv. núverandi gengi).  Hefur heimsmarkaðsverð á páskaliljum hækkað svona rosalega á einu ári!?

#362  Fór í Melabúðina þar var baquette brauð á 409 Kr en baquette í kjörbúðinni við hliðina á mér í Torrevieja á Spáni kostar 39 cent eða um 40 kr. Brauðin eru alveg sambærileg. Þetta er aðeins eitt af dæmunum um svívirðilegt matarverð á íslandi.

#361  Apple Macbook Pro sem kostar 204.995 á Elko.is kostar 1699.99 USD á www.bestbuy.com. Einfalt er að kaupa tölvu úti og margir sem eru mikið á ferðinni þannig að við skulum "kaupa" hana þar og flytja hana sjálf inn í handfarangri og gerum ráð fyrir að við séum heiðarleg og við framvísum henni á rautt hlið við komuna til landsins. Gengi USD er ekki okkur í hag, en gefum okkur töluna 68. 1699,99 x 68 = 115599. Við njótum tollfríðinda sem ferðamenn upp á ikr 23.000 fyrir hvern einstakan hlut. 115599 - 23000 = 92599. Af þessari tölu reiknast VSK. 92599 x 0,245 = 22687. Tölva þessi kostar okkur því með gjöldum 115599 + 22687 = 138.286 krónur ef við flytjum hana inn sem ferðamenn. Ef við látum senda hana yrði kostnaðurinn eitthvað hærri, gróflega áætlað 130.000 x 1,245 = 161.850. Þarna reikna ég með u.þ.b. 15.000 króna sendingarkostnaði, því svona dýran hlut er tæplega hægt að fá sendan til sín með almennum pósti.
Kitchen aid hrærivél. Kærastan suðar í sífellu í mér. Mér ofbýður það að sú ódýrasta kosti 37.895 ikr á elko.is - en sama vél á amazon.com kosti $179,99 sem gerir 12.239 krónur. Hún er reyndar á tilboði, en algengt verð á þeim virðist vera um $240 sem gerir 16.320 ikr. Hægt er að fara erlendis, versla hana og koma með hana heim í farangri og fara beint á grænt tollhlið - gætir meira segja keypt tvær. ...bent er á að hér heima kosta þær hátt í 50.000 ef þær eru úr burstuðu stáli!
Okkur langar að heimsækja foreldra mína á Torrevieja í sumar. Skulum athuga hvað kostar með leiguflugi með Heimsferðum (sem virðast vera í fljótu bragði vera ódýrastir hér á landi ásamt Sumarferðum, en verðin eru mjög áþekk) til Alicante og hvað kostar svo með Ryanair frá London Stansted til Alicante - ef ég þá byggi í Bretlandi. Kannski ósanngjarn samanburður en allt í lagi að átta sig á fjötrunum sem við Íslendingar búum við, því ekki virðist með nokkru móti vera hægt að komast frá landinu undir 30.000 ikr með sköttum...
Ég þarf að komast út í kringum 20. maí og ætla að vera í viku. Við erum 2 fullorðinn. Heildarkostnaður með Ryanair fram og til baka er ...151,26 pund frá 21. maí til 28. maí og flogið er út klukkan 19:35 og heimflugið er klukkan 15:40. Rétt tæp 21.000 ikr fyrir 2 með sköttum og flugtímarnir skaplegir. Fyrir þá sem ekki trúa þessu bendi ég hinum sama að tékka á þessu á www.ryanair.com.
Þá er það frá Íslandi til Alicante. Sömu dagar eru valdir og verðið með Heimsferðum fyrir tvo með sköttum er 64.580. Reyndar er þetta frá 21. - 29. maí þar sem brottför frá Alicante er klukkan 01:50 aðfararnótt þann 29. maí. Sumarferðir selja þetta á 62.800 (22-29 maí) og Iceland Express eru með samskonar ferð á 75.780 krónur (22 maí -29 maí).
Það er ótrúlegt að flugfélögin hér á Íslandi geti ekki boðið ódýrari ferðir fyrir almenning. JetX, Iceland Express og svo Futura Airways og Spanair sem fljúga hingað fyrir tilstilli ferðaskrifstofa, eru rekin með lítilli yfirbyggingu. Afhverju í fjandanum flýgur Ryanair ekki hingað - þeir fljúga frá ótrúlegustu stöðum - er okkar ríkisrekna bákn, Leifsstöð og Keflavíkurflugvöllur kannski alltof dýr...??

#360  Bróðir minn fór í Skálafell í gær um klukkan 14. Hann var í 3 tíma. Hann þurfti að borga 2000 krónur fyrir dagskort. Hægt er að kaupa síðdegiskort sem byrjar kl 17 á 1300. Það gagnast lítið um helgar þar sem það lokar klukkan 18. Hann sagðist hafa farið og keypt sér kókómjólk sem kostaði 150 krónur stykkið.  Dagskort fyrir börn kostar 560 krónur. Þannig ef 4 manna fjölskylda fer í dagsferð á skíði kostar það 5120 bara að komast í lyfturnar. Og svo kannski 4 kókómjólk þá er það 600 kall í viðbót. Mér finnst þetta persónulega fáranlegt að afþreying fyrir fjölskyldur um helgar kosti svona mikið.

#359    Keypti mér 40 tommu flatskjá á Las Palmas sem kostaði þar 788 evrur (evran þá 86 kr) sem gerir 67 þús krónur átti eftir að flytja hann heim, flaug heim með Icelandair og sem betur fer voru þeir með svokallað yfirviktatilboð, þú máttir vera með 35 kg, skjárinn er 25, en þegar heim var komið þá byrjaði vesenið.
Ég kem í rauða hliðið með tækið því að ég er heiðarlegur og sýni nótuna og samkvæmt mínum útreikningi þá átti ég að borga 14 þús kr í toll af tækinu en viti menn tollarinn tók nótuna leit á hana og sagði hefurðu heyrt annan betri.......sem sagt hann trúði því ekki að ég hefði borgað þetta fyrir tækið og sagði að það þyrfti að kyrrsetja tækið þangað til að ég kæmi með rétt verð, ég að koma heim fyrir jólin og öll fjölskyldan bíður spennt heima að sjá nýja sjónvarpið sem kallinn keypti svo ódýrt á Las Palmas. Nú voru góð ráð dýr átti ég að fara bara og stefna H....... tollinum eða borga það sem að hann legði til, ég ákvað að borga bara það sem að hann lagði til og voru það 34 þús krónur. Leitaði hann að verði í Bretlandi og reiknaði tollinn út frá því. Þegar öllu er á botninn hvolft þrátt fyrir dónaskap tollsins sem virðist vera frekar en ekki... kostaði tækið mig um 100 þús kall heim komið þrátt fyrir að hafa borgað meiri toll en mér bar...svona tæki kostar heima hjá Bræðrunum Ormsson sem er með umboð fyrir Samsung á íslandi 239 þús kr á tilboði. OKUR!

#358  Er í BNA og mútta bað mig að kaupa handa sér ilmkremið sem hún notar, og
ekki að furða, eins og verðlagið er. Estee Lauder beautiful body lotion: í Macy's 38,50$ eða 2.550 kr uþb. Enginn söluskattur bætist við. Sama flaska í fríhöfninni: 4.599 kr. -Þó búllan sé undanþegin virðisaukaskatti og tollum er flaskan næstum tvöfalt dýrari á Íslandi! Ég þori ekki einusinni að fletta því upp hvað flaskan kostar svo út úr venjulegri búð í Reykjavík. Það virðist löngu liðin tíð að það borgi sig að versla í fríhöfninni, og ætla ég eftirleiðis að sneiða hjá sjoppunni eins og ég best get.

#357  Ég verslaði 2 Svala á Hlölla, Ártúnshöfða um daginn. Stykkið kostaði heilar 150 kr, sumsé 300 kall fyrir tvo auma Svala. Þess má geta að fernan kostar ekki nema 42 kr. í Hagkaup, af öllum stöðum... Okur!


#356  9 sveppir á 359 kr í Nóatúni okurbúllu. 40 kr hver sveppur. Fjörutíu kall fyrir einn svepp! Þetta er ekki okur. Þetta er geðsturlun!

#355    Það er svo sem ekkert nýtt að tónlist sé dýr á Íslandi, sama hvort það séu erlendir geisladiskar eða íslensk tónlist. Ef maður vill t.d. ná í íslenska tónlist löglega á netinu þá verður maður að borga 149 kr fyrir nýleg lög á tónlist.is á meðan hvert lag kostar oftast 99 cent í erlendum netverslunum. Svo sem ekkert nýtt heldur.
Ég var hins vegar að komast að því að enska útgáfan af tónlist.is (tonlist.com) selur sömu íslensku lögin á 99 cent. Sami aðili er semsagt að selja útlendingum sömu vöru á ca 65kr og við eigum að borga fyrir 149kr. Þetta er yfir helmings munur. Og áður en eitthver nefnir virðisaukann þá er hann inni í 99 centunum.
Nú veit ég ekki hvort það er hægt að kaupa á tónlist.com þegar maður er staddur á Íslandi, (er staddur í DK) en ég get vel trúað því að þeir loki á Íslendinga. Ef ekki þá ættu íslendingar auðvitað að nota .com endingu, allir sem einn. (nb. Þetta er sama sindrómið og hjá Icelandair. Dýrt fyrir Íslendinga, ódýrari fluggjöld fyrir útlendinga á sömu ferðum...) (Ath: varðandi tónlist á Íslandi hérna er hægt að nálgast efni á 99 kr lagið (ekki 149) og 990 kr fyrir diskinn.
Smekkleysa - http://www.smekkleysa.net/
12 tónar - http://12tonar.grapewire.net/
Ambúalant http://ambulant.grapewire.net/ 
Kimi Records http://kimi.grapewire.net/
Björk, http://bjork.grapewire.net/
Mugison http://mugison.grapewire.net/is/
Airwaves http://airwaves.grapewire.net/en/  )

#354  Ef þú kaupir farmiða með Icelandair á Netinu og þarft svo að breyta t.d. brottfarardegi, þá þarftu að hringja í þá til að breyta miðanum. Þetta tekur um 2-3 mínútur en þeir rukka samt 10.000 kr. breytingagjald fyrir miðann. Ef hjón eru að ferðast saman þá þýðir þetta 20.000 kr. í aukakostnað! Skýringar Icelandair: "Það þarf að endurútgefa allan farseðilinn, mikil vinna fyrir sölufólk." Þetta er OKUR!

#353    Við teljumst vera landsbyggðarfólk þó svo það taki ekki nema um 40 mínútur að keyra út úr okkar bæjarfélagi. Nú á laugardaginn áttum við erindi á höfuðborgarsvæðið og ákváðum meðal annars að fara niður í miðbæ. Seinnipart dags var hungur farið að þjá fjölskyldumeðlimi svo ákveðið var að fara á kaffihús.
Eftir að fara einn hring í miðbænum vorum við engu nær, þar sem einu sinni voru kaffihús voru nú skemmtistaðir, Kaffi París troðfullt og ekki höfðum við áhuga á að fara með afkvæmin á sportbar, þeir eru bæði lítið fyrir að fá sér bjór og horfa á fótbolta. Svo var fullt af stöðum sem voru ekki opnir.
Til að gera langa sögu stutta þá fórum við inn á stað sem heitir Hornið, gamall og gróinn staður beint fyrir aftan pylsuvagninn.  Okkur er vísað til sætis og afhentir matseðlar. Ég byrja á þvi að fara á salernið en finnst eiginmaðurinn frekar einkennilegur á svipinn þegar ég kem aftur. Nískan í mér hefur greinilega haft einhver áhrif á bóndann eftir næstum átta ára hjónaband því hann var í áfalli yfir verðinu á matseðlinum.
Við létum okkur nú hafa það, vorum öll orðin svöng og köld en bóndinn var ekki einn um að fá áfall. Svona leit reikningurinn út.
Eplakökusneið               1stk             1.100
Skúkkulaðikökusneið             2stk             2.200
Hvítlauksbrauð m/osti   1stk                650
gos  lítið      (330 cl)      3stk               960
kaffi                              1stk               320

Þessi síðdegishressing kostaði 5.230 kr fyrir okkar fjölskyldu sem er að ég held dæmigerð vísitölufjölskylda, hjón með tvö börn, yngir en 12 ára.

Þó svo kökurnar hafi verið virkilega ljúffengar allar saman, hvítlauksbrauðið með því betra sem ég hef smakkað, gosið ískalt og svalandi (bóndinn sagði reyndar að kaffið hefði verið vont)  þá get ég ekki gert að því - ein kökusneið með rjóma fyrir 1100 krónur - er þetta ekki okur? (Nb: Jú!)

#352    Ég fór með klinkið á Devitos um daginn með vinkonu minni og ætlaði að fá mér sneið og kók í súperdós, nema hvað að við enduðum á því að fá okkur einn líter saman sem var töluvert ódýrara en súperdósin sem er 0,5 lítrar og kostar 220 ISK.,. Svo vorum við vinkonurnar í 10-11 á Hverfisgötunni og þar kostar Spro Mix snakkið hvorki meira né minna en 599 ISK!! Glæpsamlegt?

#351    Labbaði út af Sólon er ég sá að enn á ný var nýr matseðill komin í hús og viti menn 10- 25 % hækkun á öllu góssinu. Væri kannski í lagi  (nei ekki í lagi því þeir misnotuðu virðisaukann) ef þetta væri ekki í annað skiftið á 6. vikum sem allt hækkar um þessi 10-25 %. Þess má geta að samloka með skinku og osti sem kostaði þarna alls ekki fyrir löngu 870 kr. er nú á 1250 kr.  Græðgi og okur!!!!

#350    Stóra kaffimálið :<
Hef lengi gripið kaffibolla hjá Olís í Ánanaustum.  Hann kostaði lengi vel 100 kall, svo var lækkaður vaskur af matvælum og viti menn hann fór í 94 krónur. Nú bar svo við að eftir jól kom ný kaffivél og bollinn hækkaði í 150 krónur (kaffið versnaði reyndar líka). Þetta fannst mér OKUR svo ég ákvað að sýna samstöðu með sjálfum mér og hætta að kaupa kaffi á morgnana.  Fljótlega vaknaði samt kaffiþorstinn og einn morguninn var ástandið þannig að ekki var undan því komist að ná í bolla. Ég skellti mér á N1 stöðina á Nesveginum, en viti menn þar kostaði bollinn líka 150 kall. Kaffifíknin varð mér ofviða og ég borgaði uppsett verð. Maður borgar fyrir bollann og svo þarf maður sjálfur að ganga í málið, ýta á takka til að velja kaffi og síðan aftur til að staðfesta valið (snilld!). Ég skolaði svo niður kaffinu og hresstist nokkuð. Daginn eftir var ég í vanda, en aftur varð fíknin ofaná og ég mætti í N1, bað um bolla og rétti fram 150 kallinn. "Það er reyndar búið að hækka bollann í 175" sagði afgreiðslumaðurinn. Er ekki verið að grínast? 175 kall fyrir einn skitinn kaffibolla sem maður þarf að nota lengri tíma sjálfur til að merja út úr vélarskrattanum. Þetta er dýrara en bensín og dísilolía. Hér er okurvæðingin á fullu, hirða af manni fullt af pening fyrir það sem ætti að vera frítt!! Almennileg fyrirtæki bjóða viðskiptavinum uppá kaffi. Veitingastaðir servera kaffi og taka greiðslu fyrir. Bensínstöð er ekki veitingastaður!  Viðskiptum mínum við þetta fyrirtæki var lokið. Furðulega við þetta bensínstöðvakaffiokur er að þetta er ekki eins milli stöðva. Næst þegar fíknin gerði vart við sig, datt ég inn á Olís stöðina á Sæbrautinni, rétt hjá Hafró. Viti menn þar er kaffið FRÍTT? Hvað er í gangi? (ath Las pistilinn um okur verð á kaffi og langaði að segja þér að hjá Olís á Akureyri kostar það "bara" 70 kr. Enda er nýja kaffivélin ekki komin þar og ef maður er í reikningsviðskiptum við Olís fær maður kaffið frítt. Svo er hægt að kaupa könnu á 1990 kr. sem hægt er að fylla á frítt út árið, borgar sig upp á innan við 10 fyllingum. Ástæðan fyrir því að kaffið er svona vont er að nú kemur það frá Kaffitár en ekki merild eins og áður. Vil taka fram að ég vinn ekki fyrir Olís.)

#349    Ein muffins á Kaffitár kostar 500 kr og það finnst mér fáranlega dýrt!

#348    Hér er listi yfir varahluti í Audi, út úr búð, bæði verð án VSK. Ef verslunin í Bretlandi er að legga 30% þá er Hekla að leggja 300%. Engar afsakanir um flutningskostnað eða lítinn markað eru í gildi hér, Bretar panta inn eftir hendinni frá Þýskalandi og flutningskostnaður ætti ekki að vera mikið hærri til Íslands heldur en til Bretlands. Upplýsingar frá febrúar 2008.

Audi A3 Sportback 2005
Fabriknr: WAUZZZ8P75A169434

#347    Var að koma frá USA og keypti mér góðan  ipod á 15000 kaddl, held að hann kosti eitthvað um 30000 hér og Levis gallabuxur á 3500. Ódýrustu Levis buxurnar á Íslandi kosta 12000. Ótrúlegt!

#346  Brimborg. Mig vantaði hitaelement í miðstöðina í bílnum hjá mér, þetta er álstykki á stærð við litla bók. Nema hvað, þeir vildu selja mér varahlutinn á 25.000 krónur. Ég hélt nú ekki, fann hlutinn á netinu á 68 dollara(4500 kall) og lét kunningja minn koma með hann heim frá USA. Sparaði mér 20 þús.

#345    Var að koma úr Coop í Zurich, Sviss, og datt í hug að senda ykkur verðið á nokkrum hlutum í næstdýrasta landi veraldar (á eftir Íslandi):

6 x 0.5L bjór:  Kr. 196.-
6 x 1.5L kók:  Kr. 391.-
1L mjólk:  Kr. 78.-
Roastbeef álegg:  Kr. 130.-
Brauðostur:  Kr. 206.-
1.2 kg kjúklingur:  Kr. 616.-
Gott rauðvín:  Kr. 428.-

#344  Í Bakaríinu við brúna á Akureyri er hægt að kaupa Sviss Mokka kaffi á 370kr , það er mjög lítið í bollanum og auk þess er það ansi slappt á bragðið. Einnig er hægt að kaupa kaffi Latte á 350 sem er líka rétt rúmlega hálfur bolli og ekki neitt gæðakaffi þar á ferð. Á sama stað er hægt að kaupa svokallað Aspasstykki á 490 krónur, kókómjólk á 104 krónur og pínkulitla krukku af pestó (svona ca tvöfalt minni en krukka af Sacla pestói sem fæst í Hagkaup) á meira en fimmhundruð krónur. Ég verð að segja að þetta er ekkert annað en okur í mínum huga, sérstaklega þar sem um er að ræða vöru sem er ekki sambærileg í gæðum og hægt er að kaupa annarsstaðar (eins og kaffið). 

#343    Ég tók rútuna í bæinn frá Ólafsvík til Reykjavíkur og til baka um helgina. Þetta ferðalag kostaði mig litlar 10.000 krónur! Vegalengdin er 195 km hvora leið. Fyrir sama verð kæmist ég 3-4 ferðir fram og til baka á Yarisnum mínum... held mig við hann framvegis þó veðrið sé fúlt. Hérna er líka ferlega sniðug síða sem ég mæli með fyrir ferðalanga sem vilja ekki láta rútufyrirtæki okra á sér: Samferda.net

#333  Mér þykir verra að okurfærslurnar þínar séu ekki dagsettar. Ég gúglaði World Class um daginn og þá kom síðan þín upp - í okri nr. 174 er nefnt að verðið í WC sé 51.800. Það hefur nú hækkað - líklega gerðist það um áramótin. Ég veit ekki hvort hægt sé að saka þá um okur (ódýrari en Hreyfing t.d.), en hér er amk tafla sem ég rakst á sem sýnir hækkanir á árskortum á síðustu 6 árum. Kannski má í staðinn nefna Nautilus sem dæmi um fyrirtæki sem ekki reynir að okra, en verð á árskortum þar er 28 þúsund (og fylgir frítt í sund). Engir hoppuskopputímar þar, hentar þeim sem sjá um sig sjálfir.

#332  Mikið hefur verið rætt um lyfjaverð undanfarið ár eða svo. Mig langar að koma með dæmi um verðmun lyfja hér á höfuðborgarsvæðinu. Ég fékk 2 lyfseðla stuttu fyrir jólin og fór í Lyfju Lágmúla (af því læknirinn er í sama húsi) og hafði sem betur fer vit á að spyrja fyrst hvað þetta myndi kosta. Samtals kostuðu lyfin u.þ.b. 9.750 kr. (Þetta voru þunglyndislyfið Wellbutrin og flogaveikislyfið Lamictral, og skiptist verðið u.þ.b. 50/50). Mér fannst það ansi dýrt og ákvað því að athuga hvað þau kostuðu í Lyfjaveri Suðurlandsbraut, því ég hef oft verslað þar og fundist verðið frekar gott. Þar fékk ég bæði þessi lyf á um helmingi lægra verði. Sem sagt 100% dýrara í Lyfju. Skýringin er sú að Lyfjaver veitir miklu meiri afslátt af hluta sjúklings heldur en Lyfja. 

Það skiptir mig svo sem engu máli af hverju verðmunurinn er svona mikill, það eina sem skiptir mig máli er helmingi lægra verð í Lyfjaveri. Mig munar um 5.000 kr. því ég er ekki með miklar tekjur. Ég hef líka geymt kvittanir úr apótekum til að bera saman verð og hér er smá sýninshorn af verði algengra verkjalyfja:

Paratabs (30 stk.):
Lyfjaver        235 kr.
Lyfja             313 kr.
Lyf og Heilsa  382 kr.

Íbúfen (400 mg. 30 stk.)
Lyjaver          522
Lyfja              616
Apótekarinn    676
Lyf og Heilsa   699

Þetta er kannski ekki svo mikill munur í krónum, en ef munurinn er reiknaður í prósentum getur hann verið talsverður. Ég hef einnig notað svefnlyfið Stilnoct, sem er mjög algengt, og er verðið á því mjög misjafnt.

T.d.:
Lyfja:           Fullt verð 1.470.       Verð m/afsl. 910
Apótekarinn: Fullt verð 1.474.       Verð m/afsl. 834
Lyfjaver:      Fullt verð 852           Verð m/afsl. 679

Til er samheitalyf fyrir Stilnoct sem heitir Zolpidem. Mér hefur aldrei verið boðið það nema þegar Stilnoct hefur ekki verið til (þó mér skiljist að lyfjafræðingar eigi að láta fólk vita um samheitalyf séu þau 5% ódýrari eða meira). Nú sé ég það á kvittununum að ég hefði betur spurt að því, því ég er með 2 kvittanir (báðar frá Lyf og Heilsu), þar sem verðið á því er 832 (fullt verð) en 739 m/afsl. (22-12-07) og 852 (fullt verð) en 757 m/afsl. (3-1-08). Eins og sjá má breytast verðin á lyfjum dag frá degi (þetta er bara eins og verðið í Bónus, breytist oft á dag).

Sem sagt, þá ætla ég mér héðan í frá alltaf að versla í Lyfjaveri, Suðurlandsbraut 22 ef ég mögulega get.

#331  Ég tel aðalokrið á Íslandi (já, meira en þetta sem hér má sjá) sé að greiða toppverð í öllum matvöruverslunum á landinu og vera svo afgreiddur af krakka. Maður borgar toppálagningu ofan á hæsta matarverð í heiminum en fær þjónustu sem væri hvergi liðin í Evrópu. Fyrir þetta verð ætti maður að fá þjónustu eins og á Holtinu. Í stað þess þarf að leita að verðinu á frystivörunni og finna að það er ekki skráð neins staðar, þarf að segja krakkanum á kassanum hvað rúnnstykki með birki heitir, þarf maður að fylgjast sérstaklega með til að fá afsláttinn sem var í boði innar í búðinni. Lágmarksþjónusta, hámarksverð!

#330    Rakst á 100. gr krukku af hákarl í Nettó Akureyri á nettar Kr. 499 sem gerir jú kr. 4.990 á kíló. Hákarlinn er skorin í örður, svo smáar, að það þarf flísatöng til að borða hann!

#329    Kallinn skrapp á þýsku landamærin við Danmörku og lærði að ódýr bjór er ekki sama og ódýr bjór. Dæmi: ÁTVR (vínbúðirnar) selja kassann af Slots öli á  2472 krónur, fyrir sama verð með þýskri álangningu greiði ég 396 krónur á landamærunum. Samráð?  Hmmmm kannski "einhverft samráð ríkisins". Í lagi væri að 3falda þýska verðið sama er mér, þvi þá finnum við ca út danska verðið.

#328  2 stk sumacta 50 mg sumatriptan, emigran kópilyf í Apotekinu í Domus Medica: 4900 ISK.
12 stk A1 Farma, 50 mg sumatriptan emigran kópilyf á medicinpriser.dk: 29,25 DKK.
Það er 1500 % munur!!! AF HVERJU ÞARF ALLT AÐ VERA SVONA ANDSKOTI DÝRT Á ÍSLANDI? OKUR!

#327    Óþolandi að í Krónunni út á Granda gerir starfsfólkið engan greinarmun á grænum og gulum eplum þótt að verðmunurinn sé þónokkur. Til dæmis kaupi ég alltaf gul epli sem kosta 89 kr/kg en er oftast rukkuð um græn epli sem kosta 120 kr/kg... Kannski ekki há upphæð fyrir mig en töluverð fyrir Krónuna sem græðir....?

#326    Kókoslengja í Gamla Bakaríinu á Ísafirði kostar 200 krónur! Okur! (Ath: Kókoslengjurnar hjá Ruth í Gamla bakaríinu á Ísafirði eru einfaldlega himneskar. Það er ódýrt að borga 200kall fyrir sætabrauðið, þegar maður fær 500 kalóríur og 10 mínútna sælu. Ein lengja er eins og þrjár kúlur, og hver fær kókoskúlu fyrir 67 krónur?)

#325  Eitt stykki lilja í Blómavali: 1150 kr. OKUR!

#324  Café Sólon: Magic orkudrykkurinn. Lítil Dós 450 kr. OKUR! 

#323  Ég fór í Honda umboðið (Bernhard, Vatnagörðum 24-26) í vikunni til að kaupa mér aukalykil að bílnum. Lykillinn sem ég keypti var ekki með neinum hnöppum til að opna og loka; heldur bara ósköp venjulegur lykill. Fyrst er ég látinn borga 4579 kr fyrir lykilinn og sagt að ég verði að fara með hann upp á Laugaveg til að láta skera hann þar. Að því loknu á ég að koma aftur og þá verði lykilinn kóðaður. Að skera lykilinn kostaði 2500 kr og svo kostar 3000 kr að láta kóða hann. Allt í allt gerir þetta 10.079 kr. Tíu þúsund og sjötíu og níu krónur!! Ég sagði við manninn í afgreiðslunni hjá umboðinu að þetta færi á okursíðuna hjá Dr. Gunna. Vonandi lætur Doktorinn það eftir mér að birta þetta. (ath: Ég lenti í svipuðu vandamáli fyrir nokkrum árum og var rukkaður um 10 þús fyrir bíllykil.  Þetta var subaru impreza og fylgdi honum bara einn lykill. Ég fór ekki í umboðið heldur í Byko og lét smíða 2 lykla fyrir einhverja hundrað kalla. Gat ekki notað þá því það er einhver búnaður í orginal lyklinum sem svissinn skynjar og því drepst á bílnum ef annar lykill er notaður. Líklega er það þetta kóðunardrasl. Ég leysti þetta með því að líma orginal lykilinn utan á svissinn undir klæðninguna sem er í kringum hann. Nota núna hina lyklana og virkar fínt.)

#322  Í dag þurfti ég að láta breyta flugmiðum hjá því fyrirtæki sem ég kalla ennþá Flugleiðir en heitir víst Icelandair. Þetta voru ekki miðar til Jóhannesarborgar, Adelaide eða Suðurpólsins. Heldur bara til London. Á skrifstofu Flugleiða kom í ljós að bókunin var smá vitlaus: fornöfn 
fjölskyldunnar voru skráð sem eftirnöfn. Allt í allt kostaði þetta smáviðvik 42 þúsund krónur. Ég segi bara hjálp!

#321  Ég keypti  nú fyrir jólin klementínur í Kaskó á 249 og svo í Úrval á 549 (á Húsavík).

#320  Keypti mér Canon Ixus 70 fyrir jólin í Elko á 23.895. Tékkaði síðan hvað hún kostaði uppi á Flugstöð í Elko-búðinni þar: 21.999. Eru þeir ekki að stela einhverju þarna? Sama vél í Hans Petersens kostar 34.990. Ég keypti Canon Hv-20 videovél á Ebay á 790 dollarar með
2 töskum , 2 wide angle linsum, filterum, hreinsikitti, þrífót. Konan mín fékk tilboð í sama pakka í Nýherja ef mig minnir rétt á 180 þúsund – *blink blink* svaka tilboð!

#319  Eitt lítið muffin kostar 380 krónur í Súfistanum í Máli og Menningu við Laugaveg. Það þykir mér mikið miðað við að þetta eru bara þessi sömu pakkamöffin sem kosta 99 krónur í Bónus.

#318    1 stk. smábarnaórói (við erum nú bara að tala um 4 hangandi bangsamyndir í lítilli grind): 5.500 kr! 1 stk. ljós inni í kúlu, sem varpar myndum á vegg: 7.900 kr! Það er hreinasta OKUR að gefa vöggugjöf og skilst mér flest allt fyrir ungabörn þessa dagana! 

#317    Keypti rafmagnsrúðuupphalara í Passat bifreið (ekki motorinn), vírar, hjól og eitthvað plastrusl og hvað haldið þið að ég hafi þurft að borga fyrir þetta? Jú 18.900 - takk fyrir- í Hekluumboðinu. Þetta er sko OKUR! Engin furða þótt þessi bílaumboð geti reist sér þessar stóru flottu hallir!

#316  Samanburður á verði hjá Elko í Fríhöfn og Kópavogi:
Í Fríhöfn: 453 NOKIA E50 GSM FARSÍMI 22.999 kr. 
Þessi sami sími kostar 20.995 í Elko Smáratorgi.
Betra að hugsa sig um áður en verslað er í Fríhöfninn. Verslanir sem þar hafa opnað útibú treysta á að landinn telji sig vera að gera reyfarakaup í Fríhöfninni. Enginn virðisaukaskattur, en bara ennþá meira okur. Íslendingar eiga enn eitt heimsmet: AÐ LÁTA OKRA Á SÉR. Það eina sem borgar sig orðið að kaupa í "fríhöfninni" er áfengi og tóbak.

#315  Ég fór í klippingu á föstudaginn á Jóa og Félaga við Skólavörðustíg. Var þar látinn borga 4.400 krónur fyrir einfalda herraklippingu. Klippingin tók innan við hálftíma og sá sem klippti mig kunni ekki mikið fyrir sér, ég hefði líklega gert betur sjálfur. Alla vega, langaði bara að benda á þetta, hæsta verð sem ég hef nokkurn tíma borgað fyrir klippingu. (nb. maður sparar stórfé að vera sköllóttur. Aldrei klipping, aldrei sjampó, greiður eða hárnæring. Tékkaðu á því.)

#314    Af hverjum 1.000 kr. sem ég fæ í laun borga ég ca. 40% í skatt, útsvar, iðgjöld, félagsgjöld og sjúkratryggingar (fæ reyndar persónuafslátt), til viðbótar borgar atvinnuveitandi minn ca. 25% í hans hluta af sömu gjöldum. Á vöru sem ekki er framleidd í Evrópusambandinu er lagður 15% tollur? Virðisaukaskattur reiknast á heildarverð vörunnar eftir allar álagningar "ríkisins" og seljandans 14% eða 24,5% eftir eðli vörunnar. 
Spurningin er: Ef ég er með 1.000 brúttó í dagvinnulaun og kaupi 1.000 kr. vöru sem er framleidd utan evrópusambandsins og er með 25% virðisaukaskatt. Hvað tekur það mig marga klukkutíma að vinna fyrir henni og hvað hef ég, vinnuveitandi minn og sá sem seldi mér vöruna borgað til "ríkisins"?
Svo ekki sé gleymt... ef ég kaupi vöruna með debetkorti þar sem færslan kostar 12 eftir "frínotkun", eða jafnvel með kreditkorti eða á yfirdrættir hjá banka. Ef einhver kann og vill setja svona dæmi upp í excel væri það brill ;)

#313  Hjá Hans Petersen fást nú rammaklasar, þ.e. 8 rammar festir saman, framleiddir af Umbría á kr. 7.990.-. Í Boston,U.S.A., kosta sömu rammar frá sama framleiðanda aftur á móti USD 24.00, og ekki segja mér að mismunurinn sé flutningskostnaður.  Sölugengi dollars í dag, 17. Des. 2007 er kr. 62.30, þannig að verð rammanna í Boston er Kr. 1.495.

#312    Flatskjái fær maður ekki undir hundraðþúsundkallinum á Íslandi, nema ef helst væri um að ræða tölvuskjái. Rosa OKUR þar alveg hægri/vinstri. En bíddubíddu: Hver sagði annars að maður þurfi endilega þessa flatskjái? Er ekki nóg að kaupa sér bara gamla góða sjónvarpið? Sjónvarpsmiðstöðin er með 28" imba á 29.900, sem klárlega er EKKI-OKUR. Tekið er fram að þetta er líklega eina búðin á landinu sem semur slíka "forngripi". Annað: Skil ekki þessa "nútímavæðingar"dellu alltaf hreint, hvaða rugl er að vera að leigja sér eitthvað rispað DVD-drasl, sem maður getur ekkert horft á, þegar vídeóspólur eru bara alveg fínar?!? Kvikmyndir eru artform, ekki vísindi! (nb. Við verðum að halda áfram að kaupa eitthvað nýtt, annars staðnar allt og við verðum geðveik... eða var það hinssegin?)

#311  Var á Nasa um daginn á Mugison útgáfutónleikum, tónleikarnir voru alls ekkert okur, en ég ákvað að kaupa mér eina kók á barnum. Barþjónninn náði ekki að klára úr svona lítilli dós í glasið en samt kostaði glasið 350 krónur. Þetta er sorglegt.

#310    Sendi bók til New York um daginn með Íslandspósti. Bókin var 1.6 kg. að þyngd og kostaði hún kr. 3.600. Ég sendi hana ódýrustu leið sem í boði var, svokallaðan B-póst. Kostnaður kr. 2.600! OKUR! Hvað skyldi kosta að senda mig sem B-bögglapóst! Ég er 85 kg?
(nb. Það er ekki hægt að senda þig sem B-póst (2 kg hámark) en í bögglapósti myndi kosta 71.785 kr að senda þig til USA í flugi. Svipað verð og hjá Flugleiðum!)

#309  Ég pantaði mat á Nings í gær og keypti þar tilboð fyrir 2 sem stúlkan í símanum hjá Nings sagði mér að kostaði 2490. Þegar maturinn hins vegar kom heim þá borgaði ég 2990 af því að það var 500 kr heimsendingargjald sem enginn sagði mér frá. Þetta finnst mér svínslegt verð ég að segja!

#308    Vantaði rúðuþurrkublöð í Scoda Octaviu 1x55cm og 1x48cm. 

Fór á N1 stöðina Reykjavíkurvegi og keypti þar 55cm Bosch þurrkublað á kr. 1.190,- fékk 25% afslátt (eitthvað tilboð sem ég vissi ekki af) og borgaði kr 892,-.  ekki var til 48cm blaðið svo ég labbaði yfir í næstu verslun, Shell - Á Stöðinni ehf (næsta hús við N1), þar áttu þeir til 48cm Bosch þurrkublað (en ekki 55cm) og þar fékk ég að borga fyrir það kr. 1.550,-.  Þetta er Okur!

N1 55cm þurkublað kr. 892,-
Shell 48cm þurkublað kr. 1.550,-

Því má bæta við að þetta var nákæmlega sama gerð af Bosch þurrkublaði í eins umbúðum.

#307    Félagi minn var á ferðalagi um Asíu fyrir skömmu og keypti þar fyrir mig 80Gb ipod classic (video) og sendi mér í pósti. Með sendingarkostnaði kostaði hann mig heilar 15.500 íslenskar krónur. Ég læt öðrum það eftir að fletta upp verðinu á Íslandi. (nb. Það mun vera aðeins 33.990 kr.)

#306  Ég er nýbökuð móðir og er smá saman að komast að því hversu mikið er okrað á okkur foreldrum (og börnum) hér á Íslandi. Dæmi sem mér blöskrar: Lansinoh lekahlífar (nauðsynjavara fyrir mæður með börn á brjósti), 30 pör í pakka kosta 6.59 pund (= 824 kr) í Mothercare (UK) en í Lyfju: 2.054 kr! Þetta er ekki merkilegri vara en dömubindapakki (Lansinoh er reyndar besta tegundin enda sú dýrasta í Mothercare líka). En semsagt meira en tvöfalt verð. Annað dæmi: Bumbo stóll kostar 7.900 kr í Babysam en 40 dollara (ca. 2.500 kr) í USA. Meira en þrefalst verð. OKUR! Það er löngu kominn tími til að lækka virðisaukaskattinn á barnavörur á þessu landi. 

#305  Þegar ég fæ sendingar frá DHL eru aukagjöldin sem henni fylgja bókstaflega ógeðsleg. Er ekki með neitt séstakt dæmi um sendingu núna, en það bregst ekki að mér ofbýður þegar pöntunin loksins kemur. 
Ef það stendur ekki á pakkanum sem sendur var sendur í gegnum DHL hve mikið ég borgaði fyrir sendingu þegar ég pantaði vöruna á netinu þá skellir DHL bara sínu "standard" verði á, og gerir ráð fyrir að maður hafi borgað það verð fyrir sendinguna. Það eru 5 til 6 þúsund krónur
Svo koma þeir með pakkann heim til manns og rukka mann um prósentu af verði vörunnar plús prósentu af 5 - 6 þúsund krónum sem þeir slumpuðu svo vel á vöruna þegar ég borgaði í raun u.þ.b 1000 krónur fyrir sendingu!! Þeir láta sér þetta ekki nægja heldur rukka mann svo um þetta allt, án þess að segja manni að þeir hafi ekki fengið raunverulegt sendingargjald og séu að slumpa. 
Tapaði miklum peningum útaf þessu í nokkrum sendingum þangað til ég komst að þessu og varð skiljanlega mjög reiður. Það var ekki fyrr en ég varð virkilega reiður við starfsmann DHL sem sá um þetta (var auðvitað mjög kurteis fyrstu 5 - 6 símtölin) að ég fékk þetta í gegn og málið er hjá tollinum núna vegna fyrri sendinga. Fékk fyrst alltaf svarið frá DHL að þau hefðu ekki tíma til að lægfæra þetta.
Að mínu mati jaðar þetta við stuld, er þvílíkur dónaskapur, og síðast en ekki síst OKUR! 

#304    Hvernig væri að taka tónleikahald á Íslandi sem dæmi um okur? Skoðum til dæmis eftirfarandi verðlagningu á miðum á tónleika Rufusar Wainwright víðs vegar um heiminn (http://www.rufuswainwright.com/events). 

9.30 Club Washington: 35 USD : 2100 kr. 
Auckland N-Sjálandi: 64 NZD : 3000 kr. 
Bergen: 350 NKR : 3900 kr. 
Reykjavík: 6500 kr. 

Gaman væri að heyra skýringu á því hvers vegna það  kostar 2600 kr. meira að hlusta á Rufus á Íslandi en þar sem það er næstdýrast, - í Noregi? Er Ísland slík Djöflaeyja í augum tónlistarmanna að þeir taka 50% hærra gjald minnst fyrir að koma hingað? Varla getur það verið launa- og leigukostnaður enda er hann frekar í hærri kantinum í Noregi. Spurningin hlýtur þá að vera hvort íslenskir tónleikahaldarar séu svona lélegir samningamenn eða einfaldlega kannski bara gráðugir? 

(Grímur Atlason Rufus-innflytjandi svarar: 
Já, þetta er vondur veruleiki sem við búum við. Miðaverð er reyndar ekki 350 nok í Noregi heldur 375 og 400 norskar - getur líka hækkað um 35 kall per miða fáir þú þá senda heim. Miðarnir kosta síðan 6300 kr. hér - þar af fer 5900 kr til mín . Það er mjög erfitt að ná Rufus á núll. Túrinn um Evrópu er á öðrum flugáætlunum en Ísland og eins og í Noregi kemur hann og spilar tvenna tónleika í húsum sem hafa allan búnað auk þess sem þau taka 1500 plús í sæti. Það er líka allt annar veruleiki í þeim húsum - oft koma til miklir rekstrarstyrkir frá hinu opinbera þarna sem niðurgreiða tónleika. Hérna er poppmenningin prump og við þurfum að sjá um okkur sjálf - nema Listahátíð sem er á styrkjum en miðaverð er samt verulega dýrt. 

Hér erum við með Háskólabíó sem þarf að leigja fyrir nokkra hundrað kalla auk þess sem það þarf að ná í allar græjur út í bæ og leigja og þær kosta ekki mikið undir milljóninni (auk þess að þær taka 10 sæti í burtu). Við höfum hent á milli okkar tölum til þess að láta dæmið ganga upp  - ég og managementið hans um langan tíma. Kostnaður við tónleikana er gríðarlegur - áður en við borgum listamanninum krónu. Hljóð og ljós eru t.d. á allt öðrum verðskala hér en annar staðar. 

Ekki má gleyma STEF. Þeir taka af þér húsið þitt ef þú borgar að lágmarki ekki 2.5% af hverjum miða. Stundum þarf að borga 4% - ef þú greiðir ekki fyrirfram þarftu að greiða 4%. Listamenn vilja alls ekki að þetta fari af þeirra hlut.

Ég gerði hvorki vondan samning við Rufus né er gráðugur. Þetta er alveg sama formúlan og á Akron/Family (1700 kr)  - raunhæft verð til þess að þetta geti gengið. Ég hafna því og sárnar reyndar að vera kallaður okrari þegar kemur að tónleikahaldi. Allt bókhald mitt fer til samþykkis hjá listamanninum og þar gilda bara ákveðnar reglur: okur á aðdáendum á íslandi er ekki partur af prógramminu.)

#303  Var að kaupa mér innraminni fyrir Akai trommuheila. Sjónvarpsmiðstöðin, sem er með umboðið fyrir Akai á íslandi ætlaði að selja mér 32mb minni á 12.000 krónur. (sem er btw 1/6 af heildarverði trommuheilans). Fór síðan á eBay og gat keypt nákvæmlega sama hlutin á 10 dollara eða 620 kr. Komið til landsins kostaði þetta mig rúmar 1.200 kr. 

Sjónvarpsmiðstöðin: 12.000 kr.
eBay: 1.200 kr

#302  Smá dæmi hérna úr Nóatúni, 125 gr. askja af bláberjum 499 kr. Keypti eins öskju í Nettó á 199 kr.

#301  Að leigja handklæði í Laugardalslauginni kostar 350 kr. Það er frekar há leiga fyrir hvítt, lítið og ómerkilegt handklæði sem dugar varla til að þurrka fullvöxnum karlmanni. Ekki gleyma handklæðinu ef þið farið í sund!

#300  Hvernig stendur á því að þegar á að kaupa íslenska framleiðslu af bréfabindum sem er EGLA frá Múlalundi, kostar það 585 kr í Pennanum en alstaðar annarstaðar 499 kr?

#299  Langaði að benda þér á dæmi um gjafabréf/kort á upp í farmiða hjá Icelandair sem að ég gaf í útskriftargjöf, núna vorið ´07. Aðilinn sem að fékk téð kort ákvað loks að nýta sér inneignina núna fyrir jólin og nýtti sér vefinn til að bóka sitt flug. Þegar allt var klappað klárt og bókunin klár og komið var að greiða fyrir flugið var hægt að velja á milli kreditkorts og gjafabréfs. Þegar viðkomandi valdi loks gjafabréfsleiðina, hækkað téð fargjald úr rúmum 48.000 í 52.000. Þannig að gjöfin sem að ég gaf rýrnaði þarna um 4.000. kr. Svona lagað er kallað á mannamáli vörusvik eða í besta falli svik og prettir. Maður á frekar að gefa peninginn.

#298  Okur á dagatölum! 2008 Dagatal; Antique maps from the New York Public Library.
Verð í Bóksala Stúdenta: 650 isk.
Verð í Mál og Menning: 1500 isk.
(nb. Bóksala Stúdenta mun vera ríkisstyrkt, en jú, þar er yfirleitt hagstæðustu verðin.)

#297  Hér er athyglisverður samanburður á verðum á matvöru í London og Reykjavík: http://www.cafesigrun.com/2007/11/24/verdhkonnun/. Eins og við er að búast komum við illa út úr þessu. Bjóst einhver við öðru?

#296  Ég vil byrja á því að þakka þér kærlega fyrir að halda úti okursíðunni þinni.  Ég les hana reglulega og finnst frábært ef fólk er að ranka við sér að verðlagning á ýmsum vörum og þjónustu er ekki í lagi og einkennist af græðgi þeirra sem selja. En allt of margir vilja borga okurverð fyrir hluti sem fólki er talin trú um að séu betri en þeir ódýrari sem þarf alls ekki að vera, sérstaklega ef þeir eru keyptir í ,,fínum" verslunum. Eins finnst mér að kaupmenn geti spilað ótrúlega vel á minnimáttarkennd og óöryggi fólks. Þegar auglýsingar enda á ,,þú átt það skilið" er eins og verið sé að styrkja vanlíðan og sjálfsvorkunnsemi aumingjanna þarna úti. (nb. Hvaða hvaða? Þú átt það skilið að borga helmingi meira en allir aðrir því þú býrð í "besta landi í heimi".)

#295     42" flatskjár: Sjónvarpsmiðstöðin / Amazon í Bretlandi, lagði ekki í Ameríkumarkað. Ef menn eiga leið um Heathrow þá kostar tækið þar rétt tæplega 1200 pund. OKUR!

#294  Ég er að borga af skuldabréfi hjá SPRON. Mánaðarleg upphæð er 25 þúsund krónur. Þeir rukka mig um 870 krónur í innheimtulaun. Eru ekki tilbúnir að fella þá upphæð niður, þó ég bjóði þeim beingreiðslur á einn eða annan hátt, hvorki gegnum greiðsluþjónustu viðskipabanka míns, eða VISA. Ég hef boðið þeim allar þær beingreiðslur sem ég get boðið, jafnvel að sleppa því að senda mér greiðsluseðil, og fá að senda greiðslu beint inn á reikning. Svo vogar SPRON sér að auglýsa viðskiptavæna/fjölskylduvæna viðskiptastefnu. Þetta er OKUR!

#293  Tvær beikonsneiðar á Subway kosta TVÖHUNDRUÐ kall! Ég sem hélt að Kobe
nautakjötið væri dýrt. Beikonpakkinn fer hjá þeim á 3000 kall líklega. Venjulegur 12" bátur hjá Subway kostar um 700 kall. Það er brauð, kjötálegg, grænmeti, sósur og vinna við bátinn. 2 sneiðar af beikoni hækka verðið þá um vel yfir 20%. Hvað er í gangi? Þeir sem hafa keypt sér
beikonbát á Hlölla hljóta að þakka fyrir að verðlagningin þar sé ekki jafn yfirfull af græðgi og á Subway. Báturinn myndi líklega kosta 2500 kall!
Athugulir neytendur hafa vonandi einnig tekið eftir að "Bátur mánaðarins" hjá Subway var upphaflega á 299 krónur. Svo skyndilega (líklega vegna "óhagstæðs gengis o.s.frv." þar sem Subway verslar við íslenska fyrirtæki Ali) hækkaði "bátur mánaðarins" upp í 350-400 kall (man það ekki alveg). Svo stuttu seinna þegar virðisaukaskatturinn var sleginn niður auglýsti
uppáhalds fyrirtæki okkar allra, Subway, vel yfir 7% lækkun á báti mánaðarins; aftur í upprunalegt verð 299 krónur. Hvar eru neytendasamtökin? Eru þetta algjörlega gagnslaus samtök?! Viðskiptabann!

#292    Móðir mín var stödd í Bandaríkjunum fyrir rúmu ári síðan, keypti þar Magellan eXplorist XL GPS tæki handa föður mínum sem kostaði á þáverandi gengi u.þ.b. 22.000 krónur.  Ég lagðist í smá rannsóknarvinnu og fann það út að Aukaraf selur þetta sama tæki á 64.900 krónur með Íslandskorti og íslensku viðmóti.  Sem sagt hátt í þrefalt verð í Bandaríkjunum. Við feðgarnir vildum að sjálfsögðu fá Íslandskort í tækið, sem var nú lítið mál að þeirra hálfu. Að gamni okkar datt okkur í hug að spyrja hvort þeir gætu ekki sett inn íslenska stýrikerfið líka. Sama sagan, ekkert mál. Daginn eftir komum við í búðina og fengum upp verðið:  11.800 krónur fyrir kortið og stýrikerfið. 
Svo ég dragi þetta nú allt saman, þá kostar tækið 64.900 krónur hérna heima og er tvöfalt dýrara en nákvæmlega eins tæki, með öllu eins og tækið sem keypt er hérlendis, nema er keypt í Bandaríkjunum, kostar 34.000 krónur (með íslensku klónni fyrir hleðslutækið, sem kostaði 200 kall). Það verður því að segjast að álagningin hérna heima á GPS tækjum verður að teljast OKUR! En hey, við létum þó ekki fífla okkur.

#291  Bensínverð frá Shell (og líka frá hinum þ.m.t Atlantsolíu +/- 1 kr.) 30/11/07:

95 oktan - 133,20kr/L
V-Power - 141,80kr/L
Diesel - 137,40kr/L

OKUR!!!
Einokun!!!

#290  Þetta er þarft umræðuefni heima á klakanum. En þar sem að ég bý í Danmörku hef ég smá viðmið. Danir fara nefnilega allir yfir strimilinn áður en að búðinn er yfirgefin. Mér fannst þetta vera freakar asnalegt þegar að ég kom hingað fyrst en þegar að ég sá hve miklar athugasemdir kassadömurnar voru að fá þá ákvað ég að byrja á þessu. Og komst að því að í 40% verslunaferða minna er ég ofrukkaður og getur verið töluverður peningur. Fór í Føtex um daginn sem að er svona Hagkaup og ákvað að gera mér glaðan dag(helgi) og kaupa mér kassa af bjór. Bara venjulegur Tuborg varð fyrir valinu en þegar stúlkan sló hann inn í kassan sinn þá lét hún mig borga fyrir Tuborg classic sem að er 60dkkr dýrari eða 670 krónur í mismun. Ég ákvað að fylgast með þessu þegar að ég var á Íslandi nú um daginn og mér til undrunar þá er sama prósentu talan eða 40% ég fór reyndar ekki oft að versla er ég var heima. En engu að síður náði ég að spara mér 2000 isk í viku stoppi sem að mér þykir frekar mikið miða við að ég verslaði kannski fyrir 30.000 isk er ég var á Íslandi.

#289    11-11. Pakki með tveimur Rís-súkkulaðistykkjum: tæpar 2700kr/kg. Ef eitt
stykki Rís-súkkulaðistykki er verslað hjá 11-11 rennur verðið í sanngjarnar 3380kr/kg. Hvað er í gangi hérna? Hvað er kílóverðið á nautakjöti? Hættur að kaupa mér Rís. Rís; þú þarft að vera bankastjóri til að eiga það skilið.

#288    Keypti í Bónus 1 kg poka af tortelini á kr 379 kr-(fínt verð) um daginn vantaði mér tortelini svo ég neyddist til þess að versla í einu búðinni sem er hér í þorpinu sem heitir Kjarval (Kaupáskeðjuokurbúllur) og þar voru bara til 250 gr pokar og einn slíkur kostaði kr 270 kr. OKUR! (nb. Lærdómur: vera ávalt vel byrgður af tortelini frá Bónus!)

#287    Ég vildi bara minnast á eitt okur sem ég varð fyrir um daginn. Þannig er mál með vexti að ég þurfti að láta taka úr mér 2 endajaxla og var send af tannlækninum mínum til sérstaks tannlæknis sem sérhæfir sig í þesskonar málum. Ég fékk einhvers konar kæruleysislyf sem ég sofnaði af og vaknaði þegar þessu var lokið og var þá í mjög annarlegu ástandi. Ég skrifaði undir reikninginn en eftir á komst ég að því að aðgerðin kostaði 70.000 kr!! Og það aðeins fyrir 2 endajaxla, ég ætla sko að hugsa mig 2x um áður en ég læt taka hina tvo. Til að bæta gráu ofan á svart þá ákvað ég að vera sniðug og fá endurgreiðslu í sjúkrasjóð VR, ég átti tæpar 10.000 krónur í sjóðnum en þar sem þeir tóku af mér skatt þá endaði ég með 5500 krónur í endurgreiðslu frá þeim, af 70.000 krónum. Mér hefur sjaldan verið jafn misboðið. Munið að spyrja vel um verðskrána áður en þið farið í svona aðgerðir. (nb. Alveg er ég viss um að fleiri okrarar á öðrum sviðum vildu hafa kæruleysislyf til að dæla í kúnnana sína!)

#286    Ég var í fríhöfninni um daginn og keypti tollfrían bjór í veitingasölunni og hann kostar 400 kr stykkið. Ég vil benda öllum á að maður getur keypt sér bjórkippu í fríhafnarversluninni og kostar hún ca. 600 kr og drukkið hana, hvort sem er í flugstöðinni eða flugvélinni.

#285    Auka ostur á Dominos pizzu 15" kostar 400 kall. Mér finnst það asskoti dýrt.

#284    Ég tók að mér að koma með skúffuköku í boð um daginn. Ég ákvað að kanna hvort ég gæti keypt tilbúna skúffuköku í einhverju bakaríinu. Ég athugaði verðið hjá Bakarameistaranum og þá kom í ljós að skúffukökufleki með 28 bitum kostar þar 5630 krónur (já, fimmþúsundsexhundruðogþrjátíu krónur!) og held ég að óhætt sé að kalla þetta okur! Mér ofbauð skiljanlega - bakaði kökuna sjálf og kostaði hún örfáa hundraðkalla og mjög lítinn tíma. 

#283    Það verður að segjast að það er merkileg verðlagning á auka osti. Til dæmis auka ostur hjá Subway 120 kr. Aktu-Taktu 90 kr. (nb. Hvaða hvaða, ostur er dýrastu munaður í heimi – allavega á Íslandi.)

#282    Ég þurfti passamynd í snarhasti um daginn. Ég fór því í Kodak búðina við Hafnargötuna í Keflavík. Þar voru teknar af mér tvær myndir (sem ég fékk ekki einu sinni að skoða) á einhverja allgjörlega meðal digital-myndavél. Fyrir þetta þurfti ég að borga "litlar" 1500 kr. oooookur!
Í fyrrasumar (2006) keypti ég mér Ixux 6.0 út í Noregi (sem er nú alls ekki neitt ódýrt land) á 28.000 kr. Þessi sama myndavél fékkst ekki undir 50.000 kr hérna á Íslandi.

#281    32" LCD HDTV sjónvarp kostar í Elko, BT og fleiri slíkum búðum á bilinu 99.000 - 130.000 kr. Ég sá svipað sjónvarp (32"LCD HDTV) á Amazon.com á 45.000 kr. Ég hugsaði að þarna væri ég búinn að finna leið til þess að komast framhjá okurkerfinu mikla. En svo var ekki. Ég fór á shopusa.is og kannaði þar hvað það myndi kosta að fá slíkan hlut á svona verði til landsins. Sú endanlega upphæð var 98.000kr. Eru þið að grínast með tolla? Allir þurfa víst að fá bita af bökunni út af fyrir sig. Það kostaði MEIRA að fá þennan hlut til landsins en hann kostaði í upphafi. Hvernig er hægt að réttlæta það?!?! Ég meina, ég bara spyr... (nb. Björgvin er búinn að lofa að redda þessu, er þaggi?)

#280    Í BT í Kringlunni fæst dvd-diskurinn „The Office“ (fyrsta sería af bandarísku útgáfunni) á 4.699 krónur (á hádegi þann 22.11 2007) á meðan Amazon.co.uk hefur þennan sama disk á £5.98, sem er um 775 íslenskar krónur (gengið 22.11 2007); 3924 króna munur! Að auki selja þeir utanáliggjandi harða diska (ekkert nema gott um það að segja), en fjórir þeirra eru allir frá framleiðandanum LaCie og allir með mismunandi mörg gígabæt – en samt eru þeir allir fjórir með sama verðmiðann, 13.999 (en nota bene, athugið bæklinginn frá þeim sem gildir 22 nóvember til 25 nóvember 2007 þar sem segir að þeir séu til sölu á 12.999!). Ég ætla í verslunina til þeirra á morgun til þess að skila skrambans dvd-disknum (það voru engar verðmerkingar á hillunni né á hulstrinu – ég athugaði það sérstaklega) þar sem mér datt ekki í hug að verðið yrði eitthvað mikið meira en 1000 kall, þar sem ég vissi hvernig það var á Amazon.co.uk og til þess að fá minn 1000 kall til baka líka fyrir harða diskinn.

#279    Mig minnir að þegar Atlantsolía kom á markaðinn hafi þeir heldur betur ætlað að bjóða lægra bensínverð. Man ekki hvernig verðin voru hjá þeim í upphafi. Tók 95 okt. bensín hjá þeim í Kaplakrika um daginn: 129,1 kr/líter. Keyrði svo framhjá Olís í Garðabæ og sá á skiltinu þeirra verð á sama bensíni: 130,4 kr./líter. Þetta er rétt innan við 1% verðmunur. Takk Atlantsolía!!! (nb. Það er siðferðislega réttast að versla við AO. Þó munurinn sé kannski ekki mikill þá halda þeir hinum á tánum og verðinu niðri. Svo var AO eina fyrirtækið sem tók ekki þátt í hópsvindlinu sem skók samfélagið fyrir nokkrum árum.)

#278  Fór um daginn með raftæki í viðgerð til rafeindarþjónustunar Sóns. Verkið átti að taka viku en eftir vikuna var gripurinn ekki tilbúinn og viðurkenndu þeir að ekki væri byrjað á að laga hann eða kíkja á hann. Mér var því bent á að koma tveimur dögum síðar, þá fæ ég í hendurnar reikning sem kom mér mikið á óvart, þar var rukkað fyrir einar 7.157 kr á klukkutímann fyrir vinnuna, þar sem lámarksgjald hjá þeim er 3.000 kr þegar komið er með vöruna inn og þetta tók um 2 tíma að gera við (já skipta um einn takka á raftæki fyrir vanann mann myndi maður nú telja að ætti að taka minni tíma) þá hljóðaði heildar reikningur, fyrir að laga einn takka, um 16.392 kr. Eftir mikið nöldur um afslátt fékk ég heilar 3.000 kr í afslátt og endaði þá viðgerðin, á einum takka á raftæki, í um 13.392 kr. Þetta kallast nú bara OKUR!

#277    Lítill Corana bjór á Salt (gamla Eimskipshúsinu) kostar 700 kaddl. Hvílíkt rugl. Stór bjór á Nordica (gamla hótel Esja) kostar líka 700. Hélt að það væri svaka dýrt. (nb. Hugsunin er líklega: Ef þú ert inn á þessum stað fyrir það fyrsta hlýtur þér að vera sama þótt allt sé dýrt þarna.)

#276  Fór loksins á Abbabbabb með dóttir minni í gær og vil sérstaklega þakka fyrir góða sýningu. Þrælskemmtilegt fyrir okkur bæði. Hins vegar verð ég að benda á verð á sælgæti í sjoppunni í Hafnarfjarðarleikhúsinu. Í vinnunni hjá mér er lítil starfsmannasjoppa. Þar fæst Nissa á 70 kr. Sennilega er það nálægt innkaupsverði þar sem sjoppan á ekki að skila hagnaði en vinnustaðurinn er ekki stór og þ.a.l. eru innkaup í litlu magni. Í Hafnarfjarðarleikhúsinu kostar Nissa 250 kr. Ég er ekki frá því að það sé okur. / Gott okurdæmi er sælgætissalan hjá Hafnarfjarðarleikhúsinu. Ég fór þangað ásamt dóttur minni til að horfa á Abbabbabb og við skemmtum okkur bæði mjög vel. Það er þó ekki laust við að manni hafi orðið örlítið illt í veskinu við það að punga út 1200 kr. fyrir tvær appelsín og tvö pipp. Þetta er náttúrulega  fáránlegur prís.

#275  Hér er á ferðinni ótrúlegt okur. Stafræn upptökuvél frá Aukaraf, ATC2K Oregon kostar 26.900 kr. samkvæmt vefsíðunni hjá þeim. Nákvæmlega sama vél hjá Amazon.com kostar 89.99 $ sem er 5.539 kr. samkvæmt genginu 20.11.2007. Þetta er ekki nema rúmlega 385 %  hærra hjá Aukaraf en hjá Amazon!

#274    Tikk Takk á Akureyri: 12" pizza með 3 áleggstegundum kostar 2260 krónur. Þessi verðlagning var á föstudegi að nóttu til og er kallað næturálag. Mér þætti gaman að vita hvað starfsfólkið er með í "næturálag" ofan í helgartaxtann sinn (líklega í kringum 1000 kallinn)? Líklega 0 kr á klukkutímann. Annað: Mötuneytið í Odda á háskólasvæði HÍ; að fá heitt vatn kostar 20 krónur, t.a.m. ef þú ert með bollasúpu eða te. OKUR!!!

#273    Fór og fékk mér hamborgara hjá Amercan Style var spurður hvort ég vildi coctail sósu – smáglas af coctailsósu kostar þar kr. 90. Þetta er ekkert annað en okur. Það kostar kr. 500 að setja merkimiða á bíllykil og geyma hann hjá Securitas einokunar okurfyrirtækinu í Leifsstöð.

#272  Í mötuneyti Háskólans á Akureyri er kaffibollinn seldur á 90 kr! Ef maður er í stuði til að dekra aðeins við sjálfan sig getur maður keypt kaffi úr sjálfvirkri vél í staðinn fyrir bragðlausa stofnanakaffið, rukkað er tvöfalt fyrir þann munað eða 180 kr! Okur! (ath: Þegar matarskatturinn var lækkaður á sínum tíma fór kaffibollinn niður í 70 krónur í mötuneyti Háskólans á Akureyri, sem var sanngjarnt verð. En núna, rúmu ári síðar er kaffibollinn búinn að hækka um 20 krónur sem gera tæp 30% (ef ég er reikna þetta rétt). Allavegana, þá er ekki réttlætanlegt að kaupmenn eða þjónustuaðilar fái græða meira á einhverju sem átti að vera almenningi til góða. Þetta er í raun bara eitt dæmi en eflaust eru fjölmörg dæmi um það að kaupmenn og þjónustuaðilar steli þessum hagsbótum sem almenningur átti að fá! Það þarf að skoða þetta nánar og halda þessu til streitu! Það er ekki réttlætanlegt að það sé haldið áfram að stela frá okkur með þessum hætti! Við megum ekki gleyma þessu og láta halda áfram að svindla á okkur eins og hefur verið gert í gegnum tíðina. Það er kominn tími til að við segjum stopp við okri!)

#271  Ég fór í Bónus í gær og keypti kaffi. Þar kom í ljós að malað kaffi er ódýrara en baunir. Sama þyngd, nákvæmlega sama kaffi, nema hvað að baunirnar kosta meira. Heilum 58 krónum meira á 0,5 kg pakkningu. 

Er ekki pínu skrýtið af vara sem er minna unnin, kosti meira en samskonar vara sem búið er að leggja meiri vinnu í? Eða er þetta kannski bara ofureinfalt? 
Er kannski hægt að útskýra þetta svona: Þeir sem kaupa ómalað kaffi eiga kaffivélar sem mala baunirnar sjálfar. Þær eru dýrar. 
Ergo: Þeir sem kaupa ómalað kaffi eru tilbúnir til þess að kaupa kaffibaunirnar á hærra verði, en þeir sem eiga hefðbundnar kaffivélar, vegna þess að þeir eru þegar búnir að eyða umtalsverðum upphæðum í kaffivél með kaffikvörn.
Þeir kunna sitt fag, kapparnir í Bónus. 

#270  Ég fór í Jóa Fel um daginn og ég vissi nú alveg að það væri dýrt að kaupa brauð og kökur hjá honum en það sem fór alveg með mig var það að 1/4 lítri af mjólk kostaði tæpar 80 krónur þegar maður getur fengið svoleiðis fernu á 25 krónur í 11/11 sem er dýr verslun ég hélt að mjólkurverð væri staðlað og kostaði það sama alstaðar. Ég þori ekki að kaupa kókómjólk það er nokkuð ljóst! Pottur af mjólk kostar 155 kr á sama stað.

#269  Fór í veislu í salnum á Hótel Hilton um daginn þar var bara hægt að velja um eina tegund  af hvítvíni og kostaði flaskann 3900 og auðvitað einhver tegund sem ekki var hægt að fá í ríkinu svo að það er ekki hægt að bera saman verð. Ekki var um faglært fólk að afgreiða þannig að launin hafa ekki verið há. (nb. hefur ekki verð á léttvíni á veitingarstöðum hér lengi verið eitt skýrasta dæmið um okur? Manni finnst 3900 jafnvel ekki svo agalegt, þótt þetta myndi eflaust kosta 1500 kall í ríkinu, eða svo...)

#268  Ég keypti tvo minniskubba í fartölvu um daginn og eftir smáleit á netinu varð úr að ég pantaði frá att.is enda mun ódýrara en víðast annars staðar. Hér var um að ræða 1 GB 533 mhz kubba sem í Att kostuðu 2.950 kr. hver. Í Tölvulistanum kostar sams konar kubbur frá sama framleiðanda (Corsair) 5.990 kr. og er því tvöfalt dýrari þar. Gamanið kárnar hins vegar töluvert þegar skoðað er minni frá öðrum framleiðendum. Takkar.is selja sams konar kubb frá OCZ á 8.990!!! Þess má líka geta að takkar selja 1GB 667 mhz kubb frá OCZ á 11.490, task.is á 5.990 og tolvutek á 6.990. Þannig að það borgar sig að vinna smá heimildavinnu, þó maður sé ekki að kaupa stóra hluti. 

#267    Stanslaust okur og endalaust verið að taka okkur í rassinn. Þegar dollarinn hækkar: bíóin hækka verðið (líka á evrópskum myndum), bílar hækka í verði, bensínið rýkur upp úr öllu valdi –  allt hækkar. Núna er Dollarinn um 60 kall og hefur verið lengi... hefur einhver auglýst um að óhjákvæmilegt sé að lækka verðið vegna þessa? Nei – enginn! Hefur einhver laumað inn verðlækkunum í samræmi við dollarann? Nei – enginn!. Og við höldum áfram að versla við alla þessa aðila sem njóta þess að blóðsjúga hverja krónu út úr okkur. Þetta er almennt OKUR!! (nb. Bjöggi viðskipta afnemur vonandi sem fyrst þetta tolla og vask-sjúg við landamærin svo við getum komið með það sem við viljum frá útlöndum og jafnvel pantað það sem við viljum frá útlöndum í gegnum netið án þess að það sé smurt á það. Þá hreinlega neyðast íslenskar verslanir til að vera almennilegar.)

#266    Irobot ryksugur kosta á bilinu 14.000 - 20.000 í búð í Ameríku, en hér er ekki hægt að fá þær undir 49.000, enda er mjög vinsælt að kaupa þær úti.

#265    66°N! Vandaðar vörur og allt það, en núna var ég að koma af lagersölunni (er fram á laugardaginn 17.) og gerði þar góð kaup. Kraftgalli á 3000kr, vinnuúlpa á það sama og nokkrir aðrir hlutir. En þar voru jakkar sem ekki höfðu gengið út og þeir kostuðu einnig þrjú þúsund. Það eru jakkar sem seldir eru venjulega á 26-8þ! Þetta er hrikalegt! (nb. Hrikalega góð kaup þá?)

#264    Verðlisti Apple á Íslandi er út í hött!!! Þó svo að alltaf hafi verið farið illa með Makkafólk hér á Íslandi þá gengur þetta gersamlega fram af manni: 750 GB harður diskur á 59.900! 500 GB harður diskur á 22.900! Má finna svipaðan fáránleika á verðlagningu á flestöllum íhlutum hjá þeim. Okur!!! Tölvuvirkni hins vegar býður frábær verð og verður maður hreinlega að taka ofan fyrir þeim. Sambærilegir (eða betri) diskar þar eru á 18.860 (Apple er 318% dýrari) og 9.860 (Apple er 232% dýrari). Þessi verð hjá þeim eru mjög nálægt verðum í USA + VSK svo varla verður farið neðar. Húrra fyrir þeim!

#263    Hér er eitt gott dæmi um verðmun á milli lyfja í sömu keðjunni. Barnið mitt þarf á lyfi að halda sem er á undanþágulista ríkisins (þá borgar TR ekkert af kostnaðinum). 2 vikna skammtur í Lyfju Lágmúla kostar 10.000 kr. en í Lyfju Setbergi kostar sami 2 vikna skammturinn 4.300 kr! Enginn hefur gefið mér svör hvers vegna það munar 5.700 kr. á sama lyfinu, í sama fyrirtækinu en á mismunandi stað. Vil taka fram að á hvorugum staðnum er gefinn afsláttur þar sem þetta er undanþágulyf. Einnig tók ég eftir að svefnlyfið mitt (10 daga skammtur, 20 töflur) er með sömu % tölunni í afslátt á báðum þessum stöðum en er um 200 kr. lægra í Lyfju Setbergi. Hvernig er hægt að útskýra þetta? 

#262  Pixmyndir bjóða foreldrum í Reykjavík að kaupa bekkja- og einstaklingsmyndir sem fyrirtækið hefur tekið í skólunum, skv. einhverjum samningi geri ég ráð fyrir, og einstaklingsmynd (2 stk) í stærðinni 13x18 kostar 2.100 krónur. Ég hafði samband við þá til að grennslast fyrir um það hvort ég gæti ekki keypt mynd af barninu mínu á rafrænu formi svo ég gæti unnið með hana sjálfur (jólakort fyrir ömmurnar eða eitthvað) þá var það jú ekkert mál...  35.000 kall takk!  Höfundarlaun sjáið til... fyrir mynd þar sem ekkert sést nema barnið MITT.  OKUR!
Ég er líka hættur að láta framkalla stafrænar myndir fyrir mig hér á landi.  Hans Petersen hefur verið að auglýsa æðislegt tilboð, 100 myndir á 2500 kall, 25kr./stk. Ég er að borga 7-11 krónur fyrir stykkið (fer eftir magni og gengi) MEÐ flutningskostnaði, tollum og VSK, í gegnum www.bonusprint.com. OKUR!

#261   Fór á Brodway um daginn og keypti mér 1/2 líter bjór.  Kostaði 700 kr. Hver segið að ríkið okri á áfengi.  Get keypt sama bjór í ríkinu á undir 200 kr.

Okur #201 - 260 eru hér.

Veistu um skefjalaust og svívirðilegt okur? Láttu vita!