OKUR! OKUR! OKUR!
Okur á Íslandi er ekki náttúrulögmál. Ef þú lætur ekki okra á þér verður ekki okrað á þér. Láttu vita um okur!

Tilkynning frá staðarhaldara í tilefni af 400. okrinu: 
Í rúmlega hálft ár hafa okurdæmin komið í hús og ég samviskusamlega sett þau inn. Set reyndar ekki allt inn, margt er endurtekið efni og sumt hreinlega ekkert okur (þannig séð). Helsti lærdómurinn er þessi:

* Ekki versla í "klukkubúð" nema þú endilega viljir láta okra á þér. Okurdæmi um að þetta eða hitt sé svo ógeðslega dýrt í 10-11, 11-11, eða hvað sem þetta heitir, verða varla birt oftar. Verslaðu í Bónus ef þú vilt láta okra minnst á þér. Þetta vita allir.

* Bankarnir eru siðlausar okurstofnanir. Fyrir 20 árum fóru vinjettuhöfundar í fangelsi fyrir að vaxtaokra minna en það sem þykir eðlilegt að smyrja á lán í dag. Lifi einkavæðingin. Svo má lengi finna kostnað og gjöld til að smyrja á. Þetta er samt allt þér að kenna sjálfum/ri. Það var enginn að neyða þig til að kaupa þér pallbíl og flatskjá (eða búa ekki í kassa á Hlemmi, þannig séð...) 

* Dæmi um okur á Íslandi miðað við verð í USA (eða í öðrum löndum) eru vinsæl en spurning hvað þau hafa upp á sig.. 

* Lyfja og flest apótek eru okurapótek. Lyfjaver okrar minnst á þér. Verslaðu þar.

* BT er okurbúlla miðað við Elko og fleiri staði.

* Flest kaffihús eru okurbúllur. Kaffitár og Te og kaffi koma ekki vel út. Dýrt kaffi, fokdýrt bakkelsi. Að fara út að borða er svo lúxus sem maður getur bara leyft sér í bjartsýniskasti.

* Bílaumboð eru rekin af hundum heljar. Brimborg kemur sérlega illa út. Fáðu þér hjól.

* Bakarín Jói Fel, Bakarameistarinn og Kaffi Konditori eru okursjoppur. Ég mæli með Mosfellsbakaríi og einhverjum lummulegum lókalbakaríum. Skárra þar.

Annars segi ég bara "neytendur höldum vöku okkar" (sem er ofurhallærislegt því það er meira töff að þykjast svo fjáður að það sé allt í lagi þótt það sé okrað á manni) og endilega haldið áfram að senda okurpósta þótt það megi alveg hafa á bakvið eyrað að sleppa því að endurtaka gamlar lummur.

#400   Um daginn bráðvantaði mig tannþráð, var á hraðferð og kom við í Krambúðinni á Skólavörðustíg. Þar greip ég sakleysislegan colgate-tannþráð án þess að gá að verðinu og þegar afgreiðslustúlkan sagði hvað hann kostaði varð ég að biðja hana að endurtaka sig. Hvorki meira né minna en 499 (já, fjögurhundruð níutíu og níu) krónur! Fyrir plastþráð í plastboxi, sem gæti auk þess rúmað þrefalt meiri þráð en það inniheldur... Það er svívirðilegt okur!

#399    Ætlaði að kaupa hálfan lítra af Cult á Esso Hringbraut,en hætti þó snarlega við þegar að ég sá að hann kostaði 355 KRÓNUR, sama sullið kostar 265 á Select og 197 í Bónus. Það er ótrúlegt hvað er reynt að snuða mann alltaf hreint.

#398    Ég fór eins og hálfviti með Volvoinn í Brimborg af því að það fór í taugarnar á mér að barnalæsingin öðru megin að aftan var föst á. Þetta er örlítill fjöldaframleiddur smáhlutur úr málmi sem Brimborg reyndist vilja selja mér á 22 þús krónur án vsk. Komin í bílinn með fullum vsk kostaði þetta litlar 41 þúsund krónur og 2500 að auki fyrir einhverja pútu sem þeir lánuðu mér í þessa tvo klukkutíma sem þetta tók. Er þetta okur? Ójá!
Ps. Það er sérstakur kvartanadálkur á heimasíðu Brimborgar þar sem maður getur vælt. Það gerði ég fyrir meira en viku síðan en ekkert svar hefur borist þótt kompaníið sverji að öllum bréfum sé svarað. Kannski eru þeir jafnhissa og ég á þessu andskotans okri.

+ viðbót:
Loksins barst skeyti frá Brimborg þegar ég kvartaði undan okri þeirra á varahlutum. Traustur rökstuðningur þeirra kristallast í undirstrikuðum orðum.

„Verðlagning á þessum hlut er samkvæmt stefnu Brimborgar .
Það er rétt að það sé erfitt að bera saman læsingar t.d. þessi læsing er ekki bara barnalæsing þetta er læsing í afturhurð með  rafmótor fyrir central læsingu og hurðarofa ásamt barnalæsinguni og  meiri  útbúnaði . 
En ég get verið sammála um að þetta kostar mikla peninga en ég get því miður ekkert gert í því

Athugasemd frá Brimborg:

Ágæti X

Ég leyfi mér að gera nokkrar athugasemdir við fullyrðingar þínar sem birst hafa á netinu á vefsíðu Dr. Gunna í gær og í dag í kjölfar kvörtunar þinnar til Brimborgar. Þann 8. apríl 2008, nánar tiltekið, kl. 14:34 barst kvörtun þín til Brimborgar. Eins og ferlið gerir ráð fyrir var hún strax bókuð til frekari skoðunar. Þann 14. apríl kl. 09:24 barst ítrekun frá þér. Þú segir að þú fáir ekki svar við kvörtuninni þrátt fyrir loforð starfsmanna Brimborgar  um að öllum erindum sé svarað. Þú segir svo að vika sé liðin.

Eigum við ekki að halda okkur við það sem rétt er? Í fyrsta lagi. Það voru ekki nema 2,5 vinnudagar liðnir. Í öðru lagi. Öllum erindum er svarað og hefur verið gert í mörg ár. Þannig að það sem þú ert að ýja að, er rangt; við stöndum við gefin loforð. Það mættu mörg fyrirtækin taka sér til fyrirmyndar. Brimborg er eitt af fáum fyrirtækjum hér á landi sem leggur sig fram um að kerfisbinda og auðvelda móttöku kvartana á vefnum. Við teljum okkur vera öruggur kaupstaður fyrir bíla og ef eitthvað bjátar á þá viljum við gjarnan fá að vita það. Almennt er góður skilningur á þeirri ósk okkar um að það taki tíma að vinna faglegt svar, afla nauðsynlegra gagna o.s.fv. Orð þín um að varla sé svona flókið að svara kvörtunum lýsir innistæðulausum hroka eða skilningsleysi á eðli kvartana og svörun hjá fyrirtækjum sem taka kvartanir alvarlega. Kvörtunarkerfið staðfestir að vinna við kvörtun þína hófst kl. 15:25 sama dag og hún barst. Það er eðlilegt að slík vinna taki einhverja daga. Tala nú ekki um ef fleiri deildir komu að málinu.

Upphafleg kvörtun þín var á þá leið að skipt hefði verið um bilaða barnalæsingu í hliðarhurð að aftan í Volvo S60 af ameríkugerð og gefið í skyn að barnalæsing kosti rúmlega kr. 42.000.

Aftur er ekki rétt með farið, en áður en vikið er að því, þá er rétt að nefna að starfsmaður þjónustumóttöku Brimborgar var í sambandi við þig þegar bilun í læsingu var staðfest. Hann hringdi sérstaklega í þig til að bera undir þig kostnað og hvort panta ætti umræddan hlut sem þú samþykktir. Þú gefur í skyn eftir á og hér á netinu að aðeins sé um barnalæsingu ræða og að hún kosti mun meira en raunin er. Í upphaflegri kvörtun kemur betur fram að bæði er um vinnu og varahlut að ræða. Og líka lánsbíl. Allt innifalið í tölunni hér að ofan. Eigum við ekki að halda okkur við það sem rétt er? Það rétta er að um er að ræða alla læsingu í hægri afturhurð þ.á.m. barnalæsingu og kostar öll læsingin kr. 28.509. Sá kostnaður innifelur innkaupsverð, flutningskostnað, sérstök vörugjöld til ríkisins (15%), spilliefnagjald og virðisaukaskatt (24,5%).

Ísetningin var framkvæmd af einum af Volvo-tæknimönnum Brimborgar og kostaði kr. 8.668. Þetta er nákvæmlega sá ‘staðaltími’ sem Volvo gefur upp vegna ísetningar af þessu tagi eða 60 mínútur. Brimborg fer eftir þessum staðaltíma þó rauntími geti verið lengri. Þetta fyrirkomulag gefur okkur kost á því að meta kostnað fyrirfram til hagsbóta fyrir viðskiptavini okkar. Mannauður Brimborgar er mikill enda teljum við það að Brimborg sé öruggur vinnustaður að vera á. Við greiðum góð laun, tryggjum góða starfsþjálfun, réttu tækin og almennt gott vinnuumhverfi. Tími okkar manna er verðmætur. Þeir vita hvað þeir eru að gera enda vinna þeir vinnu sína á styttri tíma en aðrir. Við vitum það. Þetta skýrir líka ánægju þína með þjónustu Brimborgar eins og kemur fram hjá þér.

Þú segir í upphaflegri kvörtun að þú kvartir í sjálfu sér ekki yfir þjónustunni sem sé afbragðsgóð og sérlega gott að fá lánaðan bíl á meðan á spottprís.

Það er ánægjulegt að heyra um þjónustuna og ánægju þína með lánsbíl á spottprís. Þess vegna skiljum við ekki hvað þú átt við með orðum þínum á netinu, örfáum dögum seinna, um að þú hafir greitt: “2500 að auki fyrir einhverja pútu sem þeir lánuðu mér í þessa tvo klukkutíma sem þetta tók. Er þetta okur? Ójá!” Hvort eigum við að trúa?

Þú nefnir okur og Dr. Gunni tekur undir þá fullyrðingu án þess að gera nokkra tilraun til þess að sannreyna þessa alvarlegu ásökun. Skv. mínum kokkabókum merkir ‘okur’ að verið sé að innheimta langtum meira en eðlilegt geti talist fyrir tiltekinn hlut eða þjónustu. Hér er verið að ýja að því að Brimborg okri á sínum viðskiptavinum. Túlka má orð ykkar beggja á þann hátt að verð á umræddum hlut sé langtum dýrari en hjá samkeppnisaðilum. Væntanlega vegna þess að Brimborg leggi óheyrilega mikið á vöruna.

Oft er það nú svo að harðir gagnrýnendur vinna ekki sína heimavinnu. Oft bera þeir ekki rétta hluti saman eins og kemur í ljós í ofangreindu dæmi. Oftar en ekki er verð hjá viðurkenndum bílaumboðum eins og Brimborg borið saman við óstaðfest verð einhverra út í bæ eða jafnvel á óskyldum hlutum á óskilgreindum vefsíðum úti í heimi eins og þú gerir í þinni kvörtun. Oft grundvallast jafnvel samanburðarverðið á svartri vinnu - sem jafnvel hefur aldrei verið framkvæmd. Þetta er auðvelt en rangt. Og mjög ósanngjarnt. Í ofangreindu tilviki er álagning Brimborgar kr. 7.631 sem teljast verður eðlileg álagning. Verðið á varahlutnum er sambærilegt eða lægra en hjá okkar keppinautum og sama gildir um vinnuna.

Í þessu samhengi er holt fyrir fyrir lesendur að því sé haldið til haga að af heildarverði varahlutarins þá, eins og áður kom fram, fékk Brimborg kr. 7.631, framleiðandi, vátryggjandi og flutningsaðili fengu samtals kr. 13.258 og ríkissjóður fékk kr. 7.620. Hlutur Brimborgar telst varla mikill í ljósi þess að hann er framlag til greiðslu launa, þjálfunar, upplýsingatæknikerfis, birgðahaldskostnaðar, síma, rafmagns og hita svo fátt eitt sé nefnt. Og ekki má gleyma 2 ára ábyrgð á vöru og vinnu. Mismunurinn rennur til frekari þróunar á aukinni þjónustu og það sem þá eftir stendur rennur til hluthafa. Þetta er sérlega athyglisvert í ljósi þess að ríkið tekur sömu krónutölu til sín án þess að leggja neitt af mörkum í málinu.

Við hjá Brimborg erum fyrstir til að fagna gagnrýni sem er í senn uppbyggileg og sanngjörn. Við værum varla að hvetja til þess að fólk sendi okkur kvartanir ef svo væri ekki. Við tökum okkur hinsvegar það leyfi að vísa til föðurhúsanna sleggjudómum og óvönduðum vinnubrögðum. Sama hvar þau birtast, hér sem annarsstaðar.

Reykjavík, 15. apríl 2008

Virðingarfyllst
Brimborg ehf.
Egill Jóhannsson, forstjóri

#397    Keypti Levi´s 511 buxur í USA í síðustu viku. Fullt verð var 50 dollarar. Þær voru á afslætti á 35 þennan dag. Við bættist aukaafsláttur vegna útsöluloka, 20%. Endanlegt verð var semsagt um 28 dollarar, eða 2.100 íslenskar krónur einsog gengið var þann dag, dollar á 75 kr. Fullt verð hefði samt ekki verið nema 3.750 krónur. Fór í Levi´s í Smáralind daginn eftir að ég kom heim, nákvæmlega sömu buxur kosta þar 16.990 krónur! Hvernig er þetta hægt ?

#396    Rak augun í sodastream okrið, þurfti að kaupa í neyð sodastream hylki hjá kaupmanninum á horninu í verslunninni þingholt, þar kostar áfylling á sodastream 300 kall, 1/3 af því sem hún kostar í krónunni. Ekki okur!

#395    Löngu vitað að bílaumboðin okri á fólki. Persónulega hef ég ekki haft reynslu af því fyrr en um daginn. Hringdi í Brimborg því að tölvan í volvóinum mínum er farin að heimta 3 ára skoðun. Ég hringdi og fékk uppgefið að í þessari skoðum væri skipt um olíu,olíusíu, kerti og loftsíu. Ég spurði skilmerkilega hvort það væri ekkert annað og starfsmaðurinn staðfesti að þetta væri það eina sem væri gert. Verðið??  Jú 47 þús kr!!!!  Ég hringdi í N1, Skeljung og aðrar almennar smurstöðvar og þær gerðu nákvæmlega það sama fyrir um 20þús. Bílaverkstæði í Keflavík (Skipting) sem sér um ábyrgðarviðgerðir fyrir Brimborg framkvæmir þessa 3 ára skoðum fyrir 15-20þús, fer eftir því hvort skipta þurfi um kerti hjá mér eða ekki (fer eftir eknum km sem ég gleymdi að spyrja um í Brimborg). Kertin kosta hvort sem er bara 5þús með ísetningu. Það er semsagt hægt að spara sér 27þús kr á nokkrum símtölum. Gerum eins og erlendar þjóðir þegar þær mótmæla háum verðum – hættum að verlsa við viðkomandi og snúum okkur annað!! 

#394    7.apríl keypti ég pastapakkasúpu í 10-11 við Staðarberg í Hafnarfirði og greiddi okurverð, 139 krónur fyrir pakkann. 9.apríl greiddi ég 54 krónur fyrir samskonar pakka,sömu tegund, sama bragð, í Fjarðarkaupum. Verðmunurinn er 85 krónur, Fjarðarkaupum og mér, neytandanum í hag.

#393 / 393    Þar sem ég er að fara með barnið mitt í ungbarnasund vantaði mig sundskýlu og datt strax Intersport í hug og fór þangað.Sundskýla fyrir 5 mánaða gutta kostaði 3490 - OKUR! Að sjálfsögðu keypti ég ekki skýluna,var bent á búð sem heitir Tvö líf og viti menn samskonar skýla kostaði aðeins 1490 - það er EKKI okur!

#392    Tvöfaldur Latte í Take Away bolla frá Amokka í Hlíðarsmára.... 380 krónur!!! 
Geri ráð fyrir að bollinn taki um 270 ml. sem þýðir að líterinn af kaffi latte kostar um 1400 krónur. Það er OKUR!

#391    Get ekki orða bundist með nýjustu okurupplifun mína.
Var í Hagkaupum í gær (sem er auðvitað alger sturlun, en vegna tímaskorts "þurfti" ég að versla þar) og keypti nokkra hluti. Ákvað að kaupa fjórar lífrænar sítrónur sem seldar eru saman í pakka.  Þú veist, betra að kaupa lífrænt...
Kom svo á kassann og kassadaman rúllar þessu öllu í gegn, segir svo við mig þegar hún skannar sítrónurnar "þetta kostar 760 krónur, ertu viss um að þú viljir kaupa þetta?".  Ég rak upp stór augu, "760 krónur fyrir fjórar sítrónur!!!  Það er svolítið mikið dýrt"
Stúlkan svarar "Já, það finnst mér".  Ég þakka henni fyrir og bið hana að taka sítrónurnar frá...það eru takmörk fyrir því hvað maður lætur okra á sér. 
Mér finnst persónulega algert rokk að starfsfólki verslana sé farið að blöskra og sé komið í lið með okkur viðskiptavinina. Og ég lifi alveg helgina af án lífrænna sítróna.

#390    Hér er okur í lagi.  Lán sem er tekið er á 5,7% vöxtum.  Ótrúleg staðreynd við þetta lán er að tilkynningar og greiðslugjald er 490 kr þó svo að ég fái þennan seðil rafrænt sendan í heimabankann. Svona leit lánið út 1.janúar 2006

Hérna er svo nýjasti greiðsluseðillinn.  Nú eru verðtryggðu vextirnir komnir í 9,45% sem er auðvitað geðveiki, en það sem mér finnst gjörsamlega óþolandi er að þessi blessaði NETBANKI er að rukka mig um 515 kr fyrir tilkynningar og greiðslugjald. 

#389    Mig hefur lengi grunað að gengdarlaust okur ætti sér stað þegar kemur að fitubrennsluefninu Hydroxycut sem hægt er að kaupa í mörgum verslunum hérna heima. Núna um daginn fékk ég þann grun minn staðfestan svo ekki verður um villst.
Og við sjáum dæmi.
Á bodybuilding.com er hægt að versla téða vöru, og þar kostar dós með 280 töflum 16.99 dollara, sem gera 1274 krónur sé miðað við gengi dollara upp á 75 kall. 
Um daginn sá ég svo sömu vöruna á "tilboði" í Krónunni, en notabene, aðeins 210 töflur og hvert var verðið? 5990 krónur takk fyrir!  Það einfaldlega verður að teljast OKUR!
Notabene að ég er ekkert endilega að skjóta á Krónuna í þessu sambandi þar sem að þessi vara er á mjög svipuðu verði allstaðar þar sem hún er seld hérlendis.  Ég er farinn að hallast að því að það sé einn aðili sem flytur þetta inn og viðkomandi sé einfaldlega stórkostlegur okrari.
Annað dæmi sem ég verð að minnast á. 1944 réttur, "Marineraðar kjúklingabringur í súrsætri sósu" minnir mig að hann hafi heitið.  Fjöldaframleitt, plastpakkað og kalt, 770 krónur í Krónunni (Veit ekki verðið annarstaðar, en eflaust sambærilegt).  Þegar litið er til þess að það er hægt að fá sambærilega, heita, nýeldaða og mun betur útilátna rétti á mörgum tælenskum matstofum í borginni á 990 krónur, þá finnst mér 770 krónur einfaldlega þess verðugar að teljast sem OKUR!

#388    Þekki ekki mikið inn á kökuverð en mér fannst blóðugt að borga 600 kr fyrir kökusneið á veitingahúsinu Gló í listhúsinu. Kakan var döðlukaka með súkkulaðikremi. Reyndar voru eins og 7 bláber á henni. Kannski að það skýri kostnaðinn. Kakan var góð en ekki þess virði. Lítil sódavatn í gleri kostar líka 200 kall þannig að kaka og sódavatn = 800... Ég er ekki kannski ekki kökuverðsglögg en mér fannst þetta dýrt. Annars er okur ársins örugglega komið inn en það var helvítis hangikjetið og swissmokka á Leifstöð á yfir þúsundkallinn en ég man því miður ekki nákvæm verð. Mér varð svo um að ég tapaði skyndilega skammtímaminninu.

#387    Fyrir 2 árum keypti ég ullarmottu í IKEA á 11 þúsund krónur. Í janúar síðastliðnum fór ég með hana í hreinsun í efnalaugina Fönn (er með mörg smábörn á heimilinu og búið að hellast nokkuð oft og misjafnt niður í hana). Fyrir hreinsun á mottunni þurfti ég að punga út 13 þúsund krónum, segi og skrifa ÞRETTÁN ÞÚSUND KRÓNUM!!! Þetta er ekki bara okur, þetta er sóun. Að það skuli borga sig að kaupa nýja mottu í stað þess að láta hreinsa þá gömlu (sem gæti með reglulegri hreinsun enst mér í 20 ár í viðbót) er sólundun á verðmætum og skref í átt að eyðingu jarðar. (ath: Hér er eitt svipað: Fór með teppi sem ég á í hreinsun í Fönn í Skeifunni. Þetta er teppi/motta sem er c.a. 2*1 m á stærð.  Þegar ég kem á staðinn er mér tilkynnt af afgreiðslukonunni að rukkað sé um 1.000 kr. fyrir kílóið, hún vildi bara láta mig vita af því fyrirfram. Ég kíkti á miðann á teppinu og kemst að því að hreinsunin muni kosta c.a. 10.000 kall enda þyngdin um 10 kg. OKUR!  Hætti snarlega við, enda kostaði teppið ekki mikið meira en 10-15 þús á sínum tíma í IKEA.)

#386    Mér blöskaði þegar ég fór í Sunnubúðina í lönguhlíð um daginn að kaupa kattamat. 1.5 kg af Whiskas kattamat kostar þar 1690 kr. Ég asnaðist til að borga fyrir þetta en skoðaði svo miðann og skrapp í búðina í Suðurveri (Þín Verslun minnir mig hún heiti). Þar var sama tegund og sama magn verðsett á 643 kr. skv miða á hillunni. Daman þar benti mér reyndar á að sú verðmerking væri röng, þetta ætti að kostar rúmar 800 kr, en seldi mér þetta þó á hilluverðinu, en ég fór með fyrri pokann aftur í Sunnubúð og fékk endurgreitt.  Eftir stendur að kattagúmmelaðið kostar u.þ.b. 900 krónum meira í Sunnubúðinni en í Suðurveri, og þó er sú síðarnefnda ekki þekkt fyrir lágt vöruverð. 

#385    Ég vil fyrst byrja á því að taka fram að ég elska Game tíví, en þoli ekki okrið hjá BT.
Óli og Sverrir ef þið eruð að lesa þetta, ekki vera sárir, þættirnir ykkar eru snilld. En BT SÖKKAR FEITT. DRASL búð með gott úrval en ÖMURLEGT VERÐ.
Íslendingar hlustið nú, kynnið ykkur verð á nánast hverju sem er, tölvuleikjum, raftækjum eða tölvuskjám og Elko eru alltaf ódýrari en BT, ekki nóg með það heldur eru BT næstum altaf dýrastir! skoðið bara málið á heimasíðum BT og Elko!

Dæmi, Simpsons leikurinn á PS3:
BT: 6.999 
Elko: 4.995  30% dýrara í BT, og svona er þetta með allt hjá þeim.
BT er okurbúlla sem á að forðast (nb. Það hefur margoft komið fram hér á síðunni.)

#384    Á Laugarásvideó er útleiguverðið á mynddiskunum 500 kall sem er alveg ásættanlegt á textuðu efni frá kvikmyndahúsunum, en slíkt efni getur kostar á áttunda þúsundið hver diskur fystu dagana eftir útgáfu. En þar á bæ er mikið flutt inn af ótextuðu efni frá Amazon og ýmsum erlendum heildsölum, og heldur það efni rekstrinum uppi að langmestu leyti. Þrátt fyrir að Samtök rétthafa telji þetta vera ólöglegt sem útleiguefni, þá skulum við aðeins velta okkur upp úr því sem máli skiptir fyrir viðskiptavininn. Mörg dæmi eru um að innkaupsverð innfluttra diska sé 7-900 kr. og algengt er að vinsælir titlar séu leigðir út milli 100 og 200 skipti áður en diskarnir rispast og eyðileggjast. Ef við förum milliveginn þ.e. 150 útleigur, gerir það kr. 75.000 í tekjur fyrir Laugarásvideó. Það er talin vera þumalputtaregla í þessum bransa að í c.a. eitt skipti af hverjum þremur er ekki skilað fyrr en eftir mismarga aukadaga, og kemur því sekt á myndefnið sem er sama upphæð fyrir hvern umfram dag og upphaflegt leiguverð, þ.e. 500 kr. Förum bara mjög varlega í þann hluta málsins og áætlum að í 1/3 tilfella sé greitt fyrir aðeins einn dag í sekt. Það gerir samt kr. 25.000 í tekjur fyrir, í þessu tilfelli Laugarásvideó sem verður að teljast ágæt búbót á það sem þegar er upp talið. Þá er fjárfestingin upp á 7-900 krónur búin að skila 100.000 kalli í kassann. Ekki slæm ávöxtun það þegar heildarútleigan á dag er á bilinu 100–300 diskar og meirihlutinn innflutt, ótextað og hundbillegt efni, ætlað einungis til heimilis og einkanota og verðlagt í útlandinu samkvæmt því. Ég get ekki fengið út aðra útkomu en að álagningin sé í þessu tilfelli u.þ.b. 1250% hjá Laugarásvideó sem hlýtur að teljast óhóflegt.

#383    Ég er núna stödd í Bandaríkjunum og þurfti á nýjum linsum að halda. Tegundin sem ég kaupi er Johnson&Johnson Acuvue2, sem ég hef alltaf keypt í Optical Studio, en 3ja mánaða skammtur þar kostaði oftast í kringum 5000 ISK. 
Ég kemst að því að hagstæðast er að kaupa þær á netinu. Maður einfaldlega setur inn nafn augnlæknisins og símanúmer því að Kaninn þarf að láta tékka hvort að receptið passi við styrkleikann sem maður er að kaupa. Ég fer á VisionDirect.com og kaupi þar 8 pakka af linsum (24 pör!) á $128! Gengið var þá í 60 ISK svo að þessi kaup kostuðu mig 7.680 ISK!! Eða það sem jafngildir 4 og hálfu pari á Íslandi. OKUR!!
ps. Ég googlaði Acuvue2 tegundina og komst að því að þessar tilteknu linsur eru einungis 1-2ja vikna linsur (fer eftir notkun) en EKKI mánaðarlinsur eins og Optical Studio hefur alltaf sagt mér. Mér finnst ég illa svikin!
ps2. VisionDirect.com sendir til Íslands og þrátt fyrir gengishækkun er mun ódýrara að kaupa í magni frá þeim og borga tollinn en að versla við gleraugnabúðirnar í Reykjavík, sem eru flestallar okurbúllur.

#382    Seinfeld Complete Collection ..semsagt allar seríurnar 
Verð í BT 29.990 
Verð í Elko 14.995
Ég held að ég gæti tekið nánast allar vörur í BT sem smellti þeim í okrið hjá þér 

#381    MicroSD minniskort eru lítil kort á stærð við nögl sem t.a.m. eru notuð í farsíma til að geyma myndir og tónlist. Kortin frá ScanDisk eru nokkuð áreiðanleg og fróðlegt að bera saman verð á þeim hér á landi og annars staðar. Í Danmörku má fá 2 GB kort á dkr. 100-200 danskar (1600 - 3200 íkr. a gengi dagsins í dag). Í Þýskalandi eru þau á um € 10-30 (1200-3600 íkr.) og í USA á $ 15-30 (1100-2300 íkr.).
Hvað er verðbilið á netinu á Íslandi? Jú, 3000 - 7000 íslenskar krónur, sjá mynd (Kingston kort eru þar tekin með líka, þau eru almennt talsvert ódýrari heldur en ScanDisk).
Ég þori ekki einu sinni að reikna verðin erlendis miðað við gengið eins og það var í den (og íslensku búðirnar keyptu þessar vörur á væntanlega). Ef lægsta verðið á Íslandi er að meginreglu til sambærilegt við hæsta verð erlendis, þá verður bara að leyfa okkur að versla beint við erlendu búðirnar, þetta gengur ekki.

#380  Ég er að skoða ísskápa, m.a. hjá Eirvík.  Þeir eru að selja Liebherr skápa sem er mjög gott merki. Skv. þessari síðu er hægt að fá skáp eins og þann sem ég hef áhuga á á 475 pund í Bretlandi. Miðað við mjög hátt gengi pundsins (ca. 153 kr.) þá væru það um 73 þúsund krónur, en um 95 þús. með vörugjaldi og tolli. Listaverð Eirvíkur er rétt tæpar 219 þúsund krónur!!!
Annar ísskápur er skv. þessari síðu á tæpar 600 evrur. Miðað við hátt núverandi gengi eru þetta einnig um 73 þúsund krónur en listaverð hjá Eirvík er tæpar 200 þúsund krónur!!! OKUR!

#379    BT er okurbúlla. Dæmi: Tölvuleikur fyrir PS3 (Army of Two). Verð í BT: 7.999 kr. Verð í Elko: 6.495 kr. Mismunur: 1.504 kr. eða um 23%! OKUR í BT!

#378    Verslunin 17 er OKURBÚLLA eins of flest annað hér á Íslandi. Rambaði niður á Laugarveg síðasta laugardag (29.mars). Sá fyrir tilviljun að verslunin 17 (og fleiri verslanir í því húsi, GS skór t.d) voru með karnival stemmningu og rosalega útsölu í tilefni af þessu. Fór inn og gerði góð kaup – skór á 5þús sem höfðu kostað 18þús. Allt sem var á útsölunni var með þessu móti – jakkaföt á 15þús sem voru á 67þús, bolir, peysur, skyrtur osfrv., allt var þetta með þvílíkum afslætti að álagningin er á milli 350-600%. Kennum svo flutningskostnaði, tollum, vaski og ég veit ekki hverju um verð á vörum hér á Íslandi. Mér finnst þetta svívirðilegt OKUR sem verslanirnar opinbera á svona útsölum. Það er lágmark að þetta komi fram í fréttaflutningi og öðru samhengi þegar fréttamenn láta ljúga sig fulla af búðarfólki um að flutningsgjöld og tollar séu of háir. Því ekki er verslunin að tapa á að halda svona útsölu – það er eitt sem er víst!!

#377    Te & Kaffi í Eymundsson Austurstræti gerast sek um okur og fantaskap. Vesæl samloka á stærð við glasamottu á 550 krónur! Reyndar eru gúrmet kaffihúsin öll sek um svona matarsvívirðu. Þetta er allt fullt af 800 króna beyglum og mörghundruðkróna bakkelsi. Einhverjar biscotti ræmur (hvað sem það er) á 200 kall? Gefið mér O! Gefið mér K!...

#376    Langaði að láta þig vita að pocket mask einstefnugrímurnar til að blása í fólk við skyndihjálp kosta 4000 kr í Lyf og heilsu, eina staðnum sem ég fann þær á eftir að fara í 4 apótek. Þær kosta undir 7 dollurum á amazon. Og þetta er öryggistæki sem er ekki einu sinni ætlað fyrir mann sjálfan eða sína nánustu. (nb. Í sama anda má benda á verð á smokkum á Íslandi. Nú er þetta ætlað til að krakkar fjölgi sér ekki eða fólk fái smit en samt er þetta verðlagt upp úr öllu valdi, 10 smokka pakki á sirka 1500 kall. Algjört rugl...)

#375    Fórum í Eirvík á þriðjudag til að skoða þvottavél og þurrkara sem höfðu verið á tilboði (ca 190þús). Þennan dag var búið að rífa niður öll verð í búðinni og sölumenn hlupu um eins og ráðalaus hænsni og tilkynntu öllum viðstöddum um bráðahækkun vegna gengisfalls síðustu viku.  Óðahækkunin stafar semsagt af 90 daga greiðslufresti á lager, sem greiðist auðvitað þegar krónan nær lágmarki!!! Semsagt, eftir að flett hafði verið upp í tölvunni var verðið á fyrrgreindu pari farið að slaga upp í 280þús. Skemmst frá því að segja að hjá Siemens var allt með kyrrum kjörum (ennþá verðmiðar í búðinni) og þeir fengu fínan business.

#374    Ég fór áðan og verslaði gúmmelaði í Bakarameistaranum. Þar keypti ég meðal annars rúnnstykki á 150 kr ásamt því að kaupa 250. grömm af "gæða" kaffi sem kostaði rúmar 500 krónur. Kaffið er ekki ósvipað Merrild 103 - en 500 grömm af því fæst á um 300 krónur í Bónus... Bakarameistarinn er okurbúlla.

#373    Krambúð á Skólavörðustíg 42 leigir DVD diskana á 300 kr á sólarhring. Úrvalið er ágætt, þó það sé mun minna en á stóru leigunum. Þetta er rúmlega helmingi ódýrara en í "Bónus"-video (okur #371). 

#372    Olíufatið hefur lækkað síðustu daga úr 112 dollurum í 98 dollar (26.03.08) Sést það á íslenskum bensínstöðvum? Nei!

#371 650 kall fyrir að leigja sér DVD disk í "Bónus"video. Í sólarhring. Fyrir þetta verð ætti Ragnhildur Steinunn að koma persónulega með Astrópíudiskinn heim til manns!

#370    Svartækni virðist vera málið í flatskjám. Hér er samanburður á verðum á Samsung tækjum hjá Svar og hjá Ormsson. (ath: Til gamans má geta þess að 37" sjónvarpið hjá Svar kostar 530 pund á Amazon í Bretlandi eða rétt tæpar 80.000 kr í dag. Sýnist því að báðir aðilar séu að okra en Svar ekki jafn gróflega og Ormsson þó þeir séu eflaust að taka nóg í kassann.)

#369  Ég var við Geys í Haukadal í gær. Þar var hægt að kaupa eitt skitið muffins (með súkkulaðibitum sem sagt) og kaffibolla á 450 krónur. Það er vangefið okur.

#368  Ekki-okur dæmi til að létta lundina er nýr bístró á Laugavegi 22A sem heitir Santa María. Þar kosta réttirnir flestir undir þúsundkallinum og allt er á góðu verði. Samt er þjónustan góð! Loksins er hægt að fara út að borða með familíuna án þess að fara á hausinn.

#367  Lyfja er okurapótek. Ekki versla þar. Latabæjar vítamín á 919 kall í Smáralind. Í Hagkaupum, sem er nú engin Bónus, var samskonar vítamínbaukur á 735 kr. Endurtek: Ekki versla í Lyfju. (ath. Sammála. Keypti þrjú algeng lyf í Lyfjaveri, samtals 4100 kr. Hringdi og spurði hvað nákvæmlega það sama hefði kostað í Lyfju: 5500 kr. Lyfja = okur) 

Okur #261 - 366 eru hér.

Veistu um skefjalaust og svívirðilegt okur? Láttu vita!