19.07.10
10 x snilld:
1. Flatus lifir á sínum stað á veggnum undir
Esjunni þökk sé hressum graffitímönnum.
2. Ómar er snilld en nú er verið að safna
fyrir honum. Þig munar ekkert um 1000 kall.
3. Café Haítí er flutt í stærra húsnæði
við höfnina en arabíska kaffið er enn það
besta í bænum. Ekkert latté sull, bara arabíska
leðju takk.
4. Sund, fjöll og ís. Klassískt stöff.
5. Fyrirgefðu rembuna en gott veður á Íslandi
er bara betra en annað gott veður því það
er svo sjaldgæft.
6. Laugardalurinn í góðu veðri - eins og útlönd!
7. Þrautabrautin í Laugardal - sama landslag og í
Teletubbies!
8. Valdi koppasali. Alltaf góður.
9. Að vera í stuði því annað er væl.
Sbr. Geðorðin tíu!
10. Frí. Alltaf gott að fá frí.
17.07.10
-
Svaka sumar loksins og þá er maður gjörsamlega
upp fyrir haus við að búa til ægimagnað Popppunkts-spil
inni fyrir þykkum gardínum. Það er ekkert vit í
þessu! Hvað ætlar Ríkisstjórnin að gera
í þessu? Jæja, þetta fer að verða búið,
og vonandi lafir sumarið eitthvað áfram. Popppunktur svo
í kvöld, fínn leikur: Lay low og félagar í
Benny Crespo's gang á móti Lights on the highway.
---
Sæl og velkomin í plögghornið. Byrjum á
einu svakalegu:
Vegna flutninga til útlanda eru Bjössi og Pétur
að selja (næstum) allt fokking plötusafnið sitt! Þeir
verða í Kolaportinu 24. og 25. júlí næstkomandi
í bás 5E. YFIR 1500 TITLAR: Indie/Alternative/Electronic
o.fl. Fjöldi ófáanlegra og sjaldgæfra titla á
kostakjörum. Geisladiskar - vínylplötur - DVD. Einnig
verða bækur og ýmislegt smálegt til sölu líka.
FORSALA - SKOÐIÐ ALLA TITLA OG VERÐSKRÁ Á
http://bit.ly/risaplotusala.
Sendið póst með þeim titlum sem þið viljið
kaupa á peturvalsson@gmail.com - leggið svo inn á reikning
/ komið með pening og sækið góssið heim til
þeirra á Hverfisgötu 68a
---
Svo má nú aldreilis benda á Húsaskipti.
---
Fimmti singullinn af væntanlegri plötu Togga er kominn út.
Platan ætti að koma út í haust „ef ég tek
ekki upp á því að eignast fleiri börn fyrir
þann tíma,“ segir Toggi og bætir við: „Eftir tvo
rólega singla í röð, þá er nauðsynlegt
að skella hressum sing-along í loftið. Artwork fyrir föndrara
fylgir með. Hægt að sækja hér: http://medialux.com/brag/178-toggi-take-me-dancing-single-free-download“
---
Rökkurró
- Sólin mun skína
Ég er mikill áhugamaður um svifkláfa og reyndi
einu sinni að halda úti svifkláfa-síðu.
Sá fyrir mér að ég myndi ferðast um heiminn
og láta mynda mig við svifkláfa, en svo greip raunveruleikinn
inn í og hérna sit ég fastur eins og maur í
hunangsklessu. Nei nei. En ég þó óhikað
skorið upp um að umslag nýrrar plötu Rökkurróar
er algjörlega flottasta plötuumslag ársins, enda eins
manns svifkláfur framan á í svona líka ljómandi
draumkenndu ástandi. Það mun hafa verið Bibbi trommari
sem bjó til þessa snilld. Hér kemur fréttatilkynningin:
Rökkurró
mun á næstu vikum gefa út sína aðra plötu,
Í annan heim. Fyrri plata sveitarinnar, Það kólnar
í kvöld, hlaut góðar viðtökur bæði
hér á landi og ytra þegar hún kom út
árið 2007 og hefur lengi verið illfáanleg. Það
bíða því margir spenntir eftir nýju efni
frá sveitinni.
Upptökur á Í annan heim hófust haustið
2009 með Alex Somers úr Riceboy Sleeps við stjórnvölinn.
Á plötunni kennir ýmissa grasa og er margt ólíkt
með henni og frumburði sveitarinnar þrátt fyrir að
Rökkurró haldi sérkennum sínum. Í annan
heim var tekin upp á hinum ýmsu stöðum, m.a. í
tónlistarskóla trommuleikara sveitarinnar, í Sigur
Rósar hljóðverinu Sundlauginni og í eldhúsinu
hjá Alex. Það eru 12 Tónar sem gefa út plötuna
á Íslandi líkt og fyrri plötu sveitarinnar og
inniheldur hún 9 lög. Hljómsveitin hannaði sjálf
umslag og útlit plötunnar. Nú þegar má
heyra forsmekkinn af því sem koma skal, en Rökkurró
settu nýlega eitt laganna, Sólin mun skína, inn á
tónlistarsíðuna www.gogoyoko.com. Hlustið á
lagið endurgjaldslaust og/eða kaupið það hér.
14.07.10
Nokkuð fyndið er að heyra að Felix Bergsson eigi að
leika The Big Bopper í söngleik um Buddy Holly í haust.
Hvað næst - Pétur Jóhann leikur Jóhann Risa?
Nei, ég segi svona. Kannski má hengja nokkra sementspoka
utan á Felix til að feika vöxt Boppersins. Það
er nú gaur sem "grætt" hefur á harmþrungnum dauða
sínum. Sonur hans Big Bopper Jr. er eitthvað að rembast
við að græða á nafninu líka. Mig minnir
að ég hafi lesið það að það hafi
þurft að grafa karlinn upp og skipta um legustað og þá
hafi sonurinn skipt um líkkistu og selt þá gömlu
á Ebay. Ágóðinn átti að renna til þess
að gera bíómynd um The Big Bopper, sem óneitanlega
er sá minnst frægasti af þessum þremur rokkurum
sem létust í flugslysinu 1959. Mjög athyglisvert allt
saman. Buddy Holly, sem var bara 22 ára þegar hann dó,
er annars mikill snillingur og mikilvægt hjól í færibandi
rokksins. Hann var einn sá fyrsti sem fór að semja eigin
lög og hafði þannig mikil áhrif á Bítlana
og þá kalla alla.
---
Allskonar svaka stuð er nú í borginni á Villa
Reykjavík. Meðal atriða er ísgerðarkonan
Kitty
Travers sem ætlar að búa til nýjar ístegundir.
Eftir því sem ég kemst næst leikur hún
ís-listir sínar í Hugmyndahúsinu, Grandagarði
2 kl. 17 í dag. Ætli maður fái að smakka?
---
Buff
- Draumveruleiki
Húrra! Loksins nýtt lag með Buffinu! Veit ekki eins
og hvað þetta er eiginlega - Nýdönsk og Abba í
hrærivél með Flaming Lips? - en helv gott er það
allavega. Hannes trommari sendi bréf: Hljómsveitin Buff
er að senda frá sér nýtt lag, loksins segja sumir,
en til hvers segja aðrir. Eitt ár er síðan Buff kom
með nýtt lag ef undan er skilin plata þeirra síðasta
haust með lögum Magga Eiríks, en það var sumarsmellurinn
á síðasta ári Prinsessan mín. Nú
hefur sveitin veri lengi að hugsa hvað hún vilji gera í
þessum málum og niðurstaðan var sú að gera
það sem þeim sýnist, án þess að
móðga neinn. Nýja lagið er ekki hið hefðbundna
dægurlagablæ og var bara ákveðið að gera
það sem mönnum þótti gaman að gera, vinna
lagið án nokkurra formerkja og geri bara akkúrat það
sem hentaði þessum ópus.
Lagið er draumkennt enda eru draumar megininntak textans, lagið
heitir Draumveruleiki og fjallar um sambland af öllum þeim súrrealísku
draumum sem höfundinn hefur dreymt, en höfundur lags og texta
er söngvari Buffsins Pétur Örn Guðmundsson.
Lagið var tekið upp í hinu goðsagnakennda stúdíói
Geimsteini í Keflavík , og á hinum og þessum
stöðum á höfuðborgarsvæðinu.
Ef heldur áfram sem horfir þá mun næsta
plata Buffdrengjanna vera eingöngu eftir þeirra eigin höfði,
alveg gjörsamlega óháð útvarpsspilun. Kannski
þeirra Dúbl í Horn? En auðvitað væri
gaman að heyra lagið í útvarpi, og þá
er það bara spurning hver þorir ;-)
11.07.10
Nokkrar hræðilegar brúður má sjá
í hinu metnaðarfulla Sjóminjasafni.
Dagbjartur fór þarna með bekknum sínum og þegar
við fórum með Breiðafjarðarferjunni Baldri nokkru
síðar fór hann að tala um slasað fólk
á skipum og hvar slasaða fólkið væri. Ég
skyldi ekkert hvað hann var að tala um en böndin bárust
að Sjóminjasafninu. Að þar væri hræðilega
slösuð brúða liggjandi í sjúkrarúmi.
Við þurftum því að athuga málið.
Og vitaskuld fannst slasaða dúkkan um borð í varðskipinu
Óðni, sem er hluti af safninu og opið gestum:
Óttinn skín úr augum drengsins, enda er dúkkan
dálítið óárennileg. Gaman er að vafra
um skipið, allt hefur yfir sér íslenskan seventís
sjarma. Á eitt kalltækið hefur verið límd mynd
af teiknimyndahetju sem var í blöðunum á þessum
tíma. Gott ef hann hét ekki bara Siggi, drykkfeldur Breti
sem danglaði í konuna sína:
Kannski það hafi verið þessi náungi sem límdi
þetta á kalltækið?
Safnið sjálft er svo inn í húsinu og allskonar
sjóminjadót í gangi þar. Þar er þessi
harðneskjulega hafnarverkamanna-dúkka, fyrsta dúkkan
sem ég hef séð sem er með tóbakshor:
---
Það bar helst til tíðinda í gær að
ég smakkaði loks tröllapylsurnar í Ísbúðinni
Laugarlæk. Þær eru nokkuð fínar. Sérgerðar
fyrir ísbúðina í Kjötpol og líta dáldið
asnalega út, en smakkast vel. Hægt er að fá hvítkálssalat
í brauðið, sem er gott mál. Hér er kominn
góður hliðarkostur í pylsumenninguna og álíka
ferskt innlegg og pylsuvagninn í Hafnarfirði sem er með
hinar frábæru djúpsteiktu pylsur. Við erum þó
sennilega ekki að tala um neitt heilsufæði hérna.
---
Tar
Babies - Rejected at the high school dance
Hér er kekkjótt slumma af brjáluðu öskur-prótópönki
af sjaldséðri sjötommu úr fórum mínum.
Umslagið segir allt sem segja þarf, en ég hef aldrei tékkað
á frekari afrekum þessa Greg Prevost sem er aðalið
í þessu. Held ég hafi bara aldrei heyrt í The
Chesterfield Kings.
10.07.10
-
Enn er einn snilldarþátturinn af Popppunkti í kvöld.
Vinsælasti þáttur landsins sem er ekki HM í fótbolta
skv. könnunum. Í kvöld mæta Heiða og félagar
í Hellvar og keppa við
Breiðbandið,
en það band lagði mikið á sig til að komast
í þáttinn, samdi sérstakt Popppunkts-lag, snoðaði
sig og fjárfesti í Havaí-skyrtum. Mikið framtak.
Þetta er svo æsispennandi leikur náttúrlega.
---
Ball í Ferstiklu í sept 1967 þegar ég var
að verða tveggja ára. Ég missti af þessu. Exótískt
aukaatriði, vægast sagt. Ætli það yrði nú
ekki eitthvað sagt ef blökkukonan Lady Shandy sýndi nektardans
í pásu hjá Á móti sól í
Aratungu?
---
Hér er
slóðin á glænýtt vídeó
sem Ásdís Sif Gunnarsdóttir gerði við nýútgefið
smáskífulag Ólafar Arnalds, Innundir skinni. One little
Indian gefur út og þar skrifar sveittur blaðatengiliður:
Beautiful,
beguiling and poised to win a huge British following in the coming months,
the first of Ólöf Arnalds hotly anticipated new material is
aired with the release of new single Innundir Skinni, released through
One Little Indian on the 28th June 2010. It is backed with a cover of Arthur
Russell’s ‘Close My Eyes’. Og einhver annar skrifar smá á
íslensku: Fyrri sólóplata Ólafar, ‘Við
og við’ kom út árið 2007 og vakti stórkostleg
viðbrögð; hlaut m.a. verðlaun sem plata ársins
í flokknum ‘ýmis tónlist’ á Íslensku
tónlistarverðlaununum. Rétt eins og á nýju
plötu Ólafar stjórnaði Kjartan Sveinsson þá
upptökum. Á ‘Innundir skinni’ nýtur hann aðstoðar
Davíðs Þórs Jónssonar en aðrir sem leggja
til vinnu og spilamennsku á plötunni eru m.a. Skúli
Sverrisson, Shahzad Ismaily, María Huld Markan Sigfúsdóttir,
Daníel Bjarnason, Matthías Hemstock, Róbert Reynisson,
Ragnar Kjartansson og Björk. Næst á döfinni hjá
Ólöfu eru tónleikar með tveimur stórjöfrum
poppsögunnar. Fyrst hitar Ólöf upp á þrennum
tónleikum í London og Glasgow fyrir frönsku sveitina
Air og síðan heldur hún til San Francisco og leikur þar
tvívegis með Jonathan Richman.
---
Í dag er þetta blogg kranablogg fréttatilkynningabirtinga:
Listamaðurinn
Ummi Guðjónsson sem gaf út sína fyrstu sólóplötu
þann 10/04/2010 sendir frá sér aðra smáskífu
plötunnar þann 08/07/2010. Annar singull plötunnar er lagið
“Ef þú þekkir mig ekki” sem hefur hljómað
á öldum ljósvakans síðustu vikurnar og verður
lagið ókeypis og aðgengilegt til niðurhlaðs á
www.ummi.is
frá og með útgáfudeginum.
---
Þá er hér spikfeitur
linkur á nýtt lag með The Wintergreens. Íslenska/pólska/skoska
tríósins sem gerir út frá Leith í Skotlandi.
---
Original
Melody - Menorca
Íslenska rappkombóið Original
Melody stefnir á nýja plötu í lok sumars.
Hér er lag af henni, sætur sumarsmellur, sem heyrðist
í Bjarnfreðarsyni í hinu svokallaði FM partýi
Ólafs Ragnars.
07.07.10
Icelandair herferðin er að svínvirka á mig. Þegar
ég sé þessa erótísku mynd af Sonny Bono
að búa sig undir að gera eitthvað subbulegt með
fisknum og flugfreyjunni langar mig fátt annað en að stökkva
upp í næstu vél. Ég verð líka alveg
óður í komast eitthvað þegar ég sé
auglýsinguna þar sem allir í útlöndum eru
að tala um hvað Íslendingar eru spes.
---
Vér feðgar fórum exótíska sumarferð
um Suðurnesin. Á leiðinni héngu svokallaðir dauðahnakkar
í rassinum á okkur þar til kom tvíbreitt og
þeir gátu spænt sig framhjá. Dauðahnakkar
heita þeir á vegum úti þar sem þeir gera
sitt ýtrasta til að drepast og drepa aðra á fávitabílunum.
Þeir héngu svo í rassinum á okkur að maður
sá fávitaglottin framan í þeim. Þrátt
fyrir dauðahnakka er margt æðislegt á Suðurnesjum.
Til dæmis sundlaugin í Sandgerði sem er ódýrasta
sundlaug landsins, 200 kall oní, ókeypis fyrir börn.
Boðið er upp á eðal saunu, sækadelíska
vatnsrennibraut og marga potta. Ströndin við Garð er ógeðslega
kúl og erlendis (og það má alveg kalla hana strönd
en ekki fjöru því sandurinn er hvítur), byggðasafnið
í Garði er flott og vitinn er sá hæsti á
landinu og svaka skerí að fara upp í hann.
Keflavík er svo alltaf jafn spennandi. Klassískt að
fá sér eðal djönkfúdd á Ólsen
Ólsen og svo bland í poka á stærsta nammibar
Suðurnesja, eins og eðalsjoppan Ungó auglýsir réttilega.
---
Ringo
Starr - Blindman / Ringo
Starr - Y not
Stórmennið Ringo Starr er sjötugur í dag! Og
heldur upp áða með giggi í New York. Í afmælisgjöf
vill að hann að allir geri pís og lof með puttunum (sjá
nánar í myndbandi á Ringostarr.com)
kl. 12 á hádegi. Ekki gleyma því. Karlinn er
að spila um USA þessa dagana og ég er svona að sjá
hvort hann komi til Evrópu upp á að ná honum.
Gigg með honum væri eflaust hallærislega æðisleg
upplifun. Hér er Blindman, lag sem hann samdi sjálfur og
setti sem B-hlið á smáskífu 1972. Lagið er
samnefnt spaghettívestra sem hann lék í 1971. Svo
er titillagið af nýjustu plötunni, Y not, sem kom út
á þessu ári. Það er fyrsta platan sem hann
pródúseraði alveg sjálfur. Heill þér
meistari Ringo sjötugum! (Viðtal
í NYTimes í tilefni dagsins)
06.07.10
Það er aldrei of seint að drekka mjólk beint úr
belju. Bragðast eins og G-mjólk. Karítas Hreinsdóttir
á Helgavatni sprautar. Fæstum þykir þetta merkilegt
nema mér sem hef ekki gert svona áður. Út á
svona gengur öll ferðamennska. Að leyfa fólki að
gera eitthvað sem það hefur ekki gert áður. Upplifa
eitthvað nýtt. Allt fólkið sem kemur hingað á
skemmtiferðaskipum finnst voða spennandi að sjá Reykjavík
og Ísland af því það hefur aldrei gert það
áður. Okkur finnst þetta ekkert merkilegt. Það
er ekki heldur aldrei of seint að sjá hvalskurð í
Hvalfirði:
Það var reyndar ekkert eftir af þessum hval nema hryggurinn
og smá innyfli þegar okkur bar að. Það er búið
að girða svæðið af svo áhorfendur glápa
úr brekkunni. Það var dáldið fjör þar,
vantaði bara pulsuvagn. Þarna er gráupplagt að moka
inn ferðamannagjaldeyri, örugglega magnað að sjá
hvalflykki saxast niður í göt á planinu. Fyrst að
leifa liðinu að sjá hvali svamla í sjó, svo
að kippa því niður á jörðina og glápa
á töffara í vöðlum brytja hina "blíðu
risa hafsins" ofan í göt. Selja því hvalapylsur
og hvalabíffdjörkí á meðan. Það
er dáldið magnað meira að segja að sjá bara
hrygginn einan eftir - þetta er svo risavaxið. (Myndir: Jón
Þór Þorleifsson)
---
Ég var í tjaldútilegu í Borgarfirði
og rigningin lamdi tjaldið á stundum. Það er nú
bara notalegt. Á leiðinni heim sáum við dauða
hvalinn og tékkuðum á Hálsi
í Hvalfirði, sem er nautabú. Þetta er sveitabúð
með beint frá býli stöffi. Það var nú
eiginlega ekkert til lengur svona seint á sunnudegi svo maður
þarf að koma aftur á skikkanlegum tíma. Snilld
svona bændabúðir með snarfersku kjöti og dóti.
Dáldið dýrt dótið í þessu, 760
kall fyrir nokkur grömm af bíffdjörkí í
poka til dæmis, en maður lætur sig hafaða í
nafni íslenskrar samheldni.
---
Enn er allt að verða vitlaust í barbaralandinu. Nú
eru það myntkörfuþrælarnir sem vilja sleppa
úr fjötrunum. Vístöluþrælarnir eru
ekki alveg nógu glaðir með að mynkörfuþrælarnir
sleppi svo auðveldlega, vilja eðlilega að eitt yfir alla gangi
- helst að öllum verði gefin skuldauppgjöf og allir geti
"byrjað upp á nýtt" eins og í lagi með Sprengjuhöllinni.
Nýtt í fréttum í gær að heyra hversu
mörg gengistryggð lán hver mótmælandi væri
með á bakinu. Trúr Geðorðunum
10, og þá sérstaklega #6, hugsa ég að
sjálfssögðu um eitthvað allt annað en þetta
hark, enda búinn að borga mitt myntkörfulán (ætli
sé hægt að fá endurgreitt?) og kóa með
vísitöluþrældómnum. Ég skrifaði
undir og get ekki annað. Vissi út í hvað ég
var að fara. Aumingja bankarnir verða að tóra svo það
sé efnahagslegur stöðugleiki, e haggi? Stundum finnst manni
samt að þjóðfélagið hangi saman á
gömlu límbandi og einn daginn verði maður ryðjandi
sér leið inn á hvalskurðarsvæðið í
Hvalfirði til að ná sér í afgangsinnyfli í
soðið. Eða að Kína kaupi þetta ruglsker og
þjóðin verði send röflandi í blokk einhversstaðar
í útlöndum. Upp úr svona svartsýni nota
ég svo auðvitað Geðorðin, þá sérstaklega
#1 og #5.
02.07.10
-
Popppunkturinn heldur áfram annað kvöld, engin miskun.
Næst ætla Logar og Spútník að berjast á
banaspjótum. Rosalegt að vanda... Usssss!
01.07.10
Rakst á þessa auglýsingu í gömlu blaði
(við hliðina á auglýsingu um að Bryndís
Schram sýndi nútímadans á Hótel Borg).
Tvennt vekur athygli: hversu kuldaleg sumartískan var 1961 og hin
mikla áhersla á apaskinn. Ég man ekki alveg hvað
apaskinn er en það er allavega ekki skinn af apa, eins og eðlilegast
væri skv. orðana hljóðan. Ég er ekki frá
því að mig hafi dreymt apa nýlega. Og svo var ég
að lesa um apann Glám í bókinni Svaðilför
í Surtsey. Fyrir Dagbjart þ.e.a.s. Sjálfur er ég
í Chuck Klosterman og bókinni IV. Chuck er ansi fínn.
Hér
er sniðug grein sem hann skrifaði um nýjustu Bítlaendurútgáfuna.
---
Ég er líka búinn að glápa á
Breaking Bad sjónvarpsþættina. Þetta eru frábærir
þættir sem ég mæli eindregið með. Ríghalda
frá fyrstu mínútu. Búið er að gera
þrjár seríur og sú fjórða verður
tekin til sýninga í haust. Í gær var ég
að horfa á annan þátt í þriðju
seríu og heyrði ógeðslega flott lag. Ég linnti
ekki látum á netinu fyrr en ég vissi hvaða lag
með hvaða hljómsveit þetta var:
Timber
Timbre - Magic arrow
Timber Timbre er nú aðallega einn Kanadískur gaur
sem heitir Taylor Kirk og þetta lag er á breikþrú
plötunni hans frá því í fyrra, samnefnd
bandinu. Ef þú vilt vita meira erða bara Wiki,
þar færðu t.d. að vita að pabbi hans var skógarhöggsmaður.
Fílingurinn í laginu minnir ögn á hina algjörlega
frábæru hljómsveit Young Marble Giants frá Wales,
en eina plata þeirra Colossal Youth (útg. 1980) er lífbreytandi
meistaraverk. Það er einmitt tónlist með YMG í
fyrsta þættinum af Bored to Death. Það er svona léttgáfumannað
indie-gamanþáttur með Jason Schwarzmann, sem sumum finnst
líkjast Sigtryggi í Evil Madness (etc) - ágætt
stöff. Svona er maður mikill eigin dagskrárstjóri
um þessar mundir.
---
Rétt er að benda gosdrykkjaráhugafólki á
að í söluturninum Drekanum
á Njálsgötu fást nú margar tegundir af
sjaldséðu gosi. Eigandinn er svo mikill hugsjónamaður
að hann flytur þetta inn sjálfur. Við erum að
tala um breskt úrval, gos eins og ýmsar tegundir af Tango
og Lilt, tegundir frá DC Jamaica (þó ekki Ginger Beer,
því miður) og skoska sullið Irn-Bru. Frábært
framtak!
29.06.10
Kleifarkallinn er orðinn bakgrunnsmynd á þessu bloggi,
enda keyrði ég yfir Kleifarheiðina tvisvar og þar
er ekki annað hægt en að dást að þessari
styttu sem vegavinnuflokkurinn reisti 1947. Þetta var heljar ferð
á Patreksfjörð til að sjá um poppspurningakeppni
í Sjóræningjahúsinu, á Pönk á
Patró. Tveir feðgar á ferð, ég og Dagbjartur,
Trausti og Tinni, lagt af stað á föstudegi og allir hressir.
Þetta var frábær ferð fyrir utan það að
hún var mörkuð af vélarbilun í nýkeypta
VW Passatinum með spoilernum. Hann bilaði af einhverjum orsökum
um borð í Baldri, kom út kraftlaus og vélarbilunarblikkandi,
en við skröltum samt til Patró í öðrum
gír yfir heiðina. Er hægt að vera meira fökkt
en á biluðum bíl á Patró? Allavega eru
möguleikar manns takmarkaðir. Bifvélaverkstæði
Guðjóns hafði engan tíma í þetta, enda
með menn að sunnan að vinna í húsinu. Svanur
og Páll í Dekk og smur voru hins vegar hjálpsemin
uppmáluð. Fengu háspennukefli sent að sunnan á
laugardaginn. Það passaði náttúrlega ekki í
svo einhver ættingi lánaði keflið úr sínum
bíl á sunnudaginn. Verst að hann var að koma keyrandi
frá Búðardal svo við komumst ekki frá Patró
fyrr en kl. 18 á sunnudaginn. 75.000 kjall enda sunnudagstaxti.
Svo kom ljósið aftur á í Bjarkalundi og bíllinn
fór ekki í gang á Shellstæðinu í
Borgarnesi. Þá var klukkan hálf eitt og tveir litlir
gaurar sofandi í bílnum. Hringdi í lögguna sem
sagði mér bara að fá einhvern til að draga mig
í bæinn! Áður en ég fékk móðursýkiskast
fór bíllinn aftur í gang og ég náði
í siðmenninguna. Önnur viðgerð framundan þar.
Að eiga notaðan bíl er ávísun á peningaaustur
og fúlindi. Ég er til að mynda orðinn geðveikur
í skapinu bara við það að skrifa þetta.
Svo ekki orð meira um bilaðan bíl.
---
Sjóræningjahúsið á Patró er algjör
snilld. Lyftir bæjarstemmingunni upp. Pollapönk voru með
þéttan pakka fyrir krakkana og ættu að gera meira
af svona því þetta var að svínvirka. Voru
með vorksjopp, töluðu við krakkana um hvernig er að
vera í rokkbandi, sýndu þeim dótið sitt
og svo samdi samkoman saman lag um sjóræningja. Þetta
var þrusulag sem var spilað um kvöldið þegar alvöru
tónleikar voru settir í gang. Þá fóru
krakkarnir upp á svið og tóku lagið. Dagbjartur sá
þarna sínu fyrstu rokktónleika og verður vonandi
ekki samur aftur. Hann er kominn með Pollapönk á heilann
og syngur Vælubílinn út í eitt. Prumpukarlinn
var vitanlega dreginn upp á svið. Sá svo um spurningakeppni
eftir tónleika sem gekk ókei. Gullfallegar myndir eftir Valla
má sjá hér.
---
Á Patró er svo sem ekki mikið að gerast. Fórum
tvisvar í sund og héngum á Albínu, búðinni
sem selur allt (á, ehemm, ekki svo hagstæðu verði,
en hvað getur maður gert?). Helst að maður sjái
eitthvað fólk þar. Ég held ég hafi annars
ekki séð neitt fólk á förnum vegi sem var
ekki með hund í bandi. Smábæjarlífið
er ekki svo aðlaðandi, nema kannski í mikilli fjarlægð.
Allavega ekki nema maður komi sér í annað tempó
innvortis. Fékk allskonar yndislegt fæði hjá Öldu
og Davíð í Sjóræningahúsinu og át
þar að auki tvo hamborgara, báða með spældu
eggi. Einn í Baldri og annan í Bjarkalundi. Báðir
fínir! Á Patró er eitt veitingarhús sem heitir
Þorpið. Fékk mér pítsu sem var la la. Leit
inn í Skjaldborgarbíóið sem er þorpsdjásn.
Það var verið að sýna Prince of Persía
kl. 20 á sunnudaginn. |