Iguana eðlur þurfa umhverfi þar sem hitastigið er mjög
hátt. Hitastigið undir UVB perunni (aðal UVB perunni ef þær
eru margar í búrinu) ætti að vera á milli 30 og 35°C og
hitinn annars staðar í búrinu ætti að vera minni, en þó
ekki undir 26°C. Í búrinu ættu að vera mismunandi heit
svæði svo eðlan geti stýrt líkamshitanum með því að flakka
á milli þeirra. Hitinn að degi til er oftast gefinn með
venjulegri hitaperu (fást í öllum ljósabúðum) eða
svokölluðum DayGlow hitaperum sem eiga að vera spes fyrir
skriðdýr, en þó eru þær aldrei mikið frábruðnar hinum
hefðbundnu hitaperum og kosta umtalsvert meira í þokkabót.
Hversu öfluga peru þú færð þér fer eftir því hversu stórt
búrið er, hversu langt peran á að vera frá sólbaðstað
eðlunnar og hvort það sé gler eða plast á milli perunnar og
eðlunnar, en það er í lagi með hitaperurnar svo lengi sem
þú gætir ítrustu varúðar vegna eldhættu.
Það er líka prýðisgóð hugmynd að hafa dimmer á hitaperunum,
þannig hefurðu fullkoma stjórn á hitanum sem þær gefa frá
sér.
Hitasteinar eru ekki fyrir iguana eðlur! Ekki nóg
með að þeir hafi lítið um hita búrsins að segja, heldur eru
þeir stórhættulegir fyrir iguana eðlurnar. Þær skynja
hitann öðruvísi en við og fatta ekki að þegar þær liggja of
lengi á steininum fer að myndast slæmt brunasár á maganum á
þeim.
Ekki giska út í loftið þegar kemur að hitastigi í
búrinu! Keyptu þér góða hitamæla og staðsettu þá hér og
þar í búrinu og hafðu gott auga með þeim.
Best er að nota perustæði sem umlykur hitaperuna til
hliðanna og athugaðu að ef þú ert að nota peru sem að er
öflugri en 150W, þá þarftu sérstakt perustæði sem að þolir
þann hita, annars stafar eldhætta af perunni. Einnig er
mjög mikilvægt að ef peran er staðsett inni í búrinu, að
eðlan geti ekki klifrað á hana eða snert hana og brennt
sig. Þá er gott að útbúa varnarnet eins og á myndinni hér
fyrir neðan. Hægt er að útbúa þessi net úr sterku vírneti
sem að fæst í byggingavöruverslunum.
Ef þú átt eðlu sem að er lítil og líkleg til þess að príla
í varnarnetinu eða hanga á því skaltu íhuga að hagræða
hönnun búrsins þannig að hægt sé að staðsetja hitaperuna
utan þess.
Þetta einfalda varnarnet var útbúið úr litlum bút af
vírneti, sem er haldið á sínum stað með varnarstöngunum sem
að komu fastar með lampanum. Brúnir vírnetsins hafa verið
sveigðar inn á við þannig að engir hættulegir, hvassir
endar stingist út.
Eins og öll önnur dýr þurfa iguana eðlur að hafa
sólarhringinn skiptan upp í dag og nótt. Mælt er með ellefu
eða tólf klukkustunda dagtíma sem þýðir að þú verður að
hafa slökkt á ljósunum á nóttinni í tólf eða þrettán
klukkustundir. Best er að gera þetta með því að hafa ljósin
tímastillt með þar til gerðu tæki ef ske skyldi að þú
gleymir að slökkva eða kveikja á réttum tíma eða sést vant
við látin/n þegar að því kemur. Reglulegur sólarhringur
gerir eðlunni kleift að koma sér upp föstu ferli, mundu að
stöðugleiki er besti vinur iguana eðlunnar. Óreglulegur
sólarhringur getur leitt til stress, árásagirni,
lystarleysi og að eðlan gleymi hvar hún á að gera þarfir
sínar og driti úti um allt búr. Hitastigið ætti að vera
lægra á nóttunni hjá iguana eðlunum, en samt sem áður má
hitastigið ekki fara undir 24°C að nóttu til. Ég veit um
þrjár góðar leiðir til þess að viðhalda hitastiginu að
nóttu til án þess að nein þeirra gefi frá sér ljós sem að
ruglar sólarhring eðlunnar:
1: Staðsettu búrið upp við ofn og stilltu hann á þann hita
sem að gefur rétt hitastig að nóttu. Síðan skaltu setja
daghitabúnaðinn (hitaljósið/in) upp með ofninn enn á þeirri
hitastillingu sem að viðhélt réttum hita að nóttu til. Eini
gallinn við þennan möguleika er sá að nú er ofninn þinn
orðinn eign eðlunnar þinnar og þú mátt ekki breyta
hitastillingunni á ofninum nema með tilliti til hitans í
búrinu en ekki í herberginu sem að ofninn er í.
2: Hægt er að kaupa sérstakar hitamottur í flestum
dýrabúðum sem að límast undir gler og halda hita á
yfirborði þess, góð hugmynd er að staðsetja slíka mottu
undir staðnum þar sem að eðlan sefur. Gallinn við þennan
kost er annars vegar sá að aðeins má líma þessar mottur
undir gler vegna eldhættu sem gæti annars skapast og hins
vegar sá að sumar eðlur sofa nánast aldrei á sama stað í
búrinu tvisvar, heldur sofna bara þar sem þær voru staddar
þegar að ljósin slökknuðu.
3: CHE (Ceramic Heat Emmiter) pera. Þessar perur gefa frá
sér mikin hita, en ekkert ljós og því tilvalin kostur til
þess að viðhalda hita að næturlagi. Eingöngu má nota þessar
perur með sérstökum perustæðum sem að þola mikin hita vegna
eldhættu sem að gæti annars skapast. Ég veit um eina
verslun sem að selur svona perur/getur útvegað þær og það
er Fiskó í Kópavoginum, því þeir eru með umboðið fyrir Exo
Terra skriðdýravörurnar.
Hér er hægt að fræðast um peruna, en þessi ákveðna
tegund CHE pera gengur bara í þar til gerðan CHE lampa sem
vissulega er frá sama fyrirtæki og framleiðir peruna.
Lampinn er þó sérstaklega varinn með grind og það sparar
þér að minsta kosti eitthverja vinnu. Eini gallinn við
þennan kost er sá að oftast þarf að kveikja á CHE perunni
þegar þú slekkur á öllum hinum perunum, hægt er að fá
sérstakt kerfi sem að gerir það fyrir þig, en einfaldari
lausn væri að fá CHE peru sem að gefur frá sér minni hita
og hafa hana í gangi allan daginn.
Að auki er hægt að notast við t.d. venjuleg hitateppi, en
ég hef heyrt að sé hitateppi skilið eftir í gangi of lengi
muni óhjákvæmilega kvikna í því, svo ég verð að mæla gegn
því.